“Eseesega ma le Lotogatasi i Le Ekalesia a Iesu Keriso o le Au Paia o Aso e Gata Ai,” Autu ma Fesili (2023)
Vaaiga Aoao
Eseesega ma le Lotogatasi i Le Ekalesia a Iesu Keriso o le Au Paia o Aso e Gata Ai
O Le Ekalesia a Iesu Keriso o le Au Paia o Aso e Gata Ai o se tapuaiga i le lalolagi, e le faapea ona ua i ai ona tagata i le salafa o le lalolagi, ae ona o loo saili foi e faasoa atu le savali o le upumoni a le Atua i le lalolagi atoa.
O le eseesega o tagata auai o le Ekalesia i le lalolagi atoa o se uiga matautia lea o le Au Paia o Aso e Gata Ai aua o le talalelei a Iesu Keriso e sili atu nai lo aganuu, ituaiga, atunuu, ma gagana uma. E faapotopoto faatasi aganuu ma tagata i le lalolagi atoa i nofoaga faafaafanua e fausia ai faapotopotoga i le lotoifale e tapua’i faatasi. Ona o le valaaulia a le Faaola ia o mai fanau uma a le Atua ia te Ia (tagai Mataio 11:28; Mataupu Faavae ma Feagaiga 10:67), e leai ni faapotopotoga se lua i le Ekalesia e tutusa.
E tusa lava po o le a le ituaiga po o foliga vaaia, e lotogatasi tagata uma o le Ekalesia i le iloaina o i latou o fanau a se Tama Faalelagi. Latou te iloa e tutusa Lona alofa i Ana fanau taitoatasi. O lenei malamalama e fausia ai se lagona o le lotogatasi i fale uma ma auaunaga tapuai i le salafa o le lalolagi ma fusia faatasi ai tagata uma o le Ekalesia.
E fausia foi le lotogatasi i faapotopotoga taitasi a o aoao atu ma tapuai tagata taitoatasi mai viiga tutusa, tusitusiga paia, lesona, ma tatalo faamanatuga i Aso Sa taitasi. O faalapotopotoga mo tamaiti, talavou, ma tagata matutua e tuufaatasia tagata taitoatasi i le salafa o le lalolagi i tausaga taitasi i se vaega tutusa o le taulaiga. E faapena foi, o le konafesi faaleafatausaga a le Ekalesia, lea e faasalalauina i le lalolagi atoa, ua mafai ai e tagata o le ekalesia ona maua le avanoa e aoao ai i le taimi lava e tasi mai le perofeta, o aposetolo, ma isi taitai o le Ekalesia.
O le faatulagaga o Le Ekalesia a Iesu Keriso o le Au Paia o Aso e Gata Ai ua suia i le aluga o taimi ma o loo faaauau pea ona suia i aso uma. Talu mai le vaitau o le 1900, ua faatupulaia le Ekalesia mai faapotopotoga e aofia ai le tele o tagata malaga mai Europa i matu i le Iunaite Setete i se Ekalesia i le lalolagi atoa o ona tagata e nonofo i atunuu e 190 ma e tautatala i le silia ma le 120 gagana.
I le 1996, o le aofai o tagata o le ekalesia sa nonofo i fafo atu o le Iunaite Setete na sili atu nai lo i latou sa nonofo ai i totonu, ma e oo atu i le tausaga 2000 o le toatele o tagata auai sa le tautatala faa-Peretania. Ia Aperila 2021, na silia ma le 16.8 miliona tagata o le Ekalesia, ma oo atu ai le aofai o uarota ma paranesi (faapotopotoga) i le silia ma le 31,000 i le lalolagi atoa.
E pei lava ona aoao mai Paulo i le Feagaiga Fou o le Ekalesia o se tino e i ai vaega taitasi e faaopoopo ai le matagofie ma le faamoemoega i le vaega atoa, e faapena foi ona maua e Le Ekalesia a Iesu Keriso o le Au Paia o Aso e Gata Ai le malosi mai lona eseesega.