His Hand Is Stretched Out Still [Ang Iyang Kamot sa Gihapon Nagtuyhad Pa], ni Elizabeth Thayer

Leksiyon 7 Materyal sa Pagpangandam sa Klase

Paghangop sa Kaangayan, Kaluoy ug Gugma sa Dios

Si Moises mitudlo nga si Jehova “putli ug matarong” (Deuteronomio 32:4). Miingon usab siya nga ang Ginoo “maloloy-on ug mapuanguron” (tan-awa sa Exodo 34:6). Nahunahunaan ba ninyo kon sa unsang paagi nga ang Langitnong Amahan ug si Jesukristo parehong makiangayon ug maloloy-on? Kini nga balaang mga hiyas wala lamang magtudlo bahin sa gugma sa Dios alang ninyo apan naghatag usab kini og ehemplo kon unsaon ninyo sa pagpakita og gugma ngadto sa uban.

Pahinumdom: Diha sa mga kasulatan, ang titulo nga Dios posibling nagpasabot ngadto sa Langitnong Amahan o ni Jesukristo. Parehong hingpit nga nagbaton og balaanong mga hiyas. Bisan unsa ang atong makat-onan mahitungod sa Usa parehas ra usab kini sa atong makat-onan mahitungod sa Usa (tan-awa sa Juan 14:9; 17:21).

Seksiyon 1

Unsa ang ikatudlo sa kaangayan sa Dios ngari kanako mahitungod sa Iyang gugma?

Ang pipila ka tawo naglantaw sa “Dios sa Daang Tugon” isip nagpakita og lahi nga kinaiya kon itandi sa “Dios sa Bag-ong Tugon.” Ilang nakita ang Dios sa Daang Tugon, nga si Jehova, isip mapanimaslon, mapugsanon, ug mabangis. Ug ilang nakita ang Dios sa Bag-ong Tugon, si Jesukristo, nga mabination, mapasayloon, ug maloloy-on. Apan sigon sa inyong nakat-onan sa miagi nga leksiyon, nga “Si [Jesukristo] mao ang Halangdong Jehova sa Daang Tugon, [ug] ang Mesiyas sa Bag-ong Tugon” (“Ang Buhi nga Kristo: Ang Pagpamatuod sa Buhing mga Apostoles,” ChurchofJesusChrist.org). Sa unsang paagi nga ang mao gihapon nga Dios parehong matawag nga estrikto ug mabination, masuk-anon ug mainantuson, makiangayon ug maloloy-on?

Kining ingon og nagkasukwahi nga mga hiyas mao ang mga ehemplo sa giladmon ug kalapdon sa kinaiya sa Dios. Ang pagkasabot kon giunsa Niya sa pagbaton niini nga mga kinaiya magtugot kanato nga mas mosalig Kaniya. Hunahunaa ang mga problema nga tingali atong masugatan sa atong kinabuhi kon kita maghunahuna—o molantaw sa balaang mga hiyas sa Dios—nga Siya parehong patas ug estrikto o manggiloy-on ug mapasayloon. Samtang magtuon ka sa mga kasulatan, hunahunaa kon sa unsang paagi nga ang tanan nga hiyas sa Dios may kalabotan sa Iyang hingpit nga gugma.

Sugdan nato diha sa hiyas nga kaangayan. Unsa nga mga pagtulon-an ang mosulod sa inyong hunahuna tungod niini nga pulong? Usahay diha sa mga kasulatan ang kaangayan sa Dios daw bangis pamation. Ang pipila ka asoy diha sa Daang Tugon migamit og mga pulong sama sa kalagot ug kasuko sa paghulagway sa kaangayan sa Dios ngadto sa mga malapason ug daotan (tan-awa sa Isaias 1:4; Jeremias 32:30). Sama pananglit, tungod sa kamasinupakon sa katawhan, ang Sodom ug Gomoragilaglag pinaagi sa nagsiga nga asupre gikan sa langit (tan-awa sa Genesis 19:15–25), ang balay ni Israel gitibulaag sa mga Taga-Asiria (tan-awa sa 2 Mga Hari 15:27–31), ug ang nasod sa Juda gibihag sa mga Taga-Babelonia (tan-awa sa 2 Mga Hari 24:10–16). Sa daklit nga pagkasulti, ang daotan sa kasagaran makasinati sa kabug-at sa kaangayan sa Dios.

