“Seoli,” Autu ma Fesili (2023)
Vaaiga Aoao
Seoli
Ua talanoa mai faaaliga o aso e gata ai e uiga i le seoli i ni ala e le itiiti ifo ma le lua. Muamua, o se isi igoa lea mo le falepuipui o agaga, o se nofoaga le tumau lea i le lalolagi pe a mavae le oti mo i latou o e na maliliu e aunoa ma se malamalama i le upumoni po o i latou o e na lē usiusitai i le olaga faitino. Lona lua, o le nofoaga tumau lea o Satani ma ona soo ma atalii o le malaia, o e e le togiolaina e le Togiola a Iesu Keriso.
O le falepuipui o agaga o se tulaga le tumau lea o le a aoaoina ai agaga i le talalelei ma maua ai le avanoa e salamo ai ma talia sauniga o le faaolataga ia e faatinoina mo i latou i totonu o malumalu. O i latou e taliaina le talalelei o le a nonofo ai i le parataiso seia oo i le Toetutu. A uma ona toetutu ma faamasinoina i latou, o le a latou maua le tikeri o le mamalu lea ua latou agavaa ai. O i latou o e filifili e le salamo ae e le o ni atalii o le malaia o le a tumau pea i le falepuipui o agaga seia oo i le faaiuga o le Meleniuma, lea o le a faasaolotoina ai i latou mai seoli ma faasalaga ma toetutu ai i se mamalu telesitila.
O atalii o le malaia o i latou ia o e “le mauaina se faamagaloga i lenei lalolagi po o le lalolagi a sau—ona ua latou faafitia le Agaga Paia ina ua uma ona latou mauaina, ma faafitia le Alo e Toatasi na Fanaua e le Tama, ona ua latou faasatauroina o ia mo i latou lava ma tuu o ia i se maasiasi.”3 O na tagata o le a le mautofi i se nofoaga i soo se malo o le mamalu; mo i latou o loo tumau pea tulaga o seoli.