Faaee Atu o Lima

O le faee atu o lima o le faiga faavae na faaalia mai e le Alii mo le faatinoina o le tele o sauniga, o le perisitua, e pei o le faamauga, faauuga, vaetofiaina o tagata e auauna atu i ni valaauga, faamaloloina o e mama’i, ma le tuuina atu o isi faamanuiaga faaleperisitua. O i latou o loo i ai le pule tatau o le perisitua e faaee o latou lima i luga o le ulu o le tagata e mauaina le sauniga. I le faia o lea, latou te auauna atu ai o ni meafaigaluega e faamanuia ai e le Alii Ana fanau.

O le faiga faavae o le faaee atu o lima na faaaogaina lava e i latou e umia le perisitua. Na faauuina e Atamu ona atalii amiotonu e ala i le faaee atu o lima. Ina ua tuuina atu e Iakopo faamanuiaga ia Efaraima ma Manase, na ia faaee ona lima i luga o o la ulu. O Alema na “faauuina faitaulaga ma toeaina, i le faaee atu o ona i lima, e tusa ma le faatulagaga a le Atua.” Na faaee atu e Aposetolo o Peteru ma Ioane le meaalofa o le Agaga Paia e ala i le faaee atu o lima. I lenei tisipenisione, na faaee atu e Ioane le Papatiso le Perisitua Arona i luga o Iosefa Samita ma Oliva Kaotui e ala i le faaee atu o lima.