Anapogi

Faalatalata atili atu i le Atua ma fesoasoani ia i latou o loo manaomia le fesoasoani

O le alu e aunoa ma ni meaai atonu e foliga mai o le alu fia aai, ma e mafai ona moni lena mea. Ae a tatou o e aunoa ma ni meaai ma ni meainu ona ua tatou usitai i le tulafono o le anapogi, tatou te le na o le faamisi o taumafataga; o loo tatou tausia se tasi o poloaiga a le Atua e fesoasoani ia i tatou e latalata atili atu ai faaleagaga ia te Ia.

E ala i le anapogi ma le tatalo, tatou te tuu ese ai nisi o mea tatou te faalagolago i ai faaletino ae filifili e faalagolago i le Atua. Tatou te tapuai ia te Ia ma saili Ana faamanuiaga o le faamafanafanaga, taitaiga, ma le malosi. Tatou te anapogi foi ma tatalo mo isi pe a latou mama’i pe manaomia ni faamanuiaga patino. A o tatou taliaina le valaaulia a le Alii e anapogi, o le a tatou agaalofa atili, sili atu ona lotoalofa, sili atu ona lotomaualalo, ma sili atu ona naunau e auauna atu—e pei o Iesu Keriso.

O Le A le Anapogi?

O se anapogi e masani ona aofia ai le tatalo, e le aai pe feinu mo le 24-itula (pe afai e gafatia faaletino), ma tuuina atu se taulaga anapogi matamau.” Ua valaaulia le Au Paia o Aso e Gata Ai ina ia anapopogi ia le itiiti ifo ma le faatasi i le masina ma foai atu ma le lotomalie le aofaiga o le tupe na semanū latou te faaaluina i meaai i le taimi o a latou anapogi e fesoasoani ai i isi o loo manaomia le fesoasoani. E mafai e tagata taitoatasi ma vaega ona anapopogi. O le anapogi e sili atu nai lo le “na o le fia aai”—o se auala e “siitia ai o tatou loto, o tatou mafaufau, ma o tatou leo e fesootai ai ma lo tatou Tama Faalelagi” ma saili Lona finagalo ma Ana faamanuiaga.

Vaaiga aoao i le autu: Anapogi

Taiala e faatatau i le suesueina o le talalelei: Tatalo, Faaaliga, Tausia o i Latou e Manaomia le Fesoasoani

Vaega 1

Na Faavaeina e le Atua le Tulafono o le Anapogi ma Taulaga Anapogi e Faamanuia ai Ana Fanau

alii talavou o loo aoina taulaga anapogi

Sa ola tagata o le Atua i le tulafono o le anapogi anamua (tagai Esoto 34:28; Eseta 4:16; Mataio 6:16–18; Alema 45:1). Na toe faalauiloa mai foi e le Alii lenei tulafono i o tatou aso (tagai Mataupu Faavae ma Feagaiga 88:76). E anapopogi le Au Paia o Aso e Gata Ai e ala i le alu e aunoa ma se meaai ma se vaiinu mo se periota e 24-itula pe afai latou te gafatia faaletino. O i latou e le mafai ona anapogi mai meaai ma meainu mo le 24 itula e mafai ona filifili po o le a le anapogi talafeagai e fesoasoani ia i latou e manatua ai Iesu Keriso.

E anapopogi faatasi tagata o le Ekalesia e le aunoa, e masani lava i le Sapati muamua o masina taitasi. Latou te ofo atu foi ma le lotomalie se foai tautupe, e ta’ua o se taulaga anapogi, e tutusa lava ma le tau o meaai latou te le’i aai ai i le taimi o a latou anapogi. O a latou foai e fesoasoani e saunia ai meaai, fale, lavalava, ma isi mea taua mo i latou e manaomia le fesoasoani. O le anapogi e aumaia ai foi faamanuiaga faaleagaga. Na aoao mai Peresitene Dallin H. Oaks e faapea, “O lo tatou anapogi ina ia fesoasoani ai i ē o fia aai o se faatinoga o le alofa mama ma, a faia faatasi ma se faamoemoega mama, o le a avea ma se ‘aiga tele faaleagaga.”

