Leksiyon 19 Materyal sa Pagpangandam sa Klase: Pag-abag sa Ginoo diha sa Katubsanan sa mga Patay
“Leksiyon 19 Materyal sa Pagpangandam sa Klase: Pag-abag sa Ginoo diha sa Katubsanan sa mga Patay,” Materyal sa Magtutudlo alang sa Si Jesukristo ug ang Iyang Walay Kataposang Ebanghelyo (2023)
“Leksiyon 19 Materyal sa Pagpangandam sa Klase,” Materyal sa Magtutudlo alang sa Si Jesukristo ug ang Iyang Walay Kataposang Ebanghelyo
Imahe
Families [Mga Pamilya], ni Caitlin Connolly
Leksiyon 19 Materyal sa Pagpangandam sa Klase
Pag-abag sa Ginoo diha sa Katubsanan sa mga Patay
Unsa ang imong nahibaloan mahitungod sa imong mga katigulangan? Daghan man o gamay ra ang imong nahibaloan, importanting hinumdoman nga sila tinuod nga mga tawo. Matag usa minahal nga anak sa Langitnong Amahan. Hunahunaa kon pila sa imong mga katigulangan ug uban pa sa tibuok kasaysayan nga nabuhi ug namatay nga walay kahibalo bahin ni Jesukristo o walay oportunidad sa pagdawat sa mga ordinansa sa ebanghelyo. Samtang magtuon ka, ikonsiderar kon sa unsang paagi nga ang pangalagad sa Manluluwas ngadto sa kalibotan sa mga espiritu nakatabang nga mahatag ang mga panalangin sa ebanghelyo ngadto sa tanang tawo. Pamalandongi kon unsay imong mahimo aron sa pag-abag sa Manluluwas diha sa pagtubos sa mga patay.
Seksiyon 1
Unsa ang gitudlo ngari kanato sa pangalagad sa Manluluwas didto sa kalibotan sa mga espiritu mahitungod Kaniya?
Si Elder Spencer J. Condie, samtang nagserbisyo isip usa ka sakop sa Seventy, miingon:
Imahe
Elder Spencer J. Condie
Ang mga kamatuoran bahin sa pagkamatay ug Pagkabanhaw ni Jesus gihangop sa Kristiyanong mga pundok isip usa ka mahinungdanong konsepto. Hinoon, ang unsay gihimo sa imortal nga espiritu ni Jesukristo human sa Iyang kamatayon ug sa wala pa ang Iyang pagkabanhaw usa ka misteryo sa tanan gawas lang sa mga Santos sa Ulahing mga Adlaw. (“The Savior’s Visit to the Spirit World,” Ensign, Hulyo 2003, 32)
Ang kalibotan sa mga espiritu usa ka misteryo alang sa kadaghanan tungod kay ang Biblia gamay ra og pakisayran bahin niini. Atol sa Iyang mortal nga pangalagad, si Jesukristo nanagna nga “ang mga patay makabati sa tingog sa Anak sa Dios: ug mabuhi ang mamati niini” (Juan 5:25; tan-awa usab sa mga bersikulo 24, 26–28). Sa dihang anaa sa krus, si Jesus miingon ngadto sa mahinulsolon nga kawatan sa Iyang tupad, “Sultihan ko ikaw, karong adlawa adto ka sa paraiso uban kanako [o, sa kalibotan sa mga espiritu]” (Lucas 23:43. Si Pedro sa kaulahian mitudlo nga human sa pagkamatay ni Jesus, Siya “miadto ug nagwali sa mga espiritu nga nabilanggo” (1 Pedro 3:19; 4:6).
Niadtong 1918, si Presidente Joseph F. Smith namalandong niini nga mga pulong ni Pedro ug naghunahuna sa Pag-ula sa Manluluwas sa dihang nakabaton siya og usa ka talagsaong panan-awon bahin sa kalibotan sa mga espiritu (tan-awa sa Doktrina ug mga Pakigsaad 138:1–11).
The Commissioned [Ang Pagkatinugyanan], ni Harold I. Hopkinson
Imahe
icon, pagtuon
Pagtuon agi og Pagpangandam alang sa Klase
Basaha ang Doktrina ug mga Pakigsaad 138:12–19, 23–24, ug hunahunaa kon unsa kaha ang bation nga maanaa didto kuyog sa matinud-anon nga mga espiritu nga gihulagway niini nga mga bersikulo.
Atol niini nga panan-awon, si Presidente Joseph F. Smith natingala kon giunsa pagtudlo sa Manluluwas ang ebanghelyo ngadto sa tanang espiritu kay Siya anaa didto sa mubo ra kaayo nga panahon (tan-awa sa Doktrina ug mga Pakigsaad 138:25–28).
Imahe
icon, pagtuon
Pagtuon agi og Pagpangandam alang sa Klase
Basaha ang Doktrina ug mga Pakigsaad 138:29–35, ug pangitaa kon sa unsang paagi nga ang Manluluwas miandam og paagi nga ang Iyang ebanghelyo masangyaw ngadto sa tanang tawo sa kalibotan sa mga espiritu.
Unsa kaha ang atong makat-onan mahitungod sa Manluluwas gikan sa panan-awon ni Presidente Smith? Unsaon nimo sa pagpasabot ang kamahinungdanon niining talagsaong panghitabo ngadto sa usa ka tawo nga wala pa makadungog bahin niini?
