Faamagaloga

Mauaina o le faamoemoe ma le faamalologa e ala ia Iesu Keriso

O le faamagaloga o le meaalofa a le Atua ia i tatou E ala mai i lo tatou Faaola, o Iesu Keriso, e mafai ai ona tatou maua le faamagaloga pe a tatou salamo. O nisi taimi e mafai ona lagona ai le lofituina i le sailia o le faamagaloga o mea tatou te salamo ai. Ae a o tatou lafoaia a tatou agasala ma oo i se suiga o le loto e ala i le mana togiola o Iesu Keriso, tatou te maua le faamalologa, filemu, ma se lagona faafouina o le olioli.

I lenei olaga, tatou te aoao ai foi e tuuina atu le faamagaloga ia i latou atonu na faatiga pe faamanua ia i tatou. E ono faigatā ona faamagalo atu i isi, aemaise lava pe a matuā faamanu’alia i tatou e se tasi. Ae o le mulimuli i le poloaiga a le Alii ia faamagalo atu ma e ala i le faalagolago ia Iesu Keriso, e mafai ai ona tatou maua le mapusaga mai tiga ma maua ai le faamoemoe mo le lumanai. O le faamagalo atu i isi e fesoasoani foi ia i tatou e atiina ae ai uiga faaKeriso ina ia sili atu ona tatou saunia e maua le ola e faavavau ma toe nonofo faatasi ma lo tatou Tama Faalelagi.

O le A le Faamagaloga?

O le mauaina o le faamagaloga o le faamagaloina atoatoa lea o a tatou agasala ma mea sese—tetele pe laiti—. Ua mafai lenei mea ona o le Togiola a Iesu Keriso. Ona sa Ia puapuagatia mo a tatou agasala, e mafai ona toe faamamaina i tatou pe a tatou salamo faamaoni ma faatuatua i le gafatia o le Faaola e faamalolo ai i tatou. E ala mai i le alofa mutimutivale o le Atua e mafai ona tatou lagonaina le filemu, malosi, ma le olioli a o tatou lafoaia a tatou agasala. Ua poloaiina foi i tatou e le Faaola e faamagalo atu i isi e pei ona Ia faamagaloina i tatou.

Vaaiga aoao i le autu: Faamagaloga

Taiala e faatatau i le suesueina o le talalelei: Faatuatua ia Iesu Keriso, Salamo, Papatisoga, Faamasinoga, Alofa Mama

Vaega 1

Ua Folafola Mai e le Alii le Faamagaloga pe a Tatou Salamo Faamaoni i a Tatou Agasala

Ua tuuina mai e le Tama Faalelagi ia i tatou poloaiga e fesoasoani ia i tatou e tumau ai i le ala o feagaiga ma toe foi atu e toe nonofo faatasi ma Ia. E ala i le meaalofa o le faitalia, tatou te filifili ai e mulimuli i le faataitaiga a lo tatou Faaola ma tausia poloaiga e pei ona sa Ia faia. Ioe, o le a tatou le atoatoa i le tausiga o poloaiga—e masani ona tatou faia mea sese ona o o tatou tauiviga patino, vaivaiga, ma faaosoosoga. Ae a o tatou faatinoina lo tatou faatuatua i le Faaola ma Lana taulaga togiola, e mafai ona tatou faatoilaloina a tatou agasala ma vaivaiga. E mafai foi ona tatou maua le filemu i le iloaina ua folafola mai e le Atua le faamagaloga i tagata uma o e salamo ma tausi i poloaiga (tagai 1 Ioane 1:9; Mataupu Faavae ma Feagaiga 1:31–32).

Pe a tatou salamo ma papatisoina ma faamauina, tatou te maua le faamagaloga o a tatou agasala ma tuuina mai ai le meaalofa o le Agaga Paia (tagai Galuega 2:38). O taimi uma lava tatou te aai ai i le faamanatuga, tatou te osia ai se feagaiga ma le Alii ma mafai ai ona faamagaloina a tatou agasala e ala i le ofoina atu i le Alii o se loto momomo ma se agaga salamo (tagai Moronae 6:1–4).

E ala i le faagasologa o le salamo, e suia ai o tatou loto ma tatou mananao ai e faia mea lelei ma auauna atu i isi (tagai Mosaea 5:2; Alema 36:24). Tatou te lagona le olioli ona o le agalelei o le Atua ma taumafai e faatumauina le faamagaloga o a tatou agasala (tagai Mosaea 4:10–12, 26). A o tatou salamo faamaoni, osia ma tausia a tatou feagaiga, ma tumau e oo i le iuga, o le a faapaiaina i tatou ma agavaa e toe foi atu i le afioaga o lo tatou Tama Faalelagi (tagai 3 Nifae 27:19–22).

