Leksiyon 7

Ang Imbitasyon nga Magpabunyag ug Magpakompirma

Isangyaw ang Akong Ebanghelyo, Kapitulo 3

Ang Manluluwas nagsugo sa tanang may tulubagon nga mga tawo sa paghinulsol, pagpabunyag, ug pagdawat sa gasa sa Espiritu Santo. “Ang pagtuman sa pakigsaad sa bunyag mao ang unang lakang sa pagbugkos sa atong kaugalingon ngadto sa Dios aron ang Espiritu Santo makalimpyo, makalig-on, ug makausab sa atong kinaiya alang sa mas maayo.” (Isangyaw ang Ebanghelyo: Usa ka Giya sa Pagpakigbahin sa Ebanghelyo ni Jesukristo [2023], 32). Ang pagpadangat og mga imbitasyon sa pagpabunyag ug pagpakompirma usa ka importanteng paagi nga ang mga misyonaryo makatuman sa ilang katuyoan sa pagtabang sa uban nga moduol kang Jesukristo.

Magrebyo ug Mag-follow Up

Lider sa diskusyon: Dapita ang mga tigkat-on sa paghunahuna mahitungod sa ilang bag-ong mga paningkamot sa paggamit sa unsay ilang nakat-onan niini nga klase. Mahimo nimo silang dapiton sa pagpakigbahin og pipila sa ilang mga paningkamot uban sa kapares o isip tibuok klase.

Mga Opsiyon sa Kalihokan sa Pagkat-on

Lider sa diskusyon: Sa mainampoong paagi pilia ang (mga) opsiyon sa pagkat-on nga labing makaayo sa imong klase. Seguradoha ang pagbilin og taas nga oras sa pagpraktis ug paggamit.

Opsiyon A: Nganong importante man ang bunyag ug pagkompirma?

Pagtuon

Lider sa diskusyon: Ikonsiderar ang pagpakita og litrato sa usa ka tawo nga gibunyagan. Dapita ang mga tigkat-on sa paghisgot sa mosunod nga mga pangutana ngadto sa ilang kapares:

Unsa ang imong nahinumdoman mahitungod sa imong bunyag ug pagkompirma?
Unsa ang pipila ka paagi nga ang Ginoo nagpanalangin kanimo tungod sa imong desisyon nga magpabunyag ug magpakompirma?

Lider sa diskusyon: Pahinumdomi ang mga estudyante nga ang pagdapit sa uban sa pagduol ngadto kang Kristo pinaagi sa mga ordinansa sa bunyag ug pagkompirma usa ka importanteng paagi nga ang mga misyonaryo makatuman sa ilang katuyoan. Ikonsiderar ang pagrebyo sa misyonaryo nga katuyoan pinaagi sa dungan nga pag-recite niini isip usa ka klase (tan-awa sa “Tumana ang Imong Misyonaryo nga Katuyoan,” Isangyaw ang Akong Ebanghelyo [2023], 1).

Ang mosunod nga kalihokan sa pagtuon makatabang sa mga tigkat-on nga mas makasabot kon sa unsang paagi ang Manluluwas personal nga makapanalangin niadtong mopili nga magpabunyag ug magpakompirma. Tabangi ang mga sakop sa klase sa pagpangita sa “Ang Imbitasyon nga Magpabunyag ug Magpakompirma” diha sa kapitulo 3 sa Isangyaw ang Akong Ebanghelyo (mga pahina 32–34). Dayon ipakigbahin kini nga mga instruksiyon:

Tun-i ang mga parapo ubos sa ulohan nga “Sukaranan nga Doktrina” (Isangyaw ang Akong Ebanghelyo, 32), uban sa labing menos sa duha ka mga kasulatan nga gihimong pakisayran. Ikonsiderar ang pagpangita ug pagmarka sa mga pagtulun-an nga makapalawom sa imong panabot mahitungod sa kaimportante sa bunyag ug pagkompirma.

Lider sa diskusyon: Human makatuon ang mga estudyante, ikonsiderar ang paghisgot sa mosunod nga mga pangutana:

Unsay imong nakaplagan nga makatabang sa usa ka tawo nga mobati og tinguha nga mabunyagan ug makompirmahan?
Unsay imong nakat-onan kon sa unsang paagi ang Dios mopanalangin niadtong mopili nga mabunyagan ug makompirmahan?

