Sefuluai

Tuuina atu o le tasi vaesefulu o a tatou tupe maua e fesoasoani ai e fausia le malo o le Alii i le lalolagi

Sa le i tele foi. Faatusatusa i oa na lafo e isi i le faleteuoloa, o tupe iti e lua a le fafine ua oti lana tane sa na o sina saofaga itiiti lava. Ae sa tele le taua o lana taulaga. Na aoao mai le Faaola, “O mea a lena fafine mativa ua oti lana tane, ua lafo i le mea e teu ai tupe, ua sili ia ia i latou uma na lafo i ai” (Mareko 12:43). Aiseā na matuā tāua ai le taulaga a le fafine ua oti lana tane? Aua “ua lafo e ia mea uma ua ia te ia, o mea uma lava ua ia te ia” (Mareko 12:44).

I le taimi nei, tatou te le o foai moni atu mea uma ua tatou maua pe a tatou totogiina le sefuluai e fesoasoani ai e fausia le malo o le Atua. Na te talosagaina na o le 10 pasene o a tatou tupe maua. Ae e tele mea e mafai ona tatou aoao mai le taulaga a le fafine ua oti lana tane. E tusa lava po o le a le tele o lo tatou 10 pasene, e mafai ona tatou faia le sefuluai o se mataupu o le faatuatua ma faapaiaina mea ua tatou maua mo le Alii e tusa lava pe le o se osigataulaga faigofie le faia.

O Le A Le Sefuluai?

O le sefuluai o le faapaiaina lea o le tasi vaesefulu o a tatou tupe maua i le Alii e ala i le Ekalesia. O le tuuina atu o lenei taulaga i le Atua o se tasi lea o auala e mafai ona tatou “faamuamua ai le Alii i o tatou olaga, nai lo o tatou lava popolega ma mea e fiafia i ai.” E fesoasoani sefuluai e fausia ai le malo o le Atua i le lalolagi. E faaaogaina mo le tele o faamoemoega, e aofia ai le fausiaina ma le tausia o malumalu ma falelotu, lagolagoina o le galuega faafaifeautalai, ma le lagolagoina o faalapotopotoga faaleaoaoga a le Ekalesia. Ua poloaiina e le Alii le Au Paia o Aso e Gata Ai ina ia ola i le tulafono o le sefuluai, e tusa lava po o a o latou tulaga faaletamaoaiga o i ai nei. Afai tatou te faailoa atu lo tatou faatuatua i le Atua i lenei auala, ua Ia folafola mai e faamanuia tele i tatou (tagai i le Malaki 3:10).

Vaaiga aoao i le autu: Sefuluai

Taiala fesootai mo le suesueina o le talalelei: Poloaiga, Anapogi, Faatuatua ia Iesu Keriso, Usiusitai

Vaega 1

O Le Sefuluai o se Poloaiga Anamua ua Toefuataiina i o Tatou Aso

O le tulafono o le sefuluai sa ola ai tagata o le Atua i aso anamua ma sa toefuatai mai e ala mai i le Perofeta o Iosefa Samita (tagai Kenese 14:18–20; 3 Nifae 24:8–12; Mataupu Faavae ma Feagaiga 119:3–4). O lenei tulafono e manaomia ai le Au Paia e tuuina atu le tasi vaesefulu o a latou tupe faateleina faaletausaga i le Alii e fausia ai le malo o le Atua i le lalolagi ma fesoasoani e saunia ai manaoga o Ana fanau.

E ui lava o le sefuluai o se tulafono faaletino, ae o se tulafono faaleagaga foi. O le tuuto atu, po o le faapaiaina, o se vaega o a tatou tupe maua i le Alii o se tasi lea o auala e mafai ona tatou faamuamua ai o Ia i o tatou olaga. O le faamuamuaina o Lana galuega nai lo o tatou manaoga patino e fesoasoani ia i tatou ia sili atu ona paia ma latalata atili atu ia te Ia.

Mea e mafaufau i ai

Mafaufau e faitau le Kenese 14:18–20; 28:20–22 a o mafaufau loloto pe aisea ua talosagaina ai tagata o le Atua e ola i le tulafono o le sefuluai talu mai aso anamua. Ona faitau lea o le tala patino mai le savali a Peresitene Russell M. Nelson “Mafaufau Faaselesitila!” e uiga i se taimi na ia filifili ai e faamuamua le Alii e ala i le totogiina atoa o se sefuluai e ui lava e le tele ni ana tupe na maua. Na ia aoao mai, “O le totogiina o le sefuluai e manaomia ai le faatuatua, ma e fausia ai foi le faatuatua i le Atua ma Lona Alo Pele.” E faapefea e le ola ai i le tulafono o le sefuluai ona manaomia ai lou faatuatua i le Tama Faalelagi ma Iesu Keriso? E faapefea ona faateleina ai lou faatuatua ia i La’ua?

