Leksiyon 13 Materyal sa Pagpangandam sa Klase: Pagpangalagad sama sa Manluluwas
“Leksiyon 13 Materyal sa Pagpangandam sa Klase: Pagpangalagad sama sa Manluluwas,” Materyal sa Magtutudlo alang sa Si Jesukristo ug ang Iyang Walay Kataposang Ebanghelyo (2023)
“Leksiyon 13 Materyal sa Pagpangandam sa Klase,” Materyal sa Magtutudlo alang sa Si Jesukristo ug ang Iyang Walay Kataposang Ebanghelyo
Imahe
Jesus naghupay sa usa ka masakitong babaye
Leksiyon 13 Materyal sa Pagpangandam sa Klase
Pagpangalagad sama sa Manluluwas
Tanan kita nakamatikod––ug usahay wala nakamatikod––sa mga tawo nga nagkinahanglan og tabang. Ang uban mahimong dihay bati lamang nga adlaw. Ang uban mahimong nagsinati og kamingaw, nagduhaduha sa kaugalingon, kagutom, kahigawad, o sakit. Mahimo kitang maghunahuna, unsay akong mabuhat? Kon kita motan-aw ngadto sa kinabuhi sa Manluluwas, atong makita ang daghang mga ehemplo kon sa unsang paagi Niya “pagpangadto-adto sa paghimog kaayohan” (Mga Buhat 10:38). Samtang kamo motan-aw sa Iyang ehemplo, hunahunaa kon unsa ang inyong makat-onan mahitungod sa pagpangalagad ngadto sa mga panginahanglan sa uban.
Seksiyon 1
Unsa ang akong makat-onan mahitungod sa pagpangalagad gikan sa ehemplo sa Manluluwas?
Handurawa kon unsa kaha ang gibati sa Manluluwas atol sa Kataposang Panihapon, nagpaabot sa makalilisang nga pag-antos nga naghulat Kaniya sa Getsemani ug didto sa krus. Si Elder Jeffrey R. Holland sa Korum sa Napulog Duha ka Apostoles miobserbar:
Imahe
Elder Jeffrey R. Holland
Ubos sa malisod ug lawom nga mga pagbati … sa hilom mibarog si Kristo, gibaksan ang iyang kaugalingon sama sa buhaton sa usa ka ulipon o sulugoon, ug miluhod aron sa paghugas sa mga tiil sa Apostoles. (Tan-awa sa Juan 13:3–17.) Kining gamay nga grupo sa mga tumutuo niining halos wala matukod nga gingharian hapit na mosinati sa ilang labing malisod nga pagsulay, busa ihikling niya ang iyang kaugalingong nagkabug-at nga kasakit aron siya sa makausa pa makaserbisyo ug makalig-on kanila. (“He Loved Them unto the End,” Ensign, Nob. 1989, 25)
Human mahugasan ang mga tiil sa Apostoles, mihatag kanila ang Manluluwas og bag-ong sugo, nga mahimong importante ngadto sa tanan kinsa naningkamot sa pagpangalagad diha sa Iyang ngalan.
Imahe
icon, pagtuon
Pagtuon agi og Pagpangandam alang sa Klase
Basaha ang Juan 13:34–35, ug hunahunaa nganong kini nga sugo importante ngadto sa pagpangalagad.
Samtang kita nagpamalandong sa kinabuhi ni Jesukristo, kita makakita nga Siya mipakita kanato kon unsaon sa pagpangalagad diha sa gugma.
Imahe
icon, pagtuon
Pagtuon agi og Pagpangandam alang sa Klase
Basaha o tan-awa ang usa o sobra pa sa mosunod nga mga kasinatian gikan sa kinabuhi sa Manluluwas ug hunahunaa unsa ang inyong makat-onan mahitungod sa pagpangalagad gikan sa iyang ehemplo ug mga pagtulun-an. Hunahunaa ang pagrekord sa inyong mga hunahuna, mga pagbati, ug mga impresyon.
Kasagaran kanato gustong mangalagad ngadto sa uban inubanan sa Kristohanong gugma. Apan kita mahimong dili makamao kon unsaon o kanus-a motabang. Si Presidente Russell M. Nelson mitudlo nga “ang pagpangalagad nagpasabot sa pagsunod sa inyong mga pagbati sa pagtabang sa laing tawo nga mobati sa gugma sa Manluluwas diha sa iyang kinabuhi” (sa Sheri L. Dew, Insights from a Prophet”s Life: Russell M. Nelson [2019], 349).
