Leksiyon 27 Materyal sa Pagpangandam sa Klase: Pagkaplag og Paglaom diha sa Kahayag ug Kinabuhi sa Kalibotan
“Leksiyon 27 Materyal sa Pagpangandam sa Klase: Pagkaplag og Paglaom diha sa Kahayag ug Kinabuhi sa Kalibotan,” Materyal sa Magtutudlo alang sa Si Jesukristo ug ang Iyang Walay Kataposang Ebanghelyo (2023)
“Leksiyon 27 Materyal sa Pagpangandam sa Klase,” Materyal sa Magtutudlo alang sa Si Jesukristo ug ang Iyang Walay Kataposang Ebanghelyo
Imahe
Kahayag sa Kalibotan, ni Howard Lyon
Leksiyon 27 Materyal sa Pagpangandam sa Klase
Pagkaplag og Paglaom diha sa Kahayag ug Kinabuhi sa Kalibotan
Bisan tuod kita gusto sa atong mga kinabuhi nga magmalipayon, ang panagsa nga mga pagbati sa kaguol ug kawalay paglaom sagad kanatong tanan. Kini nga mga pagbati moabot gikan sa sala, kahadlok, pagduhaduha, o pagkanawad-an. Kini mga yanong bahin sa atong mortal nga kasinatian. Samtang kamo magtuon, hunahunaa kon unsaon ninyo nga makakaplag og kalig-on diha ni Jesukristo, kinsa “mao ang kahayag, ang kinabuhi, ug ang paglaom sa kalibotan” (“Ang Buhi nga Kristo: Ang Pagpamatuod sa mga Apostoles,” https://www.churchofjesuschrist.org/study/scriptures/the-living-christ-the-testimony-of-the-apostles/the-living-christ-the-testimony-of-the-apostles?lang=ceb).
Seksiyon 1
Sa unsang paagi nga ang kahayag ug kinabuhi nga gihatag ni Jesukristo naglig-on kanako?
Gipanagna ni Isaias nga ang Mesiyas mahimong usa ka kahayag ngadto sa kalibotan (tan-awa sa Isaias 49:6; 60:1–3). Si Jesukristo nanghimatuod nga Siya mao ang gipanagna nga Mesiyas sa dihang Siya mipadayag, “Ako ang kahayag sa kalibutan: siya nga magasunod kanako dili gayod magalakaw sa kangitngit, hinonoa magabaton siya sa kahayag nga magahatag og kinabuhi” (Juan 8:12).
Si Presidente Dallin H. Oaks, magtatambag sa Unang Kapangulohan, mipasabot:
Imahe
Presidente Dallin H. Oaks
Si Jesukristo mao ang kahayag sa kalibotan tungod kay siya ang tinubdan sa kahayag nga mopalagsik sa atong salabotan, tungod kay ang iyang mga pagtulon-an ug ang iyang ehemplo nagdan-ag sa atong dalan, ug tungod kay ang iyang gahom nag-agni kanato sa pagbuhat og maayo. (“The Light and Life of the World,” Liahona, Ene. 1988)
Sa dihang si Jesukristo mipakita ngadto sa mga Nephite ug mga Lamanite Siya mipadayag, “Ug tan-awa, Ako mao ang kahayag ug kinabuhi sa kalibotan” (3 Nephi 11:11, tan-awa usab sa Mosiah 16:9). Si Presidente Oaks misulti kabahin sa tahas sa Manluluwas isip ang kinabuhi sa kalibotan:
Si Jesukristo mao ang kinabuhi sa kalibotan tungod sa iyang talagsaon nga pagkabutang sa unsay gitawag sa kasulatan nga “ang mahinungdanon ug mahangturon nga laraw gikan sa kamatayon” (2 Nephi 11:5). …
[Siya] mao ang kinabuhi sa kalibo tan tungod sa Iyang pagkabanhaw ug ang iyang pag-ula nagluwas kanato gikan sa pisikal ug espirituhanong kamatayon. (“The Light and Life of the World,” Liahona, Ene. 1988)
Si Sister Sharon Eubank, Unang Magtatambag sa Kinatibuk-ang Kapangulohan sa Relief Society, mipakigbahin og kasinatian nga naghulagway sa importansya ni Jesukristo ingon nga ang kahayag ug kinabuhi sa atong mga kinabuhi:
Imahe
Sister Sharon Eubank
Sa akong opisina diha sa Relief Society Building perpekto kaayong tan-awon ang Templo sa Salt Lake. Kada gabii, sama ka regular sa pagtakdo sa oras, ang mga suga sa gawas sa templo mosiga inig ka kilumkilom. Ang templo mao ang makanunayon, makapadasig nga banwag sa gawas gayod sa akong bintana.
