Avea ma se Leoleo Mamoe
Ou te faamoemoe o i latou e te auauna atu i ai o le a vaai ia te oe o se uo ma iloaina, o totonu ia te oe, ua i ai se latou siamupini, ma se tasi latou te talanoa i ai.
I le tausaga talu ai, sa aumaia ai e se tamaitiiti Peraimeri sa ou feiloai i ai i Chile se ‘ata’ata i o’u foliga. “Talofa,” na ia fai mai ai, “O a’u o Tavita. E mafai ona e talanoa e uiga ia te a’u i le konafesi aoao?”
I taimi lē leoa, ou te mafaufau ai i le faafeiloai e le’i mafaufauina a Tavita. Tatou te mananao uma lava ina ia iloaina. Tatou te mananao ina ia faatāuaina, ina ia manatuaina, ma ia lagonaina le alofagia.
Uso e ma tuagane, e taua outou taitoatasi. E tusa pe lē talanoaina oe i le konafesi aoao, e silafia oe ma alofagia oe e le Faaola. Afai o e mafaufau pe moni lena mea, tau lava o lou mafaufau ua Ia “togitogia [oe] i luga o [Ona] alofilima.”1
I le iloaina e alofa le Faaola ia i tatou, atonu tatou te mafaufau, pe mafai faapefea ona sili atu lo tatou faaali atu o lo tatou alolofa mo Ia.
Na fesili le Faaola ia Peteru, “Pe e te alofa mai ia te au … ?”
Sa tali Peteru, “Ioe, le Alii e, ua e silafia ou te alofa ia te oe. Ona fetalai atu lea o ia ia te ia, Ia e fafaga i au tamai mamoe.”
Ina ua fesiligia faalua ma faatolu lenei fesili “Pe e te alofa mai ia te au?” Na faanoanoa Peteru, peitai na faamautu atu lona alofa: “Le Alii e, ua e silafia, ou te alofa ia te oe. Ona fetalai atu lea o Iesu ia te ia, Ia e fafaga i a’u mamoe.”2
Pe le’i faamaonia ea e Peteru o ia lava o se [tasi] e mulimuli ma le alofa ia Keriso? Mai le latou feiloaiga muamua i luga o le matafaga, sa ia tuua “loa lea” o lana upega ae mulimuli atu i le Faaola.3 Na avea Peteru ma faifaiva moni i tagata. Sa ia malaga faatasi ma le Faaola i Lana galuega patino ma fesoasoani e aoao isi i le talalelei a Iesu Keriso.
Ae ua silafia nei e le Alii toetu e lē toe i ai o Ia i autafa o Peteru, e faaali atu ia te ia le auala ma po o afea e tatau ai ona ia auauna atu. I le toesea ai o le Faaola, o le a manaomia e Peteru ona saili le taitaiga mai le Agaga, maua e ia lava faaaliga, ona maua lea o le faatuatua ma le lototele e galue ai. I le taulai atu i Ana mamoe, sa finagalo le Faaola ia faia e Peteru le mea Na te faia pe ana i ai o Ia iina. Sa Ia fai atu ia Peteru ia avea ma se leoleo mamoe.
Ia Aperila ua tuanai atu, sa tuuina mai e Peresitene Russell M. Nelson se valaaulia e talitutusa ia i tatou ina ia fafaga mamoe a le Tama i se auala paia atu ma ia faia lea e ala i le auaunaga.4
Ina ia mataalia le taliaina o lenei valaaulia, e tatau ona tatou atiae se loto a se leoleo mamoe ma malamalama i manaoga o mamoe a le Alii. E faapefea ona tatou avea ma leoleo mamoe lea e manaomia e le Alii ona tatou avea ai?
E pei lava o fesili uma, e mafai ona tatou vaai atu i lo tatou Faaola, o Iesu Keriso—le Leoleo Mamoe Lelei. Sa iloaina ma faitauina mamoe a le Faaola, sa vaavaaia i latou, sa faapotopoto i latou i totonu o le lafu o le Atua.
Iloaina ma Faitauina
Ao tatou tauivi e mulimuli i le faataitaiga a le Faaola, muamua, e tatau ona tatou muamua iloaina ma faitauina Ana mamoe. Ua faapatinoina le tofiaina o i tatou i tagata taitoatasi ma aiga ina ia vaavaaia ina ia tatou mautinoa o lafu uma a le Alii e manatuaina ma e leai se tasi e faagaloina. Ae peitai, o le faitauina, e le o faatatau i fuainumera; e faatatau i le faamautinoaina ua lagona e tagata taitoatasi le alofaina e le Faaola e ala i se tasi o loo auauna atu mo Ia. I lena auala, e mafai ai e tagata uma ona iloaina ua silafia i latou e se Tama oi le Lagi agaalofa.
Sa ou feiloai talu ai nei i se tamaitai talavou o lē sa tofia e auauna atu i se uso toeitiiti faalimaina lona matua. Faatasi ai, sa la iloaina e ia i laua uma se fiafia mo le musika. Pe a asiasi atu lenei tamaitai talavou, la te usuina faatasi pese, ma faasoa mea la te fiafia i ai. La te fatufatua’i se faigauo lea e faamanuia uma ai o laua olaga.
