Si Jesukristo nga nagtuyhad sa Iyang kamot ngadto sa usa ka tawo

Leksiyon 18 Materyal sa Pagpangandam sa Klase

Pagdawat sa Balaanon nga Gasa sa Grasya sa Manluluwas

Aduna bay panahon nga mibati ka og kasagmuyo tungod sa imong mga sala, mga sayop, mga kahuyang, ug mga pagkulang? Nakaingon ka na ba sa imong kaugalingon sama sa “Dili lang gyod ko angayan” o “dili gyod ko mahimong angayan”? Samtang magtuon ka, hunahunaa kon sa unsang paagi nga ang grasya sa Ginoo makaluwas nimo gikan sa pagsaway sa kaugalingon, pag-usab sa imong mga kahuyang ngadto sa mga kalig-on (tan-awa sa Ether 12:27), ug paghatag nimo og gahom nga mahimong mas maayo ug makahimo og mas daghang kaayohan kaysa imong mahimo nga ikaw lang.

Seksiyon 1

Nganong nagkinahanglan man ko sa grasya sa Manluluwas?

Si Apostol Pablo mipamatuod, “May kalig-on ako sa pagsagubang sa tanan tungod sa gahom nga gihatag kanako ni Kristo” (Mga Taga- Filipos 4:13). Kining makapalig-on o makaabag nga gahom gitawag og grasya ug “gihatag ngari kanato pinaagi sa Pag-ula ni Ginoong Jesukristo” (Gospel Topics, “Grace,” topics.ChurchofJesusChrist.org).

Ang Manluluwas mihulagway sa atong panginahanglan alang sa Iyang grasya diha sa sambingay sa tinuod nga paras [vine].

gisulatan nga diagram sa usa ka paras, sanga, bunga

icon, pagtuon

Pagtuon agi og Pagpangandam alang sa Klase

Basaha ang Juan 15:1–8, ug hunahunaa unsay ikatudlo sa mga simbolo niini nga sambingay mahitungod sa atong pagpanginahanglan og tabang sa Ginoo. (Pahinumdom: Ang “putlon” diha sa bersikulo 2 mahimo usab nga hubaron og “pul-ongan” o “limpyohan.” Ang “pabilin” diha sa bersikulo 4 mahimong hubaron nga “magpadayon.”)

Si Elder Jeffrey R. Holland sa Korum sa Napulog Duha ka Apostoles miingon bahin niini nga sambingay:

Elder Jeffrey R. Holland

Si Kristo mao ang tanan kanato ug kita gayod “magpabilin” diha Kaniya sa kanunay, dili matarog, makanunayon, sa kahangtoran. Kay aron ang bunga sa ebanghelyo mamulak ug mopanalangin sa atong kinabuhi, kita kinahanglan gayod nga lig-ong magkupot Kaniya. … Siya ang tinuod nga punoan nga paras nga mao ang atong tinuod nga tinubdan sa kalig-on ug mao lamang ang tinubdan sa kinabuhing dayon. (“Abide in Me,” Liahona, May 2004, 32)

Ang pagpabilin, o pagpadayon, diha ni Jesukristo makapahimo nga kita makadawat sa Iyang grasya aron kita makabuntog sa sala ug makaamgo sa atong hingpit nga potensyal. Si Lehi mitudlo, “Walay tawo … nga makapuyo sa atubangan sa Dios, gawas nga pinaagi sa mga buhat, ug kaluoy, ug grasya sa Balaan nga Mesiyas” (2 Nephi 2:8). Ug si Moroni mipamatuod nga pinaagi sa grasya ni Kristo kita mahisama Kaniya—putli, hingpit, ug balaan (tan-awa sa Moroni 10:32–33).

adlaw nga nagdan-ag sa young adult

Si Elder David A. Bednar sa Korum sa Napulog Duha ka Apostoles mitudlo nga ang grasya nga madawat pinaagi sa Pag-ula sa Manluluwas “makatabang kanato nga makakita ug makabuhat ug mahimong maayo sa mga paagi nga dili mabantayan o matuman gamit ang atong limitadong mortal nga kapasidad” (“Diha sa Kusog sa Ginoo,” Liahona, Nob. 2004, 77).

icon, paghisgot

Paghisgot agi og Pagpangandam alang sa Klase

Pangutana sa usa ka higala o sakop sa pamilya kon unsaon niya pagpasabot sa grasya ni Jesukristo ug kon sa unsang paagi nga siya nakasinati sa Iyang grasya.

