Mo Ia
I le iloaina o le o ai ma le aisea i le auauna atu i isi e fesoasoani ia i tatou ia malamalama o le faaaliga aupito sili ona maualuga o le alofa o le tuuto atu lea i le Atua.
I lenei po taua, ou te faailoa atu lou alofa ma le talisapaia o outou taitoatasi, o o’u uso pele. Po o le a lava lou matua, nofoaga, po o le tulaga, tatou te potopoto i lenei po i le lotogatasi, i le malosi, i le faamoemoe, ma i le molimau e alofagia ma taitaia i tatou e lo tatou Tama Faalelagi, lo tatou Faaola, o Iesu Keriso; ma lo tatou perofeta soifua, o Peresitene Russell M. Nelson.
Ao avea i ma’ua ma se ulugalii talavou, sa valaauina lo’u toalua ma a’u e lo matou epikopo e asiasi ma auauna atu i se aiga ua tele tausaga e le’i toe o mai i le lotu. Sa ma taliaina ma le naunautai le tofiga ma ō atu i lo latou aiga i nai aso mulimuli ane. Sa vave ona manino ia i maua latou te le mananao i ni tagata asiasi mai i le Ekalesia.
O le isi la a ma asiasiga, sa ma o atu ma se ipu kuki mo i latou, ma le mautinoa o keke sukalati o le a ootia ai o latou loto. Ae leai. Sa talanoa mai le ulugalii ia i maua e ala i le faitotoa valavala, ma faamanino atili mai e lē taliaina i maua. Ae a o ma tietie atu i le fale, sa ma mautinoa lelei atonu e ausia le manuia pe ana ma tuuina atu ni Krispies Alaisa.
O le leai o se ma vaaiga mamao faaleagaga na faaopoopo ai taumafaiga lē manuia faaosoita. O le teenaina e lē maua ai se toafimalie. I le aluga o taimi sa amata ona ma fesili ifo ia i maua lava, “Aisea ta te faia ai lenei mea? O le a le ma faamoemoega?
Sa faapea mai Elder Carl B. Cook: “O le auauna atu i le Ekalesia, e mafai ona faigata pe a talosagaina i tatou e faia se mea tatou te fefefe ai, pe a tatou le lavava e auauna atu, pe afai ua valaauina i tatou e fai se mea tatou te lei muamua fuafua i ai.”1 Sa ma lagonaina le moni o upu a Elder Cook ina ua ma filifili e tatau ona ma sailia le taitaiga mai i se Tasi o i ai se vaaiga e sili atu i lo ma’ua.
O lea, i le mavae ai o le tele o le tatalo ma le suesuega, sa ma maua le tali i le aisea o le ma auaunaga. Sa ia i maua se suiga i la maua malamalamaaga, se liuga o le loto, e moni lava o se aafiaga faafaaaliga.2 Ao ma saili atu mo le taitaiga mai i tusitusiga paia, sa aoao i maua e le Alii i le auala e faia ai le gasologa o le auauna atu i isi ia faigofie atu ma sili ona anoa. O le fuaiupu lea sa ma faitauina ma sa suia uma ai o maua loto ma la maua auala: “Ia e alofa atu i le Alii lou Atua ma lou loto atoa, ma lou manatu atoa, mafaufau, ma le malosi; ma ia e auauna atu ia te ia i le suafa o Iesu”3 E ui lava o lenei fuaiupu e masani tele i ai, ae na foliga mai sa talanoa mai ia i maua i se auala fou ma taua.
Sa ma iloaina sa ma taumafai ma le faamaoni e auauna atu i lenei aiga ma ia auauna atu i la ma epikopo, ae sa tatau ona ma fesili ifo ia i maua lava pe na ma auauna moni atu ma le alofa i le Alii. Na faamanino mai e le Tupu o Peniamina lenei eseesega ina ua ia faapea mai, “Faauta ou te fai atu ia te outou ona ua ou fai atu ia te outou sa ou faaaoga oʼu aso e auauna atu ai ia te outou, ou te lē fia mitamitavale ona sa na o lo’u auauna atu lava lea i le Atua.”4
O lea la, o ai sa auauna moni i ai le Tupu o Peniamina? O le Tama Faalelagi ma le Faaola. I le iloaina o le o ai ma le aisea i le auauna atu i isi e fesoasoani ia i tatou ia malamalama o le faaaliga aupito sili ona maualuga o le alofa o le tuuto atu i le Atua.
