Pagbansay sa Kahanas 4

Mangutana og Dinasig nga mga Pangutana

Ang mga misyonaryo sa kasagaran mangutana niadtong ilang mga gitudloan. Ang pagpangutana og maayong mga pangutana makatabang sa mga misyonaryo nga “masabtan ang kaikag, kabalaka, ug mga pangutana sa mga tawo. Ang maayo nga mga pangutana makadapit sa Espiritu ug motabang sa mga tawo nga makakat-on” (Isangyaw ang Akong Ebanghelyo [2023], 218).

Lider sa diskusyon: Paningkamoti nga mahuman dayon ang mga seksiyon nga “Hatagi og kahulogan” ug ang “Ipakita” aron ang mga tigkat-on adunay daghang panahon sa pagpraktis.

Hatagi og kahulogan

Lider sa diskusyon: Ipakigbahin ang mosunod nga mga instruksiyon aron mahatag ang pasiuna sa hilisgotan alang sa pagpangutana:

Basaha ang mga parapo ug ang listahan [table] sa ubos sa ulohan nga “Mangutana” sa kapitulo 10 sa Isangyaw ang Akong Ebanghelyo (mga pahina 218-19). Pangitaa kon ngano nga ang pagpangutana og maayong mga pangutana mahinungdanon kaayo sa pagpakigbahin sa ebanghelyo.

Nganong importante sa mga misyonaryo nga mangutana og epektibong mga pangutana sa ilang pagtudlo?

Lider sa diskusyon: Ipasabot nga ang ubang matang sa mga pangutana mas epektibo kay sa uban. Ipakigbahin ang mosunod nga mga instruksiyon aron sa pagtabang sa mga sakop sa klase nga makakat-on og mga giya sa pagpangutana og epektibong mga pangutana:

Basaha ang unang pito ka punto nga adunay timaan [bullet] ubos sa “Likayi ang Dili Epektibo o Naghinobra nga mga Pangutana” (Isangyaw ang Akong Ebanghelyo, 220). Pangita og mga giya nga makatabang nimo nga makat-on sa pagpangutana og epektibong mga pangutana.

Ipakita

Lider sa diskusyon: Ipakita sa mga tigkat-on ang pipila ka sanglitanan kon unsaon pag-usab ang dili kaayo epektibong mga pangutana aron mahimong mas epektibo. Ikonsiderar ang paggamit sa mga sanglitanan nga anaa sa mosunod nga table. Alang sa dugang mga ehemplo, tan-awa ang lista sa dili kaayo epektibo nga mga pangutana sa pahina 220 sa Isangyaw ang Akong Ebanghelyo.

Dili kaayo epektibo nga pangutana	Mas epektibo nga pangutana
Kinsa ang unang propeta? (Ang tawo tingali wala masayod sa tubag)	Unsa ang epekto niini sa imong kinabuhi kon mahibaloan nimo nga ang Dios mitawag og mga propeta karon? (Hangyoa ang tawo sa pagpakigbahin sa iyang kaugalingong mga hunahuna ug mga pagbati.)
Sa unsang paagi nga ang pag-amping sa kaputli sa atong lawas makatabang kanato nga makabaton sa Espiritu ug makapakita nga andam kitang mosunod sa propeta sa Dios? (Adunay sobra sa usa ka ideya.)	Sa imong hunahuna sa unsang paagi ang pag-amping sa kaputli sa atong lawas makaimpluwensya sa atong relasyon sa Dios? (Magtutok sa usa ka ideya.)

Ipraktis

Lider sa diskusyon: Ang mga estudyante mahimong makigtambayayong sa mga kauban sa pagkompleto sa mosunod nga kalihokan.

Basaha ang ubang mga sanglitanan gikan sa lista sa dili kaayo epektibo nga mga pangutana sa kapitulo 10 sa Isangyaw ang Akong Ebanghelyo (pahina 220). Pagpili og duha o tulo niini nga mga pangutana ug magtinabangay sa paghimo og mas epektibong mga pangutana.

Lider sa diskusyon: Kon makahuman na ang mga sakop sa klase, pagdapit og pipila ka tawo sa pagpakigbahin og mga sanglitanan sa mas epektibong mga pangutana nga ilang gihimo.

Kon itugot sa oras, mahimo nimong dapiton ang mga tigkat-on sa paghimo og usab niini nga kalihokan sa pagpraktis gamit ang ubang mga pangutana gikan sa lista sa dili kaayo epektibong mga pangutana sa Isangyaw ang Akong Ebanghelyo.

Gamita

Lider sa diskusyon: Ikonsiderar ang pagpakita sa mosunod aron matabangan ang mga estudyante nga makahunahuna kon unsaon nila sa paggamit niini nga kahanas:

Hunahunaa kon unsaon nimo paggamit ang imong nakat-onan mahitungod sa pagpangutana og epektibong mga pangutana sulod sa sunod nga semana o duha ka semana. Pananglitan, mahimo kang:

Mangita og ubang epektibo nga mga pangutana sa pipila ka mga leksiyon gikan sa Dali, Sunod Kanako.
Kon magtudlo mo og leksiyon sa dili madugay, pag-andam og pipila ka epektibong mga pangutana nga mahimo ninyong ipangutana samtang magtudlo mo.