Seksiyon 2
Sa unsang paagi nga ako makatabang sa Ginoo diha sa katubsanan sa mga patay?
Tungod sa Ilang walay kinutoban nga gugma ug kaluoy, ang Langitnong Amahan ug si Jesukristo miandam og paagi aron ang tanang tawo makadawat sa mga ordinansa nga mahinungdanon alang sa kahimayaan—bunyag, kompirmasyon, ordinasyon ngadto sa Melchizedek nga Pagkapari (alang sa mga lalaki), pagtuga diha sa templo, ug pagsilyo sa kaminyoon. Kon tan-awon gikan sa mahangtorong panglantaw, atong makita ang mga sumusunod sa Manluluwas sa duha ka habig sa tabil nga nagtinabangay uban Kaniya alang sa kaluwasan sa tanang anak sa Langitnong Amahan. Ang buhat sa kaluwasan alang sa mga patay usa ka sagrado nga oportunidad nga mahimo natong apilan karon ug sa tibuok natong kinabuhi. Usa ka paagi nga kita makaabag niini nga buhat mao ang pinaagi sa proxy [puli] nga mga ordinansa, nga mapahigayon lamang diha sa mga templo.
Pinaagi sa Iyang mga propeta, ang Ginoo nagdapit sa tanang miyembro sa Simbahan sa pag-andam sa ilang kaugalingong mga family history ug sa pag-ila niadtong nagkinahanglan sa makaluwas nga mga ordinansa. Si Presidente Russell M. Nelson mitudlo:
Imahe
Presidente Russell M. Nelson
Pinaagi sa paghimo alang sa uban sa unsay dili nila mahimo sa ilang kaugalingon, atong gisunod ang sundanan sa Manluluwas, kinsa naghimo sa Pag-ula aron mapanalanginan ang kinabuhi sa ubang mga tawo. (“Personal Preparation for Temple Blessings,” Liahona, Mayo 2001, 34)
Si Elder D. Todd Christofferson sa Korum sa Korum sa Napulog Duha ka Apostoles misulti bahin sa buhat sa proxy nga gipahigayon diha sa mga templo:
Imahe
Elder D. Todd Christofferson
Ang atong mga paningkamot alang sa atong mga patay mobunga og tataw nga saksi nga si Jesukristo mao ang balaang Manunubos sa tanang katawhan. Ang Iyang grasya ug mga saad moabot bisan niadtong kinsa samtang buhi pa wala makakaplag Kaniya. (“The Redemption of the Dead and the Testimony of Jesus,” Ensign, Nob. 2000, 11)
Si Elder Dale G. Renlund sa Korum sa Napulog Duha ka Apostoles nagtakda og usa ka lista sa “hilabihan ka nindot” nga mga panalangin nga atong madawat samtang kita moapil sa buhat sa family history ug sa templo:
Imahe
Elder Dale G. Renlund
Dugang nga panabot bahin sa Manluluwas ug sa Iyang maulaon nga sakripisyo;
Dugang nga impluwensya sa Espiritu Santo aron mobati sa kalig-on ug direksyon sa kaugalingon natong kinabuhi;
Dugang nga pagtuo, aron ang pagkakabig ngadto sa Manluluwas magkalawom ug magpadayon;
Dugang nga abilidad ug kadasig sa pagkat-on ug paghinulsol tungod sa panabot kon si kinsa kita, diin kita gikan, ug mas tin-aw nga panan-awon kon asa kita padulong;
Dugang nga makahapsay, makabalaan, ug makapakalma nga impluwensya sa atong kasingkasing;
Dugang nga kalipay pinaagi sa paglambo sa abilidad nga mobati sa gugma sa Ginoo;
Dugang nga mga panalangin sa pamilya, bisan unsa pay atong kasamtangan, nangagi, o umaabot nga sitwasyon o bisan unsa kadili hingpit sa atong family tree;
Dugang nga gugma ug pasalamat para sa mga katigulangan ug buhing mga paryente, aron dili na kita mobati nga nag-inusara;
Dugang nga gahom sa pag-ila sa butang nga nagkinahanglan og pagkaayo ug, uban sa tabang sa Ginoo, makaserbisyo sa uban;
Dugang nga proteksyon batok sa mga tintasyon ug sa nagkagrabing impluwensya sa kaaway; ug
Dugang nga tabang sa pag-ayo sa samok, guba, o mabalak-ong kasingkasing ug pag-ayo sa samaran.
Kon nag-ampo ka bisan asa niini nga mga panalangin, apil sa buhat sa family history ug sa templo. Sa inyong pagbuhat niini, tubagon ang inyong mga pag-ampo. Kon gihimo ang mga ordinansa para sa mga patay na, ang mga anak sa Dios dinhi sa yuta mamaayo. (“Buhat sa Family History ug sa Templo: Pagsilyo ug Pagkaayo,” Liahona, Mayo 2018, 47)
Unsay imong mabuhat karon aron makaapil uban sa Ginoo diha sa buhat sa templo ug sa family history? Ikonsiderar ang pagpakig-istorya sa usa ka sakop sa pamilya mahitungod sa inyong mga katigulangan, pagtrabaho sa pag-indeks, pagkahimong mas pamilyar sa FamilySearch, o pag-adto sa templo ug pagpahigayon og usa ka ordinansa alang sa usa ka tawo nga patay na.
