Jesus Raising the Daughter of Jairus [Si Jesus Nagbuhi sa Anak nga Babaye ni Jairo], ni Dan Burr

Leksiyon 14 Materyal sa Pagpangandam sa Klase

Pag-ila sa mga Milagro sa Manluluwas

Kon kita maghisgot mahitungod sa mga milagro ni Jesukristo, kita malagmit nga mopunting diha sa makadasig nga mga istorya nga atong makaplagan sa Bag-ong Tugon. Samtang adunay daghan nga kita makahimo ug kinahanglang makat-onan gikan niini nga mga istorya sa kasulatan, kamo ba nakahunahuna sa mga milagro nga gihimo sa Ginoo sa atong panahon––ug sa inyong kinabuhi? Samtang kamo nagtuon, paningkamot sa paglig-on sa inyong hugot nga pagtuo diha sa gahom sa Ginoo ug sa pagkaandam sa pagbuhat og mga milagro alang kaninyo ug sa uban.

Seksiyon 1

Unsay akong makat-onan mahitungod sa Manluluwas gikan niini nga mga milagro?

Sa panahon sa Iyang mortal nga pangalagad, si Jesukristo “naglakaw sa mga dalan sa Palestina, nag-ayo sa masakiton, naghimo nga ang buta makakita, ug nagbuhi sa patay” (“Ang Buhi nga Kristo: Ang Pagpamatuod sa Apostoles,” ChurchofJesusChrist.org). Kini nga mga milagro mga “talagsaon nga [mga] hitabo nga nahimo pinaagi sa gahom sa Dios” ug “mga kabahin sa ebanghelyo ni Jesukristo” (Giya ngadto sa mga Kasulatan, “Milagro,” scriptures.ChurchofJesusChrist.org). Kini mga ebidensiya ngadto sa mga Judeo nga si Jesus mao ang gisaad nga Mesiyas (tan-awa sa Mateo 11:4–5: Juan 20:30–31).

Si Elder Ronald A. Rasband sa Korum sa Napulog Duha ka Apostoles miobserbar, “Ang Pag-ula ni [Jesukristo], nga gitapos sa Iyang Pagkabanhaw human sa tulo ka adlaw diha sa hinulaman nga lubnganan, nagpabilin nga mao ang labing dakong milagro sa kasaysayan sa katawhan” (“Tan-awa! Ako Mao ang usa ka Dios sa mga Milagro,” Liahona, Mayo 2021, 109).

nabanhaw nga Kristo

Mipasabot usab si Elder Rasband nga samtang ang mga milagro ni Jesus nagpamatuod sa Iyang pagkabalaan, kini usab aron “pahinumdoman kita sa Iyang gahom, sa Iyang gugma alang kanato, sa Iyang impluwensiya sa atong mortal nga kasinatian, ug sa Iyang kagustohan nga motudlo kabahin niana nga maoy labing bililhon” (“Tan-awa! Ako Mao ang usa ka Dios sa mga Milagro,” 111).

Hunahunaa kon unsay atong makat-onan mahitungod sa Manluluwas gikan sa Iyang pag-ayo sa usa ka tawo nga adunay paralisis. Upat ka tawo nagyayong niini nga lalaki ngadto sa balay diin si Jesus nagtudlo. Sa dihang ilang nakita nga ang balay hilabihan sa kadaghang panon sa tawo nga sila dili makasulod, ilang gibuslotan ang atop ug gitonton ang paralitiko nga lalaki ngadto sa Manluluwas (tan-awa sa Marcos 2:1–4).

Jesus nga nag-ayo sa usa ka tawo

icon, pagtuon

Pagtuon agi og Pagpangandam alang sa Klase

Basaha ang Marcos 2:5–12, ug hunahunaa kon unsay inyong nakat-onan mahitungod sa Manluluwas ug sa Iyang gahom sa pag-ayo gikan niini nga kasinatian.

Hibaloi nga ang milagro sa Manluluwas nagtubag sa pisikal ug espirituhanong mga panginahanglan. Kabahin sa abilidad sa Manluluwas sa pag-ayo sa lawas ug sa espiritu, si Presidente Dallin H. Oaks sa Unang Kapangulohan mitudlo:

Presidente Dallin H. Oaks

Ang labing dako nga milagro wala diha sa ingon nga mga butang sama sa pagpahiuli sa panan-aw sa buta, pag-ayo sa sakit, o gani sa pagbuhi sa patay. …

