Faataatiaina o le Faavae o se Galuega Tele
O lesona na aoaoina e ala i tu masani tatou te faavaeina i totonu o o tatou aiga, e ui ina laiti ma faatauvaa, ua faateleina le taua i le lalolagi i aso nei.
I le avea ai ma matua i Siona, ua ia i tatou se tiutetauave paia e fagua i totonu o a tatou fanau le naunautai ma le tautinoga i le olioli, malamalama, ma upumoni o le talalelei a Iesu Keriso. Ao faafaileleina a tatou fanau, tatou te faavaeina ni tu masani i totonu o tatou aiga ma tatou fausia ai ni mamanu o fesootaiga ma amioga i totonu o a tatou mafutaga faaleaiga. I le faia ai o na mea, e tatau i tu masani ua tatou faavaeina ona fausia ai ni amioga malosi ma lē maluelue o le lelei i totonu o a tatou fanau lea o le a tuuina atu ia i latou le malosi e fetaiai ai ma luitau o le olaga.
Mo le tele o tausaga ua fiafia lo matou aiga i tu masani faaletausaga o le toalaupi maualuga i Mauga o Uintah i sautesasae o Iuta. Matou te malaga mo le 20 maila (32 km) i luga o auala maamaā palapalā ia taunuu ai i se vanu lanulauvao matagofie, ma puipui papa maualuluga lea e tafe ai se vaitafe ua faatumulia i le vai malulu ma manino. O tausaga taitasi, i le faamoemoe ai e toe faamautu le taua o aoaoga faavae ma faiga masani o le talalelei i totonu o loto o la ma’ua fanau ma fanau a ma fanau, ma te fesili atu ai ma Susan i ma atalii e toaono taitasi ma o latou aiga e saunia se savali puupuu i se autu latou te lagona o se elemene taua i le faavaega o se aiga e totonugalemu ia Keriso. Ona matou potopoto lea mo se faigalotu faaleaiga i se nofoaga tuufua, ma taitasi ma tuu mai a latou savali.
O lenei tausaga na tusia ai e fanau a le ma fanau le autu o a latou savali i luga o maa, ona taitasi lea, ma tanuina i autafa o le isi, e suitulaga i se faavae mautu lea e faavaeina ai se olaga fiafia. Na aofia ai i totonu o a latou savali uma e ono le upumoni le masuia e faavavau o Iesu Keriso o le maatulimanu lea o lena faavae.
I upu a Isaia, “O lenei, o loo faapea ona fetalai mai o le Alii o Ieova, Faauta, ou te tuuina i Siona le maa e fai ma faavae, o le maa ua uma ona faataitaiina, o le maa tulimanu taua, o le faavae ua mau.”1 O Iesu Keriso o le maatulimanu taua lea i le faavae o Siona. O Ia lea na faaali i le Perofeta o Iosefa Samita: “O le mea lea aua le faavaivai i le faia o mea lelei ona o loo oulua faataatiaina le faavae o se galuega tele. Ma o mea iti e tutupu mai ai mea tetele.”2
O lesona na aoaoina e ala i tu masani tatou te faavaeina i totonu o o tatou aiga, e ui ina laiti ma faatauvaa, ua faateleina le taua i le lalolagi i aso nei. O a mea laiti ma faatauvaa ia, pe a faatulagaina, o le a faataunuuina ai se galuega tele i olaga o a tatou fanau?
