Aua Le Atuatuvale
Ia faamalosi, uso e ma tuafafine. Ioe, ua tatou ola i taimi faigata, ae pe a tatou tumau ai i luga o le ala o feagaiga, e le tatau ona tatou fefefe.
Ou te faaopoopo atu la’u molimau i savali a Peresitene Russell M. Nelson ma Elder Quentin L. Cook na tuuina atu i nai minute ua tea e uiga i le lotogatasi ma le maliega a le Aufono a le Au Peresitene Sili ma le Korama a Aposetolo e Toasefululua. Ou te iloa o nei faasilasilaga faafaaaliga o le mafaufau ma le finagalo lea o le Alii ma o le a faamanuiaina ma faamalosia tagata taitoatasi, aiga, ma Le Ekalesia a Iesu Keriso o le Au Paia o Aso e Gata Ai mo augatupulaga a sau.
I nai tausaga ua mavae, na fesili mai ai se tasi o ma afafine faatoa faaipoipo ma lana tane ia i ma’ua ma Sister Rasband i se fesili taua tele e uunaia ai le olaga: “O saogalemu lava ma atamai le aumaia o fanau i lenei lalolagi foliga leaga ma taufaafefe ua tatou ola ai?”
O se fesili taua lena mo se tina ma se tama e mafaufau i ai ma a laua fanau pele ua faaipoipo. Sa mafai ona ma faalogoina le fefe i o la’ua leo ma lagona le fefe i o la’ua loto. O le ma tali ia i laua o se “Ioe, [mausali] e sili atu nai lo le OK,” a o matou fetufaai i aoaoga faavae o le talalelei ma a ma’ua uunaiga faamaoni ma aafiaga o le olaga.
E le fou le fefe. Na fefefe soo o Iesu Keriso, i luga o le Sami o Kalilaia i le “matagi … ma peau” i le pouliuli o le po.1 I le avea ai ma Ona soo i nei aso, e i ai foi mea tatou te fefefe ai. Ua fefefe a tatou talavou matutua nofofua i le faia o ni tautinoga e pei o le faaipoipo. O ulugalii talavou, e pei o le ma fanau, e mafai ona fefefe i le aumaia o fanau i se lalolagi ua faateleina le amioleaga. Ua fefefe faifeautalai i le tele o mea, aemaise le talanoa atu i tagata ese. Ua fefefe tina ua oti a latou tane e agai i luma na o i latou [e aunoa ma tane]. Ua fefefe le autalavou i le le taliaina; o tamaiti laiti e fefefe i le aso muamua o le aoga; e fefefe tagata a’oga o le iunivesite i le mauaina o le taunuuga o se suega. Tatou te fefefe i le toilalo, teenaina, faanoanoa, ma le le mailoa. Tatou te fefefe i afā, mafuie, ma afi ia e faatamaiaina le laueleele ma o tatou olaga. Tatou te fefefe i le le filfilia o tatou ma i le taimi lava e tasi, tatou te fefefe i le filifilia o tatou. Tatou te fefefe i le le lava o lo tatou lelei; tatou te fefefe ona ua leai ni faamanuiaga a le Alii mo i tatou. Tatou te fefefe i suiga, ma e mafai ona oo atu lo tatou fefefe i le atuatuvale. Ua ou faaaofiaina ea mea uma tatou te fefefe ai?
Talu mai taimi anamua, ua faatapulaaina e le fefe le vaai a fanau a le Atua. Ou te fiafia lava i le tala ia Elisaia i le 2 Tupu. Na auina atu e le tupu o Suria se autau lea na “oo [atu i le] po…, ona latou sio lea o le aai.”2 O lo latou faamoemoe o le pu’e ma fasioti le perofeta o Elisaia. Tatou te faitauina:
“Ua tulai le auauna a le tagata o le Atua i le taeao lava, ua alu i fafo, faauta, o ‘au ua sio le aai ma a latou solofanua ma kariota. Ona fai mai ai lea o lana auauna ia te ia, Aue! le alii e, pe faapefea se mea tatou te fai a’i?”3
O le fefe lena na tautala.
“Ona tali atu lea o (Elisaia), Aua e te fefe: aua e toatele ua ia te i tatou i e ua ia te i latou.”4
Ae na te lei taofi ai iina.