Ao faasolo ina sui la ma taulaiga, sa faapena foi a ma tatalo. Sa amata ona ma taulai atu ma le fiafia i a maua asiasiga faatasi ma lenei aiga pele ona o le ma alolofa mo le Alii.5 Sa ma faia mo Ia. Sa Ia faia le tauiviga e lē o se mamafatũ. I le tele o masina o lo ma tutu ai i le fasitepu o le faitotoa, sa amata ona avatu maua i totonu e le aiga. Mulimuli ane, sa matou faia tatalo e lē aunoa ma talanoaga faatasi faaletalalelei. Sa atia’e se faauōga umi ma tumau. Sa matou tapuai atu ma alolofa ia te Ia e ala i le alofa i Lana fanau.
E mafai ona e mafaufau i tua i se taimi sa e aapa atu ai ma le alofa ma se taumafaiga faamaoni e fesoasoani i se tasi na manaomia se fesoasoani ma lagonaina sa lē amanaia au taumafaiga pe atonu sa lē talisapaia pe sa lē manaomia foi? I lena taimi, sa e fesiligia le taua o lau auaunaga? Afai o lea, e faamoemoe o upu a le Tupu o Peniamina o le a suitulaga i ou masalosaloga ma faapena foi le tiga: “Ua nao lo outou auauna atu lava lea i lo outou Atua.”6
Nai lo le atiae o le ita, e mafai ona tatou fausia, e ala i le auaunaga, se sootaga sili atu atoatoa ma lo tatou Tama Faalelagi. O lo tatou alofa mo Ia ma le tuuto ia te Ia e aveese ai le manaomia o le viiga po o le talisapaia ma faataga Lona alofa e oo mai ia i tatou ma oo mai i totonu o i tatou.
O nisi taimi tatou te muamua auauna atu mai se lagona o le tiute po o le matafaioi, ae o lena lava auaunaga e mafai ona taitai atu ai i tatou e faaaoga se mea e maualuga atu i totonu o i tatou, e taitai atu i tatou e auauna atu i “le ala silisili lava”7—e pei ona i ai le valaaulia a Peresitene Nelson i “se auala fou atu, ma paia atu e tausia ma auauna atu ai i isi.”8
A tatou taulai atu i mea uma na faia e le Atua mo i tatou, e faaosofia e lagona o le loto faafetai. Ao amata faaitiitia lo tatou popole e uiga i le faalauaiteleina o i tatou e a tatou auaunaga, o le a tatou iloaina o le taulaiga o la tatou auaunaga o le faamuamua lea o le Atua.9
Sa aoao mai Peresitene M. Russell Ballard, “Ua na o lo tatou alolofa lava i le Atua ma Keriso ma lo tatou loto atoa, manatu atoa, ma le mafaufau atoa ua mafai ai ona tatou faasoa atu lenei alofa i o tatou tuaoi e ala i galuega agaalofa ma le auauna atu.”10
O le [poloaiga] muamua o Poloaiga e Sefulu ua toe taua ai lenei malamalamaaga paia: “O a’u o Ieova lou Atua. … Aua nei e fai mo oe ni atua ese i o’u luma.”11 O le faatulagaina o lenei poloaiga e fesoasoani ia tatou malamalama ai afai tatou te avea o Ia ma o tatou faamuamua taua, o isi mea uma o le a faatulagaina lelei—e oo lava i a tatou auaunaga i isi. Afai Na te tauaveina le tulaga sili ona taua i o tatou olaga e ala i a tatou filifiliga lelei, ona mafai lea ona Ia faamanuiaina a tatou faatinoga mo lo tatou lelei ma mo le lelei o isi tagata.
Sa apoapoai mai le Alii, “Vaai mai ia te a’u i mafaufauga uma.”12 Ma ua tatou osifeagaiga ai i vaiaso taitasi e faia lena mea—ia “manatua pea o ia.”13 E mafai ona faaaoga lea taulaiga faaleatua i mea uma tatou te faia? E mafai ona avea le faia e oo lava i se galuega faatauvaa ma se avanoa e faatino ai lo tatou alolofa ma le tuuto ia te Ia? Ou te talitonu e mafai ma o le a mafai.