Seksiyon 2

Unsay kalabotan sa akong hugot nga pagtuo ug pagkamasulondon diha sa pagdawat sa grasya sa Manluluwas?

usa ka tawo nga naggunit og regalo

mga sinsilyo nga nahulog gikan sa pitaka

Hunahunaa ang duha ka nag-uban nga mga imahe. Kini nga mga imahe mahimong nagrepresentar sa duha ka hulagway sa balaanon nga grasya. Ang uban nagtan-aw sa grasya isip usa ka gasa nga libreng ihatag bisan kon unsa pa ang atong gibuhat sa kinabuhi. Ang uban nagtuo nga kita mahimong makaangkon sa grasya sa Dios pinaagi sa atong maayong mga buhat. Bahin niining duha ka dili kompleto nga panglantaw, si Elder Holland miingon:

Elder Jeffrey R. Holland

Ang ubang mga gasa nga nagagikan sa Pag-ula malukpanon, walay kinutoban, ug walay kondisyon. Kini naglakip sa Iyang pagtubos sa orihinal nga kalapasan ni Adan … [ug] sa Pagkabanhaw. …

Laing mga aspeto sa gasa sa pag-ula ni Kristo adunay kondisyon. Kini nag-agad sa makugihong pagtuman sa mga kasugoan sa Dios. Pananglitan, samtang ang tanang miyembro sa tawhanong pamilya gawasnong gipalingkawas gikan sa sala ni Adan nga walay paningkamot sa ilang kaugalingon, sila wala hatagi og kagawasan sa ilang kaugalingong mga sala gawas kon sila mopasalig og hugot nga pagtuo diha kang Kristo [ug] maghinulsol niadtong mga sala. …

Tataw nga ang walay kondisyon nga mga panalangin sa Pag-ula wala hagoi, apan ang adunay kondisyon dili usab hingpit nga gihagoan. Pinaagi sa pagpuyo nga matinud-anon ug pagsunod sa mga kasugoan sa Dios, ang usa ka tawo makadawat og dugang nga mga kahigayonan, apan kini gihatag nga walay bayad, dili teknikal nga maangkon. (“Ang Pag-ula ni Jesukristo,” Liahona, Mar. 2008, 36–37)

Naghisgot bahin sa grasya nga madawat pinaagi sa Pag-ula sa Manluluwas, si Nephi miingon, “Kami nasayod nga pinaagi sa grasya kami maluwas, human sa tanan nga atong mabuhat” (2 Nephi 25:23). Ang uban naglibog sa hugpong sa mga pulong nga “human sa tanan nga atong mabuhat.” Aron matabangan ka nga mas masabtan ang mga pulong ni Nephi, basaha ang mosunod nga mga pamahayag sa mga lider sa Simbahan:

Elder Dieter F. Uchtdorf

Ako naghunahuna kon usahay sayop ba ang atong pagsabot sa hugpong sa mga pulong “human sa tanan nga atong mabuhat.” Kinahanglan nga atong sabton nga ang “human” dili makatupong sa “tungod.”

Kita wala maluwas “tungod” sa tanan nga atong mabuhat. Aduna bay usa kanato nga nakabuhat sa tanan nga atong mabuhat? Maghulat ba ang Dios hangtod atong nahatag ang tanang paningkamot sa dili pa Siya mopatunga diha sa atong mga kinabuhi uban sa Iyang makaluwas nga grasya? …

Ako nakasiguro nga si Nephi nahibalo nga ang grasya sa Manluluwas nagtugot ug naghimo kanato sa pagbuntog sa sala [tan-awa sa 2 Nephi 4:19–35; Alma 34:31]. Maoy hinungdan nga si Nephi naghago nga makugihon sa pagdasig sa iyang mga anak ug mga kaigsoonan “sa pagtuo kang Kristo, ug aron makig-uli sa Dios” [2 Nephi 25:23]. (Dieter F. Uchtdorf, “Ang Gasa sa Grasya,” Liahona, Mayo 2015, 110)

Elder D. Todd Christofferson

Wala kinahanglana nga mokab-ot kita og lebel sa kapasidad o kamaayo sa dili pa motabang ang Dios—ang balaang tabang atong masinati bisan kanus-a, bisan asa pa kita diha sa dalan sa pagkamasulundon. … Ang akong hangyo nga mahimong responsable ug molihok aron may butang nga magamit ang Dios sa pagtabang kanato. (D. Todd Christofferson, “Gawasnon sa Kahangtoran, nga Molihok alang sa Ilang Kaugalingon,” Liahona, Nob. 2014, 19)

Elder Bruce C. Hafen

Ang gasa sa grasya sa Manluluwas ngari kanato dili kinahanglang limitado sa panahon nga “human” sa tanan nga atong mabuhat. Kita makadawat sa Iyang grasya sa dili pa, atol sa, ug human sa panahon nga kita migahin sa atong kaugalingong paningkamot. (Bruce C. Hafen, The Broken Heart: Applying the Atonement to Life’s Experiences [1989], 155–56)

icon, pamalandong

Pamalandong agi og Pagpangandam alang sa Klase

Unsa ang pipila ka sayop nga hunahuna nga imong nadungog mahitungod sa grasya sa Manluluwas? Sa unsang paagi nga ang unsay imong nakat-onan mahitungod sa grasya nakapanalangin nimo ug sa uban nga imong kaila?

