O Le Olioli o Auaunaga Lē Manatu Faapito
Ua tatou folafola atu i lo tatou Tama o i le Lagi o le a tatou auauna atu ia te Ia ma isi i le alofa ma faia Lona finagalo i mea uma.
Ina ua mavae le konafesi aoao talu ai, e toatele tagata na o mai ia te a’u ma le fesili lava e tasi: “E toafimalie na nofoa?” Na tutusa lava la’u tali i taimi uma: “E matuai toafimalie lava na nofoa pe afai e te lē lauga.” E sa’o, a ea? E le’i toafimalie lo’u nofoa i lenei konafesi, ae ou te matuai faafetai mo le faamanuiaga ma le avanoa e lauga atu ai ia te outou i lenei afiafi.
O nisi taimi a o tatou auauna atu, tatou te nonofo i ni nofoa eseese. O nisi e matuai toafimalie lava a o nisi e leai, ae ua tatou folafola atu i lo Tama o i le Lagi o le a tatou auauna atu ia te Ia ma isi i le alofa ma faia Lona finagalo i mea uma.
I nai tausaga ua mavae, na aoao ai le autalavou i le Ekalesia e faapea “[a e alu] atu i le galuega a le Atua’ [Mataupu Faavae ma Feagaiga 4:2], ua e auai i le faigamalaga sili ona maoae. Ua e fesoasoani i le Atua e faanatinati Lana galuega, ma o se aafiaga maoae, fiafia, ma le ofoofogia.”1 O se faigamalaga o loo avanoa mo tagata uma—o soo se vaitausaga—ma o se faigamalaga foi e avatua i tatou i le mea na saunoa mai ai lo tatou perofeta pele “o le ala o feagaiga.”2
Peitai, o le mea e leaga ai, o loo tatou ola i se lalolagi manatu faapito lea e fesili soo mai ai tagata, “O le a se mea o i ai mo a’u?” nai lo le fesili, “O ai e mafai ona ou fesoasoani i ai i le asō?” po o le “E mafai faapefea ona ou auauna atili i le Alii i lo’u valaauga?” po o le “O o’u tuuina atu ea a’u mea uma i le Alii?”
O se faataitaiga sili i lo’u olaga o le auaunaga lē manatu faapito a Sister Victoria Antonietti. O Victoria sa avea ma se tasi o faiaoga Peraimeri i la’u paranesi a o o’u tuputupu a’e i Atenitina. O aoauli uma o Aso Lua, pe a matou potopoto mo le Peraimeri, na te aumaia mo i matou se keke sukalati. E fiafia tamaiti uma i le keke—ia, o tamaiti uma vagana ai a’u. Ou te lē fiafia i keke sukalati! Ma e ui foi na te taumafai e faasoa mai le keke ia te a’u, ou te teena lava lana ofa.
I se tasi aso ina ua uma ona ia faasoa mai le keke sukalati i tamaiti uma, sa ou fesili ia te ia, “Aisea e te lē aumaia ai se isi ituaiga—e pei o le moli po o le vanila?”
Ina ua mavae sina ‘ata itiiti, sa ia fesili mai ia te a’u, “Aisea e te lē taumafai ai e tofo sina fasi keke? E faapitoa mea o loo fai ai lenei keke, ma ou te folafola atu a e faataitai ona tofo i ai, o le a e fiafia i ai!”
Sa ou tilotilo solo, ma i lo’u te’i, na foliga mai o loo fiafia tamaiti uma i le keke. Sa ou ioe e faataitai ona tofo i ai. E te mate la o le a le mea na tupu? Na ou fiafia i ai! O le taimi muamua lena na ou fiafia ai i se keke sukalati.
Faatoa ou iloa i le tele o tausaga mulimuli ane le elemene faalilolilo lea sa i ai i totonu o le keke sukalati a Sister Antonietti. Matou te asiasi ma la’u fanau i lo’u tina i vaiaso taitasi. I se tasi o nei asiasiga, sa ma aai fiafia ai ma tina i se fasi keke sukalati, ma sa ou faamatalaina ia te ia le ala na ou fiafia ai i le keke mo le taimi muamua. Ona ia faamalamalama mai lea ia te a’u le vaega na totoe o le tala.
