Suesuega Faaleaoaoga Faavae
Perisitua Arona
Vaaiga Aoao
O le perisitua o le pule ma le mana e faavavau o le Atua. Na foafoaina e le Atua ma pulea le lagi ma le lalolagi e ala i le mana o le perisitua. E ala mai i lenei mana Na te togiolaina ma faaeaina ai Ona atalii ma afafine ia aumaia lo latou “tino ola pea ma le ola faavavau” (Mose 1:39).
O le Perisitua Arona o “se faaopoopoga i le perisitua maualuga, po o le Perisitua Mekisateko” (Mataupu Faavae ma Feagaiga 107:14). A o auauna se e umia le perisitua i le Perisitua Arona, e saunia o ia e maua le Perisitua Mekisateko, e maua faamanuiaga o le malumalu, e faia se misiona talai, e avea ma se tane ma se tamā alofa, ma faaauau pea ona auauna i le Alii i le olaga atoa.
O tofi i le Perisitua Arona o le epikopo, ositaulaga, aoao, ma le tiakono. Faatasi ai ma le faatagaga a le taitai perisitua pulefaamalumalu (e masani lava o le epikopo po o le peresitene o le paranesi), e tufa ai e le tiakono le faamanatuga. Latou te fesoasoani i le epikopo po o le peresitene o le paranesi e vaai ia tagata o le Ekalesia e ala i le tuuina atu o auaunaga ma fesoasoani i mataupu faaletino e pei o le aoina o taulaga anapogi. O aoao e mafai ona faatinoina tiute uma o tiakono, ma latou te maua foi isi avanoa e auauna atu ai. Latou te tapenaina le falaoa ma le vai o le faamanatuga ma auauna atu o ni uso o auaunaga. O ositaulaga e mafai ona faatinoina tiute uma o tiakono ma aoao. Faatasi ai ma le faatagaga a le taitai perisitua pulefaamalumalu, e mafai foi ona latou faamanuia le faamanatuga, papatiso, ma faauu isi i tofi o le ositaulaga, aoao, ma le tiakono.
I le Ekalesia i aso nei, e mafai e alii agavaa o le ekalesia ona maua le Perisitua Arona i le amataga o Ianuari o le tausaga e atoa i ai lo latou ta’i 12 tausaga. O nei alii talavou, e masani o le vaitausaga 11–17, e maua le tele o avanoa e auai ai i sauniga paia o le perisitua ma tuuina atu le auaunaga. A o latou faataunuuina ma le agavaa o latou tiute, latou te galulue i le suafa o le Alii e fesoasoani ai i isi ia maua faamanuiaga o le talalelei.
A o faaliliuina e le Perofeta o Iosefa Samita le Tusi a Mamona, se tau ai o ta’ua mai ai le papatisoga mo le faamagaloina o agasala. I le aso 15 Me, 1829 na la o ai ma lana tusiupu o Oliva Kaotui i le vao e fesili i le Alii e uiga i le papatisoga. A o la tatalo, “sa afio ifo mai le lagi se avefeau i se ao o le malamalama.” O lenei avefeau o Ioane le Papatiso, o le perofeta o lē sa papatisoina Iesu Keriso i seneturi na muamua atu. O Ioane le Papatiso, ua avea nei ma se tagata toetu, na tuu ona aao i luga o Iosefa ma luga o Oliva ma faaee atu i luga o i laua taitoatasi le Perisitua Arona, lea na aveesea mai le lalolagi i le taimi o le Liliuese Tele. Faatasi ai ma lenei pule, na mafai ai e Iosefa ma Oliva ona papatiso e le tasi le isi. (Tagai Iosefa Samita—Talafaasolopito 1:68–72.)
Tusifaamaumau Ou Lagona Uunai
Autu Fesootai
Tusitusiga Paia
Mau Faasino
Punaoa mo le Suesueina o Tusitusiga Paia
Savali mai Taitai o le Ekalesia
Savali Faaopoopo