Ou te faamoemoe o i latou e te auauna atu i ai o le a vaai ia te oe o se uo ma iloaina, o totonu ia te oe, ua i ai se latou siamupini, ma se tasi latou te talanoa i ai—se tasi e nofouta i o latou tulaga ma lagolagoina i latou i o latou faamoemoega ma sini.
Talu ai nei, sa ou maua ai se tofiga e auauna atu i se uso e lē masani lelei i ai la’u soa ma a’u. Ao ou fefautuaai faatasi ma Jess, lo’u uso o auaunaga e 16 tausaga le matua, sa ia fautua mai ma le atamai, “E manaomia ona ta iloaina o ia.”
Sa vave loa ona ma filifili o se selfie ma se tesi faalauiloa sa tatau ona faagasolo. Sa ou uuina le telefoni, ma sa oomi e Jess le ki e pu’e ai le ata. O le ma avanoa muamua e auauna atu ai sa o se taumafaiga faalesoa.
I le ma asiasiga muamua, sa ma fesili ai i lo ma uso pe sa i ai se mea e mafai ona ma faaaofia i ā maua tatalo mo ia. Sa ia faasoaina mai se luitau patino ma fai mai na te taliaina ā maua tatalo. O lona faamaoni ma le talitonuga na aumaia ai se sootaga vave o le alofa. Oka se faamanuiaga matagofie o le manatuaina o ia i a’u tatalo i aso uma.
Ao e tatalo, o le a e lagonaina le alofa o Iesu Keriso mo i latou e te auauna i ai. Faasoa atu lena alofa ma i latou. O le a le auala sili e fafaga ai Ana mamoe nai lo le fesoasoani ia latou lagona Lona alofa—e ala ia te oe?
Leoleo i Luga [o i Latou]
O se auala lona lua e atiina ae ai le loto o le leoleo mamoe o le leoleo lea i luga o Ana mamoe. I le avea ai ma tagata O Le Ekalesia a Iesu Keriso o le Au Paia o Aso e Gata Ai, e mafai ona tatou gaoioi, faasa’o, faaleleia, ma toe fausia toetoe lava o so’o se mea. E vave ona tatou taulimaina se manaoga ma se lima fesoasoani po o se ipu kuki. Ae o i ai nisi mea?
O silafia e a tatou mamoe o loo tatou leoleo i luga o i latou ma le alofa ma o le a tatou galulue e fesoasoani atu?
I le Mataio 25 tatou te faitau ai:
“O mai ia, o outou ua faamanuiaina e lo’u Tama, ia fai mo outou tofi le malo ua saunia mo outou … :
“Aua na ou fia ‘ai ona outou avane ai lea ni mea ou te ‘ai ai; na ou fia inu, ona outou avane ai lea ni vai ou te inu ai, sa fai a’u ma tagata ese, ona outou talia lea o a’u: …
“Ona tali mai ai lea ia te ia o e amiotonu, e faapea mai, Le Alii e, o anafea ua matou iloa ai oe ua fia ai ma matou fagaina oe? po o fia inu, ma matou avane e te inu ai?
“O anafea foi na matou iloa ai oe o le tagata ese, ma matou talia oe?”5
Uso e ma tuagane, o le upu sili ona taua o le iloa. Sa iloaina e ē amiotonu i latou na manaomia le fesoasoani aua sa latou leoleo ma matauina. E mafai foi ona tatou mataala ina ia fesoasoani ma faamafanafana, ina ia faamanatu ma vaai gafatia o isi. Ma a o tatou galulue, e mafai ona faamautinoaina i tatou i le folafolaga i le Mataio: “Auā na faia e outou i le tasi o e aupito itiiti o o’u uso nei … , o a’u lea na outou faia i ai.”6
O se uo—o le a tatou faaigoa ia Ioane—sa faasoa mai le mea e mafai ona tupu pe a vaaia se manaoga tau le iloa a se tasi: “Sa taumafai se tuafafine i la’u uarota e pule i lona ola. I le mavae ai o le lua masina, sa ou iloaina e leai se tasi o la’u korama na alu atu i lona toalua e talanoa i lenei mea matautia na tupu. O le mea e faanoanoa ai, ou te le’i faatinoa foi. Mulimuli ane, na ou talosagaina le tane mo se ‘aiga o le aoauli. O ia o se alii e matamuli, e masani ona filemu. Ae peitai ina ua ou fai atu, ‘Sa taumafai lou toalua e pule i le ola. O se mea lofituina lea mea mo oe. E te fia talanoa e uiga i ai?’ sa ia tagi masūsū. Sa ma maua se talanoaga alofa ma mafanafana ma atiaeina se vavalalata ofoofogia ma le faatuatuaina i totonu o nai minute.”
