Pagbansay sa Kahanas 8

Tinuyo nga Pagginhawa

Panahon sa misyonaryo nga pagserbisyo ug sa atong inadlaw nga kinabuhi, komon lang nga moabot ang puno sa stress nga mga sitwasyon. Ang tinuyo nga pagginhawa usa ka teknik nga atong magamit aron pakobsan ang stress ug mohimo og pagbati nga kamaayo.

Lider sa diskusyon: Paningkamoti nga mahuman dayon ang mga seksiyon nga “Hatagi og kahulogan” ug ang “Ipakita” aron ang mga tigkat-on adunay daghang panahon sa pagpraktis.

Hatagi og kahulogan

Lider sa diskusyon: Ikonsiderar ang paghangyo sa mga tigkat-on sa paghisgot mahitungod sa unsang paagi ang stress makaapekto kanato sa negatibo o positibong mga paagi. Kon kinahanglan, pwede nimong ipakita ang mosunod nga pagpasabot:

Ang pagsinati og kaugtas maghatag kanato og mga oportunidad nga malig-on, motubo, ug mosalig sa Ginoo alang sa kusog. Hinoon, sa mga panahon sa grabeng kaugtas o kanunay nga pagbati sa kaugtas sa taas nga panahon posibleng moresulta sa pisikal ug emosyonal nga mga hagit.

Lider sa diskusyon: Dungang basahon ug hisgotan ang tambag sa Ginoo sa Doktrina ug mga Pakigsaad 101:16. Pangutan-a ang mga partisipante kon sa unsang paagi ang tambag magamit niining puno sa kaugtas nga sitwasyon, lakip ang mga sitwasyon nga ilang masugatan isip usa ka misyonaryo. Mahimo nimong ipaila ang kahanas nga tinuyo nga pagginhawa pinaagi sa pagpakita sa mosunod:

Usa ka positibong paagi aron masugakod ang negatibong mga matang sa kaugtas mao ang pinaagi sa mga pag-ehersisyo sa tinuyo nga pagginhawa. Ang tinuyo nga pagginhawa makatabang nga mokalma ang atong mga hunahuna ug ang atong lawas. Magtugot usab kini nga molambo ang atong konsentrasyon, mapugngan ang atong mga emosyon, mapalambo ang atong panumdoman, ug mas madawaton sa mga pag-aghat sa Espiritu.

Ipakita

Lider sa diskusyon: Ang mosunod mao ang duha ka matang sa ehersisyo sa lawom nga pagginhawa nga imong ipakita:

Opsiyon 1: Box nga pagginhawa [Box Breathing]

Molingkod sa hangin ug mahimong komportable. Seguradoha nga ang imong likod nasuportahan ug ang imong mga tiil lig-ong nakatunob sa salog. Pwede nimong padayonon sa pagbuka o pagpiyong ang imong mga mata.

• Lakang 1: Moginhawa pasulod gamit ang imong ilong ug hinay nga mag-ihap hangtod lima, nga sudlan sa hangin ang imong baga.

• Lakang 2: Pugngi ang imong ginhawa hangtod lima ka segundo. Likaye ang pagpagawas sa hangin sa tibuok lima ka segundo.

• Lakang 3: Hinayhinay nga ipagawas ang hangin gamit ang imong baba sulod sa lima ka segundo.

• Lakang 4: Pugngi ang pagginhawa sa lima ka segundo.

• Lakang 5: Balika ang lakang 1 hangtod sa 4 hangtod nga marelaks naka.

Lider sa diskusyon: Ipakita ang mosunod nga graphic aron matabangan ang mga tigkat-on nga mas makasabot niini nga ehersisyo sa pagginhawa:

Opsiyon 2: Ehersisyo sa pagginhawa diha sa Pag-adjust ngadto sa Misyonaryo nga kinabuhi

Lider sa diskusyon: Tabangi ang mga tigkat-on sa pagpangita sa Pag-adjust ngadto sa Misyonaryo nga Kinabuhi diha sa Librarya sa Ebanghelyo (Librarya > Mga Tamdanan nga Basahon ug mga Calling > Mga Calling sa Misyon > Pag-adjust ngadto sa Misyonaryo nga Kinabuhi).

Pangitaa angEhersisyo sa Pagginhawa” nga kalihokan sa “Kinatibuk-ang Baruganan sa Pagdumala sa Stress” nga seksiyon sa Pag-adjust ngadto sa Misyonaryo nga Kinabuhi ([2013], 18). Sunda ang tulo ka lakang nga gihulagway sa kalihokan.

Ipraktis

Lider sa diskusyon: Human ikapakita ang usa o duha ka ehersisyo sa pagginhawa, hatagi og oras ang mga miapil nga ipraktis kini. Mahimo nimo silang dapiton sa pagsukod sa ilang mga pagbati sa stress o tumang kaugtas sa sukod nga 1 hangtod 5 sa dili pa ug paghuman sa mga ehersisyo sa pagginhawa aron sa pagsuta kon nakabantay ba sila og kalahian.

Gamita

Lider sa diskusyon: Ipakigbahin ang imbitasyon sama sa mosunod aron motabang sa mga miapil sa paggamit niini nga kahanas:

Praktisa ang tinuyo nga pagginhawa sulod sa pipila ka minuto matag adlaw ingon man usab sa bisan kanus-a nga masinati nimo ang kaugtas. Hatagi og pagtagad kon unsay imong gibati samtang nagpraktis ka. Pag-ampo alang sa tabang sa Langitnong Amahan sa pagsagubang sa puno sa stress nga mga sitwasyon sa imong kinabuhi.