Tumau e oo i le Iuga

Tumau faamaoni i a tatou tautinoga i le Atua, e tusa lava po o le a

Mafaufau faapea o le a e tamo’e i se tuuga tele. A o e amata, ua tumu oe i le malosi ma ua saunia e tauave le galuega o loo i luma atu. Ae e umi ma faigata le tuuga. E oo lava i le lelavā—faapea le vaivai. Ae e te finau pea i le tauvaga, ma tuu le vae e tasi i luma o le isi seia oo ina e sopoia le laina faaiu, ma le mitamita ona sa e onosaia lelei e oo i le iuga.

A tatou maua le talalelei a Iesu Keriso, tatou te amataina se malaga i le olaga atoa. O nisi aso atonu tatou te lagona ai le tumu i le faamoemoe ma le naunautai—o isi aso e ono lagona ai le umi ma le faigata o le ala. Ae e lē tatau ona tatou fiu. Nai lo lena, tatou te faalagolago i le folafolaga a le Alii o le a Ia le tuua lava i tatou pe tuulafoaiina i tatou (tagai Eperu 13:5), ma tatou te filifili i aso taitasi e “fetaomi atu i luma ma le tumau ia Keriso” (2 Nifae 31:20).

O Le A le Tumau e oo i le Iuga?

O le tumau e oo i le iuga o lona uiga o le tumau faamaoni i la tatou tautinoga i le Atua ma Ana poloaiga i o tatou olaga atoa. E aofia ai le osia o feagaiga ma Ia, salamo i aso taitasi, ma le faalagolago i le mana o Iesu Keriso e fesoasoani ia i tatou e faatoilalo ai tofotofoga, faaosoosoga, ma teteega. O i latou uma o e tumau e oo i le iuga o le a maua le meaalofa o le ola e faavavau ma toe foi atu e nonofo faatasi ma le Atua (tagai Mataio 10:22).

Taiala e faatatau i le suesueina o le talalelei: Faitalia, Feagaiga ma Sauniga, Olaga Faaletino

Vaega 1

Ua Folafola Mai e le Atua O Le a Tatou Maua le Ola e Faavavau pe Afai Tatou te Tumau e oo i le Iuga

O le meaalofa silisili a le Atua ia i tatou o le meaalofa lea o le ola e faavavau (tagai Mataupu Faavae ma Feagaiga 14:7). O lenei meaalofa e tuuina atu ia i latou o e maua le talalelei ma tumau ai i le tuuto atu i ai (tagai i le 3 Nifae 15:9). O le tumau e oo i le iuga e sili atu nai lo le faasaoina mai se tofotofoga po o se luitau. O se taumafaiga i aso taitasi “o le o mai ia Keriso ma faaatoatoaina ia te Ia” i le olaga atoa. Na taua e Elder Kevin W. Pearson e faapea “o le tumau e oo i le iuga o le tofotofoga sili lea o le avea ma soo.”

Mea e mafaufau i ai

Na oo Iesu Keriso i le tofotofoga sili o le tumau e oo i le iuga ina ua Ia puapuagatia mo a tatou agasala i le taimi o Lana Togiola. Faitau le Luka 22:42 ma le 3 Nifae 11:11. O le a se mea e mafai ona e aoao mai i faataitaiga a Keriso ia e mafai ona fesoasoani ia te oe e tumau ai seia oo i le iuga? E mafai faapefea ona e faalagolago i Lana Togiola a o e taumafai e tumau e oo i le iuga ma maua le ola e faavavau? Tusifaamaumau soo se lagona e te maua, ma galue iai.
O le tumau e oo i le iuga atonu e foliga mai e umi se taimi e alu ai—e umi lava, o le mea moni, e ono lagona ai le le mafai. Ae a e manatua o le tumau e oo i le iuga e tupu i lea laasaga ma lea laasaga, atonu e le foliga mai e faigata tele. Na aoao mai Peresitene Thomas S. Monson: “Saili le taitaiga faalelagi i lea aso ma lea aso. O le ola ai i le olaga a o popole i le lumanai, e faigata; ae o le ola ma taulima auauai e faigofie. E mafai e i tatou taitoatasi ona faamaoni i le aso e tasi—ona faaopoopo lea o le isi tasi, ma le isi tasi pe a uma—seia oo lava ina tatou ola i se olaga atoa e taialaina e le Agaga, o se olaga e latalata i le Alii, o se olaga o galuega lelei ma le amiotonu.” O a filifiliga i aso taitasi e mafai ona e faia ina ia faamaoni ai i le talalelei a Iesu Keriso? E mafai faapefea e na filifiliga ona fesoasoani ia te oe e tumau ai e oo i le iuga? Atonu e mafai ona e filifilia se uiga faaKeriso se tasi e te manao e faaleleia atili ona valaaulia lea ma le agaga tatalo ia le Alii e fesoasoani ia te oe e maua a o e taumafai e mulimuli ia te Ia i aso taitasi.

Gaoioiga mo le aoao faatasi ma isi

Ua aoao mai tusitusiga paia o le a tatou maua le ola e faavavau e ala i le tumau e oo i le iuga. Ae e faape’ī foliga o le tumau e oo i le iuga? Faitau faatasi le Roma 2:7; 2 Nifae 31:19–20; ma le Mataupu Faavae ma Feagaiga 59:23 , ona talanoaina lea o mea ua e aoaoina mai nei fuaiupu e uiga i le auala e tumau ai e oo i le iuga. E mafai foi ona e usuina pe faitauina le viiga “Press Forward, Saints” (Hymns, no. 81) o se vaega ona talanoa lea e uiga i soo se upu e musuia ai oe e fetaomi atu i luma ma maua le meaalofa o le ola e faavavau.
I lana savali “E Le Tatau Ea Ona Tatou Olioli?” Na aoao mai ai Elder Dieter F. Uchtdorf e le tatau ona tatou tumau e oo i le iuga na o i tatou lava. Fai mai o ia: “O le tumau e oo i le iuga ua le na o se mataupu o le onosaia lelei o tulaga faigata o le olaga po o le ‘ia onosai ai pea.’ O la tatou tapuaiga e ola, e fesoasoani ai i fanau a le Atua i le ala lauitiiti ma le vaapiapi e atiina ae lo latou agavaa atoa i lenei olaga ma toe foi atu ai ia te Ia i se aso.” Matamata faatasi i se vaega o le savali a Elder Uchtdorf i le vitio “Endure to the End” (2:05). Ona faasoa atu lea o manatu e fesoasoani ai i le tasi ma le isi e tumau ai i le ala e tau atu i le ola e faavavau. E mafai foi ona outou faasoa atu i le tasi ma le isi nisi o aafiaga na fesoasoani ai se tasi ia te outou e onosaia ma le faamaoni se tofotofoga.

Aoao atili

Eperu 6:12; 10:23; 1 Nifae 8:30; 15:24; Mataupu Faavae ma Feagaiga 63:47; 101:35; 121:7–8, 29; Mataupu Faavae o le Faatuatua 1:13
Dale G. Renlund, “Tautinoga Mausali ia Iesu Keriso,” Liahona, Nov. 2019, 22-25
Steven J. Lund, “O Le Avea ma Soo Tumau,” Liahona, Nov. 2022, 89–91
Henry B. Eyring, “O Le Taui o le Tumau Lelei,” Liahona, Iulai 2017, 4–5
Russell M. Nelson, “Endure and Be Lifted Up,” Ensign, May 1997, 70–72