Na saunoa talu ai nei Peresitene Russell M. Nelson i se faalapotopotoga toatele e lata i Toronto, Kanata, ma faamanatu atu ma le alofa i matua e uiga i le tiutetauave paia ua ia i tatou e aoao atu a tatou fanau. I totonu o tiutetauave taua ua faailoa mai, na faamamafaina ai e Peresitene Nelson ia tiute ua ia i tatou o ni matua e aoao atu a tatou fanau ina ia malamalama i le mafuaaga tatou te aai ma feinu ai i le faamanatuga, le taua o le fanau i totonu o le feagaiga, ma le taua o le sauniuni mo ma le mauaina o se faamanuiaga faapeteriaka, na ia faamalosiau atu i matua ina ia taimua i le faitauina faatasi o tusitusiga paia o se aiga.3 E ala i nei taumafaiga, ua uunaia i tatou e lo tatou perofeta pele ina ia avea o tatou fale ma “malutaga o le faatuatua.”4
I le Tusi a Mamona, na tusia ai e Enosa le lagona o le agaga faafetai tele mo le faataitaiga a lona tama, o le na “aoaoina [o ia] i lana gagana, ma i le aoaoga ma le apoapoaiga foi a le Alii.” Ma le ootia tele na alaga atu ai Enosa, “Ma ia faamanuina lava le suafa o lo’u Atua mo lena mea.”5
E pele ia te a’u ia tu masani laiti ma faatauvaa ua matou matauina i totonu o le matou aiga i le silia ma le 35 tausaga o le ma faaipoipoga. O le tele o a matou tu masani e laiti ae anoa. Mo se faataitaiga:
-
I taimi o afiafi pe a ou aluese mai le aiga, ou te iloa lava i taimi uma i lalo o le taitaiga a Susan, o le ma atalii ulumatua o loo i ai na te aveina i ona luga le taitaiga o le aiga i le suesueina o tusitusiga paia ma le tatalo faaleaiga.6
-
O le isi tu masani––e le mafai ona matou tuua lo matou fale pe faaiu se talanoaga i le telefoni e aunoa ma le fai atu, “ou te alofa ia te oe.”
-
Ua faamanuiaina ō matou olaga i le faataatiaese o se taimi i tulaga masani e fiafia ai i faatalanoaga patino ma a ma’ua atalii taitoatasi. I se tasi o faatalanoaga sa ou fesili ai i le ma atalii e uiga i ona manaoga ma sauniuniga e auauna atu i se misiona. Ina ua mavae ni talatalanoaga, sa i ai sina taimi o le manatunatu lē leoa; ona ia punou mai lea i luma ma tautino mai ma le totoa, “Tama, manatua a o o’u laitiiti ma amata ona faia a tatou faalatanoaga faatama?” Sa ou fai atu, “Ioe.” “Ia,” na ia fai mai ai, “Sa ou folafola atu ia te oe i lena taimi o le a ou auauna atu i se misiona, ma na lua folafola mai ma Tina ia te a’u o le a lua auauna atu i se misiona pe a lua matutua.” Ona toe filemu foi lea. “O i ai se faaletonu ia te oulua o le a taofia ai oulua mai le auauna atu—aua atonu e mafai ona ou fesoasoani atu?”
O le faifai pea o tu masani faaleaiga aoga lea e aofia ai le tatalo, faitauina o tusitusiga paia, afiafi faaleaiga, ma le auai i sauniga o le Ekalesia, e ui e foliga laitiiti ma faatauvaa, ae fausia ai se aganuu o le alofa, faaaloalo, lotogatasi, ma le malupuipuia. I le agaga e o faatasi ma nei taumafaiga, o le a puipuia a tatou fanau mai u fanafana mu a le tiapolo lea ua mauaa i aganuu faalelalolagi i o tatou aso.
Ua faamanatu mai ia i tatou le fautuaga poto a Helamana i ona atalii: “Ia manatua o luga lava o le papa o lo tatou Togiola, o le o Keriso lea, le Alo o le Atua, e ao ina oulua atinae ai lo oulua faavae; ina ia pe a auina mai e le tiapolo ana matagi malolosi, ioe, ana ufanafana i le asiosio, ioe, pe a pesi mai ia te oulua ana uatoa uma ma lana afa malosi, o le a leai sona mana i luga o oulua e toso ifo ai oulua i lalo i le to o le pagatia ma le malaia e le gata, ona o le papa lea ua oulua atinae ai i luga, o le faavae mautinoa lea, o se faavae lea afai e atiae ai tagata e le mafai lava ona pauu i latou.”7
I tausaga ua tea, ao o’u auauna atu o se epikopo talavou, na talosaga mai ai se tamalii matua e feiloai ia te a’u. Sa ia faamatalaina lona aluese mai le Ekalesia ma tu masani amiotonu a ona matua ao ia talavou. Sa ia faamatalaina auiliili ia lototiga na ia oo i ai i le taimi o lona olaga ao saili ma le le aoga le olioli tumau, i le lotolotoi i le fiafia le tumau ua ofo mai e le lalolagi. I le taimi nei, i tausaga mulimuli o lona olaga, ua ia lagonaina le agavaivai, o nisi taimi le faalavelave mai o musumusuga a le Agaga o le Atua e toe taitaia o ia i tua i lesona, faiga masani, lagona, ma le saogalemu faaleagaga o lona talavou. Na ia faaalia le agaga faafetai mo tu masani a ona matua, ma i upu faaona po nei, na ia toe taua ai le folafolaga a Enosa: “Ia faamanūina lava le suafa o lo’u Atua mo lena mea.”
