Pagbansay sa Kahanas 3

Tudloi ang mga Tawo Unsaon sa Pag-ampo

Three young sister missionaries in the Philippines. They are shown walking on a dirt road by tin shack homes, teaching a family and praying with them in their home and as passengers on a motorcycle.

Daghang tawo ang matudloan sa mga misyonaryo ang nagkulang og kasinatian sa pag-ampo. “Ang pag-imbitar sa mga tawo nga mag-ampo mao ang usa sa labing importante nga imbitasyon nga imong mahatag [isip usa ka misyonaryo]” (Isangyaw ang Akong Ebanghelyo [2023], 50).

Lider sa diskusyon: Paningkamoti nga mahuman dayon ang mga seksiyon nga “Hatagi og kahulogan” ug ang “Ipakita” aron ang mga tigkat-on adunay daghang panahon sa pagpraktis.

Hatagi og kahulogan

Lider sa diskusyon: Ipaila ang hilisgotan alang niini nga pagbansay sa kahanas pinaagi sa pagpakigbahin sa mosunod:

Ang atong Langitnong Amahan nagtinguha nga ang Iyang mga anak makigsulti Kaniya pinaagi sa pag-ampo. Ang mga misyonaryo kasagaran magtudlo sa mga tawo kinsa adunay gamay o walay kasinatian sa pag-ampo.

Lider sa diskusyon: Dapita ang mga tigkat-on sa pagpangita sa “Leksiyon 4—Pagkahimong mga Disipulo ni Jesukristo sa Tibuok Kinabuhi” sa kapitulo 3 sa Isangyaw ang Akong ebanghelyo. Tabangi sila sa pagpangita sa ulohan nga giulohan og “Pag-ampo Kanunay” sa pahina 89. Dayon ipakigbahin ang mosunod nga mga instruksiyon:

Basaha ang seksiyon nga nag-ulohan og “Pag-ampo Kanunay” (Isangyaw ang Akong Ebanghelyo, 89). Pangita og mga giya nga makatabang nimo sa pagtudlo sa uban nganong importante nga mag-ampo ug unsaon sa pag-ampo.

Unsay imong nakat-unan mahitungod sa kaimportante sa pag-ampo?
Unsay imong nakaplagan nga makatabang sa uban aron makahibalo unsaon sa pag-ampo?

Lider sa diskusyon: Ikonsiderar ang pagpakita sa mosunod nga mga giya gikan niini nga seksiyon aron matamdan sa mga tigkat-on atol sa ilang kalihokan sa pagpraktis:

Sugdi pinaagi pagtawag sa Langitnong Amahan.
Ipadayag ang mga pagbati sa atong kasingkasing, sama sa pagpasalamat alang sa mga panalangin nga atong nadawat.
Pangutana, pagtinguha og giya, ug pangayo og mga panalangin.
Taposa pinaagi sa pag-ingon og, “Sa ngalan ni Jesukristo, amen.”

Ipakita

Lider sa diskusyon: Ipakita unsaon sa pagtudlo sa usa ka tawo kabahin sa pag-ampo. Isip usa ka bahin sa imong pagpakita [demonstration], ihulagway nganong importante ang pag-ampo ug unsaon sa pag-ampo.

Pwede nimong gamiton ang bidyo nga “Teaching about the Holy Ghost and Prayer: John” (ChurchofJesusChrist.org; tan-awa hangtod sa time code nga 2:46 hangtod 5:00).

Ipraktis

Lider sa diskusyon: Sangoni ang matag sakop sa klase og usa ka kapares ug ipakigbahin ang mosunod nga mga instruksiyon:

Uban sa imong kapares, magbalosbalos ang matag usa sa pagtudlo mahitungod sa pag-ampo (tan-awa ang mga giya gikan sa pahina 89 sa Isangyaw ang Akong Ebanghelyo kon gikinahanglan). Seguradoha sa pagpasabot kon nganong mag-ampo kita ug unsaon sa pag-ampo. Mahimo usab kang magpamatuod nga ang Dios maminaw ug motubag sa mga pag-ampo.

Gamita

Lider sa diskusyon: Ipakigbahin ang imbitasyon sama sa mosunod aron sa pagtabang sa mga estudyante sa paggamit niini nga kahanas:

Atol sa sunod semana, pangita og oportunidad sa pagpraktis sa pagtudlo sa usa ka tawo unsaon sa pag-ampo. Pwedeng mahitabo kini kauban sa sakop sa pamilya, higala nga kahibalo na unsaon sa pag-ampo, o kon nakaila ka og usa ka tawo nga dili pamilyar sa pag-ampo, pwede ka nga motudlo nila. Usab ikonsiderar unsaon nimo sa pagpalambo sa imong personal nga pag-ampo.