Leksiyon 4

Siksika ang mga Kasulatan ug Isul-ob ang Tibuok nga Panagang sa Dios

Isangyaw ang Akong Ebanghelyo, Kapitulo 2

Si Joseph Smith nga nagtuon sa mga kasulatan

Ang pagtuon ug paggamit sa mga kamatuoran nga makita sa pulong sa Dios mahinungdanon sa pagkakabig ug pagtabang sa mga tawo nga moduol ni Jesukristo. Ang matarong nga paggamit sa teknolohiya makapalambo sa atong pagtuon ug makatabang nato sa pagpangita og mga tubag sa atong mga pangutana bahin sa ebanghelyo. Ang mga pag-amping samtang naggamit og teknolohiya usa ka importante nga paagi sa “pagsul-ob sa tibuok nga panagang sa Dios” (Mga Taga-Efeso 6:11).

Magrebyo ug Mag-follow Up

Lider sa diskusyon: Dapita ang mga tigkat-on sa paghunahuna mahitungod sa ilang bag-ong mga paningkamot sa paggamit sa unsay ilang nakat-onan niini nga klase. Mahimo nimo silang dapiton sa pagpakigbahin og pipila sa ilang mga paningkamot uban sa kapares o isip tibuok klase.

Mga Opsiyon sa Kalihokan sa Pagkat-on

Lider sa diskusyon: Sa mainampoong paagi pilia ang opsiyon sa pagkat-on o mga opsiyon nga labing makaayo sa imong klase. Seguradoha ang pagbilin og taas nga oras sa pagpraktis ug paggamit.

Opsiyon A: Unsaon nako nga makabaton og mas makahuloganon nga kasinatian sa pagtuon sa mga kasulatan?

Pagtuon

Pagtimbang-timbang sa Akong Personal nga Pagtuon sa Kasulatan

Gradohi ang imong kasinatian sa mga kasulatan pinaagi sa pagtubag sa mosunod nga mga pamahayag sa sukod nga 1 (dili gayod) ngadto sa 5 (hapit kanunay).

Kanunay kong maningkamot sa pagtuon sa mga kasulatan. ____

Kon magbasa ko sa mga kasulatan:
Tutokan nako ang Langitnong Amahan ug si Jesukristo. ____
Mogahin ko og panahon sa pagpamalandong sa akong gibasa. ____
Magtinguha ko og giya ug salabotan gikan sa Espiritu Santo. ____
Mangita ko og mga tubag sa akong mga pangutana. ____
Maninguha ko sa pagbuhat sa akong nakat-onan. ____

Lider sa diskusyon: Awhaga ang mga sakop sa klase nga mohatag og pagtagad sa espirituhanong mga impresyon atol sa kalihokan sa pagkat-on nga lagmit nilang nabatonan kon unsaon sa pagpalambo sa ilang kasinatian sa pagtuon sa kasulatan.

Ipakita ang mga mosunud nga instruksiyon, ug hatagi og panahon ang mga estudyante aron makompleto ang kalihokan sa pagtuon:

Pagpili og usa o duha ka bahin gikan sa imong pagsukod sa kaugalingon nga gusto nimong pauswagon. Ang mosunod nga de-numero nga mga kapanguhaan motugma sa mga numero gikan sa pagsukod sa kaugalingon. Giyahan ka niini ngadto sa may kalabotan nga mga kapanguhaan sa kapitulo 2 sa Isangyaw ang Akong Ebanghelyo.

1. Tun-i ang pasiuna nga seksiyon sa “Siksika ang mga Kasulatan” (mga pahina 17–18).
2a. Tun-i ang pasiuna nga seksiyon sa “Siksika ang mga Kasulatan” (mga pahina 17–18).
2b. Kompletoha ang kalihokan diha sa “Personal nga Pagtuon” nga kahon sa pahina 18.
2c. Tun-i ang“Tinguhaa ang Espiritu” (pahina 18), ug kompletoha ang kalihokan nga anaa sa “Pagtuon sa Kasulatan” nga kahon sa mga pahina 18–19.
2d. Tun-i ang “Pangitaa ang mga Tubag sa mga Pangutana”(pahina 19).
2e. Tun-i ang“Buhata ang Unsay Imong Nakat-onan” (pahina 19), ug kompletoha ang kalihokan nga anaa sa “Personal nga Pagtuon” nga kahon sa mga pahina 19.