“Ona tatalo ai lea o Elisaia, ua faapea atu, Ieova e, ia e faapupula i ona mata, ina ia na iloa. Ona faapupulaina lea e Ieova o mata o le taulealea, ona iloa ai lea e ia, faauta foi, ua tumu le mauga i solofanua ma kariota afi ua latou vagavagai ia Elisaia.”5
Atonu e i ai pe leai foi ni a tatou kariota o afi na auina mai e faate’a lo tatou fefe ma faatoilalo o tatou temoni, ae ua manino le lesona. E faatasi le Alii ma i tatou, silafia i tatou ma faamanuiaina i tatou i auala e na o Ia e mafaia. O le tatalo e mafai ona valaau mai ai i lalo le malosi ma faaaliga ia tatou te manaomia e faatotonugalemu ai o tatou mafaufauga ia Iesu Keriso ma Lana taulaga togiola. Na silafia e le Alii e i ai taimi o le a tatou lagona ai le fefe. Na ou i ai iina ma na faapena foi ma oe, o le mafuaaga lena ua tumu ai tusitusiga paia i fautuaga a le Alii:
“Ia fiafia, ma aua le fefefe.”6
“Vaai mai ia te aʼu i mafaufauga uma; aua le masalosalo, aua le fefefe.”7
Aua le matatau, le lafu mamoe itiiti e.”8 Ou te fiafia i le agavaivai o le “lafu mamoe itiiti.” I lenei Ekalesia atonu tatou te toalaiti i fuainumera i ala e faitaulia ai e le lalolagi faatosinaga, ae a tatalaina o tatou mata faaleagaga, “e toatele ua ia te i tatou i e ua ia te i latou.”9 Na faaauau lea o le fetalaiga a lo tatou Leoleo Mamoe alofa, o Iesu Keriso, “Ia tuu le lalolagi ma seoli e aufaatasi faasaga mai ia te [outou], auā afai ua [tou] atiaʼe i luga o laʼu papa, e lē mafai ona latou manumalo.”10
E faapefea ona aveese le fefe? Mo le alii talavou, sa tu o ia i autafa o Elisaia, o se perofeta a le Atua. Ua tatou maua lena lava folafolaga e tasi. Pe a tatou faalogo ia Peresitene Russell M. Nelson, pe a tatou faalogo i lana fautuaga, ua tatou tutu ma se perofeta a le Atua. Ia manatua upu a Iosefa Samita: “O lenei, ina ua uma ona faia molimau e tele e uiga ia te ia, o le molimau tupito mulimuli lenei i mau uma lava, mā te faia ia te ia: O loo soifua o ia!”11 O loo soifua Iesu Keriso. O lo tatou alolofa ia te Ia ma Lana talalelei e aveesea ai le fefe.
O lo tatou mananao ina “ia maua pea lona Agaga”12 e faatasi ma i tatou o le a faataatiaesea ai lo tatou fefefe mo se vaaiga faavavau sili atu o o tatou olaga faaletino. Na lapatai mai Peresitene Nelson, “I aso a sau, o le a le mafai ona ola ai faaleagaga e aunoa ma le taiala, taitaiga, faamafanafanaga, ma le faatosinaga mafanafana a le Agaga Paia.”13
Na fetalai mai le Alii, e faatatau i mala o le a ufitia ai le laueleele ma o le a faamaaa ai loto o le toatele, “O o’u soo o le a tutu i nofoaga paia, ma o le a le masii ese.”14
Ona sosoo ai lea ma lenei apoapoaiga paia: “Aua tou te atuatuvale, aua, a faataunuuina nei mea uma, o le a mafai ona outou iloa o le a faataunuuina folafolaga na fai atu ia te outou.”15
Tutu i nofoaga paia—aua le atuatuvale—ma o le a faataunuuina folafolaga. Sei o tatou tagai taitasi i nei mea e faatatau i lo tatou fefefe.