Seksiyon 3

Sa unsang paagi nga ang grasya sa Manluluwas makausab sa akong kinabuhi?

Si Jesukristo nakasinati sa tanang kasakit, mga tintasyon, mga balatian, ug mga kahuyang sa mortal nga kinabuhi, busa Siya nasayod kon unsaon sa pagtabang kanato (tan-awa sa Mga Hebreo 2:18; 4:15; Alma 7:11–12; Doktrina ug mga Pakigsaad 62:1). Tungod kay si Jesukristo usa ka andam ug makahimo nga Manluluwas, kita “dili magpanuko sa pagduol sa trono sa Dios diin anaa ang grasya, dinha madawat nato ang kaluoy ug ang grasya nga atong gikinahanglan” (Mga Hebreo 4:16).

young adult nga nag-ampo

icon, pagtuon

Pagtuon agi og Pagpangandam alang sa Klase

Ikonsiderar kon unsay imong makat-onan mahitungod sa pagtinguha o pagdawat sa grasya sa Ginoo gikan sa usa o daghan pa nga mga asoy sa kasulatan.

• Ether 12:23–28: Si Moroni nabalaka sa iyang kahuyang sa pagsulat.

• 2 Nephi 4:17–26, 30–33: Si Nephi nabalaka mahitungod sa iyang mga sala.

• Mosiah 24:8–16: Ang mga tawo ni Alma nanglimbasog diha sa pagkabihag.

• Moises 6:27, 31–32; 7:10–13: Si Enoch mibati nga dili angayan nga mosangyaw ug managna.

• 2 Mga Taga-Corinto 12:7–10: Si Pablo naghisgot bahin sa usa ka “tunok sa unod,” usa ka pasumbingay nga nagpasabot nga usa ka kahuyang nga anaa niya nga nakasamok niya.

Samtang magbasa ka, pamalandongi ang mosunod nga mga pangutana:

1. Sa unsang paagi nga makita ang grasya?

2. Unsa ang gibuhat sa tawo (o mga tawo) sa pagdapit o pagsalig sa grasya sa Ginoo?

3. Sa unsang paagi nga ako makatandi niini nga asoy ngari sa akong kinabuhi?

icon, irekord

Irekord ang Imong mga Hunahuna

Paghunahuna ug irekord ang higayon nga mibati ka nga morag nadawat nimo ang grasya sa Ginoo. Hinumdomi nga kasagaran, ang grasya moabot matag adlaw sa ginagmay ug yano nga mga paagi. Pag-andam sa pagpaambit og ehemplo atol sa klase.

Gusto pa og Dugang? (Opsiyonal)

Asa ako makakat-on pa og dugang mahitungod sa unsay gitudlo sa mga propeta mahitungod sa grasya?

Presidente Dieter F. Uchtdorf

Si Presidente Dieter F. Uchtdorf, kanhi magtatambag sa Unang kapangulohan, mitudlo sa kahulogan ug kaimportante sa grasya diha sa pakigpulong nga “Ang Gasa sa Grasya” (Liahona, Mayo 2015, 107–10).

Mahimo usab nimong basahon ang pakigpulong nga “Nasamdan” (Liahona, Nob. 2018, 83–86), diin si Elder Neil L. Andersen sa Korum sa Napulog Duha ka Apostoles mitudlo kon sa unsang paagi nga ang grasya sa Manluluwas naghatag og kaayohan ug paglaom niadtong nasamdan.

Ang ubang mga pakigpulong sa kinatibuk-ang komperensiya mahitungod sa grasya makit-an pinaagi sa pagpangita sa “grasya” gamit ang Mga Hilisgotan sa Kinatibuk-ang Komperensiya nga tool diha sa ChurchofJesusChrist.org.

Sa unsang mga paagi nga ang grasya adunay kalabotan sa akong inadlaw-adlaw nga kinabuhi?

Brother Bradley R. Wilcox

Sa pakigpulong nga “His Grace Is Sufficient” ([Brigham Young University nga debosyonal, Hulyo 12, 2012], speeches.byu.edu), si Brother Bradley R. Wilcox, magtatambag sa Kinatibuk-ang Kapangulohan sa Young Men, mitudlo nga ang grasya sa Manluluwas igo ra sa matag adlaw sa atong kinabuhi.

Asa ako makakat-on pa og dugang mahitungod sa relasyon tali sa grasya ug mga buhat?

Ang artikulo nga “Are You Saved by Grace or Works?” (New Era, Mar. 2005, 38–39) naghatag og importante nga mga ideya mahitungod sa grasya ug mga buhat ug naglista og dugang nga mga tudling sa kasulatan nga mahimo nimong tun-an.