O Gaoioiga mo le aoao faatasi

Faitau le Levitiko 27:30–32 ma le 2 Nofoaiga a Tupu 31:5–6 e aoao ai e uiga i le auala na tausia ai le tulafono o le sefuluai i aso anamua. Aisea e te manatu ai e paia sefuluai i le Alii? Faitau le Mataupu Faavae ma Feagaiga 97:10–12 e iloa ai pe na faapefea ona fesoasoani le sefuluai i le Au Paia anamua e faataunuu le galuega a le Alii. Na faapefea ona faamanuiaina i latou ona o le tausia o lenei tulafono? Talanoa e uiga i le auala e mafai ai e le totogiina o le sefuluai ona fesoasoani e faamalosia ai lo tatou lava manao e fausia le malo o le Atua.
Talanoa pe faapefea ona avea le sefuluai o se tulafono faaletino ma se tulafono faaleagaga. Ona faitau faatasi lea o le Mareko 12:41–44 , ma talanoa e uiga i le auala e avea ai le totogiina o le sefuluai o se mataupu o le faatuatua. E mafai foi ona outou matamata faatasi i le vitio “The Widow’s Mite” (1:57) po o le “Jesus Teaches about the Widow’s Mites” (1:14). O le a le uiga o le tuuina atu faaleagaga o au mea uma a o e tuuina atu sefuluai i le Alii? E mafai faapefea e le tuuina atu ia te Ia o au mea uma ona faamalosia ai lou faatuatua ma suia ai oe faaleagaga?

Aoao atili

Eperu 7:1–2, 9; Alema 13:13–15
Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 34.3.1, Potutusi o le Talalelei
O Autu o le Talafaasolopito o le Ekalesia, “Sefuluai,” Potutusi o le Talalelei
Steven C. Harper, “The Tithing of My People,” in Revelations in Context (2016), 250–55

Vaega 2

Na Folafola mai e le Alii Faamanuiaga ia i Latou o e Usitai i le Tulafono o le Sefuluai.

Tatou te maua le tele o faamanuiaga mai le Alii pe a tatou ola i le tulafono o le sefuluai. Na saunoa Elder Neil L. Andersen: “E tele auala e tatala ai faamalama o le lagi. O nisi e faaletino, ae o le tele lava e faaleagaga. O nisi e ma’ale’ale ma faigofie ona sopoloa ai le vaai. Talitonu i le taimi a le Alii; e oo mai lava faamanuiaga.” A o tatou mataala ma iloa faamanuiaga manino ma e lei faamoemoeina mai le totogiina o le sefuluai, e mafai ona tatou lagonaina le lotofaafetai ma le alofa i totonu o o tatou loto ma latalata atili atu ai ia Iesu Keriso.

Mea e mafaufau i ai

I le Malaki 3:8–12, ua folafola mai ia i tatou faamanuiaga silisili mo le usiusitai i le tulafono o le sefuluai. E mafai faapefea ona e nofouta atili i nei faamanuiaga i lou olaga i le asō? Toe iloilo le savali a Elder David A. Bednar “O Faamalama o le Lagi,” ona mafaufau lea i nisi o auala faigofie na e maua pe mafai foi ona faamanuiaina ai e ala i le totogiina o le sefuluai. Atonu e mafai ona e tusia se lisi o faamanuiaga ua tuuina mai e le Alii ia te oe ma mafaufau loloto po o fea o faamanuiaga e mafai ona avea ma taunuuga o le usiusitai i le tulafono o le sefuluai. E faapefea e le iloa ua faamanuiaina oe ona o le ola ai i le tulafono o le sefuluai ona faalolotoina ai lou manao e totogi atoa le sefuluai ma o mai ia Keriso?
Pe a tatou faatinoina le faatuatua ma totogi le sefuluai, e mafai ona tatou faamoemoe i faamanuiaga mai le Alii. I lana lauga “E Pei o se Togalaau ua Faasūsūina,” na faamalamalama mai ai e Peresitene Jeffrey R. Holland le auala na faaauau ai pea ona totogi e Maria Filitia Samita le sefuluai ina ua fasiotia lana tane o Ailama Samita. Mafaufau e faitau le tala lenei i le savali a Peresitene Holland. O le a se mea ua e aoao mai i le faataitaiga a Maria? O a faamanuiaga e mafai ona e maua a o e amata pe faaauau pea ona ola i le tulafono o le sefuluai?

