Learn about Jesus [Magkat-on mahitungod ni Jesus], ni Dan Burr

Leksiyon 8 Materyal sa Pagpangandam sa Klase

Pagdawat kang Jesukristo isip ang Gisaad nga Mesiyas

Paghunahuna og usa ka higayon sa dihang nakasinati ka og pipila ka matang sa pisikal, mental, emosyonal o espirituwal nga hagit. Diin ka nangayo og panabang? Ang karaang mga propeta mipamatuod nga ang Mesiyas moanhi aron sa paghupay, paglig-on, ug pag-ayo kanato. Samtang magtuon ka sa pipila niining sagrado nga mga panagna, ikonsiderar kon sa unsang paagi nga si Jesukristo, ang Mesiyas, makatabang kanimo.

Seksiyon 1

Sa unsang paagi nga ang pagdawat kang Jesukristo isip ang Mesiyas maghatag kanako og kaayohan?

Sama nga kita nagbantay alang sa Ikaduhang Pag-anhi sa Ginoo, ang katawhan sa Pakigsaad sa Daang Tugon mahinamon nga nagpaabot sa unang pag-anhi sa Mesiyas, ang tigluwas. Sumala pa sa mga propeta sa Daang Tugon, ang Mesiyas usa sa kaliwatan ni Haring David ug moluwas sa Iyang katawhan. “Diha sa Bag-ong Tugon ang tigluwas mao ang gitawag og Kristo, nga katumbas sa pinulongan nga Gresyanhon sa Mesiyas” (Ang Giya ngadto sa mga Kasulatan, “Mesiyas”).

Si Isaias misulat og pipila ka panagna mahitungod sa Mesiyas ug sa Iyang misyon (tan-awa sa Isaias 9:6; 7:14–15; 11:1–9; 35:5; 51:4–8; 52:9–10).

icon, pagtuon

Pagtuon agi og Pagpangandam alang sa Klase

Basaha ang Isaias 61:1–3, ug ikonsiderar ang pagmarka sa mga pulong o mga hugpong sa pulong nga naghulagway sa Mesiyas ug sa Iyang misyon. (Pahinumdom: Sa karaang panahon, ang mga abo iwisik-wisik diha sa mga ulo sa pagpahayag og kasubo atol sa mga panahon sa kasubo ug pagbangotan. Nahimo na nga kustombre ang pag-andam alang sa kasaulogan pinaagi sa pagdihog og lana sa kaugalingon ug pagsinina og sapot alang sa kasaulogan. Ang mga kahoy sa kasagaran maoy gigamit nga mga simbolo sa katawhan.)

Si Elder Jeffrey R. Holland sa Korum sa Napulog Duha ka Apostoles miingon mahitungod sa Isaias 61:1–3, “Kana nga mga bersikulo nag-una isip labing makatandog ug makahuloganon nga nahisulat sukad, ilabi na sa paghatag og panabot bahin sa tinuod nga kahulogan niini sa Pagka-Mesiyas” (Christ and the New Covenant [1997], 89).

The Prophet Isaiah Foretells Christ’s Birth [Si Propeta Isaias Nanagna sa Pagkatawo ni Kristo], ni Harry Anderson

Samtang ang ingon niana nga mga panagna naghatag sa mga Judeo og paglaom ug mga ekspektasyon sa pagkaluwas, atol sa kapanahonan sa Bag-ong Tugon daghan “ang nagpaabot sa usa ka tigluwas gikan sa Romano nga gahom ug sa usa ka dako nga nasudnon nga kauswagan” (Ang Giya ngadto sa mga Kasulatan, “Mesiyas,” scriptures.lds.org). Dihang wala himoa ni Jesus kini nga mga ekpektasyon, daghan ang misalikway sa Iyang pagpangangkon nga mao ang dugay nang gisaad nga Mesiyas.