“E te iloa, Cris,” o le tala lea a lo’u tina, “Sa le’i tele ni mea a Victoria ma lona aiga, ma o vaiaso taitasi na te filifili ai i le va o le totogiina o le pasi e ave ai o ia ma lana fanau e toafa i le Peraimeri po o le faatauina o mea e faia ai le keke sukalati mo lana vasega Peraimeri. Na te filifilia lava i taimi uma le keke sukalati nai lo le pasi, ma sa latou savavali ma lana fanau i le silia ma le lua maila (3km) i le alu ma [le isi lua maila] le sau, po o le a lava le tulaga o le tau.”
O lena aso sa ou maua ai se lagona talisapaia sili atu mo lana keke sukalati. O le mea e taua atu, sa ou aoaoina o le elemene faalilolilo i le keke a Victoria o le alofa sa ia te ia mo i latou sa ia auauna atu i ai ma lana taulaga lē manatu faapito mo i matou.
O le toe mafaufau i tua i le keke a Victoria ua fesoasoani ia te a’u e manatua se taulaga lē manatu faapito i lesona taua na aoaoina e le Alii i Ona soo a o Ia savali atu i le mea e teu ai tupe o le malumalu. Ua tou silafia le tala. Na aoao mai e Elder James E. Talmage faapea e 13 pusa, “ma i nei pusa na lafo i ai e tagata a latou foai mo faamoemoega (eseese) na faailoga i tusiga i luga o pusa.” Na silasila atu Iesu i laina a tagata foai, na eseese uma lava ituaiga tagata. O nisi na tuuina mai a latou meaalofa ma le “faamoemoega moni” a o isi na lafo i totonu “le tele o ario ma auro,” ma le faamoemoe ina ia vaaia, iloaina, ma viia ai mo a latou foai.
“Na filo ai i totonu o le toatele se fafine mativa ua oti lana tane, o le na … lafo i totonu o se tasi o pusa tupe o tupe iti e lua; o lana foai e itiiti ifo ma le afa sene i tupe Amerika. Ona fetalai atu lea o le Alii i Ona soo, ua faasino atu a latou taulaiga i le fafine mativa ua oti lana tane ma lana galuega, ma fetalai atu: ‘E moni, ou te fai atu ia te outou, o mea a lena fafine mativa ua oti lana tane, ua lafo i le mea e teu ai tupe, ua sili ia i a latou uma na lafo i ai; aua o i latou uma, ua latou lafo nisi mea mai a latou mea ua tele; a o ia ua mativa ua ia lafo ana mea uma sa ia te ia, o ana mea uma e ola ai’ [Mareko 12:43–44].”3
Na foliga mai sa le’i umia e lenei fafine ua oti lana tane se tofiga lauiloa i le malo i lona taimi. Sa ia umia moni lava se mea na sili atu ona taua: sa mamā ona faamoemoega, ma sa ia foai atu mea uma sa ia te ia. Atonu sa itiiti atu mea sa ia foai nai lo isi, sili atu ona lē amana’iaina nai lo isi, ma ese atu nai lo isi. I le vaai a nisi, o mea sa ia foai atu sa lē taua, ae i fofoga o le Faaola, o le “faamasino foi i manatu ma filifiliga o le loto,”4 sa ia foai atu ana mea uma.
Uso e, o tatou foai atu ea a tatou mea uma e aunoa ma le faatali? O tatou ositaulagaina ea o tatou taimi ma taleni ina ia mafai ona aoao ai le tupulaga faiae ia alolofa i le Alii ma tausi Ana poloaiga? O tatou auauna atu ea ia i latou uma o siomiaina i tatou ma i latou ua tofia i ai tatou ia tausia ma le maelega—ositaulagaina o le taimi ma le malosi lea e mafai ona faaaoga i nisi auala? O tatou ola ea i poloaiga sili e lua—ia alofa atu i le Atua ma alofa atu i Ana fanau?5 O lena alofa e tele ina faaalia i se auaunaga.