Usa ka gabii niining miaging Pebrero, ang akong opisina wala damha nga nagpabiling dulom sa dihang misalop ang adlaw. Sa akong pagtambo sa bintana, ang templo ngitngit. Ang mga suga wala mosiga. Kalit kong mibati og kamahinoklogon. Dili nako makita ang mga tumoy sa templo nga akong malantawan kada gabii sulod na sa daghang katuigan.
Ang makakita og kangitngit diin akong gilauman nga makita ang kahayag nagpahinumdom nako nga usa sa mga nag-unang panginahanglanon nato aron molambo mao ang magpabiling konektado ngadto sa tinubdan sa kahayag—si Jesukristo. Siya ang tinubdan sa atong gahom, ang Kahayag ug Kinabuhi sa Kalibotan. Kon wala ang lig-ong koneksyon ngadto Kaniya, magsugod kita nga mamatay sa espirituhanong paagi. Kay nakahibalo niana, si Satanas mosulay sa pagpahimulos sa kalibutanong mga kalisod nga atong gisagubang. Naningkamot siya sa pagpaawop sa atong kahayag, gub-on ang koneksyon, putlon ang linya sa koryente, pasagdan kita nga nag-inusara diha sa kangitngit. (“Kristo: Ang Kahayag nga Nagdan-ag sa Kangitngit,” Liahona, Mayo 2019, 73)
Imahe
icon, palandonga
Palandonga agi og Pagpangandam alang sa Klase
Unsa nga mga panalangin ang inyong nasinati sa inyong kinabuhi sa dihang kamo mihimo og mga paningkamot sa pagkonektar ngadto sa Kahayag ug Kinabuhi sa Kalibotan? Unsa ang inyong mabuhat sa paghimo niana nga koneksyon nga mas malig-on?
Seksiyon 2
Sa unsa nga paagi nga ang pagtutok diha kang Jesukristo magdala kanako og paglaom?
Ang pagbansay sa hugot nga pagtuo diha ni Jesukristo isip ang Kahayag ug ang Kinabuhi sa Kalibotan makapanalangin sa atong mga kinabuhi sa daghang mga paagi. Usa niadto nga mga paagi mao ang paghatag kanato og paglaom.
Si Presidente Dieter F. Uchtdorf, kaniadto magtatambag sa Unang Kapangulohan, mipasabot kon unsaon sa kahayag ug kinabuhi ni Jesukristo pagdala og paglaom:
Imahe
Presidente Dieter F. Uchtdorf
Ang kahayag sa Dios tinuod. Kini maangkon natong tanan! Mohatag kini og kinabuhi sa tanang butang [tan-awa sa Doktrina ug mga Pakigsaad 88:11–13]. Kini adunay gahom sa pag-alim sa lawom nga samad. Kini ang tambal sa pag-inusara ug sakit sa atong mga kalag. Sa mga tudling sa kawalay paglaom, makatisok kini sa liso sa mas hayag nga paglaom. (“Ang Paglaom sa Kahayag sa Dios,” Liahona, Mayo 2013, 75)
Gikan sa Giya ngadto sa Mga Kasulatan atong mabasa: “Sa atong inadlaw nga pinulongan ang pulong nga [paglaom] kasagaran adunay pasumbingay sa pagkawalay kasigurohan. Sama pananglitan, mahimo kitang mosulti nga kita naglaom alang sa kausaban sa panahon o sa usa ka pagbisita gikan sa usa ka higala. Sa pinulongan sa ebanghelyo, hinoon, ang pulong nga paglaom sigurado, dili mausab, ug aktibo. Ang mga propeta nagsulti kabahin sa pagbaton og usa ka ‘malig-on nga paglaom’ (Alma 34:41) ug usa ka ‘buhing paglaom’ (1 Pedro 1:3)” (Giya ngadto sa mga Kasulatan, “Paglaom,” scriptures.ChurchofJesusChrist.org).
