Leksiyon 7 Materyal sa Magtutudlo

Paghangop sa Kaangayan, Kaluoy ug Gugma sa Dios

Gikan sa Lectures on Faith atong makat-onan nga aron makagamit sa hugot nga pagtuo sa Dios kita nagkinahanglan nga adunay “eksakto nga ideya sa Iyang kinaiya ug mga hiyas” ([1985], 38). Niini nga leksiyon ang mga estudyante adunay oportunidad sa pagpasabot kon sa unsang paagi nga ang mga hiyas sa Dios sa kaangayan ug kaluoy maoy mga pagpakita sa Iyang balaan nga gugma. Sila usab mokonsiderar unsay ilang mahimo aron makapakita sa ilang pagpasalamat sa hingpit nga gugma sa Dios ug sa makatubos nga sakripisyo sa Manluluwas.

Mga Sugyot alang sa Pagtudlo

Sila si Enoch ug Alma nagtudlo mahitungod sa balaang mga hiyas sa kaangayan, kaluoy, ug gugma.

Mahimong sugdan nimo kini nga leksiyon pinaagi sa pagpakita sa mosunod nga pamahayag:

• Sa Daang Tugon, si Jehova nangalagad og mapait ug estrikto nga kaangayan. Sa Bag-ong Tugon, si Jesukristo mapasayloon ug manggiloy-on. Mas pabor ko nga motuo sa Dios sa Bag-ong Tugon kay sa Dios sa Daang Tugon.

• Unsa nga mga problema ang imong nakita dinhi niini nga pamahayag?

• Nganong importante ang pagsabot ug ang pagdawat sa kaangayan ug kaluoy isip balaan nga mga hiyas?

• Unsa nga mga problema ang atong mamugna sa atong kaugalingon ug sa uban kon kita magpokus sa kaangayan ug mobaliwala sa kaluoy o magpokus sa kaluoy ug mobaliwala sa kaangayan?

Ikonsiderar nga isulat sa pisara ang kaangayan, kaluoy, ug gugma. Dapita ang mga estudyante sa pagporma og ginagmay nga mga grupo. Pasabta nga hatagan sila og mga handout nga adunay mga instruksiyon nga makatabang nila sa pagpalawom sa ilang panabot bahin sa relasyon tali sa kaangayan, kaluoy, ug gugma sa Dios.

Ang Kaangayan ug Gugma sa Dios

Materyal sa Magtutudlo alang sa Si Jesukristo ug ang Iyang Walay Kataposang Ebanghelyo—Leksiyon 7

Sa dili pa ka magsugod sa imong grupo nga diskusyon, ipabasa og dungan ang mosunod nga tip sa diskusyon:

Pagpalambo sa Atong Grupo nga mga Diskusyon

Paningkamoti ang balanse nga partisipasyon. Mas makakat-on kita kon kita maminaw gikan sa tanang sakop, dili lang kay sa usa o duha. Kon natural ang imong kamahugoy-hugoyon ug katabian, palihog matngoni ang dili pagsapaw sa mga diskusyon, pagbalda, o pagsapaw og sulti sa uban. Kon natural ang imong kahilomon ug dili kaayo tabian, palihog pagmaisogon ug motingog aron ang uban makakat-on gikan nimo. Ihikling ang paghunahuna nga ang imong opinyon dili importante.

Magdungan sa pagbasa og kusog sa mosunod nga sitwasyon:

Si Zane mibati nga nabug-atan sa mga balaod ug sa mga sugo sa Dios. Sulod sa taas nga panahon, mibati siya nga dili gayod igo ang iyang kamaayo ug kanunayng mapakyas. Nawad-an siya og kadasig tungod sa iyang kakulang sa “paglambo,” bag-ohay lang siya nga natumpawak sa sunodsunod nga grabeng kalapasan. Gibati niya ang pagkawala sa Espiritu. Dili na siya takos nga magbaton og rekomend sa templo. Naghunahuna siya kon gihigugma pa ba kaha siya sa Dios, tungod sa dili maayo niyang mga pagpili. Bag-ohay lang niyang gisultihan ang iyang higala nga si Maia, “Wala nay bili ang akong kinabuhi. Sigurado ko nga napul-an na kanako ang Dios.” Agig tubag si Maia miingon, “Ayaw kabalaka bahin niana. Ang Dios nahigugma kanato nga walay kondisyon ug Siya moluwas kanimo bisan unsa pay imong nabuhat. Mao kana ang tuyo sa Pag-ula ni Jesuskristo.”

Rebyoha og kadali ang mga kondisyon sa wala pa ang Lunop. Dayon rebyoha ang Moises 7:28–29, 32–33, 37, ug pangitaa kon unsay nakat-onan ni Enoch mahitungod sa kinaiyahan sa Dios gikan sa pagtan-aw Kaniya nga nakakita sa Iyang masinupakon nga mga anak nga nag-antos. Dayon hisgoti ang mosunod nga mga pangutana:

• Unsang mga kamatuoran gikan niini nga mga bersikulo ang makatabang ni Zane nga makaamgo nga ang Langitnong Amahan nahigugma kaniya bisan og nasupak niya ang mga sugo? Sa unsang paagi kini nga ang kahibalo makapalambo sa relasyon ni Zane ngadto sa Langitnong Amahan? (Mahimo nimong basahon ang pamahayag ni Elder Jeffrey R. Holland sa seksiyon 1 sa materyal sa pagpangandam isip kabahin niini nga diskusyon.)