Na aoao mai Peresitene Dallin H. Oaks: “Sa tuuina mai e le Faaola Ia lava i se auaunaga lē manatu faapito. Sa Ia aoao mai e tatau ia i tatou taitoatasi ona mulimuli atu ia te Ia e ala i le faafitia o i tatou lava mai mea e naunau i ai ma le faaloloto ina ia auauna atu ai i isi.”
Na ia faaauau:
“O se faataitaiga masani o le lafo atu o i tatou lava i le auaunaga mo isi … o le osigataulaga e faia e matua mo a latou fanau. E mafatia tina i le tiga ma le ma’umauina o mea faamuamua ma le mafanafana e patino ia te ia lava ina ia fanauina ma tausia fanau taitasi. E fetuunai e tamā o latou olaga ma mea e faamuamua ina ia lagolagoina se aiga. …
“… Tatou te olioli foi ia i latou o e tausia ni tagata o aiga e le atoatoa le malosi ma matua matutua. E leai ma se tasi o nei auaunaga e fesili mai, po o le a sa’u mea e maua ai? E manaomia e auaunaga uma le faataatia ese o le toafimalie o le tagata lava ia mo auaunaga lē manatu faapito. …
“[Ma] o nei mea uma ua faapupula mai ai le mataupu faavae e faavavau, e sili atu lo tatou fiafia ma sili atu le loto malie, pe a tatou galulue ma auauna atu i mea tatou te foai atu, ae le mo mea tatou te maua.
“Ua aoaoina i tatou e lo tatou Faaola ina ia mulimuli ia te Ia e ala i le faia o osigataulaga e tatau ai ina ia lafo atu i tatou lava i auaunaga lē manatu faapito mo isi.”6
Na faapena foi ona aoao mai Peresitene Thomas S. Monson e faapea “atonu pe a tatou faafesagai ma lo tatou Foafoa, o le a lē fesiligia i tatou, ‘Pe fia ni tofiga na e umia?’ ae, ‘E toa fia ni tagata na e fesoasoani i ai?’ O le mea moni, e le mafai lava ona e alofa i le Alii seiloga e te auauna atu ia te Ia e ala i le auauna atu i Ona tagata.”7
I nisi upu, uso e, o le a le afaina pe afai o tatou saofafai i nofoa toafimalie pe o tatou tauivi ia faauma se fonotaga i se nofoa faamoe elea i le laina pito i tua. O le a le afaina lava pe afai e manaomia ona tatou laa i totonu o se faapaologa e faanā se pepe o tagi. O le mea o le a taua e faapea, na tatou o mai ma se manao ia auauna atu, na tatou matauina i latou o tatou auauna i ai ma faafeiloai fiafia i latou, ma na tatou faailoa atu i tatou lava ia i latou o tatou nonofo faatasi i atulaina o nofoa faamoe—ma aapa atu ma faauo i ai e ui sa le’i tofiaina i tatou e auauna atu ia i latou. Ma o le a mautinoa e taua lo tatou faia o mea uma o loo tatou faia i le elemene faapitoa o le auaunaga e vaavaalua ma le alofa ma le ositaulaga.
Ua ou iloaina tatou te lē tau faia se keke sukalati e avea ai ma se faiaoga manuia pe tuuto o le Peraimeri, aua sa lei faatatau i le keke. O le alofa na i tua atu o le faatinoga.
Ou te molimau atu o le alofa e faapaiaina e ala i le ositaulaga—le ositaulaga a se faiaoga ma nisi mea sili atu e ala i le taulaga silisili ma faavavau a le Alo o le Atua. Ou te molimau atu o loo soifua o Ia! Ou te alofa ia te Ia ma manao ia tuuese manaoga manatu faapitoa ina ia alofa ma auauna atu ai e pei ona Ia faia. I le suafa, o Iesu Keriso, amene.