… Ang mas dako pa gani nga milagro mao ang usa ka gamhanang kausaban sa kasingkasing sa usa ka anak nga lalaki o anak nga babaye sa Dios (tan-awa sa Mosiah 5:2). Ang kausaban sa kasingkasing, lakip ang bag-ong mga kinaiya, mga prayoridad, ug mga tinguha, mas dako ug mas importante kay sa bisan unsang milagro nga naglakip sa lawas. (“Miracles,” Ensign, Hunyo 2001, 17)

paghulagway og kausaban sa kasingkasing

icon, irekord

Irekord ang Inyong mga Hunahuna

Basaha o tan-awa ang usa o dugang pa sa mosunod nga mga milagro sa Manluluwas nga gihimo sa panahon sa Iyang mortal nga pangalagad, o pagpili og usa nga inyong kaugalingon nga basahon o tan-awon. Samtang kamo magtuon, palandonga, ug pagrekord sa inyong mga hunahuna agi og tubag sa mosunod nga mga pangutana:

1. Unsay inyong nakat-onan mahitungod sa Manluluwas gikan niini nga milagro?

2. Unsa nga kahulogan ang inyong nakuha gikan niini nga milagro alang sa inyong kinabuhi?

Mga Milagro ni Jesukristo

• Basaha ang Juan 2:1–11.

• Basaha ang Marcos 4:35–41.

• Basaha ang Lucas 7:11–16.

• Basaha ang Mateo 14:13–21.

• Basaha ang Juan 9:1–7.

Seksiyon 2

Giunsa sa akong hugot nga pagtuo ug sa kabubut-on sa Ginoo pag-impluwensiya og mga milagro?

Sayo sa mortal nga pangalagad sa Manluluwas, usa ka tawo nga nag-antos gikan sa sanla miduol ni Jesus aron magpaayo. Ingon sa paggamit sa Biblia, ang sanla mahimong magpasabot ngadto sa usa ka dakong sakit sa panit nga makaatake sa panit, mga ugat, mga mata, ug mga bukog. Walay medikal nga tambal, kini makagiya ngadto sa kadaot sa ugat, pagkabota, mga pagkahiwi sa parte sa lawas, ug usa ka masakit nga kamatayon. Atol sa panahon sa Manluluwas, ang tawo kinsa miduol sa Manluluwas mahimo unta nga hunahunaong “mahugaw” ug magpuyo unta nga bulag sa iyang pamilya ug sa katilingban (tan-awa sa Levitico 13:45–46).

Be Thou Clean [Magmahinlo Ka], ni Kyle Vincent

icon, pagtuon

Pagtuon agi og Pagpangandam alang sa Klase

Basaha ang Marcos 1:40–42, mangita kon giunsa niini nga tawo pagpakita og hugot nga pagtuo diha sa Ginoo sa dihang naninguha og usa ka milagro.

Si Elder Jorge F. Zeballos sa Kapitoan mi-obserbar:

Elder Jorge F. Zeballos

Ang sanlahon wala mohangyo og bisan unsang butang, bisan tingali matarong ang iyang mga tinguha; andam ra gyod siya sa pagdawat sa kabubut-on sa Ginoo. (“Kon Kamo ang Mahimong Responsable,” Liahona, Mayo 2015, 125)

Kon kita sa tinuoray nagtinguha sa pagdawat sa kabubut-on sa Ginoo, kita nagkinahanglan usab nga magbaton og hugot nga pagtuo nga dili mamaayo. Si Elder David A. Bednar sa Korum sa Napulog Duha ka Apostoles mitudlo:

Elder David A. Bednar

Ang pagkamatarong ug hugot nga pagtuo sa tinud-anay gikinahanglan sa pag-ayo sa masakiton, bungol, o bakol—kon ang ingon nga pag-ayo nagtuman sa mga katuyoan sa Dios ug sumala sa Iyang kabubut-on. Busa, bisan kon kita adunay lig‑on nga pagtuo … daghang mga kalisdanan ang dili tangtangon. Kon ang tanang oposisyon gipugngan, kon ang tanang balatian gikuha, niana ang unang mga katuyoan sa plano sa Amahan mapakyas. (David A. Bednar, “Pagdawat sa Kabubut-on ug Panahon sa Ginoo,” Liahona, Ago. 2016, 34)

Samtang kamo mamalandong sa mga milagro nga inyo untang gitinguha alang sa inyong kinabuhi, hunahunaa ang mosunod nga tambag gikan ni Elder Ronald A. Rasband sa Korum sa Napulog Duha ka Apostoles:

Elder Ronald A. Rasband

Ang mga milagro mahimong moabot isip mga tubag sa pag-ampo. Dili kini kanunay mao kon unsay atong gipangayo o atong gilaoman, apan kon mosalig kita sa Ginoo, Siya maanaa didto, ug Siya dili masayop. Ipahiangay Niya ang milagro sa higayon nga gikinahanglan nato kini. …