Muamua, tutu i nofoaga paia. A tatou tutu i nofoaga paia–o tatou aiga amiotonu, o tatou faletatalo paia, malumalu faapaiaina—tatou te lagona le faatasi o le Agaga o le Alii ma i tatou. Tatou te maua tali i fesili o loo tatou atuatuvale ai po o le filemu i le tau lava ina lafoaiese i latou. O le Agaga lena o loo galue. O nei nofoaga paia i le malo o le Atua i le lalolagi o loo valaau mai mo lo tatou migao, faaaloalo mo isi, o o tatou tagata silisili i le ola ai i le talalelei, ma o tatou faamoemoega e faataatiaese lo tatou fefe ma saili le mana faamalolo o Iesu Keriso e ala i Lana Togiola.
E leai se avanoa mo le fefe i nei nofoaga paia a le Atua po o i totonu o loto o Lana fanau. Aisea? Ona o le alofa. E alofa le Atua ia i tatou—e le aunoa—ma e tatou te alolofa ia te Ia. O lo tatou alolofa i le Atua e taofia ai le fefe, ma e faatumulia e Lona alofa nofoaga paia. Mafaufau i ai. Pe a tatou le mautonu i a tatou tautinoga i le Alii, pe a tatou se ese mai Lona ala e tau atu i le ola e faavavau, pe a tatou fesiligia pe masalosalo i lo tatou taua i Lana mamanu faalelagi, pe a tatou faataga le fefe ia tatou lagonaina le—lotovaivai, ita, le fiafia, faanoanoa—e tuua e le Agaga i tatou, ma ua tatou aunoa ma le Alii. Afai e te iloa lena ituaiga o lagona, e te iloa lava e le o se lagona lelei. I se faatusatusaga, pe a tatou tutu i nofoaga paia, e mafai ona tatou lagonaina le alofa o le Atua, ma e “lafo ese e le alofa ua atoatoa le fefe uma.”16
O le folafolaga e sosoo ai o le “Aua le atuatuvale.”17 Po o le a lava le tele o le amioleaga ma vevesiga ua faatumulia ai le lalolagi, ua folafola mai ia i tatou e ala i lo tatou faamaoni i aso taitasi ia Iesu Keriso le “[filemu] mai le Atua, o loo silisili lava i mea uma e manatu i ai.”18 Ma pe a afio mai Keriso i le mana ma le mamalu atoa, o le a muta le amioleaga, fouvale, ma faiga le tonu.
Na valoia e le Aposetolo o Paulo i aso ua tea o tatou taimi, ma fai atu i le taulealea o Timoteo:
“A e ia e iloa e oe lenei mea, o ona aso e gata ai e oo mai ai aso faigata.
“Aua e avea tagata ma e alolofa i latou ia i latou, o e mananao i tupe, o e loto vii, o e faamaualuga, o e upu leaga, o e le faalogo i matua, o e le faafetai, o e amio leaga, …
“… o e ua tele le manao i mea faafiafia a e leai se manao i le Atua.”19
Ia manatua, “e toatele ua ia te i tatou” i itu uma o le veli, i latou o e alolofa i le Alii ma o latou loto, mafaufau, manatu, ma le malosi atoa, “i e ua ia te i latou.”20 Afai tatou te faalagolago atoatoa i le Alii ma Ona ala, afai tatou te punouai i Lana galuega, o le a tatou le fefefe i faiga a le lalolagi pe atuatuvale ai foi. Ou te augani atu ia te outou ia tuuese faatosinaga ma uunaiga faalelalolagi ma saili le faaleagaga i lou olaga i aso taitasi. Fiafia i mea e fiafia i ai le Alii—lea e aofia ai Ana poloaiga, Lona maota paia, a tatou feagaiga paia ma Ia, o le faamanatuga i aso Sapati taitasi, o a tatou fesootaiga e ala atu i le tatalo—ma o le a e le atuatuvale ai lava.
O le manatu mulimuli: faalagolago i le Alii ma Ana folafolaga. Ou te iloa o le a faataunuuina uma Ana folafolaga. Ou te iloa ma le mausali e pei ona ou tu atu iinei i o outou luma i lenei sauniga paia.
