Pagbansay sa Kahanas 5

Maningkamot sa Pagsag-ulo sa mga Kasulatan

“Talagsaong gahom ang moabot gikan sa pagmemorya og mga kasulatan” (Isangyaw ang Akong Ebanghelyo [2023], 31). Ang pagmemorya sa mga tudling sa kasulatan makapalawom sa atong pagsabot sa ebanghelyo sa Manluluwas ug makapauswag sa atong abilidad sa pagtudlo niini ngadto sa uban.

Lider sa diskusyon: Paningkamoti nga mahuman dayon ang mga seksiyon nga “Hatagi og kahulogan” ug ang “Ipakita” aron ang mga tigkat-on adunay daghang panahon sa pagpraktis.

Hatagi og kahulogan

Lider sa diskusyon: Tabangi ang mga sakop sa klase sa pagpangita sa kahon nga nag-ulohan“Ang Kamahinungdanon sa Pagmemorya” diha sa kapitulo 3 sa Isangyaw ang Akong Ebanghelyo (mga pahina 31). Dayon ipakigbahin ang mosunod nga mga instruksiyon:

Basaha ang ikatulong parapo sa“Ang Kamahinungdanon sa Pagmemorya” (Isangyaw ang Akong Ebanghelyo, 31). Pangitaa kon sa unsang paagi ang pagmemorya sa mga tudling sa kasulatan makapanalangin kanimo ug sa uban.

Sa unsang paagi ang pagmemorya motabang nimo isip usa ka misyonaryo?
Sa unsang paagi ka nakabenepisyo sa pagmemorya sa usa ka tudling sa kasulatan?

Lider sa diskusyon: Ipasabot nga adunay daghang paagi nga atong magamit aron matabangan kita sa pagmemorya sa mga kasulatan. Mahimo nimong ipakigbahin ang pipila sa mosunod isip mga ehemplo. Mahimo usab nimong dapiton ang mga estudyante sa pagpakigbahin og dugang pang mga ideya.

Basaha ang mga pulong sa makadaghan. Dayon tagoa ang mga pulong ug balika nga dili magtan-aw.
Bahina ang tudling sa kasulatan ngadto sa mugbo nga mga hugpong sa pulong. Usa-usaha sa pagmemorya ang hugpong sa mga pulong, rebyohon kon unsa ang namemorya na sa dili pa moadto sa lain.
Isulat ang mga pulong sobra sa kausa samtang nagbasa sa bersikulo. Dayon isulat ang tudling nga dili magtan-aw sa bersikulo.
Isulat ang unang mga titik sa matag pulong diha sa bersikulo ug dayon gamita kadtong mga titik sa paggiya kanimo samtang imong isulti ang bersikulo.
Pagmugna og yano nga mga hulagway sa pagtabang kanimo sa pagmemorya sa tudling.

Ipakita

Lider sa diskusyon: Ipasabot nga ang importanteng tudling sa kasulatan nga sag-ulohon sa mga misyonaryo mao ang asoy sa Unang Panan-awon ni Joseph Smith sa Joseph Smith—Kasaysayan 1:16–17.

Sa ubos mao ang paagi nga imong magamit ang ikaduhang ideya gikan sa lista sa miaging seksiyon aron sa pagtabang sa mga tigkat-on nga sag-ulohon ang asoy ni Joseph Smith. Tabangi ang mga tigkat-on nga maanam-anam sa pagmemorya ang mosunod nga hugpong sa mga pulong pinaagi sa lanog nga pagbalikbalik niini sa tibuok klase.

“Ako nakakita og usa ka dako nga gilis sa kahayag ibabaw gayod sa akong ulo, labaw sa kahayag sa adlaw, nga nag-anam og paubos hangtod kini midapat kanako. …

“Sa diha nga ang kahayag midapat kanako ako nakakita og duha ka Personahe, kansang kahayag ug himaya dili mahulagway, nagtindog ibabaw kanako diha sa kawanangan.

“Usa kanila misulti ngari kanako, nagtawag kanako sa akong ngalan ug miingon, nagtudlo ngadto sa lain—Kini mao ang Akong Hinigugmang Anak. Paminaw Kaniya!” (Joseph Smith—Kasaysayan 1:16–17).

Ipraktis

Lider sa diskusyon: Dapita ang mga tigkat-on sa pagpraktis sa pag-recite kauban ang kapares niini nga bahin sa Unang Panan-awon ni Joseph Smith. Pwede nilang gamiton ang samang paagi sa imong pagpraktis isip usa ka klase o pwede pod silang mopili og laing paagi.

Gamita

Lider sa diskusyon: Ipakigbahin ang mosunod nga mga instruksiyon aron sa pagtabang sa mga tigkat-on sa paggamit sa kahanas sa pagmemorya sa mga kasulatan ngadto sa ilang kinabuhi:

Tinoa unsaon nimo sa pagpadayon gamit ang kahanas sa pagmemorya sa mga kasulatan. Ania ang pipila ka ideya:

Padayon sa imong pagmemorya sa Unang Panan-awon ni Joseph Smith. Praktisa sa pag-recite kini ngadto sa usa ka minahal.
Pagpili og usa o daghan nga uban pang mga kasulatan nga gusto nimong sag-ulohon ug paningkamoti ang pagmemorya niini.