batan-ong lalaki nga gibunyagan

Leksiyon 5 Materyal sa Pagpangandam sa Klase

Pagkahimong Katawhan sa Pakigsaad sa Ginoo

Nagkinahanglan og taas nga lebel sa pagsalig ug gugma ang pagpabugkos sa imong kaugalingon ngadto sa usa ka tawo sa usa ka relasyon sa pakigsaad. Ug kana nga pagsalig mapalambo samtang kamo magkailhanay. Mahitungod sa paghimo og mga pakigsaad sa Dios nga magbugkos kanimo ngadto Kaniya, Siya nakaila na kanimo sa hingpit ug nagtinguha sa paghatag kanimo sa tanan nga anaa Kaniya—sa tanan kon unsa Siya. Siya nagdapit kanimo sa pagsalig Kaniya ug sa pagsulod sa Iyang dalan sa pakigsaad. Mapanalanginan ka sa hilabihan kon buhaton nimo kini, kay ang “Iyang paagi mao ang dalan nga paingon ngadto sa kalipay dinhi niini nga kinabuhi ug sa kinabuhing dayon sa kalibotan nga moabot” (“Ang Buhi nga Kristo: Ang Pagpamatuod sa mga Apostoles,” ChurchofJesusChrist.org).

Seksiyon 1

Kinsa si Jehova, ug ngano nga ako makasalig Kaniya?

Ang “Ang Buhi nga Kristo” nagtudlo nga “si “[Jesukristo] mao ang Halangdong Jehova sa Daang Tugon.” Asa ang ngalan nga Jehova naggikan, ug unsay ikatudlo niini kaninyo mahitungod sa Manluluwas?

Human sa pagkaulipon sa mga anak sa Israel sa taga-Ehipto sulod sa daghang katuigan, ang Ginoo mitawag ni Moises sa “pagkuha [kanila] gikan sa Ehipto” (Exodo 3:10; tan-awa usab sa mga berskikulo 1–9). Si Moises mibati og kakulang sa abilidad nga makahimo niini nga buluhaton. Iyang gipangutana ang Ginoo unsay Iyang ngalan aron iyang masultihan ang mga Israelita kon kinsa ang mipadala kaniya (tan-awa sa Exodo 3:11–13).

icon, pagtuon

Pagtuon agi og Pagpangandam alang sa Klase

Basaha ang Exodo 3:13–14, ug ikonsiderar ang pagmarka sa ngalan sa Ginoo nga gipadayag ngadto ni Moises.

Si Moises nga nagtan-aw ni Jehova, ni Joseph Brickey

Ang ngalan nga Ako Mao nagpasabot nga “Siya mao” o “Siya anaa” ug direkta nga may kalabotan sa Hebreo nga ngalan nga Yahweh, o Jehova. Ang Jehova nagpasabot sa “Unchangeable One [Usa nga Walay Pagkausab]” (Bible Dictionary, “Jehovah”). Ang balaang pagtahod nga ilang gibati sa ngalan ni Jehova ingon sa gihisgotan diha sa asoy sa Bag-ong Tugon mao ang hinungdan sa bangis nga reaksiyon sa mga Judeo dihang si Jesukristo misulti kanila nga, “wala pa gani matawo si Abraham, mao na Ako” (Juan 8:58). Ang paggamit ni Kristo sa termino nga “Ako mao na” susama ra sa Exodo 3:14 dihang Siya miingon nga, “Ako mao na Ako.”

Si Jesus nga gihagit

Si Elder Bruce R. McConkie sa Korum Napulog Duha ka Apostoles misulti mahitungod sa gipamahayag sa Manluluwas:

Elder Bruce R. McConkie

“Prangka gayod kaayo kini ug direkta nga pagpamahayag sa kabalaan nga nahimo o mahimo sa usa ka tawo. “Sa wala pa si Abraham Ako mao na si Jehova.” Nga, “Ako ang Dios nga Makagagahom, ang Halangdon nga AKO MAO. Mianhi ako sa kaugalingon, Usa nga Mahangturon. Ako ang Dios sa inyong mga amahan. Ang akong ngalan mao: AKO MAO NA AKO” (Doctrinal New Testament Commentary [1965], 1:464)

icon, pamalandong

Pamalandong agi og Pagpangandam alang sa Klase

Sa unsang paagi nga ang pagkasayod nga si Jesukristo mao ang Bantogan nga Jehova—nga Dios sa Daang Tugon, Siya nga anaa ug walay pagkausab—makaapekto sa inyong pagsalig Kaniya? Unsa ang gikatudlo niini nga mga titulo diha nimo mahitungod sa Iyang abilidad sa paghimo ug pagtuman sa mga saad diha kanimo?