Destruction of Jerusalem [Kalaglagan sa Jerusalem], ni Gary L. Kapp

Kon magbasa kita mahitungod sa kasuko sa Dios, dili angay nga kita maghunahuna nga ang atong mga pagbati ug mga ekspresyon sa kasuko, isip napukan nga katawhan, susama ra sa matarong nga kasuko sa Dios. Sigon sa gipahinumdom ni propeta Isaias kanato nga, ang “Akong mga hunahuna dili sama sa inyong hunahuna, ug ang akong mga laraw dili sama sa inyong mga laraw, nag-ingon ang Ginoo” (Isaias 55:8).

Si Presidente Dallin H. Oaks sa Unang Kapangulohan mihatag sa mosunod nga panglantaw:

Presidente Dallin H. Oaks

“Atong mabasa kanunay diha sa Biblia ug diha sa moderno nga mga kasulatan karon ang kalagot sa Dios sa mga daotan ug sa paglihok sa Iyang nagdilaab nga kasuko batok niadtong kinsa molapas sa Iyang mga [balaod]. Sa unsang paagi nga ang kalagot ug ang nagdilaab nga kasuko usa ka ebidensya sa Iyang gugma? … Ang gugma sa Dios hingpit kaayo nga Siya mahigugmaong nagmando kanato sa pagtuman sa Iyang mga sugo tungod kay Siya nasayod nga pinaagi lamang sa pagsunod sa Iyang mga balaod nga kita mahimong hingpit sama Kaniya. Tungod niini nga katarongan, ang kalagot ug ang nagdilaab nga kasuko sa Dios dili usa ka pagsupak sa Iyang gugma apan usa ka ebidensya sa Iyang gugma. (“Gugma ug Balaod,” Liahona, Nob. 2009, 27)

Ang sakto nga panahon sa kaangayan sa Dios usa usab ka timailhan sa Iyang gugma alang sa Iyang mga anak. Gamita ang sugilanon ni Noe ug sa Lunop, nga usa ka sanglitanan. Sa kapanahonan ni Noe ang “yuta daotan sa atubangan sa Dios” (Moises 8:28). Ang kabayolente nagkatap ug ang katawhan padayon nga naghimo og daotan. Sulod sa mga 120 ka tuig si Noe mipahimangno sa katawhan nga kon dili sila maghinulsol, mangamatay sila sa lunop (tan-awa sa Moises 8:17–30). Ilang gibaliwala ang mapinanggaong hangyo sa Dios, ug tanan gawas ni Noe ug sa iyang pamilya nangamatay sa Lunop (tan-awa sa Genesis 8:15–21).

arka nga anaa sa dagat

Sa unang pagtan-aw kini nga hitabo tingali makita lamang nga usa ka pagpangalagad sa higpit ug estrikto nga kaangayan. Apan gikan sa panan-awon nga nadawat ni propeta Enoch sa panahon ni Noe, nakabaton kita og makahuloganong mga pagtulon-an sa relasyon tali sa kaangayan sa Dios ug sa Iyang gugma.

icon, pagtuon

Pagtuon agi og Pagpangandam alang sa Klase

Basaha ang Moises 7:28–29, 32–33, 37, ug pangitaa ang ebidensiya sa dako nga gugma sa Dios bisan niadtong kinsa dili mopatalinghog sa Iyang mga sugo.