Mea e mafaufau i ai

Sa faatumulia tagata o le Tupu o Peniamina i le olioli ma le filemu o le mafaufau ina ua latou maua se faamagaloga o a latou agasala. Faitau le Mosaea 4:1–3 ma mafaufau loloto pe faapefea e le tuuina o lou faatuatua ia Iesu Keriso ma Lana taulaga togiola ona aumaia le olioli ma le filemu i lou olaga. Pe i ai ni auala e mafai ona e tuuina atu atoatoa ai lou loto i le Atua a o e lafoaia au agasala?
Ina ua liua Alema le Itiiti i le talalelei, sa le toe lagonaina e ia le tiga o ana agasala sa i ai muamua (tagai Alema 36:12–14, 17–24). Mafaufau e matamata le vitio lenei a Peresitene Russell M. Nelson o loo faamatala mai ai le tele o le suiga o le loto ma le auala e mafai moni ai ona liua i tatou i le talalelei a Iesu Keriso. E faapefea ona e taumafai ia liua i le Alii? Na faapefea e lou liua ona faamanuiaina lou olaga ma olaga o i latou o siomia oe?

Gaoioiga mo le aoao faatasi ma isi

Pe a tatou sailia le faamagaloga, tatou te vaavaai mo avanoa e tuputupu ae ai—e oo lava i le liua—e ala mai i lo tatou Faaola, o Iesu Keriso. Matamata i se vitio ua leva ona i ai e uiga i nisi o mea i le natura e oo i se suiga, e pei o se ketipila o loo liua i se pepe po o se fatu ua liua i se fugalaau. Talanoaina pe faapefea ona tatou maua le gafatia e avea ai ma se mea matagofie e ala mai ia Iesu Keriso ma Lana Togiola.
Na aoao mai Peresitene Nelson e manaomia e i tatou uma ona salamo ma a tatou faia i aso taitasi, o le a avea i tatou ma tagata sili ona lelei o i tatou lava. Toe iloilo lana lauga “E Mafai Ona Tatou Faia Mea e Sili Atu ma Lelei Atu,” ma talanoaina pe faapefea ona e salamo i aso taitasi ina ia maua ai se vaaiga fou ia te oe lava, le Atua, ma le lalolagi (tagai foi i le Taiala i Tusitusiga Paia, “Salamo, Salamo,” Potutusi o le Talalelei).

Aoao atili

Isaia 1:18; 55:6–7; Esekielu 18:21–22; Enosa 1:4–8; Mosaea 26:30; Mataupu Faavae ma Feagaiga 61:2
Dale G. Renlund, “Salamo: O Se Filifiliga Fiafia,” Liahona, Nov. 2016, 121–24
Craig A. Cardon, “E Finagalo le Faaola ia Faamagalo Atu,” Liahona, Me 2013, 15–17
Camille N. Johnson, “O Iesu Keriso o le Mapusaga,” Liahona, Me 2023, 81–83

Vaega 2

Ua Poloaiina i Tatou e le Alii ia Faamagalo Atu i Isi

A o i ai Keriso i luga o le satauro, sa Ia ole atu i le Tama e faamagalo fitafita na faasatauroina o Ia. O lenei faatinoga o le alofa o se faataitaiga atoatoa lea o le faamagaloga ma e faamanatu mai ai ia i tatou ia faamagalo atu e pei ona sa Ia faia.

I le taimi o Lana galuega i le tino, na aoaoina ai i tatou e le Faaola ia alolofa i o tatou fili ma “faia mea lelei ia te i latou o e inosia outou, ma tatalo mo i latou o e faaaogaina ma le le fiafia outou, ma sauaina outou” (Mataio 5:44). Atonu tatou te lagona e le mafai ona tatalo mo i latou o e ua matua faatiga ia i tatou, ae o le faia o lena mea ua faaalia ai i le Atua o loo tatou tuuina lo tatou faatuatua ia te Ia. Na aoao mai Peresitene M. Russell Ballard: “O le tatalo ma le loto atoa mo i latou atonu ua manatu o ni o tatou fili e faapupula atu ai lo tatou talitonuga faapea e mafai e le Atua ona suia o tatou loto ma loto o isi.”