Na faaopoopo mai Ioane, “Ou te manatu o la matou naunautaiga e tau lava o le aumaia o kuki enaena, nai lo le mafaufau pe faapefea ona taulimaina lena taimi ma le faamaoni ma le alofa.”7
Atonu o loo tiga, leiloloa, faapea foi ona sē ese ma le loto i ai a tatou mamoe; i le avea ai o ni leoleo mamoe, e mafai ona tatou lotolotoi ai i tagata e muamua ona vaai i o latou manaoga. E mafai ona tatou faalogo ma alofa atu e aunoa ma le faamasino atu ma ofa atu le faamoemoe ma le fesoasoani faatasi ai ma le taitaiga iloatino a le Agaga Paia.
Uso e ma tuagane, ua sili atu ona faatumulia le lalolagi i le faamoemoe ma le olioli ona o galuega musuia o le agalelei o loo outou faatinoina. Ao outou sailia le taitaiga a le Alii i le auala e faailoa atu ai Lona alofa ma vaai i manaoga o i latou e te auauna atu i ai, o le a matala o outou mata. E tuuina atu e lau tofiga paia o le auaunaga ia te oe le aia tatau faalelagi i musumusuga. E mafai ona e sailia lena musumusuga ma le mautinoa.
Faapotopoto i totonu o le Lafu a le Atua
Tolu, tatou te mananao ina ia faapotopoto mai a tatou mamoe i totonu o le lafu a le Atua. O le faia o lenei mea, e tatau ona tatou mafaufau po o fea o latou i ai i le ala o feagaiga ma ia naunau e savavali faatasi ma i latou i le latou faigamalaga o le faatuatua. O loo ia i tatou se avanoa paia ina ia iloaina o latou lagona ma taitai i latou i le latou Faaola.
Sa faigata ia Sister Josivini i Fiti ona vaaia lona agai i luma i luga o le ala o feagaiga—e moni lava. Sa vaaia e lana uo le tauivi o Josivini ia iloa lelei ia tusitusiga paia ina ia faitau ai. Sa ia saunia mo Josivini se matatioata fou e faitau ai ma se peni samasama sesega e maka ai le ta’uaina o Iesu Keriso i le Tusi a Mamona. O le mea na amataina o se manao faigofie e auauna atu ma fesoasoani i le suesueina o tusitusiga paia na mafua ai ona auai Josivini i le malumalu mo le ulua’i taimi 28 tausaga talu ona papatiso o ia.
Pe malolosi pe vaivai a tatou mamoe, fiafia pe mafatia, e mafai ona tatou mautinoa e leai se tasi e lagona le tuuatoatasi. E mafai ona tatou alolofa ia i latou po o fea lava o latou i ai faaleagaga ma ofa atu le lagolago ma le faamalosiauga mo leisi laasaga i luma. Ao tatou tatalo ma saili ina ia malamalama i o latou loto, ou te molimau atu o le a taitaia i tatou e le Tama Faalelagi ma o le a faatasi mai Lona Agaga mai tatou. Ua ia i tatou le avanoa e avea ai ma “‘au agelu e si’o faataamilo i latou ao ia muamua atu ia i latou.8
Ua valaaulia i tatou e le Alii ina ia fafaga i Ana mamoe, ma ia tausia Ana lafu e pei ona Ia faia. Ua Ia valaaulia i tatou ina ia avea ma leoleo mamoe i malo uma, i atunuu uma. (Ma ioe, Elder Uchtdorf, matou te alolofa ma manaomia leoleo mamoe Siamani.) Ma ua Ia finagalo i Ana tagata talavou e auai faatasi i le galuega.
E mafai ona avea a tatou talavou ma nisi o a tatou leoleo mamoe malolosi. O i latou, e pei ona saunoa mai Peresitene Russell M. Nelson, “o tagata sili ona lelei ua auina mai e le Alii i lenei lalolagi.” O i latou o ni “agaga tamalii,” o a tatou “tagata taaalo sili ona lelei” o ē mulimuli i le Faaola.9 E mafai ona outou vaai faalemafaufau i le mana e aumaia e leoleo mamoe faapena a o latou tausia Ana mamoe? O le auauna atu faatasi ma nei talavou, tatou te vaaia ai mea ofoofogia.
Tamaitai talavou ma alii talavou, matou te manaomia outou! Afai e lē o i ai sau tofiga o le auaunaga, talanoa i lau peresitene o le Aualofa po o le korama a toeaina. O le a latou fiafia i lou naunautai ina ia mautinoa o loo iloaina ma faitauina Ana mamoe, leoleo, ma faapotopoto mai i totonu o le lafu a le Atua.
A oo mai le aso tatou te tootutuli ai i aao a lo tatou Faaola pele, ua faafaileleina Lana lafu, ou te tatalo ina ia mafai ona tatou tali atu e pei o Peteru: “Ioe, le Alii e, ua e silafia, ou te alofa ia te oe.”10 O Au mamoe nei, ua alofagia i latou, ua saogalemu i latou, ma ua latou i ai i le aiga. I le suafa, o Iesu Keriso, amene.