Ipraktis

Lider sa diskusyon: Hatagi ang mga tigkat-on og kahigayonan sa pagpakigbahin sa unsay ilang nakat-onan gikan sa kalihokan sa pagtuon. Sa pagbuhat niini, mahimo nimong ipakita ang mosunod nga mga pangutana. Hatagi ang mga sakop sa klase og panahon nga maghisgot og usa o labaw pa sa usa ka pangutana ngadto sa usa ka kauban o sa gamay nga grupo.

Base sa unsay imong gitun-an, unsaon nimo pagpalambo ang imong pagtuon sa mga kasulatan?
Unsa nga tudling sa kasulatan o pamahayag gikan sa Isangyaw ang Akong Ebanghelyo nga imong nakita nga makatabang kaayo? Nganong gibati man nimo nga importante kini?
Unsa nga positibong kasinatian ang imong nasinati sa pagtuon sa mga kasulatan?

Lider sa diskusyon: Ikonsiderar ang pagtapos niini nga bahin sa kalihokan sa pagkat-on pinaagi sa pagbasa sa pamahayag gikan ni Elder D. Todd Christofferson ubos sa “Siksika ang mga Kasulatan” (Isangyaw ang Akong Ebanghelyo, 18). Pagdapit og pipila ka mga tigkat-on sa pagpakigbahin kon sa unsang paagi ang ilang pagtuon sa kasulatan nakapalig-on sa ilang pagtuo ug pagpamatuod sa Langitnong Amahan ug ni Jesukristo.

Alang sa dugang nga pagpraktis, mahimo nimong gamiton ang Pagbansay sa Kahanas 2: “Gamita ang mga Kasulatan sa Imong Pagtudlo.”

Pagtakda og tumong

Lider sa diskusyon: Hatagi og panahon ang mga sakop sa klase sa pagpamalandong sa unsay ilang nakat-onan karong adlawa ug sa pagtakda og mga tumong. Usa ka paagi nga mahimo nimo kini mao ang pagdapit kanila sa paghimo og yano nga plano sa pagpalambo sa ilang personal nga pagtuon sa kasulatan. Ikonsiderar ang pagpakita sa mosunod aron magiyahan sila. Hatagi sila og panahon sa klase sa pagrekord sa ilang mga plano.

Ang akong plano sa pagtuon sa kasulatan

Kanus-a ko magtuon?
Unsa kadugay ko nga magtuon?
Asa ko magtuon?
Unsay akong tun-an?
Unsay akong buhaton aron mapalambo ang akong kasinatian?

Opsiyon B: Sa unsang paagi ang paggamit sa Librarya sa Ebanghelyo makatabang nako sa pagkaplag og mga tubag sa akong mga pangutana?

Pagtuon

Lider sa diskusyon: Ikonsiderar ang paghisgot sa mosunod nga mga pangutana ug pagsulat sa mga tubag sa mga sakop sa klase diha sa pisara.

Unsa ang uban pang mga gipangutana diha nimo mahitungod sa Ang Simbahan ni Jesukristo sa mga Santos sa Ulahing mga Adlaw?
Unsa ang ubang komon nga mga tinubdan nga gigamit sa mga tawo sa pagtubag sa ilang mga pangutana mahitungod sa Simbahan?

Lider sa diskusyon: Dapita ang mga tigkat-on sa pagpamalandong sa ilang personal nga mga pangutana. Awhaga sila sa paghinumdom niini nga mga pangutana atol niini nga kalihokan sa pagkat-on. Ipasabot nga ang Espiritu Santo makagiya nila sa pagpangita og mga tubag sa ilang mga pangutana.