I le Mataupu Faavae ma Feagaiga 64:8–11, ua tatou aoao ai afai tatou te filifili e le faamagalo atu, ua sili atu lo tatou sese nai lo le tagata na faia se mea sese ia i tatou. A o tatou ofoina atu le faamagaloga i tagata uma, ua tatou faaali atu i le Atua e le gata ina tatou naunau e tausi Ana poloaiga ae faapea foi tatou te faatuatuaina o Ia e faia le mea sili mo Ana fanau.

Mea e mafaufau i ai

I le faamamaluina o le Eseta i le 2023, na valaaulia ai e Peresitene Nelson tagata i le lalolagi atoa ina ia oo i le vavega o le faamagaloga. Na ia faapea mai: “Ou te folafola atu a e faamagalo atu, o le a aveesea e le Faaola lou ita, le fiafia, ma le tiga. O le a aumaia e le Aloalii o le Filemu ia te oe le filemu.” Pe o i ai se ita o loo e teuina pe tiga o loo e lagonaina ona sa e musu e faamagalo se tasi? Mafaufau po o a laasaga e mafai ona e faia agai i le faamagaloga, ma mafaufau pe faapefea ona taialaina oe e le Tama Faalelagi ma Iesu Keriso.
A o tatou tatalo ma le filiga mo Lana fesoasoani, e mafai e le Faaola ona tuuina mai ia i tatou le malosi tatou te manaomia e faamagalo atu ai i isi, e tusa lava pe foliga mai e le mafai. Na aoao mai Peresitene Nelson: “Ae o le a faamatuu atu e le Faaola ia te oe le gafatia e faamagalo atu i soo se tasi na agaleaga ia te oe i soo se auala. Ona le toe mafai lea e a latou faatinoga tiga ona avea ma avega mamafa i lou agaga. Mafaufau loloto pe faapefea ona avea le faamagaloga ma meaalofa a le Faaola ia i tatou ma pe faapefea ona Ia faatagaina oe e faamagalo atu e tusa lava pe le mafai ona e faamagalo atu. E faapefea e le mafaufau i le faamagalo atu o se meaalofa ona aumaia ia te oe le faamoemoe?

Gaoioiga mo le aoao faatasi ma isi

O nisi taimi e manaomia ai le lototele tele e faamagalo atu ai e pei foi o le sailia o le faamagaloga. Talanoaina nisi o faataitaiga o tagata o e na ofoina atu le faamagaloga i tulaga faigata. O a faamanuiaga e oo mai pe a tatou faamagalo atu i isi? Valaaulia tagata uma e mafaufau i se tasi na faatiga pe faaitaina i latou i se isi itu ma tatalo mo lena tagata i lo latou lava taimi. Atonu foi e te fautuaina i latou e taumafai e auauna atu i lena tagata pe afai e talafeagai mo lo latou tulaga, ma valaaulia i latou e vaai pe suia ai o latou lagona i le tagata lava ia.
Pe a tatou ole atu mo le Faaola e faamalosia i tatou e ala i Lana taulaga togiola, e mafai ona tatou maua le saoasaoa faaleagaga tatou te manaomia e faamagalo atu ai i isi. Faataitai po o le a le saoasaoa—atonu e ala i le faaali atu o se vitio o se nofoaafi e saoasaoa tele po o se tagata taalo o loo faia se gaoioiga mataina. Faitau vaega o le saunoaga a Peresitene Nelson, ma talanoaina pe mafai faapefea e le Faaola ona faamalosia i tatou e faamagalo atu ia i latou o e na matuai tiga lava ia i tatou a o tatou taulai atu i lo tatou saoasaoa faaleagaga.

Aoao atili

Mataio 18:21–22; Efeso 4:32; 1 Nifae 7:16–21; Mosaea 26:31; Mataupu Faavae ma Feagaiga 42:88
Jeffrey R. Holland, “O le Galuega o le Faaleleiga,” Liahona, Nov. 2018,
“Alofa Mama, o le Alofa Lē Pona o Keriso,” Aoaoga a Peresitene o le Ekalesia: Iosefa Samita (2011), 391–99
Kristin M. Yee, “Matagofie e Sui A’i Le Lefulefu: O Le Ala Faamalolo o le Faamagaloga,” Liahona, Nov. 2022, 36–38
“President Uchtdorf: Forgiveness” (vitio), ChurchofJesusChrist.org