Ua faaalia mai e le Alii: “Aua o i latou o e e popoto ma ua latou talia le upumoni, ma ua latou ave le Agaga Paia mo o latou taiala, ma sa lei faaseseina—e moni Ou te fai atu ia te outou, o le a lē tatuuina i latou i lalo ma lafo i le afi, ae o le a latou gafatia le aso.”21
O le mafuaaga lenei e le tatau ai ona tatou atuatuvale i vevesi o nei aso, ia i latou o i le fale tele ma le ateatea, ia i latou o e tauemu i taumafaiga faamaoni ma auaunaga tuuto i le Alii o Iesu Keriso. O le manatu lelei, lototele, e oo lava i le alofa mama e sau mai le loto e le mamafa i ni faafitauli po o faalavelave. O Peresitene Nelson, o lē “manatu o le a lelei mea uma i le lumanai,” na faamanatu mai ia i tatou, “Afai e ao ona tatou maua se faamoemoe o le suesueina o le tele o manatu ma filosofia a tagata ia e osofaia le upumoni, e tatau ona tatou aoao e maua ia faaaliga.”22
Ina ia maua se faaaliga patino, e tatau ona tatou tuu le faamuamua i le ola ai i le talalelei ma uunaia le faamaoni ma le faaleagaga i isi faapea ma i tatou foi.
O Spencer W. Kimball sa avea ma se tasi o perofeta i lo’u talavou. I nai tausaga nei ua mavae, ina ua uma ona valaauina o se Aposetolo, sa ou maua le filemu i lana savali muamua i le konafesi aoao ia Oketopa 1943. Sa lofituina o ia i lona valaauga; ou te iloa lena ituaiga lagona. Na saunoa Elder Kimball: “Sa ou mafaufau tele ma tatalo, ma anapogi ma tatalo. Sa i ai ni mafaufauga feteenai na osofaia lo’u mafaufau—o leo na foliga o fai mai: ‘E le mafai ona e faia le galuega. E te le agavaa. E le o i ai sou tomai’—ma e masani ona faaiu i se manatu manumalo: ‘E tatau ona e faia le galuega ua atofaina—e tatau ona e faia oe lava ia mafai, agavaa, ma faaagavaaina.’ Ma na faaauau ai pea le fetauaiga.”23
Ua faamalosia a’u mai lena molimau mama a’ia’i a lenei Aposetolo lea na avea ma Peresitene lona 12 o lenei Ekalesia malosi. Na ia iloaina na tatau ona ia le amanaiaina lona fefe ina ia “faia le galuega ua atofaina atu” ma ua tatau ona ia faalagolago i le Alii mo le malosi ina ia “mafai ai, agavaa ma faaagavaaina” o ia lava. Tatou te mafaia foi. O le a faaauau pea ia taua, ae o le a tatou taulimaina i latou i le Agaga o le Alii. O le a tatou “le atuatuvale” aua a tatou tutu ma le Alii ma tutu atu mo Ana mataupu faavae ma Lana fuafuaga e faavavau, ua tatou tutu i laueleele paia.
Ia, ae a la lena afafine ma le atalii faaletulafono o e na tuuina mai se fesili faamaoni, vailiili ma taufaafefe i tausaga ua mavae? Sa la mafaufau mamafa lava i le matou talanoaga i lena po; sa la tatalo ma anapopogi ma oo ai i sa la’ua lava faaiuga. O le fiafia ma le olioli mo i la’ua ma mo i ma’ua, o matua matutua, ua faamanuiaina ai nei i la’ua i ni fanau aulelei e toafitu a o la agai atu i luma ma le faatuatua ma le alofa.
Ia faamalosi, uso e ma tuafafine. Ioe, ua tatou ola i taimi faigata, ae pe a tatou tumau ai i luga o le ala o feagaiga, e le tatau ona tatou fefefe. Ou te faamanuiaina outou a o outou faia, o le a outou le atuatuvale i taimi ua tatou ola ai po o faafitauli e oo mai ia te outou. Ou te faamanuiaina outou ina ia filifili e tutu i nofoaga paia ma ia le masii ese. Ou te faamanuiaina outou ina ia talitonu i folafolaga a Iesu Keriso, o loo soifua o Ia, ma o loo Ia vaavaaia i tatou, popole mo i tatou, ma tu i o tatou autafa. I le suafa o lo tatou Alii ma le Faaola, o Iesu Keriso, amene.