Basaha ang “Pangitaa ang mga Tubag sa mga Pangutana” sa kapitulo 2 sa Isangyaw ang Akong Ebanghelyo (pahina 19). Pangita og tambag nga makatabang nato kon kita adunay mga pangutana sa ebanghelyo.

Unsay imong natiman-an og maayo?
Unsa man ang atong pangunang tinubdan sa pagpangita og mga tubag sa mga pangutana sa ebanghelyo? Ngano man?

Lider sa diskusyon: Ikonsiderar ang pagdapit sa mga tigkat-on nga mopakigbahin og mga kasinatian sa dihang ang Langitnong Amahan mitubag sa ilang mga pangutana pinaagi sa mga kasulatan o ubang kasaligan nga mga tinubdan. Mahimo nimong ipasalida ang bidyo nga “How I #HearHim: Elder Dale G. Renlund” (2:55; Gospel Library).

Ipraktis

Lider sa diskusyon: Aron matabangan ang mga estudyante nga magpraktis sa paggamit sa Librarya sa Ebanghelyo aron sa pagpangita og mga tubag, ipakita ang mosunod nga mga sitwasyon ug mga instruksiyon. Ipasabot nga ang katuyoan niini nga kalihokan mao ang pagdiskobre sa mga kapanguhaan nga anaa sa Librarya sa Ebanghelyo, aron dili motaas ang mga diskusyon mahitungod sa mga hilisgotan nga gipresentar.

Kon dunay mangutana, “Nagtuo ba ang inyong simbahan nga ang mga tawo naginahanglan og grasya aron maluwas?” Adto sa Giya ngadto sa mga Kasulatan, ug pangitaa ang pulong nga “Grasya.” (Librarya sa Ebanghelyo > Mga Kasulatan > Mga Tabang sa Pagtuon > Guide to the Scriptures > Grasya)
Sa miaging adlaw, nakadungog ka og usa ka tawo nga naghisgot bahin sa Inahan sa Langit, ug karon naghunahuna ka kon unsay gitudlo sa Simbahan mahitungod kaniya. Adto sa mga Hilisgotan ug mga Pangutana, ug pangitaa ang mga pulong “Mother in Heaven.” (Librarya sa Ebanghelyo > Mga Hilisgotan ug mga Pangutana > Inahan sa Langit)
Gusto ka ba og tabang aron mas mapanalipdan ang imong kaugalingon batok sa pornograpiya. Adto sa Tabang sa kinabuhi. Tan-awa unsay imong makat-onan diha sa “Tabang Alang Kanako” ubos sa “Pornograpiya,” ug rebyoha ang mga pangutana nga gipresentar. (Librarya sa Ebanghelyo > Tabang sa Kinabuhi > Pornograpiya > Tabang alang Kanako)
Ang imong igsoong babaye nangutana, “Unsaon nako pagpangandam aron makadawat og patriyarkal nga panalangin?” Gamit ang search nga function sa Librarya sa Ebanghelyo, tan-awa unsay imong makit-an.
Ganahan ka og mga ideya kon unsaon nimo pagpakigbahin sa ebanghelyo sa uban. Adto sa Librarya sa Ebanghelyo > Pagpakigbahin sa Ebanghelyo ug pangita og makatabang nga mga kapanguhaan.

Lider sa diskusyon: Kon ang mga sakop sa klase gusto og dugang nga pagpraktis, mahimo nimo silang patan-awon ngadto sa mga pangutana diha sa “Ang mga Tawo Mahimong Maghunahuna” nga mga kahon sa ibabaw sa mga leksiyon 1, 2, o 3 sa kapitulo 3 sa Isangyaw ang Akong Ebanghelyo (mga pahina 30, 46, 61). Mahimo silang mopili og pangutana ug magpraktis sa pagpangita og mga kapanguhaan aron matubag kini diha sa Librarya sa Ebanghelyo.

Human sa pagpraktis sa partisipante, ikonsiderar ang pagdapit nila sa pagpakigbahin kon unsay ilang nakat-onan.