Samtang kamo maghunahuna mahitungod sa mga hagit nga inyong nasinati, hinumdomi nga si propeta Mormon mipuyo sa usa ka adlaw nga ang espirituhanong kangitngit mihari sa kinabuhi sa Nephite (tan-awa sa Mormon 1–6). Atol nining malisod nga mga panahon, mitudlo si Mormon kon unsaon sa pagdugang sa atong paglaom.
Imahe
icon, pagtuon
Pagtuon agi og Pagpangandam alang sa Klase
Basaha sa Moroni 7:40–42, ug pangitaa ang relasyon tali sa hugot nga pagtuo, paglaom, ug sa Pag-ula ni Jesukristo.
Si Elder David A. Bednar sa Korum sa Napulog Duha ka Apostoles mitudlo:
Imahe
Elder David A. Bednar
Ang pagsalig ug kompyansa diha ni Kristo ug andam nga pagsalig diha sa Iyang mga kaayo, kalooy, ug grasya mogiya ngadto sa paglaom, pinaagi sa Iyang Pag-ula, diha sa Pagkabanhaw ug kinabuhi nga dayon (tan-awa sa Moroni 7:41). Ang mao nga hugot nga pagtuo ug paglaom nagdapit sa atong mga kinabuhi sa tam-is nga kalinaw sa konsyensya nga atong gipangandoy. (“Busa Sila Mihupay sa Ilang mga Kahadlok,” Liahona, Mayo 2015, 47)
Sama ni Mormon, si propeta Ether mipuyo usab sa panahon nga mahagiton (tan-awa sa Ether 11). Ug sama ni Mormon, si Ether mitudlo nga bisan sa labing malisod nga mga panahon kita makakaplag og paglaom diha ni Jesukristo.
Imahe
icon, pagtuon
Pagtuon agi og Pagpangandam alang sa Klase
Basaha ang Ether 12:4, pangitaa kon sa unsang paagi ang paglaom diha ni Kristo makaapekto sa atong inadlaw nga mga kinabuhi.
Aron sa pagkat-on pa og dugang mahitungod sa gahom sa paglaom, basaha ang mosunod nga mga pamahayag ni Presidente Uchtdorf:
Imahe
Presidente Dieter F. Uchtdorf
Ang paglaom usa ka gasa sa Espiritu [tan-awa sa Moroni 8:26]. …
[Kini mao] … ang kanunayng pagsalig nga ang Ginoo motuman sa Iyang saad ngari kanato. Kini ang kamasaligon nga kon kita magkinabuhi sigon sa mga balaod sa Dios ug sa mga pulong sa mga propeta karon, kita makadawat sa gitinguhang mga panalangin sa umaabot. Kini mao ang pagtuo ug pagdahom nga ang atong mga pag-ampo pagatubagon. Makita kini diha sa pagsalig, positibong hunahuna, kadasig, ug mapailubong pagpadayon. …
Bisan pa kon unsa ka walay hinungdan ang yugto sa atong mga kinabuhi tan-awon karon, tungod sa kinabuhi ug sakripisyo ni Jesukristo, kita makalaom ug makapaniguro nga ang kataposan nga bahin sa basahon sa atong mga kinabuhi labaw pa kay sa atong kinadak-ang mga pagdahom. (“Ang Walay Kinutoban nga Gahom sa Paglaom,” Liahona, Nob. 2008, 23)
Imahe
icon, pagtuon
Pagtuon agi og Pagpangandam alang sa Klase
Pagbasa og usa o daghan pa sa mosunod nga mga asoy sa kasulatan, o pagpili og usa sa inyong kaugalingon. Pangita og ebidensiya nga ang hugot nga Pagtuo diha sa Ginoo makadala kanato og paglaom. Pangandam sa pagpakigbahin unsay inyong nakat-onan diha sa inyong klase.
Tumutuo nga mga Nephite ug mga Lamanite mipaabot sa pagkatawo ni Kristo: 3 Nephi 1:4–15
Imahe
icon, palandonga
Palandonga agi og Pagpangandam alang sa Klase
Unsa ang inyong nakat-onan mahitungod sa paglaom gikan sa tudling sa kasulatan o mga tudling nga inyong natun-an? Samtang kamo naningkamot sa espirituhanong gasa sa paglaom, unsa ang inyong mabuhat sa pagdapit niini nga gasa nganha sa inyong kinabuhi?
