Leksiyon 4 Materyal sa Magtutudlo

Pagpangita sa Katuyoan ug Hingpit nga Kalipay diha sa mga Nilalang sa Ginoo

“Ubos sa direksyon sa Iyang Amahan, [si Jesukristo] mao ang tiglalang sa yuta” (Ang Buhi nga Kristo: Ang Pagpamatuod sa mga Apostoles,” ChurchofJesusChrist.org). Niini nga leksiyon, ang mga estudyante maghunahuna nganong ang Ginoo milalang niini nga yuta ug kon unsay ilang mahimo aron makakaplag og mas hingpit nga kalipay diha sa Iyang mga nilalang.

Mga Sugyot alang sa Pagtudlo

Pagpalambo sa Atong Pagtudlo ug Pagkat-on

Saligi ang pagpangandam sa imong mga estudyante. Paghunahuna og mga paagi sa pag-awhag sa mga estudyante nga magtuon sa materyal sa pagpangandam sa klase. Dayon ipakita ang imong hugot nga pagtuo diha sa imong mga estudyante pinaagi sa paghisgot atol sa klase sa ilang gihimo nga pagpangandam. Ang pagbuhat sa ingon makapadasig sa mga estudyante nga moangkon og mas dako nga responsibilidad alang sa ilang kaugalingong pagkat-on.

Ang Dios milalang sa yuta aron ipahinabo ang kaluwasan.

Sa pagsugod sa klase, puwede nimong ipakita ang nag-uban nga litrato ug modapit og pipila ka estudyante sa pagpaambit unsay ilang mga hunahuna, mga pagbati, o mga pangutana samtang nagtan-aw sa mga bitoon sa kalangitan inigka gabii. O puwede nimong ipakita ang mga litrato nga tingali gidala sa mga estudyante og gipadala diha nimo. Hangyoa sila sa pagpaambit sa ilang mga hunahuna mahitungod kon unsay nakadasig kanila diha sa mga litrato.

tawo nga nagtan-aw sa mga bitoon

Pahinumdomi ang mga estudyante nga si Moises dunay talagsaon nga panan-awon diin iyang nakita ang halapad nga kawanangan sa mga nilalang sa Dios. Aron matabangan ang mga estudyante sa paghunahuna og mas lawom pa mahitungod sa Tiglalang ug sa Iyang mga nilalang, dapita sila nga magtrabaho sa ginagmay nga grupo ug hatagi sila sa mosunod nga handout.

Si Moises Nakakat-on og Importanting mga Kamatuoran mahitungod sa Paglalang

Materyal sa Magtutudlo alang sa Si Jesukristo ug ang Iyang Walay Kataposang Ebanghelyo—Leksiyon 4

Basaha ang mosunod nga senaryo:

• Si Gretchen ganahan og siyensiya. Gumikan sa iyang mga pagtuon nakakat-on siya og daghan mahitungod kon sa unsang paagi molihok ang kinaiyanhong kalibotan apan wala siya makakita og makatabagbaw nga tubag kon ngano nga adunay kalibotan. May daghan siyang pangutana mahitungod sa katuyoan sa yuta ug sa atong kinabuhi.

• Unsa nga mga hagit ang atubangon sa usa ka tawo kon dili nila masabtan nganong ang yuta gilalang?

Basaha og dungan ang Moises 1:27–39, ug mangita sa mga kamatuoran nga makapalambo sa panglantaw ni Gretchen bahin sa Paglalang. Dayon hangyoa ang matag sakop sa grupo sa pagpili og usa sa mga dagkong tuldok sa ubos ug gahini og pipila ka minuto ang pag-andam og tubag. Ang matag tawo mopaambit dayon sa ilang mga hunahuna diha sa grupo.

• Unsay imong nakat-onan mahitungod sa matang sa Tiglalang tungod sa Nilalang? Sa unsang paagi nga ang imong hugot nga pagtuo kang Jesukristo naimpluwensiyahan pinaagi sa pagkahibalo nga Siya ang milalang sa tanan nga butang?

• Unsa ang imong mga hunahuna o mga pagbati kon ikaw magkonsiderar nga “kita ang hinungdan sa paglalang sa [Dios] sa uniberso”? (Mahimo nimong rebyohon ang pamahayag ni Presidente Dieter F. Uchtdorf sa seksiyon 1 sa materyal sa pagpangandam.)

• Unsa nga mga aksiyon ang imong gihimo o imong himoon aron matabangan ang uban nga makakab-ot sa ilang potensiyal isip mga anak sa Langitnong Amahan? (Mahimo nimong dapiton ang mga sakop sa grupo sa pagrekord og bisan unsa nga tingali gibati nila nga giaghat nga buhaton alang sa tawo nga ilang nailhan.)

• Unsa nga matang sa kahibalo ang mahimo natong maangkon gikan sa siyensiya? Unsa nga matang sa kahibalo ang mahimo natong maangkon gikan sa mga kasulatan? Nganong kita nagkinahanglan niining duha ka matang sa kahibalo? (Mahimo nimong rebyohon ang mga pamahayag ni Presidente Russell M. Nelson ug ni Presidente Dallin H. Oaks sa seksiyon 3 sa materyal sa pagpangandam.)

