Leksiyon 16 Materyal sa Pagpangandam sa Klase: Paghangop sa Mahinungdanon nga Sakripisyo sa Pag-ula sa Manluluwas
“Leksiyon 16 Materyal sa Pagpangandam sa Klase: Paghangop sa Mahinungdanon nga Sakripisyo sa Pag-ula sa Manluluwas,” Materyal sa Magtutudlo alang sa Si Jesukristo ug ang Iyang Walay Kataposang Ebanghelyo (2023)
“Leksiyon 16 Materyal sa Pagpangandam sa Klase,” Materyal sa Magtutudlo alang sa Si Jesukristo ug ang Iyang Walay Kataposang Ebanghelyo
Imahe
Kristo Nag-ampo didto sa Tanaman sa Getsemani, ni Hermann Clementz
Leksiyon 16 Materyal sa Pagpangandam sa Klase
Paghangop sa Mahinungdanon nga Sakripisyo sa Pag-ula sa Manluluwas
Si Elder Jeffrey R. Holland sa Korum sa Napulog Duha ka Apostoles mipamatuod, “Ang labing mahinungdanong panghitabo ug labing importante nga nakab-ot sa tanang kasaysayan sa tawo mao ang sakripisyo sa pag-ula ni Ginoong Jesukristo” (“Testify of the Restoration,” New Era, Abr. 2017, 3). Samtang magtuon ka, hunahunaa kon unsay giantos sa Ginoo aron makompleto ang Iyang sakripisyo sa pag-ula. Ikonsiderar usab kon sa unsang paagi nga ikaw makapakita og pasalamat sa Iyang gibuhat alang nimo.
Seksiyon 1
Nganong gikinahanglan man nako ang Pag-ula sa Manluluwas?
Ang Pagkapukan nila ni Adan ug Eva usa ka mahinungdanong lakang sa paglambo diha plano sa Langitnong Amahan alang sa atong mahangtoron nga pag-uswag. Naghatag kini kanato og oportunidad nga makaanhi sa yuta, makagamit sa kabubut-on, makamugna og mga pamilya, makasinati og kalipay, ug makakat-on ug molambo (tan-awa sa 2 Nephi 2:19–25).
Apan kini nga lakang sa paglambo nagdala usab og lakang sa pagpakunhod. Tungod sa Pagkapukan, matag usa nato nakapanunod og usa ka napukan nga kahimtang ug makasinati og espirituhanon ug pisikal nga kamatayon (tan-awa sa Alma 42:5–9, 14). Kita dili makabuntog niini nga mga kahimtang pinaagi sa atong kaugalingong mga paningkamot o maayo nga mga buhat (tan-awa sa 2 Nephi 2:5, 8). Ang propeta nga si Jacob mitudlo nga kon wala ang “walay kinutoban nga pag-ula” sa Ginoo kita “wala nay pagkabanhaw” ug hangtod sa hangtod dili na makabalik sa presensya sa Dios (tan-awa sa 2 Nephi 9:7–9).
Imahe
icon, pagtuon
Pagtuon agi og Pagpangandam alang sa Klase
Basaha ang 2 Nephi 9:10, 21, ug pangitaa kon sa unsang paagi nga si Jesukristo miluwas nato gikan sa pisikal ug espirituhanon nga kamatayon.
Si Elder D. Todd Christofferson sa Korum sa Napulog Duha ka Apostoles mipamatuod kon sa unsang paagi nga ang Pag-ula sa Manluluwas makatabang kanato nga mabuntog ang mga sangpotanan sa Pagkapukan:
Imahe
Elder D. Todd Christofferson
Ang Katubsanan sa Manluluwas adunay duha ka bahin. Una, nag-ula kini sa kalapasan ni Adan ug sa miresulta nga Pagkapukan sa tawo pinaagi sa pagbuntog sa gitawag nga direkta nga mga epekto sa Pagkapukan—pisikal ug espirituhanong kamatayon. Ang pisikal nga kamatayon nasabtan pag-ayo; ang espirituhanong kamatayon mao ang pagkabulag sa tawo gikan sa Dios. … Kining katubsanan gikan sa pisikal ug espirituhanon nga kamatayon alang sa tanan ug walay kondisyon.
