Apendiks 1

Giya alang sa Paghimo og Dugang nga mga Kalihokan sa Pagkat-on

Samtang maghunahuna ka sa mga panginahanglan niadtong anaa sa imong klase, mahimo nimong ilhon ang usa ka seksiyon gikan sa Isangyaw ang Akong Ebanghelyo nga imong gibati nga importante apan wala hisgoti niini nga mga materyal sa kurso. Kini nga giya makatabang kanimo sa paghimo og haom sa sitwasyon nga kasinatian sa pagkat-on alang sa imong klase.

Mahinungdanong mga Bahin alang sa mga Kalihokan sa Pagkat-on

Adunay tulo ka mahinungdanong mga seksiyon alang sa matag kalihokan sa pagkat-on niini nga kurso: (1) pagtuon, (2) pagpraktis, ug (3) pagtakda og tumong. Ang mosunod nga mga giya makatabang kanimo sa paglakip niining importante nga mga seksiyon ngadto sa dugang nga mga kalihokan sa pagkat-on nga imong gihimo alang sa imong klase.

Pagtuon

Tinoa kon unsa ang tun-an sa mga tigkat-on

• Hain nga mga parapo ang gikan sa Isangyaw ang Akong Ebanghelyo ang imong idapit nga tun-an sa mga estudyante?

  • Ibutang sa hunahuna ang mga limitasyon sa oras. Sa kinatibuk-an, mas maayo nga makatutok og gamay nga seksiyon ug mas lawom kaysa mosulay sa pagtuon sa daghang materyal. Seguradoha ang pagbilin og taas nga oras sa pagpraktis ug paggamit.

• Aduna bay mga kasulatan o mga pamahayag gikan sa mga lider sa Simbahan nga mahimong gamiton sa pagsuporta o pagpauswag sa gitun-an sa mga estudyante gikan sa Isangyaw ang Akong Ebanghelyo?

Tinoa kon sa unsang paagi magtuon ang mga tigkat-on

• Sa unsang paagi nimo matabangan ang mga tigkat-on nga makakita sa kamahinungdanon niini nga seksiyon sa Isangyaw ang Akong Ebanghelyo? Aduna bay ehemplo, senaryo, pangutana, istorya, hulagway, personal nga kasinatian, o mubo nga bidyo nga makatabang sa pag-andam kanila sa pagkat-on?

• Unsa ang mga pangutana ang mahimo nimong ipangutana? (Irekord ang pipila ka pangutana nga makatabang sa mga estudyante sa pagsuhid sa ilang mga hunahuna ug mga pagbati.)

Ang mga sakop sa klase magtrabaho ba nga mag-inusara, dunay kauban, o pinaagi sa gamay nga grupo?

Ipraktis

• Unsa ang mahimo sa mga sakop sa klase aron mapraktis ang ilang nakat-onan? Pananglitan, mahimo nimong:

  • Hatagan ang mga tigkat-on og panahon sa pagpasabot o pagtudlo unsa ang ilang gitun-an sa ilang kaugalingong mga pulong.

  • Pagpresentar og usa ka senaryo ug hangyoa ang mga sakop sa klase sa paggamit sa unsay ilang nakat-onan sa pagtabang sa tawo nga anaa sa maong senaryo.

Pagtakda og tumong

Taposa ang kalihokan sa pagkat-on pinaagi sa pagdapit sa mga sakop sa klase sa pagtakda og tumong nga may kalabotan sa ilang nakat-onan. Ikonsiderar ang paghatag og pipila ka ehemplo sa posible nga mga tumong nga ilang mahimo. Dayon hatagi ang mga estudyante og panahon sa pagrekord sa ilang mga tumong.