O Le Galuega o le Faaleleiga
Ou te molimau atu e uiga i le filemu o le agaga lea o le a aumaia e le faaleleiga ma le Atua faapea ma le tasi ma le isi pe afai e lava lo tatou agamalu ma le lototele e saili ai.
O Aperila talu ai, ina ua faalauiloa mai ai e Peresitene Russell M. Nelson le mataupu o le auaunaga, sa ia faamamafa mai o se auala e tausi ai le poloaiga sili o le alofa atu i le Atua ma le tasi ma le isi.1 I le aveai ai ma taitai o le Ekalesia, ua matou patipatia aloaia ma faamalo atu ia te outou i le tali ofoofogia o le tou amataina o lena vaega. Matou te faafetai atu ia te outou mo le mulimulitai i lo tatou perofeta pele i lenei galuega matagofie ma fautua atu ia aua tou te faatali mo nisi faatonuga e tele. Na o le puna lava i totonu o le vaitaele ma aau loa. Agai atu ia i latou e le tagolima. Aua le tau na o le faaopeopea ma mafaufau pe tatau ona aau e ū i ai lou tua po o le aau pisipisi pei se taifau. Afai tatou te mulimuli i mataupu faavae autu ua aoaoina, tumau le ogatusa ma ki o le perisitua, ma saili atu i le Agaga Paia e taiala i tatou, e le mafai ona tatou toilalo.
O lenei taeao ou te fia talanoa ai e uiga i se vaega e sili ona patino o le auaunaga lea e le o se tofiga, e le aofia ai se faatalanoaga ua faakalenaina, ma e leai se laina o lipoti vagana ai o le tali atu i le lagi. Se’i o’u faasoa atua se faataitaiga faigofie se tasi o lena ituaiga o auaunaga.
O Kurene Moreli Pouena o se tane ma se tama galue malosi ma tuuto o lē, e pei o le toatele na maua tupe mai le fanua, sa i ai se faaletonu tau tamaoaiga ina ua faaletonu le faatoaga pateta i le lotoifale. O lea sa galulue ai o ia ma lona toalua o Noma i isi galuega, mulimuli ane sa masii atu i se isi aai, ma amata ai ona toe foi i le tulaga lelei o le tamaoaiga. Peitai, i se mea le lelei ma pagatia na tupu, na matua tiga tele ai Uso Pouena, i se faatalanoaga o le pepa malumalu, sa fai sina le talitonuina o le epikopo i le tautinoga a Moreli o ia e totogi atoa le sefuluai.
Ou te le iloa po o ai o alii nei sa sili ona sa’o ana faamaumauga i lena aso, ae ou te iloa sa savali ese mai Tuafafine Pouena mai lena faatalanoaga ma lana pepa faataga o le malumalu ua sainia, ae savali ese mai Uso Pouena ma le ita na aveesea ai o ia mai le Ekalesia mo le 15 tausaga.
E le afaina po o ai sa sa’o e uiga i le sefuluai, ae na manino lava sa galo uma ia Moreli ma le epikopo le poloaiga a le Faaola ia “vave ona oulua lelei ma [lou fili]”2 ma le fautuaga a Paulo ia “aua ne’i goto le la o ita pea outou.”3 O le mea moni sa le’ilelei i la’ua ma sa o’oina goto le la o ita pea Uso Pouena mo ni aso, ona sosoo lea ma vaiaso, ma tausaga, ma faamaonia ai le manatu sa faia e se tasi o tagata atamai o Roma anamua, lea na fai mai, “O le ita, a lē puleaina, e tele lava ina sili atu ona [faataumaoia] nai lo le manu’a na mafua ai.”4 Ae o le vavega o le faaleleiga o loo avanoa pea mo i tatou, ma ona o le alofa mo lona aiga ma le Ekalesia sa ia iloa lava e moni, sa toe foi mai ai Moreli Pouena ma toe toaga i le Lotu. Sei ou ta’u atu faapuupuu pe na faapefea ona tupu lena mea.
O le atalii o Uso Pouena, o Brad, o se ma uo lelei ma o se Fitugafulu Eria tuuto o loo auauna atu i Idaho i saute. Sa 11 tausaga le matua o Brad i le taimi na tupu ai lea mea, ma mo le 15 tausaga sa ia vaaia ai le faaitiitia o le tuuto faalelotu o lona tama, o se molimau i le seleselega pagatia ua selesele mai le mea sa luluina ai le ita ma le le femalamalamaai. Na manaomia le faia o se mea. O lea la ina ua tulata i le aso malolo o le Aso Faafetai i le 1977, o Brad, le tamaitiiti aoga 26 tausaga i le Iunivesite o Polika Iaga; o lona toalua, o Valerie; ma le pepe tama fou, o Mic, na uta a latou mea i totonu o le latou tamai taavale ma, e ui i le leaga o le tau, sa malaga atu pea i Billings, Montana. E oo lava i se lavea i se faaputuga aisa e latalata i West Yellowstone sa le mafai ona taofia le toatolu lenei mai le latou auaunaga e feiloai ma Uso Pouena Matua.