Seksiyon 2

Sa unsang paagi nga ang akong kinabuhi mapanalanginan pinaagi sa paghimo ug pagtuman sa mga pakigsaad ngadto kang Jehova?

Bisan og ang Ginoo, nga si Jehova, gamhanan ug walay pagkausab, Siya ug ang Iyang Amahan nagdapit kanato ngadto sa usa ka relasyon sa pakigsaad uban Kanila. Kini nga relasyon sa pakigsaad naglakip og potensiyal nga mga panalangin nga dili madawat sa bisan unsang lahi nga paagi.

Imong mahinumdoman nga ang pakigsaad “usa ka sagradong kasabotan tali sa Dios ug sa tawo o grupo sa mga tawo. Ang Dios naghan-ay og piho nga mga kasabotan, ug Siya misaad sa pagpanalangin kanato kon atong tumanon kadtong mga kasabotan. Kon kita mopili sa dili pagtuman sa mga pakigsaad, dili kita makadawat sa mga panalangin, ug sa pipila ka sitwasyon kita mag-antos sa silot isip sangpotanan sa atong pagsupak” (Gospel Topics, “Covenant,” topics.ChurchofJesusChrist.org).

Si Abraham usa ka talagsaong ehemplo sa tawo kinsa mihimo ug mituman sa mga pakigsaad ngadto sa Ginoo. Bisan pa man sa pagsimba og mga dios-dios ug sa dili maayong ehemplo sa daghang tawo nga naglibot kaniya, si Abraham nagtinguha nga mamahimong “labaw nga sumusunod sa pagkamatarong” (Abraham 1:2). Ang mga tinguha ni Abraham nagantihan dihang si Jehova misulod ngadto sa usa ka pakigsaad ngadto Kaniya.

icon, pagtuon

Pagtuon agi og Pagpangandam alang sa Klase

Ang unsay kasagaran nga gitawag og “Pakigsaad ni Abraham” naglakip og mga saad sa Dios nga gitanyag ngari kanatong tanan. Tun-i ang Abraham 2:8–11 aron mas mapamilyar ngadto usa ka bahin sa pakigsaad ni Abaraham, ug ihanduraw nga ang Ginoo nagsulti niini nga mga saad diha nimo ingon man ngadto ni Abraham. Mahimo nimong markahan ang mga panalangin nga imong makit-an.

The Lord Appearing unto Abraham [Ang Ginoo nga Nagpakita ngadto ni Abraham], ni Keith Larson

Ang pakigsaad ni Abraham naglakip sa tanan nga mahangtorong panalangin nga naggikan sa ebanghelyo sa Ginoo, sa mga ordinansa sa pagkapari, ug celestial nga kaminyoon. Kini nga dalan magsugod sa usa ka pakigsaad nga gihimo atol sa pagbunyag ug magpadayon ngadto sa templo ug lapas sa templo kon kita magmasulondon sa mga pakigsaad nga atong gihimo.

Si Presidente Russell M. Nelson miingon mahitungod sa pakigsaad ni Abraham:

Presidente Russell M. Nelson

“Ang labing mahinungdanon nga mga panalangin sa pakigsaad ni Abraham itugyan diha sa balaang mga templo. … Ang katumanan sa karaan nga pakigsaad ni Abraham mahimo lamang tungod sa Ginoo nga si Jesukristo. Siya ang mihimo niini nga posible aron kita makapuyo og balik uban sa Dios, uban Kaniya, ug uban sa atong mga pamilya sa kahangtoran. (Sa “Special Witnesses of Christ,” Ensign, Abr. 2001, 7)

magtiayon nga nagtan-aw sa templo

Basaha ang mosunod nga pamahayag ni Elder D. Todd Christofferson sa Korum sa Napulog Duha ka Apostoles, ug ikonsiderar ang pagmarka sa mga panalangin nga moabot gumikan sa pagsubay sa dalan sa pakigsaad sa Manluluwas:

Elder D. Todd Christofferson

Unsa ang dalan sa pakigsaad? Mao kana ang bugtong dalan nga modala kanato ngadto sa celestial nga gingharian sa Dios. … Sa pagpadayon diha sa dalan sa pakigsaad (nga, agig dugang, magpadayon latas sa mortalidad), kita makadawat sa tanang mga ordinansa ug mga pakigsaad kalabot sa kaluwasan ug kahimayaan.