… Adunay mga higayon nga kita naglaom alang sa usa ka milagro nga mamaayo ang usa ka minahal sa kinabuhi, nga balihon ang usa ka dili makiangayon nga binuhatan, o humokon ang kasingkasing sa usa ka masuk-anon o nahisalaag nga kalag. Kon ikonsiderar ang mga butang sa mortal nga panglantaw, gusto kita nga ang Ginoo manginlabot, nga moayo sa unsay naguba. Pinaagi sa hugot nga pagtuo, ang milagro moabot, bisan dili gayod sa atong gusto nga higayon o sa pamaagi nga maoy atong gitinguha. Nagpasabot ba kana nga dili igo ang atong pagtuo o dili kita angayan sa Iyang pagpanginlabot? Dili. Kita gipangga sa Ginoo. (“Tan-awa! Ako Mao ang usa ka Dios sa mga Milagro,” Liahona, Mayo 2021, 111)

usa ka babaye nag-ampo kauban sa uban

icon, pamalandong

Pamalandong agi og Pagpangandam alang sa Klase

Unsaon ko sa pagpalambo ang hugot nga pagtuo sa pagsalig sa kabubut-on ug panahon sa Ginoo kon maninguha og usa ka milagro?

Seksiyon 3

Unsaon nga ako mas maayong makaila sa mga milagro sa Ginoo diha sa akong kinabuhi?

Si Presidente Oaks miobserbar, “Daghang mga milagro ang nahitabo matag adlaw diha sa buhat sa atong Simbahan ug diha sa kinabuhi sa atong mga miyembro” (“Miracles,” Ensign, Hunyo 2001, 17). Usahay kita makakita og mga milagro diha sa mga kinabuhi sa uban apan mahimong dili makakita niini sa atong kaugalingong kinabuhi.

Si Elder Rasband mitudlo og sama:

Elder Ronald A. Rasband

Daghan kaninyo ang nakasaksi og mga milagro, sobra pa sa inyong mahunahunaan. Kini tingali mora og gamay ra kon itandi sa pagbanhaw ni Jesus sa mga patay. Apan ang gidak-on niini dili mopaila sa kalainan sa usa ka milagro, kon dili nga kini naggikan sa Dios. (“Tan-awa! Ako Mao ang usa ka Dios sa mga Milagro,” Liahona, Mayo 2021, 110)

icon, irekord

Irekord ang Inyong mga Hunahuna

Paggahin og pipila ka minuto sa pagrekord sa mga milagro nga ikaw nakasaksi o karon nagsinati. Hunahunaa nga magsugod sa pag-ampo ug sa paghangyo sa Ginoo alang sa mga mata nga makakita niini nga mga milagro nga nagpanghitabo.

Gusto pa og Dugang? (Mahimong sundon o dili)

Unsa ang pipila sa ubang ehemplo sa mga milagro sa Manluluwas?

• Pag-ayo sa ulipon sa kapitan (tun-i ang Lucas 7:1–10)

• Pagpapahawa sa mga yawa gikan sa usa ka lalaki ngadto sa baboy (tun-i Marcos 5:1–19)

• Pagbuhi ni Lazaro gikan sa patay (tun-i ang Juan 11:1–44)

• Pag-ayo sa dalunggan sa ulipon sa halangdong sacerdote (tun-i ang Lucas 22:47–51)

Unsaon ko pagpalambo ang hugot nga pagtuo nga mosalig sa kabubut-on sa Ginoo kon maninguha og usa ka milagro?

Diha sa pakigpulong ni Presidente Oaks “Pag-ayo sa Masakiton” (Liahona, Mayo 2010, 47–50) ug sa pakigpulong ni Elder Bednar “Pagdawat sa Kabubut-on ug Panahon sa Ginoo” (Liahona, Ago. 2016, 17–23), makakat-on kamo gikan sa mga ehemplo sa uban samtang magbasa kamo sa mga istorya sa mga tawo kinsa migamit sa hugot nga pagtuo sa pagpaninguha og mga milagro.

Asa ako makakat-on pa og dugang mahitungod sa mga milagro nga nahitabo sa atong panahon?

Elder Donald L. Hallstrom

Si Elder Donald L. Hallstrom sa Seventy mipakigbahin og istorya sa usa ka milagrosong pagkaayo diha sa “Nahunong ba ang Adlaw sa mga Milagro?” (Liahona, Nob. 2017, 88–90).

Sister Sydney S. Reynolds