Jesus in the Synagogue at Nazareth [Si Jesus nga anaa sa Sinagoga sa Nazaret], ni Greg K. Olsen

Sama pananglit, sa pagsugod sa Iyang pangalagad, si Jesus mipauli gikan sa Iyang lungsod nga gipuy-an sa Nazaret ug mitambong sa sinagoga atol sa Igpapahulay. Mitindog Siya aron magbasa gikan sa mga kasulatan, giabli ang linukot nga papel [scroll], ug gibasa og kusog ang Isaias 61:1–2. Siya dayon mipahayag nga Siya ang katumanan niini nga Mesiyanikanhong panagna (tan-awa sa Lucas 4:16–21). Kadtong mga nanambong nakalitan, nangasuko, ug misulay sa pagpatay Kaniya (tan-awa sa Lucas 4:22–30).

Sama sa katawhan sa Nazaret, matag usa kanato kinahanglan nga mohukom kon kita modawat ba ni Jesus isip ang Mesiyas. Nagpamatuod sa personal nga matang sa mesiyanikanhong misyon sa Ginoo, si Elder Gerrit W. Gong sa Korum sa Napulog Duha ka Apostoles miingon:

Elder Gerrit W. Gong

Buhi Siya—dili lang kaniadto, apan karon, dili para sa uban, apan sa tanan. Mianhi Siya ug moanhi aron sa pag-ayo sa nasakitan, paghaw-as sa mga nabilanggo, pag-ayo sa mga buta, ug paghatag og kagawasan sa mga nasamaran [tan-awa sa Lucas 4:18]. Kana para kanatong tanan. Ang iyang makatubos nga mga saad magamit, bisan unsa pay atong kagahapon, atong karon, o mga kabalaka sa atong umaabot. (“Hosana ug Aleluya—Ang Buhi nga si Jesukristo: Ang Pinakaimportanting Bahin sa Pagpahiuli ug Pasko sa Pagkabanhaw,” Liahona, Mayo 2020, 53)

icon, pamalandong

Pamalandong agi og Pagpangandam alang sa Klase

Giunsa sa Manluluwas sa pagtabang kanimo sa dihang mibati ka nga nasakitan o nakasinati og nasamaran nga kalag? Kon dili ka sigurado unsaon sa pagtubag kini nga pangutana, hunahunaa kon ngano kaha nga importante ang pagtinguha sa Iyang tabang ug sa makaayo nga gahom sa imong kinabuhi.

Seksiyon 2

Unsa ang gihimo sa Mesiyas nga nakapahimo Kaniya nga moayo ug motabang kanako?

Ikaw lagmit nahibalo pinaagi sa personal nga kasinatian bisan gamay mahitungod sa pag-antos ug kasakit. Ug tingali nakita nimo kini diha sa kinabuhi sa uban sa imong palibot. Sulayi sa paghunahuna kon unsa kaha ang gibati ni Jesukristo nga misinati ang tanan nga tawhanong pag-antos—pisikal, emosyonal, ug espirituwal nga kasakit, alang sa tanang katawhan sa tibuok kapanahonan, lakip kanimo.

Ang Isaias 53 mao ang usa sa labing puno sa pagtulon-an nga mga pagpadayag diha sa mga kasulatan mahitungod sa pag-antos ni Jesukristo alang kanato. Gani, si Elder Holland miingon nga kini “ang labing halangdon, kinatas-an ug kinadaghanan og pulong nga pamahayag mahitungod sa kinabuhi, kamatayon, ug makatubos nga gahom sa Ginoo nga si Jesukristo” (Christ and the New Covenant [1997], 89).

icon, pagtuon

Pagtuon agi og Pagpangandam alang sa Klase

Basaha ang Isaias 53:3–6, 8, 11–12, ug ikonsiderar ang pagmarka sa unsay nasinati sa Mesiyas aron Siya moayo ug motubos kanimo. (Alang sa dugang nga tabang sa pagsabot sa Isaiah 53, mahimo nimong basahon ang “Ang Pagpundok sa Israel ug ang Pag-anhi sa Mesiyas: Isaias 48–54,” gikan sa Manwal sa Estudyante sa Daang Tugon.)