Si Presidente Henry B. Eyring mitanyag sa mosunod nga tambag:
Imahe
Presidente Henry B. Eyring
Ang [katuyoan sa Ginoo] alang sa iyang mga Santos mao ang pag-atiman sa usag usa sama sa Iyang gihimo. … Milampos sila sa dihang ang Espiritu Santo migiya sa tig-atiman aron mahibalo unsay nasayran sa Ginoo nga labing maayo alang sa tawo nga Iyang gitabangan. (“Dinasig nga Pagpangalagad,” Liahona, Mayo 2018, 62)
Ang Espiritu Santo kasagarang moaghat kanato sa pagserbisyo sa ginagmay ug yanong mga paagi. Si Presidente Jean B. Bingham, Kinatibuk-ang Presidente sa Relief Society, mitudlo:
Imahe
Presidente Jean B. Bingham
Usahay maghunahuna kita nga kinahanglang mobuhat kita og usa ka butang nga bililhon kaayo ug bayanihon aron “maihap” isip pagserbisyo sa atong mga silingan. Apan ang yano nga mga buhat sa serbisyo mahimong adunay lawom nga mga epekto sa uban—ingon man sa atong mga kaugalingon. Unsa ang gibuhat sa Manluluwas? … Siya … mipahiyom ni, nakigsulti ni, nakiglakaw kauban ni, naminaw ngadto ni, mihatag og oras alang ni, miawhag, mitudlo, mipakaon, ug mipasaylo. Managsama Niyang giserbisyohan ang pamilya ug mga higala, mga silingan ug dili kaila, ug gidapit Niya ang mga kaila ug mga minahal sa pagpahimulos sa buhong nga mga panalangin sa Iyang ebanghelyo. Kadtong “yano” nga mga buhat sa serbisyo ug gugma naghatag og sumbanan alang sa atong pagpangalagad karon. (“Pagpangalagad sama sa Gibuhat sa Manluluwas,” Liahona, Mayo 2018, 104)
Basaha ang mosunod nga pamahayag ni Sharon Eubank, Unang Magtatambag sa Kinatibuk-ang Kapangulohan sa Relief Society, ug hunahunaa kon unsa ang inyong mahimo sa pagpangalagad nga usa ka mas makahuluganon ug personal nga kasinatian.
Imahe
Sister Sharon Eubank
Kon atong usbon ang atong panglantaw nga aron ang pag-amuma alang sa kabos ug sa timawa maminos mahitungod sa paghatag og mga butang ug mas daghan ang mahitungod sa pagpawala sa kagutom alang sa tawhanong kontak, maghatag og makahuluganong pakigsultihanay, ug magmugna og buhong ug maayong mga relasyon, niana ang Ginoo makapadala kanato sa usa ka dapit. … Ang Dios gusto nga mogamit kanimo. Adunay trabaho alang kanimo nga buhaton, ug kini piho nganha kanimo ug sa imong mga abilidad. Walay usa nga mahimong embahador nga kamo mamahimo. … Hinumdomi kana, sa samang paagi ingon sa Manluluwas, kamo sa inyong mga kaugalingon mao ang labing maayo nga mga gasa nga inyong ikahatag ngadto sa ubang mga tawo nga nanginahanglan. (“Turning Enemies into Friends” [Brigham Young University forum address, Ene. 23, 2018], speeches.byu.edu)
Hangyoa ang usa ka sakop sa pamilya, higala, o kauban sa klase kon giunsa nila sa pagpangalagad ngadto sa uban. Kamo mahimo usab nga maghisgot kon unsa usahay ang nagpugong kanato sa pagpangalagad ngadto niadtong nanginahanglan sa Kristohanong gugma.
Seksiyon 2
Unsa ang akong nakat-onan gikan sa sambingay sa Manluluwas sa maayong Samarianhon mahitungod sa pagpangalagad?
Sa panahon ni Jesukristo, dihay igo-igo nga panagbingkil tali sa mga Judeo ug sa mga Samarianhon. Gitan-aw sa mga Judeo ang mga Samarianhon uban sa pagbiay-biay tungod kay sila may “pagka-Israelinhon ug may pagka-Hentil” ug ang ilang “relihiyon mao ang usa ka sinagolan sa mga Judeo ug pagano nga mga tinuohan ug mga batasan” (Giya ngadto sa mga Kasulatan, “Samarianhon, Mga,” scriptures.ChurchofJesusChrist.org).
Kon usa ka abogado (ang mga abogado niana nga panahon mga eksperto sa balaod ni Moises) naninguha sa paghatag og katarongan sa iyang mga lihok kabahin sa sugo sa “paghigugma sa imong silingan,” siya nangutana sa Ginoo, “Kinsa ang akong silingan?” (Tan-awa sa Lucas 10:25–29.) Ang Ginoo mitubag uban sa sambingay sa maayong Samarianhon.
Basaha ang Lucas 10:30–37, ug hunahunaa kon unsa ang inyong makat-onan mahitungod sa pagpangalagad ngadto sa uban.
Si Elder Gerrit W. Gong sa Korum sa Napulog Duha ka Apostoles mitudlo:
Imahe
Elder Gerrit W. Gong
Sa atong abogon nga mga dalan paingon sa Jericho, kita gidagmalan, gisamaran, ug gibiyaan diha sa kasakit.
Bisan kon kinahanglan kita nga magtinabangay sa usag usa, kasagaran motipas kita sa pikas bahin sa dalan, tungod sa bisan unsa nga rason.
Hinoon, uban sa kalooy, ang Maayong Samarianhon mohunong ug mohunad sa atong mga samad gamit ang bino ug lana. … Siya nagdala kanato sa balay nga abotanan, nga mahimong magrepresentar sa Iyang Simbahan. …
… Si Jesukristo nagdapit kanato nga mahimong sama Niya, usa ka maayong Samarianhon, sa paghimo sa Iyang Balay Abotanan (Iyang Simbahan) nga usa ka dangpanan alang sa tanan gikan sa mga kasakit ug mga unos sa kinabuhi. (“Lawak sa Balay Abotanan” Liahona, Mayo 2021, 25)
Kinsa ang inyong gibati nga angay bayawon, lig-unon, o awhagon? Unsa nga Kristohanong serbisyo ang inyong mabuhat alang niini nga tawo? Paghunahuna sa paghimo og usa ka plano sa pagpangalagad.