E mafai ona tatou avea mea taitasi i le tatou lisi o mea e fai ma se auala e faamamalu ai o Ia. E mafai ona tatou vaai i galuega taitasi o se faamanuiaga ma se avanoa e auauna atu ai ia te Ia, e tusa po o tatou i ai i le lotolotoi o mea e faagata, tiute, po o napekini leaga.
E pei ona fai mai Amona, “Ua tusa au nei ma le leai; o lo’u malosi foi ua ou vaivai ai; o le mea lea ou te le mitamita ai ia te au lava, ae peitai, ou te mitamita i lo’u Atua, aua o Lona malosi ou te mafaia ai mea uma.”14
Pe a avea le auauna atu i lo tatou Atua ma o tatou faamuamua taua i le olaga, tatou te faama’umau i tatou lava, ma mulimuli ane, tatou te maua ai i tatou lava.15
Na faigofie ma tuusao le aoaoina e le Faaola o lenei mataupu faavae: “O lea ia faasusulu atu ai lo outou malamalama i luma o lenei nuu, ina ia latou vaai ai ia outou galuega lelei ma viia lo outou Tamā o i le lagi.”16
Ou te fia faasoa atu ma outou ni upu atamai lea na maua i luga o le puipui o se fale mo tamaiti ua leai ni matua i Calcutta, Initia: “A e agalelei, e mafai ona tuuaia oe i ni faamoemoega lilo ma manatu faapito. Ia agalelei pea. O mea sa e faaalu le tele o tausaga e te fausia, e mafai e se tagata ona faaleagaina i le po e tasi. Fausia pea. O le lelei e te faia i le asō, e masani ona galo i tagata i le aso a taeao. Ia faia pea le lelei. Tuu atu i le lalolagi le lelei silisili o ia te oe, ma atonu e le mafai ona lava. Tuu atu pea i le lalolagi le lelei silisili o ia te oe. E te iloaina, i le taimi mulimuli, e i le va lava o oe ma lou Atua ….”17
Uso e, e i le va lava o oe ma le Alii. E pei ona saunoa mai Peresitene James E. Faust: “‘O le a le manaoga silisili i le lalolagi?’ … ‘E lē o le manaoga silisili ea i le lalolagi atoa e mo tagata taitoatasi ina ia maua se sootaga patino, faifai pea, i aso taitasi, ma le Faaola?’ O le i ai o se sootaga faapena e mafai ai ona faaali mai le paia i totonu o i tatou, ma e leai se mea e faia se eseesega silisili i o tatou olaga pe a tatou iloa ma malamalama i la tatou sootaga paia ma le Atua.”18
E faapena foi, sa faamatala atu e Alema i lona atalii, “Ioe, tuu atu i le Alii au mea uma e fai, ma soo se mea e te alu i ai ia tuu atu i le Alii; ioe, ia tuu atu ou manatu uma i le Alii; ioe, ia tuu atu alofaaga o lou loto i le Alii e faavavau.”19
Ma sa faapena foi ona aoao mai i tatou e Peresitene Russell M. Nelson, “A tatou manatunatu i Lana Togiola ofo fua mai, soo se lagona lava o le ositaulaga i la tatou vaega e matua ufitia atoa e se lagona o le faafetai tele mo le avanoa paia e auauna atu ai ia te Ia.”20
Uso e, ou te molimau atu afai e galue Iesu Keriso e ala i le mana o Lana Togiola, ia i tatou ma i totonu o i tatou, e amata ona Ia galue e ala ia i tatou e faamanuia ai isi. Tatou te auauna atu ia i latou, ae tatou te faia e ala i le alofa ma auauna atu ia te Ia. Tatou te avea ma mea ua faamatala mai e le mau: “E saili ai e tagata [ma tamaitai] taitoatasi le lelei o lē la te tuaoi, ma faia mea uma ma le manatu tasi i le mamalu o le Atua.”21
Masalo na silafia e la matou epikopo o le lesona lena o le a ma aoaoina ma lo’u toalua mai i na taumafaiga muamua ma lelei, ae e lē atoatoa, e auauna atu ai i Ana atalii ma afafine pele. Ou te tuuina atu lau molimau patino ma le mautinoa i le agalelei ma le alofa Na te faasoa mai ia i tatou ao tatou taumafai e auauna atu mo Ia. I le suafa paia o Iesu Keriso, amene.