I le taunuu atu ai, sa talosagaina e Brad ma lona tuafafine o Pam sina taimi paganoa ma lo la tama. “O oe o se tama lelei tele,” sa amata ai Brad ma se lagona ootia, “ma e matou te iloa lava le tele o lou alofa ia i matou. Ae o loo i ai se mea o sese, ma ua i ai mo se taimi umi lava. Ona sa faatasi ona e tiga, ua tiga ai lenei aiga mo le tele o tausaga. Ua nutimomoia i tatou, ma e na o oe lava e mafai ona toe faaleleia. Faamolemole, faamolemole i le mavae ai o lenei taimi atoa, e mafai ona e mauaina i lou loto e faataatia ese lena mea le lelei na tupu ma lena epikopo ae toe taitai lenei aiga i le talalelei e pei ona sa e faia muamua?”
Sa matuā sāō atoa. Ona tepa a’e lea o Uso Pouena i le toalua lea, o lana fanau, o le ivi o ona ivi ma le aano o ona aano,5 ma fai atu lemu, “Ioe. Ioe, o le a ou faia.”
I le faagaeetia ma le maofa i le tali sa lei mafaufauina, sa matauina ai e Brad Pouena ma lona aiga lo latou tama ma le tane o alu atu i lana epikopo i lena taimi i se agaga o le faaleleiga ina ia toe faatulaga sa’o mea i lona olaga. I se tali atoatoa i lana asiasiga lototele sa lei mafaufauina, sa opo ai e le epikopo sa tele ni ana valaaulia faisoo ia Uso Pouena e foi mai, ia Moreli ma fusi o ia i se opo umi lava.
I le na o ni nai vaiaso—e lei umi—sa auai atoatoa ma toaga ai Uso Pouena i le Ekalesia ma toe faaagavaaina o ia lava e toe foi atu i le malumalu. Sa le’i pine ae ia taliaina le valaauga e pulefaamalumalu i se tamai paranesi e 25 tagata sa tauivi lava, ma faatupulaia i se aulotu malosi e silia ma le 100. O nei mea na tutupu i le toeitiiti afa seneturi talu ai, ae o le taunuuga o le aioiga faaleauaunaga a se atalii ma se afafine i lo la’ua lava tama atoa ai ma le naunautaiga o le tama ia faamagalo ma agai i luma e ui i ni le atoatoa o isi na aumai ai faamanuiaga ia o loo oo mai pea—ma o le a faavavau ona mai—i le aiga o Pouena.
Uso e ma tuafafine, ua fetalai mai Iesu ia tatou “nonofo faatasi i le alofa”6 ma ia “leai ni finauga i totonu ia te outou.”7 “O le e i ai le agaga o le finauga ua le mai ia te au o ia,” sa Ia lapataia ai sa Nifaē.8 O le mea moni, i se tulaga maoae, o lo tatou sootaga ia Keriso o le a fuafuaina—pe aafia foi—i a tatou sootaga i le tasi ma le isi.
“Afai tou te … mananao e o mai ia te au,”sa Ia fetalai ai, “ma e manatua ua i ai i lou uso se mea e faasaga ia te oe—
“Ia e alu atu i lou ala i lou uso, ma muamua ona e faalelei [ia te ia], ma ona e sau ai lea ia te au ma le faamoemoe atoa o le loto, ma o le a ou taliaina oe.9
E mautinoa lava e tofu i tatou ma le anoanoai o ituaiga eseese o manu’aga ua leva ma faanoanoaga ma manatuaga tiga e faamatala lea o loo olopalaina ai lava i lenei taimi le filemu i le loto o se tasi po o le aiga po o le tuaoi. Pe na tatou faatupuina lena tiga pe na tatou tiga foi, o na manu’aga e manaomia ona faamaloloina ina ia mafai ai ona tauia le olaga e pei ona faamoemoeina ai e le Atua. E pei o meaai i totonu o lau pusaaisa lea e siaki ma le faaeteete e lau fanau a fanau po o lelei mo oe, o na tiga ua leva ma ua le tatau ona toe faatiga ia te oe. Faamolemole aua ne’i toe ma’umaua ai se avanoa taua i lou agaga i na mea. E pei ona fai atu ai Prospero ia Alonso faanoanoa i le ata The Tempest, “Aua ne’i o ta faanoanoa i mea ua tuanai aua e leai se uiga e toe faanoanoa ai.”10