Mea e mafaufau i ai

Talu mai aso anamua, ua faamanuiaina e le tulafono o le anapogi fanau a le Atua. Faitau le Isaia 58:6–11 e aoao ai e uiga i nisi o nei faamanuiaga. Ona faitau lea o le Mataio 25:35–40. O le a le mea o aoao mai e nei fuaiupu e uiga i le taua o le anapogi ma le tausia o i latou e manaomia le fesoasoani? Atonu e mafai ona e mafaufau ma le agaga tatalo i nei fuaiupu i le isi taimi e te anapogi ai pe faia ai se taulaga anapogi. E faapefea e le taulai atu ia Iesu Keriso ona atili anoa ai lou aafiaga i le tulafono o le anapogi?
I le Ekalesia, e faia se sauniga anapogi ma molimau i masina taitasi. Faitau le Alema 5:45–48 e aoao ai pe faapefea e le anapogi ona faamalosia lau molimau ia Iesu Keriso. Atonu e mafai ona e toe iloiloina nei fuaiupu a o lei faia le isi sauniga anapogi ma molimau e te auai ai. E mafai faapefea e le tuuina atu o lau molimau i mea ua e iloa, talitonu, ma lagona e uiga ia Iesu Keriso ona aumaia ai se faamoemoega sili atu i lau anapogi? E mafai faapefea ona fesoasoani i isi o loo anapopogi? Atonu foi e te manao e tusi faamaumau musumusuga faaleagaga e te maua a o e faalogologo i molimau a isi ona faatino lea.

Gaoioiga mo le aoao faatasi ma isi

O le anapogi o se avanoa paia lea e aumaia ai vavega. Matamata le vitio “Fast Offerings: Are We Not All Beggars” (2:31), ona talanoa lea e uiga i le auala e fesoasoani ai le tulafono o le anapogi ia i tatou e tausia ma alolofa i isi e pei ona faia e Iesu. E mafai foi ona outou faitauina pe usuina faatasi le viiga “Ona ua Maua Tele ” . Talanoa e uiga i le auala na agalelei mai ai le Alii ia te oe a o e ola i le tulafono o le anapogi. Fai se lisi pe tusi ni ata o vavega na e oo i ai, ma talanoaina pe faapefea ona faamanuiaina ai lou olaga.
Na aoao mai Peresitene Henry B. Eyring e faapea: “O le a sili atu mea e faia e lau taulaga anapogi nai lo le fesoasoani atu e fafaga ma faalavalava ni tino. O le a faamaloloina ma suia ia loto.” Iloilo faatasi le savali a Peresitene Eyring “E Le o Lenei ea le Anapogi Ou Te Loto I Ai?.” Ona mafai lea ona e faasoa atu pe na faapefea ona faamaloloina ma suia lou loto i le tuuina atu po o le mauaina o taulaga anapogi. Na faapefea e nei aafiaga ona faateleina lou alofa mo fanau a le Atua? Na faapefea ona latou fesoasoani ia te oe e lagona le alofa o le Alii mo oe?

Aoao atili

Dean M. Davies, “O Le Tulafono o le Anapogi: O Se Tiutetauave Faaletagata Lava Ia e Tausia ai E Matitiva ma E le Tagolima,” Liahona, Nov. 2014, 53-55
Carl B. Pratt, “O Faamanuiaga o le Faataunuuina Sa’o o le Anapogi,” Liahona, Nov. 2004, 47–49
O Autu o le Talafaasolopito o le Ekalesia, “Anapogi,” Potutusi o le Talalelei

Vaega 2

O Le Anapogi ma le Tatalo e Fesoasoani e Saunia ai i Tatou mo Faamanuiaga a le Atua

E tele mafuaaga e anapopogi ai le Au Paia o Aso e Gata Ai. O le anapogi o se auala e fesoasoani ai i isi, tapuai i le Atua, ma faaalia le agaga faafetai mo Ia (tagai Alema 45:1). E mafai foi ona tatou anapogi e saili faaaliga patino mai le Atua pe ole atu ia te Ia e faamanuia e mamai ma e mafatia (tagai Salamo 35:13; Alema 5:46). E ala i le anapogi, e mafai ai ona tatou maua le malosi e tetee atu ai i faaosoosoga ma maua ai le faamafanafanaga i taimi o tofotofoga (tagai Mataio 4:2–4; Alema 30:1–2). E le gata i lea, o le anapogi e fesoasoani ia i tatou ia sili atu ona lotomaualalo, aua e faamanatu mai ai ia i tatou lo tatou faalagolago atoatoa i le Atua (tagai Salamo 35:13).