• Sa unsang paagi nga ang kaangayan sa Dios, nga usahay ipakita pinaagi sa Iyang kapungot o kasuko, usa ka ebidensiya sa Iyang gugma? (Ikonsiderar ang pagbasa og dungan sa pamahayag ni Presidente Dallin H. Oaks sa seksiyon 1 sa materyal sa pagpangandam.) Kon dili makiangayon ang Dios, sa unsang paagi nga kini makapahuyang sa atong hugot nga pagtuo Kaniya?

• Unsa kaha ang maghatag og sayop nga pagsabot mahitungod sa panglantaw ni Maia bahin sa gugma sa Dios? (Tingali makatabang ang pagbasa sa pamahayag ni Elder D. Todd Christofferson sa seksiyon 1.) Unsa kaha ang pipila sa mas maayong paagi sa paghulagway sa gugma sa Dios? Sa unsang mga paagi nga ikaw nakasinati sa gugma sa Dios?

© 2023 pinaagi sa Intellectual Reserve, Inc. All rights reserved.

Ang Kaangayan ug Gugma sa Dios

Materyal sa Magtutudlo alang sa Si Jesukristo ug ang Iyang Walay Kataposang Ebanghelyo—Leksiyon 7

handout sa magtutudlo

Human sa paghatag og daghang oras alang sa grupo nga diskusyon, mahimo nimong dapiton ang mga estudyante sa pagpaambit og mga kamatuoran o mga pagtulon-an nga gibati nila nga importante kaayo sa ilang diskusyon sa grupo.

Mahimo nimong ipadayon ang paghisgot sa mga panglantaw ni Zane ug Maia mahitungod sa Dios pinaagi sa daklit nga paghisgot sa mga pagpili nga gihimo ni Corianton samtang nagserbisyo og misyon (tan-awa sa Alma 39:1–5). Rebyoha ang Alma 42:15, 22, 24–25 aron makakat-on sa unsay gitudlo ni Alma ngadto ni Corianton mahitungod sa kaangayan, kaluoy, ug kang Jesukristo.

• Sa unsa nga paagi nga ang eksaktong pagsabot sa Pag-ula ni Jesukristo makatabang ni Zane nga mausab ang unsay iyang pagtan-aw sa iyang mga kakulangan, mga sayop, ug mga sala? Sa unsang paagi kaha nga ang kinaiya ug mga buhat ni Zane mausab kon makakat-on siya sa unsay ipasabot sa “tinuod nga mahinulsolon”? (tan-awa sa Alma 42:24).

• Unsay imong isulti nga maghatag og sayop nga pagsabot mahitungod sa panglantaw ni Maia bahin sa Pag-ula ni Jesukristo? Unsa ang imong ipahiangay mahitungod sa iyang panglantaw aron mas mahiuyon kini sa mga pagtulon-an ni Alma?

• Sa unsang paagi kaha mausab ang kinabuhi ni Zane kon minosan lang niya ang pagpokus sa iyang kaugalingong mga kapakyasan ug dugangan ang pagpokus ngadto sa tinguha sa Manluluwas alang sa paghatag og ikaduhang higayon? (Mahimo nimong rebyohon ang mga pamahayag ni Presidente Dieter F. Uchtdorf ug Elder Lynn G. Robbins diha sa seksiyon 2 sa materyal sa pagpangandam.) Sa unsang paagi nga ang pagpokus ngadto sa pagpailob ug kaluoy sa Manluluwas mopanalangin sa imong kinabuhi?

Aron sa pagtapos sa klase mahimo nimong ipakita ang mosunod nga mga kamatuoran uban sa mga pangutana nga may kalabotan niini. Dapita ang mga estudyante sa pagpili og usa niini nga mga kamatuoran ug dayon irekord ang ilang mga hunahuna ug mga pagbati agig tubag sa mga pangutana:

• Ang Dios mobati og labihan kasubo kon kita mag-antos tungod sa atong pagkadili masulondon. (Tan-awa sa Moises 7:37.)

• Unsay imong mga hunahuna o mga pagbati samtang maghunahuna ka mahitungod sa pagbakho sa Langitnong Amahan kon mag-antos ka sa imong pagkadili masulondon? Unsay imong mahimo aron ikapakita ang imong pasalamat alang sa Iyang hingpit nga pagpakabana ug gugma?

• Pinaagi sa Iyang Pag-ula, si Jesukristo mitagbaw sa mga gipangayo sa kaangayan aron kita makahinulsol ug makadawat og kaluoy. (Tan-awa sa Alma 42:24.)

• Unsa ang imong mga hunahuna ug mga pagbati alang ni Jesukristo nga mitagbaw sa mga gipangayo sa kaangayan aron ikaw makahinulsol ug makadawat og kaluoy? Unsay imong mahimo aron makapakita sa imong pasalamat alang sa makatubos nga sakripisyo nga Iyang gihimo alang kanimo?

Alang sa Sunod nga Higayon

Atol niini nga semana, ikonsiderar ang pagpadala sa mosunod nga mensahe, o sa usa nga imong gihimo, ngadto sa imong mga estudyante: Samtang magbasa ka sa materyal sa pagpangandam alang sa leksiyon 8, paghunahuna og lahi nga mga paagi nga si Jesukristo makatabang (motabang o mosuporta) nimo ug sa imong mga gihigugma.