Lider sa diskusyon: Samtang maghisgot kamo sa miagi nga pangutana, ikonsiderar ang pagpakigbahin sa mosunod nga pamahayag ni Presidente Russell M. Nelson. Dapita ang mga sakop sa klase sa pagpakigbahin og dugang nga mga pagsabot nga ilang nakuha gikan sa mga panudlo ni Presidente Nelson.

Sa higayon nga kamo ug ako makahimo na og pakigsaad uban sa Dios, ang atong relasyon ngadto Kaniya mamahimong mas suod kay sa wala pa ang atong pakigsaad. Karon kita mag-uban nga gihugpong. Tungod sa atong pakigsaad sa Dios, Siya dili gayod kapoyon sa Iyang mga paningkamot sa pagtabang kanato, ug kita dili gayod makabsan sa Iyang maluluy-on nga pailob ngari kanato. Ang matag usa kanato adunay usa ka espesyal nga dapit sa kasingkasing sa Dios. Siya adunay taas nga pangandoy alang kanato. (“Ang Walay Kataposan nga Pakigsaad,” Liahona, Okt. 2022, 28)

Lider sa diskusyon: Aron matabangan ang mga estudyante nga makakita og ehemplo sa mga panalangin sa bunyag ug pagkompirma, ikonsiderar ang pagpasalida sa bidyo nga “How Sarah Found Happiness” (3:42, ChurchofJesusChrist.org). Human sa bidyo, mahimo kamong maghisgot kon sa unsang paagi napanalanginan ang kinabuhi ni Sarah tungod sa iyang desisyon nga magpabunyag ug magpakompirma.

Ipraktis

Lider sa diskusyon: Hatagi ang mga sakop sa klase og oportunidad nga magpraktis alang sa pagpasabot kon unsay ilang nakat-onan mahitungod sa bunyag ug pagkompirma. Ang usa ka paagi nga mahimo nimo kini mao ang pagdapit nila sa pagtubag sa mosunod nga senaryo. Mahimo nilang irekord una ang ilang tubag sa dili pa nila kini ipakigbahin uban sa kapares o sa gamay nga grupo.

Hunahunaa nga nakigsulti ka sa usa ka higala nga dili pamilyar sa mga ordinansa sa bunyag ug pagkompirma. Nangutana ang imong higala, “Nganong kinahanglan man ang tawo nga mabunyagan ug makompirmahan?” Unsay imong isulti?

Pagtakda og tumong

Lider sa diskusyon: Hatagi ang mga sakop sa klase og oras sa pagpamalandong sa unsay ilang nakat-onan ug sa pagtakda og mga tumong. Pwede usab nimong ipakita ang mosunod aron matabangan sila:

Pagtakda og tumong nga may kalabotan sa unsay inyong gitun-an. Gamita ang mga ideya sama sa mosunod, o paghunahuna og inyong kaugalingong ideya.

Isulat kon sa unsang paagi ka napanalanginan tungod kay nabunyagan ka ug nakompirmahan nga usa ka miyembro sa Ang Simbahan ni Jesukristo sa mga Santos sa Ulahing mga Adlaw. Ipakigbahin kon unsa ang imong gisulat ngadto sa usa ka minahal, atol sa miting sa puasa og pagpamatuod, o pinaagi sa social media.
Pamalandonga ang pakigsaad nga imong gihimo sa dihang gibunyagan ka. Tinoa kon unsaon nimo pagtuman sa imong pakigsaad sa bunyag sa mas hingpit nga paagi.

Akong tumong

Ako mo … (aksiyon nga imong himoon).
Akong kab-oton ang akong tumong pinaagi sa … (usa ka yano nga plano).

Lider sa diskusyon: Kon ang mga tigkat-on adunay grupo sa mga kaedad nga pakigbahinan sa mga tumong sa tibuok kurso, hatagi sila og oras sa pagpakigbahin unsaon nila sa pagsuporta o pagpahinumdom ang matag usa sa dili pa ang sunod nga klase.

Opsiyon B: Unsaon nako pagdapit ang uban nga magpabunyag ug makompirmahan?

Pagtuon

Lider sa diskusyon: Ikonsiderar ang pagsugod sa leksiyon pinaagi sa pagpakigbahin sa mosunod nga senaryo:

Handurawa nga bag-o kang natawag nga misyonaryo. Ikaw ug ang imong kompanyon nagplano sa inyong eskedyul sa umaabot nga adlaw. Gipasabot sa imong kompanyon nga gibati nila nga naaghat sa pagdapit sa usa sa mga tawo nga inyong gitudloan aron magpabunyag ug magpakompirma. Nangutana ang imong kompanyon kon mahimo ba nga ikaw ang mohatag sa pagdapit atol sa inyong appointment sa pagtudlo inig ka hapon. Mao ni ang imong unang higayon sa pagdapit og tawo aron magpabunyag ug magpakompirma.