The Mocking of Christ [Ang Pagbugalbugal kang Kristo], ni Carl Bloch

Dihang ang propeta nga si Alma nga Batan-on nagtudlo ngadto sa mga Nephite, gihulagway niya ang kalapdon ug kaladmon sa pag-antos sa Mesiyas.

icon, pagtuon

Pagtuon agi og Pagpangandam alang sa Klase

Basaha ang Alma 7:11–12, ug hunahunaa og maayo kon unsa ang giantos ni Jesus ug ngano. (Pahinumdom: Ang Pagtabang nagpasabot nga “pagdali og adto, o pagdali og adto sa pagsuporta; ginaingon nga, pagtabang o paghupay kon anaa sa kalisdanan, panginahanglan o kaluya; sa pagtabang ug paghaw-as gikan sa pag-antos” (Webster’s Dictionary [1828].)

young adult nga babaye nga masulob-ong tan-awon

Si Presidente Jean B. Bingham, Kinatibuk-ang Presidente sa Relief Society, mitudlo:

Presidente Jean B. Bingham

Sa Iyang 33 ka tuig sa mortalidad, [si Jesukristo] nag-antos nga gisalikway, gigukod, gigutom, giuhaw, ug gikapoy, gimingaw, giabuso sa pulong ug sa pisikal, ug sa kataposan, usa ka sakit kaayo nga kamatayon diha sa mga kamot sa mga tawonga makasasala. Didto sa Tanaman sa Getsemani ug didto sa krus sa Kalbaryo, gibati Niya ang tanan natong mga sakit, mga kasakit, mga pagtintal, mga balatian ug mga kahuyang.

Dili igsapayan unsa ang atong giantos, Siya mao ang tinubdan sa pagpang-ayo. Kadtong kinsa nakasinati sa bisan unsang pang-abuso, makaguol nga pagkawala, naglaygay nga sakit o makaluya nga kasakit, bakak nga mga pasangil, madumtanong pagpanggukod, o espirituhanong kadaot tungod sa sala o mga walay pagsinabtanay mamaayo sa Manunubos sa kalibotan. Hinoon Siya dili moduol kon walay pagdapit. Kita kinahanglan gayod nga moduol ngadto Kaniya ug motugot Kaniya sa pagbuhat sa Iyang mga milagro. (“Nga ang Imong Hingpit nga Kalipay Mapuno,” Liahona, Nob. 2017, 86)

Sa pagpamulong kon sa unsang paagi nga ang Ginoo motabang kanato, si Presidente Dallin H. Oaks sa Unang Kapangulohan miingon:

Presidente Dallin H. Oaks

Tungod sa Iyang Pag-ula, ang Manluluwas adunay gahom sa pagtabang—sa pag-abag—sa tanang sakit ug kasakit sa kinabuhi. Usahay ang Iyang gahom moayo og usa ka kahuyang, apan ang kasulatan ug ang atong kasinatian nagtudlo nga usahay Siya motabang o moabag pinaagi sa paghatag kanato og kalig-on o pailob sa paglahutay sa atong mga kahuyang. (“Nalig-on pinaagi sa Pag-ula ni Jesukristo,” Liahona, Nob. 2015, 61–62)

icon, irekord

Irekord ang Imong mga Hunahuna

Paghunahuna og usa ka tawo nga imong nailhan kinsa nagsagobang og usa ka mahagiton nga sitwasyon. Ikonsiderar ang pagsulat og usa ka mensahe nga pwede nimong ikapaambit ngadto nila mahitungod sa katakos ni Jesukristo sa paglig-on ug pagluwas kanato. Kon mibati ka nga nadasig sa paghimo sa ingon, ipaambit kini ngadto nila.

Gusto pa og Dugang? (Opsiyonal)

Unsa ang gitudlo sa mga propeta sa Basahon ni Mormong mahitungod sa Mesiyas?

Sa pagkat-on kon unsay gisulti sa mga propeta sa Basahon ni Mormon mahitungod sa pag-anhi sa Mesiyas, basaha ang 1 Nephi 10:4–11; 2 Nephi 2:6–9; 25:12–18; ug Mosiah 3:3–10.

Sa unsang paagi nga ang Ginoo makatabang kanako nga makadaog sa mga alantoson kon ako mobati nga nabug-atan?

Sa pakigpulong nga “Makadaog sa Ilang mga Alantuson uban sa Kasayon” (Liahona, Mayo 2014, 90), si Elder David A. Bednar sa Korum sa Napulog Duha ka Apostoles mipaambit kon sa unsang paagi ang Ginoo makalig-on kanato samtang kita nagpas-an sa atong mga alantoson.