Leksiyon 28 Materyal sa Magtutudlo

Pagbarog isip mga Saksi ni Jesukristo

Sa tibuok niini nga kurso, ang mga estudyante nakabaton og oportunidad sa pagtuon, pagpalandong, ug paghisgot ni Jesukristo ug sa Iyang walay kataposang ebanghelyo. Sila gidapit sa pagpalig-on sa ilang pagpamatuod sa Manluluwas ug sa paglihok diha sa hugot nga pagtuo nga mahimong mas mahisama Kaniya. Niini nga leksiyon, ang mga estudyante mohunahuna sa unsay ilang gibati, gikat-onan, ug gisinati. Sila pagadapiton sa pagpakigbahin sa ilang pagpamatuod sa Manluluwas.

Mga Sugyot alang sa Pagtudlo

Ang mga tinun-an ni Jesukristo nagpamatuod Kaniya.

Timan-i Aron tugotan ang mga estudyante og daghang oras sa paghunahuna ug sa pagpakigbahin sa ilang mga pagpamatuod sa Manluluwas atol sa klase, adunay mas diyutay nga mga ideya sa pagtudlo niini nga leksiyon.

Kamo mahimong makigbahin sa mosunod nga talan-awon samtang kamo magsugod sa klase:

Handurawa ang usa ka suod nga higala nga nagtambong sa iyang unang miting sa puasa ug pagpamatuod o mibalik sa simbahan human sa mga katuigan nga nagpalayo. Kon makigbahin mo sa inyong pagpamatuod, unsay inyong isulti? Unsa ang inyong gilaoman nga ang uban mahimong makigbahin?

Hunahunaa ang paghatag sa mga estudyante og panahon sa pagrekord unsa kahay ilang isulti diha sa ilang mga pagpamatuod. Mahimo dayon kamong modapit og pipila ka estudyante sa pagpakigbahin kon unsay ilang girekord. Isip kabahin sa inyong panaghisgotan, makapangutana kamo og usa o daghan pa sa mosunod nga mga pangutana:

• Unsa ang inyong bation kon walay usa nga mopamatuod ni Jesukristo? Ngano nga ang pagpamatuod kang Kristo ug sa Iyang walay kataposang ebanghelyo importante kaayo? (Samtang ang mga estudyante naghisgot, makapakita kamo sa mosunod nga pamahayag ni Elder Dieter F. Uchtdorf: “Ang kinauyokan niini nga pagpamatuod kanunay gayod nga mao ang hugot nga pagtuo ug ang kahibalo kabahin ni Jesukristo ug sa Iyang balaanong misyon” [“Ang Gahom sa Personal nga Pagpamatuod,” Liahona, Nob. 2006, 38].)

• Sa unsang paagi ang inyong pagpamatuod ni Jesukristo miabot nganha kaninyo? (Mahimo kamong makarebyo sa Alma 5:46–48 ug ang ikaduhang pamahayag ni Elder Uchtdorf sa seksiyon 1 sa materyal sa pagpangandam. Kon nagtinguha, mahimo ninyong tabangan ang mga estudyante sa pag-ila og usa ka kamatuoran nga susama sa mosunod: Kita makabaton og tinuod nga pagpamatuod ni Jesukristo pinaagi sa Espiritu Santo.) Unsa nga impluwensya aduna ang Espiritu Santo diha sa inyong pagsabot ug paghigugma alang sa Manluluwas?

Paghunahuna sa pagdapit og usa o duha ka estudyante sa wala pay klase aron maandam sa pagpakigbahin ngadto sa klase kon giunsa sa pagpanalangin ang ilang kinabuhi pinaagi sa pagpaminaw sa uban nga nagpamatuod ni Jesukristo. Mahimo dayon kamong mangutana:

• Unsa ang pipila ka paagi kita makabarog isip mga saksi ni Jesukristo? (Mahimo ninyong hangyoon ang mga estudyante sa pagrebyo sa pamahayag ni Elder Neil L, Andersen diha sa seksiyon 2 sa materyal sa pagpangandam.)

• Ngano kaha nga importante kini ang pagpakigbahin sa atong pagpamatuod sa Manluluwas, bisan og atong gibati nga kini dili kaayo lig-on? (Hunahunaa ang pagrebyo sa unang pamahayag ni Presidente Uchtdorf diha sa seksiyon 1 sa materyal sa pagpangandam.)

Pagpalambo sa Atong Pagtudlo ug Pagkat-on

Pagdapit og mga estudyante sa pagpamatuod ni Jesukristo ug sa Iyang balaanong misyon. Tabangi ang mga estudyante sa pagsabot nga ang pagpakigbahin sa pagpamatuod kang Jesukristo wala lamang magpanalangin sa tawo nga nagpamatuod apan makapalig-on usab sa hugot nga pagtuo ug sa mga pagpamatuod sa uban. Ang usa ka pagpamatuod mahimong usa ka yanong pahayag sa usa ka tawo sa unsay gituohan, gilaoman, o gihibaloan nga tinuod.

Pahinumdomi ang mga estudyante nga sila gidapit sa pagpangandam alang sa klase pinaagi sa pagpili og usa ka kalihokan sa pagtuon aron sa pagtabang kanila sa paghunahuna diha sa ilang pagpamatuod sa Manluluwas ug sa Iyang walay kataposang ebanghelyo. Hatagi ang mga estudyante og panahon sa pagrebyo sa ilang mga sinulat [notes] ug sa pag-andam og usa ka butang nga ipakigbahin.

Kon kamo adunay dako nga klase, mahimo ninyong bahinon ang inyong mga estudyante ngadto sa mga grupo aron ang tanan adunay oportunidad sa pagpaambit. Awhaga ang mga estudyante nga magmahunahunaon sa oras nga ilang gamiton aron ang tanan diha sa klase o grupo kinsa gustong makigbahin makahimo. Samtang ang tanan nga mga estudyante kinahanglang awhagon sa pagpakigbahin, walay usa ang kinahanglang mobati nga napugos.

Taposa ang klase pinaagi sa inyong pagpamatuod ug awhaga ang mga estudyante sa pagpadayon sa paglig-on sa ilang pagpamatuod ni Jesukristo ug sa pagpangita og mga oportunidad sa pagpakigbahin niana nga pagsaksi Kaniya.

Sa dili pa matapos ang klase, awhaga ang mga estudyante sa pagpadayon sa pagpalista diha sa institute.