Unsa ka dako ang imong pagsalig sa kaugaligon mahitungod sa paghatag niini nga pagdapit?
Unsa kaha ang imong mga pangutana?

Lider sa diskusyon: Ang mosunod nga kalihokan sa pagtuon makatabang sa mga partisipante nga mas makasabot unsaon nga mahimong epektibo nga mga misyonaryo. Dapita sila sa pagpangita sa “Ang Imbitasyon nga Magpabunyag ug Magpakompirma” diha sa kapitulo 3 sa Isangyaw ang Akong Ebanghelyo (mga pahina 32–34). Dayon ipakigbahin kini nga mga instruksiyon:

Tun-i ang “Pagpadangat sa Imbitasyon” ug “Mga Ideya alang sa Imbitasyon nga Magpabunyag” (Isangyaw ang Akong Ebanghelyo., 32–34). Pangita og mga giya nga makatabang nimo sa pagdapit og tawo nga magpabunyag ug magpakompirma. Ikonsiderar ang pagmarka sa mga pulong nga importante para nimo.

Lider sa diskusyon: Dapita ang mga sakop sa klase sa paghisgot kon unsay ilang nakat-onan pinaagi sa pagpangutana og mga pangutana nga sama sa mosunod:

Hain nga mga giya o mga sugyot ang imong nakita nga labing makatabang? Ngano man?
Ngano kaha nga makatabang man ang pagtutok sa mga ehemplo sa Manluluwas kon magdapit sa uban nga magpabunyag?

Ipraktis

Lider sa diskusyon: Hatagi ang mga tigkat-on og oportunidad nga magpraktis alang sa pagdapit og tawo sa pagpabunyag ug pagpakompirma. Aron matabangan sila sa pagpangita og mga panig-ingnan kon unsaon sa pagbuhat niini, mahimo kang:

Mogamit og bidyo, nga sama sa mosunod “Invitation to Be Baptized: German” (2:42) o “Invitation to Be Baptized: Jynx” (2:34). Ang duha ka bidyo anaa sa ChurchofJesusChrist.org.
Dapita ang mga sakop sa klase nga magdramadrama sa pagdapit og usa ka tawo nga magpabunyag ug magpakompirma. Mahimo nilang gamiton ang pinahandag nga litra ubos sa “Pagpadangat sa Imbitasyon” (Pagsangyaw sa Ebanghelyo., 33) o ang usa sa mga drama-drama nga anaa sa kataposan niini nga leksiyon.

Hisgoti uban sa mga sakop sa klase kon unsa ang ilang nakat-onan gikan sa mga bidyo o mga drama-drama, lakip sa unsay ilang ganahan ug unsa kaha ang ilang nabuhat nga lahi. Dayon ipakigbahin ang mosunod nga mga instruksiyon:

Ipraktis ang pag-andam ug paghatag og imbitasyon nga magpabunyag ug magpakompirma pinaagi sa pagbuhat sa mosunod:

Pagsulat og yano nga plano kon unsaon nimo pagdapit ang usa ka tawo nga magpabunyag ug magpakompirma. Sulayi sa pagsunod kini nga mga giya sa imong plano: (1) mosulti og piho ug direkta, (2) mosaad og mga panalangin, ug (3) mopakigbahin sa imong pagpamatuod.
Uban sa usa ka kapares, pagpuli-puli sa paghatag sa imbitasyon nga imong giandam.
Human magpraktis uban sa imong kapares, tinoa kon unsaon nimo pagpahiangay ang imong imbitasyon.
Magpraktis og usab uban sa laing kapares.

Pagtakda og tumong

Lider sa diskusyon: Hatagi ang mga sakop sa klase og oras sa pagpamalandong sa unsay ilang nakat-onan ug sa pagtakda og mga tumong. Pwede usab nimong ipakita ang mosunod aron matabangan sila:

Pagtakda og tumong nga may kalabotan sa unsay inyong gitun-an. Gamita ang mga ideya sama sa mosunod, o paghunahuna og inyong kaugalingong ideya.