Pagtakda og tumong

Lider sa diskusyon: Hatagi og panahon ang mga sakop sa klase sa pagpamalandong sa unsay ilang nakat-onan karong adlawa ug sa pagtakda og mga tumong. Pwede usab nimong ipakita ang mosunod aron matabangan sila:

Pagtakda og tumong nga may kalabotan sa unsay inyong gitun-an. Gamita ang mga ideya sama sa mosunod, o paghunahuna og inyong kaugalingong ideya.

Paggahin og panahon sa pagsuhid sa pipila ka mga entry diha sa Giya ngadto sa mga Kasulatan o Mga Hilisgotan ug Mga Pangutana diha sa Librarya sa Ebanghelyo.
Dapita ang mga higala ug mga sakop sa pamilya sa pagpangutana kanimo aron makapraktis ka sa pagpangita og mga tubag diha sa Librarya sa Ebanghelyo.

Akong tumong

Ako mo … (aksiyon nga imong himoon).
Akong kab-oton ang akong tumong pinaagi sa … (usa ka yano nga plano).

Opsiyon C: Unsaon nako sa paggamit ang teknolohiya sa matarong nga paagi?

Pagtuon

Lider sa diskusyon: Ipataas ang usa ka smartphone o pagpakita og hulagway niini, dayon dapita ang mga sakop sa klase sa paghisgot sa mosunod nga pangutana:

Unsa ang tahas sa mga electronic device sama sa mga smartphone ug mga computer sa pagpauswag sa buhat sa Ginoo?

Lider sa diskusyon: Ipasabot nga ang kapitulo 2 sa Isangyaw ang Akong Ebanghelyo naglangkob og mga sumbanan mahitungod sa paggamit sa teknolohiya sa matarong nga paagi. Mahimo ninyong basahon og dungan ang “Gamita ang Teknolohiya sa Matarong nga Paagi” (pahina 20) aron ipaila kini nga hilisgotan.

Unsa ang pipila ka mga hagit o mga tintasyon nga nalanggikit sa paggamit sa teknolohiya?

Lider sa diskusyon: Isip kabahin sa inyong diskusyon, ikonsiderar ang pagtan-aw sa “Taking Charge of Technology: The Challenge” (3:18; Librarya sa Ebanghelyo).
Ipasabot nga ang Isangyaw ang Akong Ebanghelyo naghulagway og upat ka mga pag-amping sa paggamit sa teknolohiya. Aron matabangan ang mga sakop sa klase nga makat-on mahitungod niini nga mga pag-amping, ipakita ang mosunod nga mga instruksiyon. Mahimo nimong hatagan og bulohaton ang mga estudyante sa matag pagtuon sa usa sa mga pag-amping ug mangandam sa pagreport sa ilang nakat-onan sa gagmay nga mga grupo. (Usa ka sakop sa grupo mahimong magtuon sa mga pag-amping 1–2 aron ang matag sakop sa grupo mobasa og parehas nga gidaghanon.)

Pagkat-on mahitungod sa upat ka mga pag-amping sa paggamit sa teknolohiya sa matarong nga paagi pinaagi sa pagtuon sa mosunod nga mga ulohan sa kapitulo 2 sa Isangyaw ang Akong Ebanghelyo:

Pag-amping 1: “Magpahiuyon sa Espirituhanong mga Pag-aghat” (pahina 20)

Pag-amping 2: “Itumong ang Imong Hunahuna diha sa Imong Misyonaryo nga Katuyoan” (pahina 20)

Pag-amping 3: “Magbaton og Disiplina” (pahina 21)

Pag-amping 4: “Maghiusa” (pahina 21)

Pangandam sa pagpakigbahin sa mosunod:

Usa ka mubo nga summary sa unsay imong gitun-an, lakip sa unsay gitudlo sa imong seksiyon mahitungod sa Ginoo
Sa unsang paagi sa imong hunahuna nga kining mga pagtulun-an magamit ni bisan kinsa, dili lang sa full-time nga mga misyonaryo
Unsa ang nakatabang nimo sa paggamit sa teknolohiya sa matarong nga mga paagi

Ipraktis

Lider sa diskusyon: Dapita ang mga tigkat-on nga magpuli-puli sa pagpakigbahin sa ilang grupo sa unsay ilang nakat-onan gikan sa kalihokan sa pagtuon.