© 2023 pinaagi sa Intellectual Reserve, Inc. All rights reserved.

Si Moises Nakakat-on og Importanting mga Kamatuoran mahitungod sa Paglalang

Materyal sa Magtutudlo alang sa Si Jesukristo ug ang Iyang Walay Kataposang Ebanghelyo—Leksiyon 4

handout sa magtutudlo

Pahinumdom: Puwede nimong pilion nga ang gagmay nga grupo moreport ngadto sa klase. O kon ikaw mibati nga ang grupo nga diskusyon nakahisgot na sa tanan nga hilisgotan, mahimo ra dayon nga mopadayon ka ngadto sa sunod nga bahin sa leksiyon.

Puwede nimong taposon kini nga bahin sa klase pinaagi sa paghatag og gibug-aton o pagpamatuod nga ubos sa direksiyon sa Langitnong Amahan, si Jesukristo milalang sa tanan nga butang. Mahimo usab nga imong ipamatuod nga ang Paglalang sa yuta usa ka kinahanglanon nga bahin sa plano sa Langitnong Amahan aron sa pagpahinabo sa pagka-imortal ug sa kinabuhi nga dayon sa Iyang mga anak.

Gipahimutang sa Dios ang tanan nga butang dinhi sa yuta alang sa atong kaayohan ug katagbawan.

Mahimo nimong sugdan kini nga bahin sa diskusyon sa klase pinaagi sa pagpangutana:

• Unsa ang pipila ka nilalang sa Ginoo diin ikaw mibati nga labing mapasalamaton? Giunsa nimo sa pagpahayag ang imong pasalamat ngadto sa Dios alang niini nga mga nilalang?

Mahimo dayon nimong pahinumdoman ang mga estudyante nga ang Dios mipahulay sa ikapito nga adlaw ug nakita nga “ang tanan nga butang nga [Siya] mihimo … mga maayo” (Moises 3:2). Siya dayon “mipanalangin sa ikapito nga adlaw, ug mibalaan niini” (Moises 3:3). Ug sa modernong mga panahon, ang Manluluwas mipahinumdom kanato nga samtang kita magtamod sa Adlawng Igpapahulay “ang kahingpitan sa yuta” maatoa (tan-awa sa Doktrina ug mga Pakigsaad 59:9–16).

Basaha og dungan ang Doktrina ug mga Pakigsaad 59:16–20, ug dapita ang mga estudyante sa pagpangita sa mga pulong o hugpong sa pulong nga naghulagway kon sa unsang paagi nga ang Ginoo gusto nga kita makasinati sa Iyang mga nilalang. Human nga mahisgotan ang kamahinungdanon niadto nga mga pulong ug hugpong sa pulong (ilabi na kadtong anaa sa bersikulo 20), tingali makatabang ang pagpakita sa mosunod nga kamatuoran nga: Ang mga nilalang sa Ginoo gilalang alang sa atong kaayohan ug katagbawan ug dili gamiton sa dili matarong nga mga katuyoan.

Aron matabangan ang mga estudyante sa paghunahuna og lawom mahitungod niini nga kamatuoran mahimo nimong ipangutana ang mga mosunod:

• Ngano kaha nga importante man ang regular nga paggahin og panahon sa pagpangita og hingpit kalipay diha sa mga nilalang sa Ginoo? (Mahimo kang mo-follow up sa “Buhaton” nga pagdapit diha sa seksiyon 2 sa materyal sa pagpangandam.) Unsa kaha ang angay nimong usabon sa imong inadlaw nga buluhaton aron masiguro nga ikaw dunay regular nga oras nga motagamtam sa mga nilalang sa Ginoo? (Tingali makatabang ang paghatag sa mga estudyante og panahon sa pagpamalandong ug pagrekord sa ilang mga hunahuna ug mga impresyon.)

• Sa unsang paagi ikaw nakabenipisyo gikan sa maayong mga butang nga naggikan sa yuta? Unsaon nimo sa pagpakita sa Ginoo og mas dugang nga pasalamat alang niining mga butanga?

• Ngano kaha nga ang atong lawas matawag nga labing mahinungdanon nga nilalang? (Tan-awa ang pamahayag ni Presidente Gordon B. Hinckley sa seksiyon 2 sa materyal sa pagpangandam.) Unsa ang pipila ka paagi nga kita makatahod sa kabalaan sa atong lawas ug sa mga lawas sa uban? Unsa ang nakatabang nimo aron mobati og mas dakong pasalamat alang sa imong kaugalingon nga lawas?

Hatagi og pipila ka minuto dapit sa kataposan sa klase aron mopamatuod ug modapit sa mga estudyante nga mopamatuod bahin sa gugma sa Tiglalang alang sa matag usa kanato.

Alang sa Sunod nga Higayon

Ikonsiderar ang pagpadala sa mosunod nga mensahe ngadto sa mga estudyante sa dili pa moabot ang sunod nga klase: Gusto ka ba nga mobati og dugang nga gahom ug proteksiyon sa imong kinabuhi? Samtang magtuon ka sa materyal sa pagpangandam alang sa leksiyon 5, pangitaa ang gisaad nga mga panalangin ngadto niadtong kinsa nagmatinud-anon sa pagtuman sa ilang mga pakigsaad ngadto sa Ginoo.