Pagtuon og dugang nga mga tudling sa kasulatan mahitungod sa bunyag ug pagkompirma. Dayon ipakigbahin ang imong nakat-onan ngadto sa usa ka sakop sa pamilya o higala.
Paghunahuna og usa ka tawo nga gusto nimong tabangan nga maduol kang Jesukristo. Tinoa ang usa ka imbitasyon nga mahimo nimong ipadangat kanila.

Akong tumong

Ako mo … (aksiyon nga imong himoon).
Akong kab-oton ang akong tumong pinaagi sa … (usa ka yano nga plano).

Sa Sunod nga Higayon

Lider sa diskusyon: Kon andam ka na nga motudlo sa leksiyon 8 sa sunod nga klase, ikonsiderar ang pagdapit sa mga sakop sa klase sa pagtuon sa kapitulo 4 sa Isangyaw ang Akong Ebanghelyo agig pagpangandam. Mahimo usab nimong padad-an sila og usa ka pahinumdom.

Pagpadangat sa Imbitasyon nga Magpabunyag ug Magpakompirma

Drama-drama 1—Paggamit sa Ehemplo ni Jesukristo

Narrator: Si Sarah mibatig tinguha nga makabaton ug relasyon sa Dios sukad siya nagsugod sa kolehiyo duha ka bulan ang milabay. Bag-o lang siyang nakigkita sa mga misyonaryo. Sa ilang unang pagbisita, si Sister Hernandez ug Sister Williams mitudlo kang Sarah mahitungod sa Pagpahiuli sa ebanghelyo ni Jesukristo ug midapit kaniya sa pagbasa ug pag-ampo mahitungod sa Basahon ni Mormon. Karon ang mga misyonaryo nakigtagbo na usab kang Sarah. Gibati nila nga gigiyahan sa pagdapit ni Sarah nga magpabunyag.

Sister Hernandez: Sarah, nagsulti ka namo nga gusto kang mosunod sa Dios ug mopalalom sa imong relasyon uban Kaniya. Magdungan kita sa pagbasa gikan sa Biblia kon sa unsang paagi gipakita kanato ni Jesukristo ang paagi sa pagsunod sa Dios.

Sister Williams: Sa Mateo kapitulo 3, atong mabasa ang mahitungod ni Jesus nga miadto kang Juan Bautista. Sarah, mahimo bang basahon nimo ang Mateo 3:13–17?

Sarah: [Gibasa og kusog ang Mateo 3:13–17.]

Sister Hernandez: Sarah, si Jesus gibunyagan aron sa pagtuman sa tanang pagkamatarong. Kana nagpasabot nga misunod Siya sa sugo nga magpabunyag. Unsay imong nahibaloan bahin sa bunyag?

Sarah: Nahibalo ko nga usa kini ka butang nga kasagaran buhaton sa mga tawo. Sa simbahan diin ko nagdako, nahinumdom ko nga nakakita kog pipila ka tawo nga nagbuhat niana. Walay usa sa among pamilya nga nabunyagan. Gawas niana, wala na kaayo akoy laing nahibaloan.

Sister Hernandez: Salamat sa pagpaambit niana, Sarah. Tugoti mi nga mopasabot pa og dugang kon unsa ang bunyag. Gusto sa Langitnong Amahan nga mobalik kita aron mopuyo uban Kaniya. Magsugod kita sa dalan balik sa Dios pinaagi sa pagpakita og pagtuo kang Jesukristo. Ang pagtuo kang Jesukristo mogiya kanato sa pag-usab sa atong kinabuhi ug paghinulsol sa atong mga sala. Ang bunyag mao ang unang pakigsaad nga atong gihimo niini nga dalan. Kini mopaduol kanato ngadto Manluluwas, ug mobati kita og kalipay, kapasayloan, ug paglaom. Ang bunyag usa usab ka ordinansa. Nagpasabot kana nga usa kini ka seremonyas nga gihimo pinaagi sa awtoridad sa pagkapari.

Sister Williams: Kon magpabunyag ta, maghimo kita og pakigsaad, o saad, ngadto sa Dios. Mosaad ta nga moalagad Kaniya ug motuman sa Iyang mga sugo. Isip kabahin niini nga pakigsaad, ang Dios misaad nga mopasaylo Siya sa atong mga sala ug mopanalangin kanato sa Iyang Espiritu, aron malimpyohan kita, magiyahan, ug mahupay.

Sister Hernandez: Imo bang sundon ang ehemplo ni Jesukristo pinaagi sa pagpabunyag sa usa ka tawo nga naorden sa pagpahigayon niini nga ordinansa? Tabangan ka namo sa pagpangandam alang sa bunyag. Nagtuo mi nga maandam ka na sa Hulyo 29. Mangandam ka ba nga magpabunyag niana nga petsa?