Alang sa dugang nga pagpraktis, mahimo nimong gamiton ang Pagpraktis sa Kahanas 9: “Gamita ang Teknolohiya sa Matarong nga Paagi.”

Pagtakda og tumong

Mga Pag-amping alang sa Paggamit sa Teknolohiya

Paghunahuna og mga hagit karon nga imong giatubang nga may kalabotan sa teknolohiya. Ikonsiderar kon sa unsang paagi ang mosunod nga mga pag-amping gikan sa Isangyaw ang Akong Ebanghelyo makatabang nimo sa imong mga sirkumstansiya.

Pag-amping 1: Magpahiuyon sa Espirituhanong mga Pag-aghat

Pipila ka mga ideya:

Pag-ampo alang sa giya sa paggamit og teknolohiya sa matarong nga paagi.
Irekord sa imong journal ang mga impresyon nga imong nadawat mahitungod sa imong digital nga mga device.
Iprayoridad ang mga kinaiya nga modapit sa Espiritu, sama sa pagtuon sa kasulatan, pag-ampo, ug buluhaton sa templo.

Pag-amping 2: Magtutok sa Imong Katuyoan

Pipila ka mga ideya:

Likayi ang paggamit sa imong device kon wala kay piho nga katuyoan sa hunahuna.
Sa dili pa mogamit sa teknolohiya, pangutan-a ang imong kaugalingon kon ang paggamit niini makadapit o makababag sa pakig-uban sa Espiritu Santo.
Kon mogamit ka ug social media, sunda lamang ang mga tawo nga makatabang nimo nga magpabiling suod sa Ginoo.

Pag-amping 3: Magbaton og Disiplina

Pipila ka mga ideya:

Kon kauban nimo ang ubang mga tawo, ihipos ang imong device ug pakig-istorya sa mga tawo sa imong palibot.
Limitahi ang imong inad-adlaw nga pagtan-aw sa screen.
Pag-establisar og mga dapit nga walay device, sama sa imong kwarto o sa banyo.
Kon gibati nimo ang kahuyang ug gitintal, palonga ang imong device ug paglakawlakaw.

Pag-amping 4: Maghiusa

Pipila ka mga ideya:

Pangayo og tabang gikan sa usa ka minahal kon bation nimo nga nagkahuyang ug natintal.
Ipakigbahin ang imong plano sa paggamit sa teknolohiya uban sa tawo nga imong kasaligan.
Hunahunaa kon sa unsang paagi nga mahimo kang kasaligan nga higala sa uban.

Isulat ang imong plano diha sa ubos.

Lider sa diskusyon: Kon ang mga tigkat-on adunay grupo nga masultihan sa ilang mga tumong, hatagi sila og panahon sa pagpakigbahin kon unsaon nila sa pagsuporta o pagpahinumdom ang usag usa sa dili pa ang sunod nga klase. Mahimo nimong ipasalida ang bidyo nga “Texting Truth” (2:22; ChurchofJesusChrist.org) aron matabangan ang mga miyembro sa klase nga makakita og ehemplo sa mga tin-edyer nga naggamit og teknolohiya sa pagtabang ug pagbayaw sa usag usa.

Sa Sunod nga Higayon

Lider sa diskusyon: Kon andam ka na nga motudlo sa leksiyon 5 sa sunod nga higayon, ikonsiderar ang pagdapit og mga tigkat-on sa pagbasa sa unang tulo ka pahina sa “Magtuon ug Motudlo sa Ebanghelyo ni Jesukristo” gikan sa kapitulo 3 sa Isangyaw ang Akong Ebanghelyo (mga pahina 25–27) agig pagpangandam. Mahimo usab nimong padad-an sila og pahinumdom.

Pagtimbang-timbang sa Akong Personal nga Pagtuon sa Kasulatan

Mga Pag-amping alang sa Paggamit sa Teknolohiya