E o faatasi le anapogi ma le tatalo. O le anapogi e mafai ona faaopoopo ai se elemene o le faamaoni ma le tautinoga i a tatou tatalo, ma o le tatalo e siitia ai lo tatou anapogi mai le na o le faamisi o meaai i le faia o se fesootaiga moni ma le Atua. Faatasi, o le anapogi ma le tatalo e i ai se aafiaga mamana i lo tatou lotomaualalo ma le faatuatua ia Keriso (tagai Helamana 3:35).

Mea e mafaufau i ai

O nisi taimi e mafai ona faigata le anapogi, ae e aumaia ai foi le tele o faamanuiaga faaleagaga. Faitau le Mataio 4:1–4, e aofia ai le Faaliliuga a Iosefa Samita o fuaiupu 1 ma le 2, mo se faataitaiga o le taimi na anapogi ai Iesu Keriso. Aisea na taua ai mo Iesu le faatasi ma le Atua i le taimi lea? Mafaufau pe faapefea e le anapogi ma le tatalo ona fesoasoani ia te oe e te latalata atili atu ai i le Atua. E mafai faapefea ona avea le tatalo o se vaega e sili atu ona faamoemoeina o lau anapogi? Ia faatino soo se manatu e te maua.
O le anapogi ma le tatalo e mafai ona fesoasoani ia te oe e avea ai o se meafaigaluega i aao o le Alii. Faitau le Alema 17:1–3, 9. O a faamanuiaga faaleagaga na oo mai i atalii o Mosaea mai le anapogi ma le tatalo na fesoasoani ia i latou e faia ai le galuega a le Alii? O le a se mea e mafai ona e aoao mai i a latou faataitaiga a o e auauna atu i fanau a le Atua, faataunuu lou valaauga, ma faasoa atu le talalelei?

Gaoioiga mo le aoao faatasi ma isi

I lana lauga “Ua Toetu Keriso; O le Faatuatua ia te Ia o le a Siitia ai Mauga,” na faasoa mai ai e Peresitene Russell M. Nelson se tala i le Au Paia i Samoa, Fiti, Tahiti, ma Toga o e na anapogi ma tatalo mo se vavega. Faitau le tala lenei, ona talanoa lea e uiga i mauga, po o luitau, i lou lava olaga (tagai Mataio 17:14–21). O le a se mea ua e aoaoina mai upu a Peresitene Nelson e uiga i le auala e mafai ai e le anapogi ma le tatalo ona aumaia le mana o le Alii i lou olaga? Atonu e te talanoaina ou manatu pe a uma ona vaai i ata o mauga po o le o faatasi i se savaliga sopo. E mafai foi ona e talanoa e uiga i faamanuiaga ma avanoa na e mauaina a o e anapogi ma tatalo ma le faatuatua.
O le anapogi e masani lava o lona uiga o le le aai pe feinu, ae e mafai foi ona tatou auai i ituaiga anapogi eseese. I le sauniga a tamaitai o le konafesi aoao ia Oketopa 2018, na fautua mai ai Peresitene Nelson: “Ou te valaaulia outou e auai i se anapogi e 10 aso mai ala o faasalalauga faaagafesootai ma soo se isi lava ala o faasalalauga e aumaia ai mafaufauga le lelei ma le le mama i lou mafaufau. Tatalo ia iloa po o a faatosinaga e aveese i le taimi o lau anapogi. O le aafiaga o lau anapogi 10 aso e mafai ona faateia ai oe. O le a se mea e te matauina i le mavae ai o se malologa mai vaaiga o le lalolagi ia na faamanualia ai lou agaga? O i ai ea se suiga i le mea ua e manao nei e faaalu ai lou taimi ma le malosi? Ua suia ea se tasi o au faamuamua—e tusa lava pe na o sina mea? Ou te uunaia oe e tusi faamaumau ma mulimuli i uunaiga taitasi.” Talanoa faatasi o se vaega e uiga i nisi o mea e mafai ona outou anapogi ai atonu o le a taofia ai outou mai le latalata atili atu i le Atua. Ona taulima lea o le lui a Peresitene Nelson. A uma lau anapogi, talanoaina pe na faapefea ona taialaina e le tatalo lou aafiaga ma le auala na faamanuiaina ai oe mo le anapogi i lenei auala.

Aoao atili

Neemia 1; Galuega 10:30–33; 13:3; Mosaea 27:22; Alema 17:3; 3 Nifae 27:1–2; Mataupu Faavae ma Feagaiga 59:13–14
James B. Martino, “Liliu Atu ia te Ia ma o le a E Mauaina Tali,” Liahona, Nov. 2015, 58–60
“The Hope of God’s Light” (vitio), Potutusi o le Talalelei