Sarah: Oo. Morag mao ni ang dugay na nakong gipangita.

Sister Williams: Sarah, mahinamon mi sa mga panalangin nga moabot kanimo samtang mohimo ka niini nga pagpili. Ang pagpabunyag modala og dakong kalinaw ug gahom sa imong kinabuhi. Daghan pa kami og itudlo nimo nga makatabang nimo nga maandam.

Pagpadangat sa Imbitasyon nga Magpabunyag ug Magpakompirma

Drama-drama 2—Itudlo ang Dokrina ni Kristo

Narrator: Nakigtagbo si Isaac sa mga misyonaryo sa unang higayon. Daghan siyag mga pangutana bahin sa katuyoan sa kinabuhi ug kon sa unsang paagi siya makakaplag ug dugang kalipay. Ang mga misyonaryo mitudlo kang Isaac mahitungod sa plano sa Langitnong Amahan alang sa kaluwasan. Atol sa leksiyon, sila si Elder Browning ug Elder Singh mibati nga naaghat sa pagdapit kang Isaac nga magpabunyag.

Elder Browning: Isaac, gusto namong hisgotan ang dalan balik sa atong Langitnong Amahan. Gusto Siya nga mobalik ta sa pagpuyo uban Niya, ug si Jesukristo nagpahimo niini nga posible.

Elder Singh: Magsugod ta sa dalan balik sa Dios pinaagi sa pagtuo kang Jesukristo. Kon duna kitay pagtuo ni Jesukristo, natural nga gusto natong usbon ang atong kinabuhi ug mas mahisama Kaniya. Mosunod ta sa Iyang mga pagtulun-an ug maghinulsol ta kon makasala. Ang pagtuo ug paghinulsol modala kanato ngadto sa bunyag ug pagkompirma. Makasulti ka ba kanamo kon unsay imong nahibaloan bahin sa bunyag?

Isaac: Nakakita ko og usa o duha ka bunyag sa lain-laing mga simbahan, apan wala kaayo koy nahibaloan gawas niana. Sa akong hunahuna mahitungod kini sa mga sala.

Elder Browning: Sakto ka. Ang bunyag mao ang unang lakang sa pagbugkos sa atong kaugalingon ngadto sa Dios, aron ang Espiritu Santo makalimpyo, makapalig-on, ug makausab sa atong kinaiya alang sa mas dakong kaayohan. Mao usab kini ang paagi sa atong pagpadayag sa atong pasalig ngadto sa Dios. Kon magpabunyag ta, maghimo kita og pakigsaad, o saad, Kaniya nga moserbisyo kita Kaniya ug mosunod sa Iyang mga sugo. Kon ato kining buhaton, ang Dios nakigsaad nga Iyang ibu-bo ang Iyang Espiritu kanato ug pasayloon kita sa atong mga sala.

Elder Singh: Kita usab mosaad, kon magpabunyag ta, nga andam kitang modala diha sa atong mga kaugalingon sa ngalan ni Jesukristo, motuman sa mga sugo sa Dios, moalagad sa Dios ug sa uban, ug molahutay hangtod sa kataposan. Kana nagpasabot nga ang bunyag usa ka bag-ong sinugdanan sa atong kinabuhi. Aduna gihapon kitay mga hagit ug masayop, siyempre. Apan dili gayod kita mohunong sa pagpaningkamot sa pagtuman sa atong saad ug pagsalig kang Jesukristo sa tibuok natong kinabuhi.

Elder Browning: Isaac, sundon ba nimo ang ehemplo ni Jesukristo pinaagi sa pagpabunyag sa usa ka tawo nga gi-orden sa pagpahigayon niini nga ordinansa? Tabangan ka namo sa pagpangandam alang sa bunyag. Nagtuo mi nga maandam ka na sa Hulyo 29. Mangandam ka ba nga magpabunyag niana nga petsa?

Isaac: Oo. Morag mao kini ang dugay na nakong gipangita.

Elder Singh: Isaac, mahinamon mi sa mga panalangin nga moabot kanimo samtang mohimo ka niini nga pagpili. Ang pagpabunyag modala og dakong kalinaw ug gahom sa imong kinabuhi. Aduna mi daghang mga butang nga itudlo kanimo nga makatabang nimo sa pag-andam alang sa bunyag.

Pagpadangat sa Imbitasyon nga Magpabunyag ug Magpakompirma