“Faamagalo atu, ona faamagaloina ai lea o outou,”11 sa aoao mai ai Keriso i le vaitaimi o le Feagaiga Fou. Ma i o tatou aso: “O Aʼu, o le Alii, Ou te faamagalo i lē o le a Ou faamagaloina, ae o outou ua poloaiina ia faamagalo atu i tagata uma.”12 Peitai, e taua mo soo se tasi o outou o loo ola i le tiga moni e matau mea sa le’i fetalai ai o Ia. Sa le’i fetalai mai o Ia, “E le faatagaina outou e lagonaina le tiga moni po o faanoanoaga moni mai aafiaga matuitui na e oo i ai ona o le isi tagata.” Pe na Ia fetalai foi, “Ina ia mafai ona faamagalo atu atoatoa e ao ona e toe faia se sootaga faatiga pe toefoi atu i se tulaga faasaua ma faataumaoi.” Ae e ui i ni faatiga sili ona matuitui e ono oo mai ia i tatou, e mafai lava ona tatou tutulai ae i o tatou tiga pe afai tatou te savavali i luga o le ala i le faamalologa moni. O lena ala o le ala o le faamagaloga sa savalia e Iesu o Nasareta, lea o loo valaau mai ia i tatou taitoatasi, “Sau, mulimuli mai ia te a’u.”13
I lea lava valaaulia e avea ma Ona soo ma taumafai e faia e pei ona sa Ia faia, o loo augani mai ai Iesu ia i tatou ia avea ma meafaigaluega o Lona alofatunoa—ia avea ma “savali a Keriso” i “le galuega o le [faa]leleiga,” e pei ona faamatala ai e Paulo i tagata Korinito.14 O Lē faamaloloina manu’a uma, o Lē e faasa’oina mea sese uma, ua augani mai ia i tatou ia galulue faatasi ma Ia i le galuega faigata o le faatupuina o le filemu i se lalolagi o le a le maua ai le filemu i se isi lava ala.
E pei la ona tusia e Phillips Brooks: “O oe lena e te faatagaina le malamalamasese pagatia e alu pea mai lea tausaga i lea tausaga, ma le faamoemoe e foiaina i se aso; o oe lena e te faaolaolaina pea finauga ona e le o mafai ona e maua se tonu i lou mafaufau, o le aso nei lava e ao ona ositaulagaina ai lou faamaualuga ma [foia] na mea; o oe lena e te fepasia’i ma tagata i luga o le auala, e le talanoa ia i latou ona o le fiatagata … ; o oe lena e te iloaina … [se tasi] o loto mafatia ae e te le fia fai atu i ai se upu talisapaia pe faamafanafana, lea e te faamoemoe se’i i ai … se aso, … alu nei lava ma faia lena mea ina ne’i e le toe mauaina se isi avanoa e faia ai.”15
O’u uso e ma tuafafine, ou te molimau atu o le lotofaamagalo ma le lafoai o le faatiga atu, fou pe ua leva, e totonugalemu i le mamalu o le Togiola a Iesu Keriso. Ou te molimau atu i le iuga, o lena lava faaleleiga faaleagaga e mafai ona oo mai ae ua na o lo tatou Togiola paia lava e oo mai ai, o Lē e faataalise mai i lo tatou laveai “ma le faamalologa i ona apaau.”16 Tatou te faafetai ia te Ia, ma lo tatou Tama Faalelagi o le na auina maia o Ia, lena faafouga ma le toefanauina, o se saolotoga i le lumanai mai faanoanoaga tuai ma measese o le tuanai, e le gata e mafai ae ua maea ona latou faatauina totogiina, mo se tau tiga tele ua faailogaina i le toto o le Tamai Mamoe lea na faamaligiina.
Faatasi ai ma le pule faaaposetolo ua faamatuu mai ia te a’u e le Faaola o le lalolagi, ou te molimau atu e uiga i le filemu o le agaga lea o le a aumaia e le faaleleiga ma le Atua faapea ma le tasi ma le isi pe afai e lava lo tatou agamalu ma le lototele e saili ai. “Tuu le fefinauai [o le tasi] ma le isi,” na fetalai mai ai le Faaola.17 Afai e te iloaina se manu’a ua leva, ia faaleleia. Ia tausi e le tasi le isi i le alofa.
A’u uo pele, i la tatou galuega fai faatasi o le faaleleiga ou te talosagaina ai outou ia avea ma se faatupu filemu—ia fiafia i le filemu, ia saili le filemu, ia fatuina le filemu, ma ia faatauaina le filemu. Ou te faia lena talosaga i le suafa o le Aloalii o le Filemu, e silafiaina mea uma e uiga i le “manua ai i le fale o [Ana] uo,”18 ae o loo maua pea le malosi e faamagalo ai ma faagalo—ma faamalolo—ma ia fiafia. Mo lena mea ou te tatalo ai, mo oe ma a’u, i le suafa o le Alii o Iesu Keriso, amene.