"Perisitua Mekisateko," Autu ma Fesili (2025)
Vaaiga Aoao
Perisitua Mekisateko
O le Perisitua Mekisateko o le perisitua maualuga i Le Ekalesia a Iesu Keriso o le Au Paia o Aso e Gata Ai, o le [perisitua] itiiti ane o le Perisitua Arona. O alii faamaoni o le Ekalesia e mafai ona maua le Perisitua Mekisateko e amata i le 18 o ona tausaga. O le igoa o le Perisitua Mekisateko e sau mai se faitaulaga sili taua sa soifua i le taimi o le perofeta o Aperaamo.
O lenei perisitua maualuga atu na tuuina atu ia Atamu ma sa i ai i luga o le fogaeleele i soo se taimi lava e faaali mai ai e le Alii Lana talalelei. Sa aveesea mai le lalolagi i le taimi o le Liliuese Tele, ae na toefuatai mai i le 1829 ina ua faaee atu e Aposetolo o Peteru, Iakopo, ma Ioane i luga o Iosefa Samita ma Oliva Kaotui.
Avanoa ma Tiutetauave o le Perisitua Mekisateko
A maua e se alii le Perisitua Mekisateko, e ulu atu o ia i le tautoga ma le feagaiga o le perisitua. Ua ia osifeagaiga ina ia faamaoni, faalautele lona valaauga, “gauai ma le filiga i upu o le ola e faavavau,” ma “ola i afioga uma e tulei mai le fofoga o le Atua.” O i latou o e tausia lenei feagaiga o le a faapaiaina, pe faamamaina ma paia, e ala i le Agaga ma maua “mea uma ua i ai i [le] Tama.”
O e agavaa e umia le Perisitua Mekisateko ua i ai le pule e auauna atu ai i e mama’i ma tuuina atu faamanuiaga faapitoa i tagata o le aiga ma isi. E tatau foi i alii o le Ekalesia ona agavaa e umia le Perisitua Mekisateko ina ia mafai ai ona maua faaeega paia o le malumalu ma ia faamauina i o latou taitoalua ma o latou aiga mo le faavavau.
E ala i le pule o le Perisitua Mekisateko ma i lalo o le taitaiga a le Alii o Iesu Keriso, e taiala ai e taitai le Ekalesia ma taitaia le talaiga o le talalelei i le lalolagi atoa. Ua aoao mai foi le Alii e mafai ona tatou vaai i Lona mana i sauniga o le Perisitua Mekisateko.
O Tofi o le Perisitua Mekisateko
O tofi o le Perisitua Mekisateko o le toeaina, faitaulaga sili, peteriaka, Fitugafulu, ma le Aposetolo. O le Peresitene o le Perisitua Maualuga o le Peresitene lea o le Ekalesia.
Toeaina. E mafai e toeaina ona faatino tiute uma o le Perisitua Arona. E le gata i lea, faatasi ai ma le faatagaga a taitai perisitua pulefaamalumalu, e mafai ai ona latou tuuina atu le Agaga Paia ma faauu isi alii agavaa i tofi i le Perisitua Arona ma le Mekisateko. E mafai foi ona latou tuuina atu faamanuiaga faaleperisitua.
Faitaulaga Sili. O se faitaulaga sili e mafai ona faatinoina tiute uma o se toeaina ma ua i ai foi le aia tatau e taitai ai i le Ekalesia. O peresitene o siteki, peresitene o misiona, fautua maualuga, epikopo ma o latou fesoasoani, ma isi taitai o le Ekalesia ua faauuina o ni faitaulaga sili.
Fitugafulu. O aso nei, o korama a Fitugafulu ua aofia ai Fitugafulu o le Pulega Aoao ma Fitugafulu Eria. O sui o le Au Fitugafulu e galulue i le suafa o le Alii i lalo o le taitaiga a le Au Peresitene Sili ma le Korama a Aposetolo e Toasefululua. E tuuto atu e le Au Pulega Aoao lo latou taimi atoa i le galuega ma auauna atu i le lalolagi atoa; o Fitugafulu Eria e auauna atu faavaitaimi ma e masani lava ona tofia e auauna atu mo le umi e lima tausaga i o latou eria i le lotoifale.
Peteriaka. O se peteriaka o se tasi e umia le Perisitua Mekisateko ua faauuina e tuuina atu faamanuiaga faapeteriaka i tagata o le Ekalesia.
Aposetolo. O se Aposetolo o se taitai faauuina i le Perisitua Mekisateko. E filifilia i latou e ala i musumusuga e le Peresitene o le Ekalesia ma faauuina e le Au Peresitene Sili ma le Korama a Aposetolo e Toasefululua. Latou te auauna atu o ni molimau a Iesu Keriso i le lalolagi atoa.
Fautua Maualuga
O le au fautua maualuga e fausia mai i faitaulaga sili e toasefululua. O nei alii e galulue i lalo o le taitaiga a le au peresitene o le siteki. Latou te auauna i le aoao atu, aoao faamasani, ma le vaavaaia o isi taitai o siteki ma uarota ma polokalama.
Korama a le Perisitua Mekisateko
O se korama a le au perisitua o se vaega faatulagaina o alii po o alii talavou o e umia le perisitua. O uso o korama e “auauna atu i isi, faataunuu tiute o le perisitua, fausia le lotogatasi, ma aoao ma ola i aoaoga faavae autu.”
O korama e faatulagaina mo le Perisitua Mekisateko ma le Arona. O korama taitasi e taitaia e se peresitene o loo umia ki e tatau ai o le perisitua, po o le pule, e taitai ai le korama. I nofoaga e mafai ai, e lagolagoina o ia e ni fesoasoani se toalua ma se failautusi.
E tofu uarota taitasi ma se korama se tasi pe sili atu foi a toeaina. O se korama a toeaina e aofia uma ai toeaina [ua faauuina] ma toeaina faaolioli (alii ua ta’i 19 tausaga pe matutua atu e le o umia le Perisitua Mekisateko) i le uarota. O loo aofia ai foi faitaulaga sili o e e le o auauna atu i le taimi nei i valaauga ia e maua ai le korama a faitaulaga sili a le siteki.
E tofu siteki taitasi ma se korama e tasi a faitaulaga sili, lea e taitaia e le peresitene o le siteki ma ona fesoasoani. O le korama a faitaulaga sili o le siteki e aofia ai epikopo o i ai nei ma o latou fesoasoani, fautua maualuga, ma peteriaka o loo galulue.
O le Au Fitugafulu ma Aposetolo ua faatulagaina i korama a le Perisitua Mekisateko i le tulaga aoao o le Ekalesia. O Fitugafulu e galulue i lalo o le taitaiga a le Korama a Aposetolo e Toasefululua. O le Korama a Aposetolo e Toasefululua o le vaega e lona lua le maualuga e pulea le Ekalesia. O le Au Peresitene Sili, lea e aofia ai le Aposetolo sinia o le Ekalesia ma isi Aposetolo e toalua, o le vaega aupito maualuga lea e pulea e le Ekalesia ma pulefaamalumalu i mataupu uma o le Ekalesia.
Autu Fesootai
-
Faitaulaga Sili