Gaoioiga mo le aoao faatasi ma isi

Ua folafola mai e le Alii ia i tatou a o tatou ola i le tulafono o le sefuluai, o le a Ia “tatala … pupuni o le lagi” ma “sasaa mai … faamanuiaga” i o tatou luga (Malaki 3:10). O le a le uiga o le tatalaina o pupuni o le lagi pe a tatou usiusitai i lenei tulafono? Faitau faatasi upu nei mai ia Elder Bednar: “O faamalama e mafai ai ona ulufale atu le malamalama faalenatura i totonu o se fale. I se ala faapena, o le a oo mai ai le susulu o le malamalama ma le vaaiga faaleagaga mai pupuni o le lagi ma i o tatou olaga pe a tatou faamamaluina le tulafono o le sefuluai.” Atonu e mafai ona e tapunia mo sina taimi puupuu le malamalama o loo sau i totonu o se potu mai se faamalama po o se isi avanoa a o lei faatagaina le malamalama e toe ulufale mai. Talanoaina le eseesega e faia e le malamalama ma le auala e mafai ai e le totogiina o le sefuluai ona aumaia ia te oe le malamalama po o le malamalama faaleagaga. E mafai foi ona outou faasoa atu i le tasi ma le isi le auala na outou maua ai le malamalama faaleagaga i o outou lava olaga a o outou usitai i le tulafono o le sefuluai.

Aoao atili

Robert D. Hales, “O Le Sefuluai: O Se Tofotofoga o le Faatuatua ma Faamanuiaga e Faavavau,” Liahona, Nov. 2002, 26-29
Sheldon F. Child, “O Le Teugatupe Aupito Sili Ona Lelei,” Liahona, Me 2008, 79–81
Yoshihiko Kikuchi, “Pe Faoa e le Tagata Mea a le Atua?,” Liahona, Me 2007, 97–98
Valeri V. Cordón, “O Le Gagana o le Talalelei,” Liahona, Me 2017, 55–57

Vaega 3

O Tupe o le Sefuluai e a le Alii ma e Tufatufaina e Ana Auauna

O le sefuluai e faaaoga e faamanuia ai fanau a le Atua faaletino ma faaleagaga foi a o salalau atu le atoatoaga o le talalelei a Iesu Keriso i le lalolagi atoa. E mafai lenei mea pe a foai atu e tagata o le ekalesia ia sefuluai i le Ekalesia. O se aufono e aofia ai le Au Peresitene Sili, o le Korama a Aposetolo e Toasefululua, ma le Au Epikopo Pulefaamalumalu e filimaotiina pe faapefea ona faaaoga nei tupe paia (tagai i le Mataupu Faavae ma Feagaiga 120:1).

Na aoao mai Elder Neil L. Andersen: “O nei tupe paia e le o ni tupe a taitai o le Ekalesia. E ō le Alii. Ua matua nofouta Ana auauna i le natura paia o lo latou tausimea.” E saili e taitai o le Ekalesia le finagalo o le Alii ma faia faaiuga e faatatau i le sefuluai e tusa ai ma le taitaiga latou te maua mai le Alii.

Mea e mafaufau i ai

O auauna filifilia a le Alii o ni tausimea i foai o le sefuluai. Na faamalamalama mai e Epikopo Gerald Causse, “I faaupuga faaletalalelei, o le upu tausimea e faama’oti mai ai se tiutetauave paia faaleagaga pe faaletino e tausia se mea e ō le Atua lea tatou te tali atu ai.” E faapefea ona avea le tausimea o sefuluai o se tiutetauave faaleagaga ma faaletino mo auauna a le Alii? Faitau le Mataupu Faavae ma Feagaiga 104:11–17. O le a se mea ua e aoaoina mai nei fuaiupu e uiga i le finagalo o le Alii e “tausia [Lana] Au Paia” e ala i le tausimea?

Gaoioiga mo le aoao faatasi ma isi

O le tele o faamanuiaga tatou te olioli ai i le Ekalesia ua mafua ona o foai o le sefuluai ia e faaaoga e fausia ai le malo o le Atua i le salafa o le lalolagi. Na aoao mai Peresitene Jeffrey R. Holland e faapea o o tatou “malumalu, falesa, seminare, ma fegalegaleaiga” e mafai uma lava ona o le saofaga a tagata o le ekalesia i le sefuluai ma o nei “faamanuiaga e toetoe lava a le mafai ona oo mai i se isi lava auala.” Talanoa le tasi i le isi e uiga i faamanuiaga o loo maua ona o le sefuluai. E mafai faapefea e nei faamanuiaga ona fesoasoani e tuuina mai ia i tatou se vaaiga e faavavau ma aumaia ai i tatou ia latalata atili atu i le Atua? E mafai faapefea ona latou faalolotoina la tatou tautinoga e totogi se sefuluai atoa ma le faamaoni?

Aoao atili

“Tithing and Charitable Donations,” newsroom.ChurchofJesusChrist.org
“How the Church of Jesus Christ Uses Tithes and Donations,” Dec. 20, 2019, newsroom.ChurchofJesusChrist.org