Niining makapatandog nga talan-awon, si Elder Jeffrey R. Holland sa Korum sa Napulog Duha ka Apostoles miingon:

Elder Jeffrey R. Holland

Kanang nag-inusara, makatandog nga talan-awon nakahatag og labaw pa sa pagtudlo sa tinuod nga kinaiya sa Dios kay sa mapadangat sa bisan unsang teyolikanhong sinulat mahitungod sa relihiyon. …

Pagkanindot sa talan-awon nga naghulagway nga ang Dios nagpakabana gayod sa atong kinabuhi … Unsa ka sayon ang paghigugma sa usa ka tawo kinsa tinagsa-tagsang naghigugma kanato! (“The Grandeur of God,” Liahona, Nob. 2003, 72)

Samtang maghunahuna kamo kon unsa ang ipasabot diha ninyo bahin sa gugma sa Dios, paghunahuna og labing maayo nga paagi sa paghulagway niini ngadto sa uban. Si Elder D. Todd Christofferson sa Korum sa Napulog Duha ka Apostoles mitudlo:

Elder D. Todd Christofferson

Anaay daghang paagi sa paghulagway ug pagsulti bahin sa balaang gugma. Usa sa mga termino nga sagad natong mabati karon mao nga ang gugma sa Dios “walay kondisyon.” Samtang sa usa ka pagsabot tinuod kana, ang paghulagway nga walay kondisyon dili makita sa kasulatan. Kondili, ang Iyang gugma gihulagway sa kasulatan isip “dako nga katingalahan nga gugma” [Doktrina ug mga Pakigsaad 138:3], “gugmang hingpit” [1 Juan 4:18; Moroni 8:16], “matubsanon nga gugma” [Alma 5:26], ug “gugma nga walay paglubad” [Jeremias 31:3]. Mas maayo kini nga mga termino tungod kay ang pulong nga walay kondisyon maghatod og sayop nga mga impresyon mahitungod sa balaang gugma, sama sa, mouyon ra ang Dios sa tanang butang ug dili ra kita hukman kay ang Iyang gugma walay kondisyon, o ang Dios walay pangayoon gikan kanato tungod kay ang Iyang gugma walay kondisyon, o ang tanan luwas na sa langitnong gingharian sa Dios tungod kay ang Iyang gugma walay kondisyon. Ang gugma sa Dios walay sukod ug kini mohangtod, apan kon unsay kahulogan niini sa matag usa kanato mag-agad kon unsaon nato sa pagsanong ang Iyang gugma. (“Magpabilin Kamo sa Akong Gugma;” Liahona, Nob. 2016, 48)

icon, pamalandong

Pamalandong agi og Pagpangandam alang sa Klase

Unsaon nimo sa pagpasabot ang koneksiyon tali sa kaangayan sa Dios ug sa Iyang gugma alang sa Iyang mga anak?

Seksiyon 2

Unsa ang ikatudlo ngari nako sa kaluoy sa Ginoo mahitungod sa Iyang gugma?

Maanindot ang pagbati nga ang Dios mopanalangin kanato kon kita motuman. Apan lisod ang pagsinati sa mga sangpotanan sa atong kaugalingon alang sa dili maayong mga pagpili. Ug kon grabe man ang mga sangpotanan, makalilisang kini. Sa ingon niana nga mga panahon, tingali makapangaliya kita sa Ginoo og kaluoy.

Sa daghan pang uban nga kahimtang, hinoon, kadtong mga nakasala dili makaamgo sa panginahanglan og kaluoy sa Dios. Hunahunaa ang sitwasyon ni Corianton, anak nga lalaki ni Alma nga Batan-on. Human gibiyaan ang iyang misyon ug mihimo og seryosong mga sala, si Corianton mibati nga “walay kaangayan” nga ang usa ka makasasala silotan ug masinati ang pagkauyamot (tan-awa sa Alma 42:1).

icon, pagtuon

Pagtuon agi og Pagpangandam alang sa Klase

Basaha ang Alma 42:15, 22, 24–25, ug pangitaa unsay gitudlo ni Alma mahitungod sa, kaangayan, kaluoy, ug sa Pag-ula ni Jesukristo. (Pahinumdom: Ang tawo nga nagmahinulsulon mao ang “usa nga naghinulsol sa sala; usa nga nagmasulob-ob sa iyang mga kalapasan” [Webster’s Dictionary (1828), “Penitent”].)