Ang atong pinakataas nga pasalig sa pakigsaad mao ang pagbuhat sa kabubut-on sa Dios “ug magmasulundon sa iyang mga sugo diha sa tanan nga mga butang nga siya mosugo kanato” [Mosiah 5:5]. …

… Ang mga pakigsaad nga gitanyag sa Dios ngadto sa Iyang mga anak makahimo og labaw pa kay sa paggiya kanato. Kini mobugkos kanato ngadto Kaniya, ug, kay nabugkos ngadto Kaniya, kita makabuntog sa tanan nga butang. …

… Ang Dios nag-andam og halos dili matugkad nga gasa aron motabang sa mga tighimo og pakigsaad nga mahimong mga tigtuman sa pakigsaad: ang gasa sa Espiritu Santo. Kini nga gasa mao ang katungod sa kanunay nga pakig-uban, proteksiyon, ug giya sa Balaang Espiritu. …

Sa dalan sa pakigsaad makakaplag [sab] kita sa kinahanglanon nga mga panalangin sa kapasayloan ug paglimpyo gikan sa sala. …

Kadtong nagsunod sa dalan sa pakigsaad makakaplag usab og talagsaong mga panalangin diha sa nagkalainlaing sagradong nakatakda nga mga pagpundok. … [Ang] literal nga mga pagpundok sa dugay nang natibulaag nga mga tribo sa Israel … nagpadayon karon diha sa pagpundok sa mga katawhan sa pakigsaad ngadto sa Simbahan. … Usab adunay sinemana nga panagpundok sa mga katawhan sa pakigsaad … sa pag-ambit sa pan ug tubig sa sakramento sa paghinumdom sa Pag-ula ni Jesukristo. …

Ang mga tawo sa pakigsaad magpundok [usab] sa templo, sa balay sa Ginoo, aron modawat sa mga ordinansa, mga panalangin, ug pagpadayag nga didto lamang maangkon. …

Sa kataposan, diha lamang sa pagsubay sa dalan sa pakigsaad nga kita makapanunod sa mga panalangin ni Abraham, Isaac, ug ni Jacob, ang pinakataas nga mga panalangin sa kaluwasan ug kahimayaan nga ang Dios lang ang makahatag. (“Nganong Mahinungdanon ang Dalan sa Pakigsaad,” Liahona, Mayo 2021, 116, 118)

icon, buhaton

Buhaton

Si Presidente Nelson nakaobserbar, “Ang labing dako nga pagdayeg nga madawat niining kinabuhia mao nga mailhan nga usa ka tighupot sa pakigsaad” (“Mga Pakigsaad,” Liahona, Nob. 2011, 88). Pagtino og usa ka aksiyon nga imong buhaton sugod karong semanaha aron magpadayon ang imong kaugalingon ngadto sa unahan diha sa dalan sa pakigsaad. Pamalandongi kon sa unsang paagi nga si Jesukristo—si Jehova, ang Usa nga Walay Pagkausab—makatabang nimo sa pagkab-ot sa imong tumong. Dayon ikonsiderar kon unsaon kaha nga ikaw makatabang sa uban diha sa dalan sa pakigsaad.

Gusto pa og Dugang? (Opsiyonal)

Asa ko makakat-on pa og dugang mahitungod sa panalangin nga gisaad ngadto sa nakigsaad nga Israel?

Elder Dale G. Renlund

Si Elder Dale G. Renlund sa Korum sa Napulog Duha ka Apostoles miasoy sa sugilanon mahitungod sa tulo ka indibidwal nga taga-Zaire kinsa mihimo og dako kaayong sakripisyo aron sa pagtuman sa ilang mga pakigsaad diha sa “Walay Pagkapaling nga Pasalig ngadto Kang Jesukristo” (Liahona, Nob. 2019, 24–25; o tan-awa gikan sa time code 7:10 hangtod 11:57).

Presidente Linda K. Burton

Sa pakigpulong nga “Ang Gahom, Kalipay, ug Gugma sa Pagtuman sa Pakigsaad” (Liahona, Nob. 2013, 111–14), si Presidente Linda K. Burton, kanhi Kinatibuk-ang Presidente sa Relief Society, mipaambit sa hingpit nga kalipay sa pagtuman sa pakigsaad.

Asa ako makakat-on pa og dugang mahitungod sa mga pakigsaad sa templo?