Ang ikaduhang bahin sa Pag-ula sa Manluluwas mao ang katubsanan gikan sa unsay giingon nga dili direkta nga sangputanan sa Pagkapukan—ang atong kaugalingong mga sala batok sa kalapasan ni Adan …
Tungod kay kita may tulubagon ug kita mohimo og mga pagpili, ang katubsanan gikan sa atong kaugalingong mga sala kondisyonal—sa kondisyon sa pagkumpisal ug pagbiya sa sala ug pagbalhin ngadto sa diosnon nga kinabuhi, o sa laing pagkasulti, sa kondisyon sa paghinulsol [tan-awa sa Doktrina ug mga Pakigsaad 58:43]. (“Katubsanan,” Liahona, Mayo 2013, 109–10)
Imahe
icon, pamalandong
Pamalandong agi og Pagpangandam alang sa Klase
Unsa ang imong mga hunahuna ug mga pagbati alang ni Jesukristo, sa pagkasayod nga Siya lamang ang paagi nga ikaw maluwas gikan sa espirituhanon nga kamatayon, sa pisikal nga kamatayon, ug sa mga epekto sa imong kaugalingong mga sala? (Tan-awa sa Mosiah 3:17.)
Seksiyon 2
Sa unsang paagi nga ang pagpamalandong sa pag-antos sa Manluluwas didto sa Getsemani ug diha sa krus makadugang sa akong pagpasalamat alang Kaniya?
Human sa pagpangaon sa Kataposan nga Panihapon uban sa Iyang Apostoles ug sa pagpaila sa sakramento ngadto nila, si Jesus midala nila ngadto sa Tanaman sa Getsemani. Didto ang Manluluwas nag-ampo ug nag-antos alang sa atong mga sala.
Human sa pag-antos sa dili matukib nga kasakit didto sa Getsemani, si Jesus giluiban. “Siya gidakop ug gihukman sa bakak nga mga pasangil” (“Ang Buhi nga Kristo: Ang Pagpamatuod sa mga Apostoles,” ChurchofJesusChrist.org). Samtang diha sa kustodiya sa mga lider sa relihiyon nga mga Judeo, ang Manluluwas gibugalbugalan, gilud-an, gitamparos, ug gipasanginlan (tan-awa sa Mateo 26:47–68).
Tungod kay sila walay katungod sa pagpatay ni Jesus, ang mga lider nga Judeo midala Kaniya ngadto ni Pilato, ang gobernador nga Romano. Nahadlok sa mga tawo, si Pilato mihukom nga patyon si Jesus pinaagi sa paglansang sa krus. Agi og pagpangandam sa paglansang sa krus, si Kristo gikastigo, dayon walay kalooy nga gibugalbugalan sa mga sundalo nga Romano. Sila milansang sa Iyang mga kamot ug mga tiil ug gipataas Siya diha sa krus taliwala sa duha ka kriminal (tan-awa sa Mateo 27:11–38).
Si Elder Bruce R. McConkie sa Korum sa Napulog Duha ka Apostoles mitudlo nga samtang si Jesus anaa sa krus, “ang tanang walay kinutobang panghingutas ug walay kaluoy nga mga kasakit sa Getsemani nahitabo pag-usab” (“Ang Makalimpyo nga Gahom diha sa Getsemani,” Liahona, Abr. 2011, 18). Sa pagka-alas tres, “mituaw si Jesus sa makusog, “Eloi, Eloi, lama sabachthani?” nga sa ato pa, “Dios ko, Dios ko, nganong gibiyaan mo ako?” (Marcos 15:34).