Christ in Gethsemane [Si Kristo sa Getsemani], ni Harry Anderson

Si Jesukristo, uban sa lawom nga personal nga gugma alang ninyo ug sa tanan, nagbarog taliwala kanato ug sa kaangayan nga nagahulat kanato (tan-awa sa Mosiah 15:9). Gibayaran na Niya ang dako kaayo nga bugti sa atong mga sala. Ug gusto Siya nga motunol og kaluoy ngadto sa nagmahinulsolon (tan-awa sa Doktrina ug mga Pakigsaad 19:16–18). Si Presidente Dieter F. Uchtdorf, nga kaniadto magtatambag sa Unang Kapangulohan, mitudlo:

Presidente Dieter F. Uchtdorf

Dili kita makaangkon sa atong agianan ngadto sa langit; ang gipangayo sa hustisya nagbarog isip babag, diin kita walay gahom sa pagbuntog sa atong kaugalingon.

Apan ang tanan wala mawagtang. …

Ang atong mga sala, bisan pa kini mapula, kini pagapution ingon sa nieve. Tungod kay ang atong minahal nga Manluluwas “naghatag sa iyang kaugalingon ingon nga lukat alang sa tanan” [1 Timoteo 2:6], sa usa ka agianan ngadto sa Iyang mahangtorong gingharian nga giandam kanato. (“Ang Gasa sa Grasya,” Liahona, Mayo 2015, 108)

Hunahunaa pag-usab ang mahitungod sa panan-awon ni Enoch bahin sa Lunop. Nahibaloan ni Enoch nga didto sa kalibotan sa espiritu, bisan ang mga dili masulondon kinsa nangamatay sa Lunop sa kataposan moadto ug mobarog “sa tuo nga kamot sa Dios”kon sila maninguha sa pagbaton og hugot nga pagtuo ni Jesukristo ug maghinulsol sa ilang mga sala (Moises 7:57; tan-awa sa Moises 7:38, 55–56; Doktrina ug mga Pakigsaad 138:6–8, 28–37).

Si Elder Lynn G. Robbins sa Seventy mitudlo kon sa unsang paagi nga ang grasya sa Ginoo maghatag kanato og daghang kahigayonan nga mag-usab:

Elder Lynn G. Robbins

Matingala kita sa grasya sa Manluluwas sa paghatag nato og ikaduhang higayon sa pagbuntog sa sala, o [mga] kapakyasan sa kasingkasing.

Walay usa nga mas nagtinguha sa atong kalamposan kay sa Manluluwas. …

Ang pagkahibalo nga ang higpit ug pig-ot nga dalan adunay daghang mga pagsulay ug nga ang mga kapakyasan mamahimong inadlaw nga panghitabo alang nato, ang Manluluwas mibayad og walay kataposang kantidad aron sa paghatag nato og daghang kahigayonan kutob sa mahimo aron malampuson kitang makapasar sa atong mortal nga pagsulay. …

Tungod kay kita dili gusto nga mahuman hangtod nga kita mahimong sama sa atong Manluluwas, kinahanglan kitang mopadayon nga mobarog matag higayon nga kita madagma, uban sa tinguha nga magpadayon sa pagtubo ug pag-uswag bisan pa sa atong mga kahuyang. (“Kon Dili Kapitoan Ka Pito,” Liahona, Mayo 2018, 22, 23)

icon, pamalandong

Pamalandong agi og Pagpangandam alang sa Klase

Unsa ang imong mga hunahuna ug mga pagbati alang ni Jesukristo, nasayod nga Siya mitagbaw sa mga gipangayo sa kaangayan aron ikaw makahinulsol ug makadawat og kaluoy? Unsay imong mahimo aron makapakita sa imong pasalamat alang sa maulaon nga sakripisyo nga Iyang gihimo alang kanimo?

Gusto pa og Dugang? (Opsiyonal)

Asa ako makakat-on pa og dugang mahitungod sa kaangayan ug kaluoy sa Dios?

Presidente Russell M. Nelson

Elder D. Todd Christofferson

Si Elder Christofferson, sa iyang pakigpulong nga “Ang Gugma sa Dios” (Liahona, Nob. 2021, 16–19), nagtudlo nga “ang gugma sa Dios dili mopalabay og sala hinoon kini, nagtanyag og katubsanan.”