I lo’u aafiaga, o le toe foi mai o lenei tamalii faapelepele i le talalelei o se uiga a le toatele ma e faia soo e fanau a le Atua o e tuua mo sina taimi, ae na o le toe foi mai lava i aoaoga ma faiga masani o lo latou talavou. Tatou te molimauina i na taimi, le atamai o le tusitala o le faataoto, lea na apoapoai atu i matua, “Aoao ia i le tama e tusa ma lona ala: a oo ina toeaina lava o ia, e le te’a ese ai.”8
O matua uma lava e feagai ma taimi o le lē mautonu ma le eseese o tulaga o le naunautaiga ma le malosi ao tausia fanau. Ae peitai, afai e faatino e matua le faatuatua i le aoao atu o fanau i taimi uma, faamaoni, alofa ma le faia o mea uma latou te mafaia e fesoasoani ai ia i latou i le ala, latou te maua le faamoemoe sili atu faapea o le fatu o loo totoina o le a mauaa i totonu o loto ma mafaufau o a latou fanau.
Na malamalama lelei Mose i le manaomia taua o le aoao atu faifaipea. Na ia fautua atu, “Ia e matua aoao soo [nei upu] i lau fanau, ma ia e tautalatala a’i, pe a e nofo i lou fale, pe a e savali foi i le ala, pe a e taoto, pe a e tulai foi.”9
Tatou te tootutuli i autafa o a tatou fanau i taimi o tatalo faaleaiga, tatou te faafailele i latou e ala i a tatou taumafaiga ia faia ni faitauga tusitusiga paia faaleaiga anoa, tatou te faafaileleina ma le onosai ma le alofa i latou ao tatou auai faatasi i afiafi faaleaiga, ma e tatou te popole mo i latou ao tatou tatalo i o tatou tulivae i le ogatotonu o a tatou tatalo lilo i le lagi. Oka, so tatou naunau mo fatulaau o loo tatou totoina ina ia mauaa i totonu o loto ma mafaufau a o tatou fanau.
Ou te talitonu e le o se fesili e popole tele i ai le pe o “mauaina” e a tatou fanau i le lotolotoi o a tatou aoaoga, e pei o le tauivi e faitau ia tusitusiga paia pe ina ia auai i le Mutuale ma isi sauniga o le Ekalesia. O se fesili e le popole tele i ai pe na latou malamalama i na taimi i le taua o na gaoioiga ae o se fesili e sili le popole i ai pe o i tatou, i le avea ai ma matua, o lava le faatinoina o le faatuatua e mulimuli ai i fautuaga a le Alii ia ola ai ma le maelega, aoao atu, apoapoai atu, ma faatulaga faamoemoega ua musuia e le talalelei a Iesu Keriso. O se taumafaiga ua uunaia e lo tatou faatuatua––la tatou talitonuga o le a i ai se aso o le a mauaa ai fatu na totoina i lo latou talavou ma amata ona totogo ae ma tuputupu ae.
O mea tatou te tautatala ai, o mea tatou te talai atu ma aoao atu e fuafua ai mea o le a tutupu i totonu o i tatou. Ao tatou faatulagaina ni tu masani lelei lea e aoao atua ia aoaoga faavae a Keriso, o le a molimau atu le Agaga Paia i le moni o a tatou savali ma faafailele ia fatu o le talalelei o loo totoina loloto i totonu o loto o a tatou fanau e ala i a tatou taumafaiga i le aluga o le ala. Ou te molimau atu ai i le suafa o Iesu Keriso, amene.