Aron ang kinadak-ang sakripisyo sa Iyang Anak tingali maingon ka hingpit kay kini boluntaryo man ug sa nag-inusara, ang Amahan sa mubong higayon mitangtang gikan kang Jesus sa kahupayan sa Iyang Espiritu, mitangtang sa Iyang personal nga presensya. … Aron mahimo ang Iyang Pag-ula nga walay kataposan ug mahangtoron, kinahanglan Siya [Jesukristo] nga motagamtam kon unsay bation sa pagkamatay dili lamang sa pisikal apan usab sa espirituhanong paagi, aron mabatyagan unsay bation kon ang balaang Espiritu mobiya, unsay bation kon siya gitalikdan sa hingpit, kapait ug kawalay paglaom nga pag-inusara. …
… Tungod kay si Jesus mibaktas sa ingon ka taas, masulub-ong agianan nga nag-inusara, dili na kita kinahanglang mohimo pa sa ingon. (“Walay Bisan Usa nga Nakig-uban Kaniya,” Liahona, Mayo 2009, 87–88)
Imahe
icon, irekord
Irekord ang Imong mga Hunahuna
Pamalandongi ang bugti nga gibayad sa Manluluwas didto sa Getsemani ug diha sa krus aron sa pagtubos kanimo, ug irekord ang imong mga hunahuna ug mga pagbati. Ikonsiderar ang paghatag og usa ka pag-ampo aron ipahayag ang imong pagpasalamat sa Langitnong Amahan alang sa sakripisyo sa pag-ula ni Jesukristo alang nimo.
Seksiyon 3
Unsa ang akong mahimo sa paghangop sa sakripisyo sa pag-ula sa Ginoo?
Importante nga masabtan ug mapahayag ang pagpasalamat alang sa pag-antos sa Ginoo alang nimo. Apan ikaw makahimo gani og daghan pa aron mapakita ang imong hugot nga pagtuo sa katinuod sa Iyang Pag-ula kon ikaw mopili sa paghinulsol sa imong mga sala. (Imong makita ang ehemplo bahin niini diha sa 3 Nephi 9:12–13, 21–22, diin ang Ginoo midapit sa mga Nephite ug mga Lamanite sa paghinulsol sa wala pa Siya mobisita nila.)
Imahe
icon, pagtuon
Pagtuon agi og Pagpangandam alang sa Klase
Basaha ang Doktrina ug mga Pakigsaad 18:10–14, ug pangitaa ang koneksyon tali sa atong tagsa-tagsa nga bili, Pag-ula sa Ginoo, ug paghinulsol.
Si Presidente Russell M. Nelson misulti bahin sa gasa sa Ginoo sa paghinulsol:
Imahe
Presidente Russell M. Nelson
Daghan ra kaayo ang nagkonsiderar sa paghinulsol isip silot––usa ka butang nga likayan gawas lang sa labing seryoso nga mga sirkumstansya. Apan kining pagbati nga gisilotan hinimo-himo ni Satanas.…
Walay laing mas makapagawasnon, mas makapahamili, o mas importante sa atong kaugalingong paglambo kay sa usa ka kanunay, matag adlaw nga paghatag og gibug-aton sa paghinulsol. Ang paghinulsol dili usa ka panghitabo; usa kini ka proseso. Mao kini ang yawe ngadto sa kalipay ug kalinaw sa hunahuna. Kon inubanan sa hugot nga pagtuo, ang paghinulsol moabli sa atong agianan ngadto sa gahom sa Pag-ula ni Jesukristo. (“Kita Makabuhat og Mas Maayo pa ug Mahimong mas Maayo,” Liahona, Mayo 2019, 67)
Unsa ang imong kinaiya bahin sa paghinulsol? Unsa ang imong buhaton aron ang paghinulsol mahimong mas nakasentro ni Kristo ug mas mahimong malipayon nga kasinatian sa imong kinabuhi? Ikonsiderar ang pagtakda ug pagrekord og usa ka tumong, ug rebyoha kini kanunay.
