O Le Faaaliga o le Togiolaina o Ē ua Maliliu
Ou te molimau atu o le faaaliga na maua e Peresitene Iosefa F. Samita e moni. Ou te molimau atu e mafai e tagata uma ona iloa e moni.
O’u uso e ma tuafafine, sa saunia la’u lauga i se taimi a o le’i maliu si o’u toalua pele o Barbara. Matou te faafetai tele lava ma lo’u aiga mo lo outou alolofa ma le tou aapa mai ma le agalelei. Ou te tatalo ia faamanuia a’u e le Alii a o o’u talanoa atu ia te outou i lenei taeao.
Ia Oketopa 1918, 100 tausaga talu ai, sa maua ai e Peresitene Iosefa F. Samita se faaaliga mamalu. I le mavae ai toetoe 65 tausaga o le auaunaga tuuto i le Alii i le Ekalesia a Iesu Keriso o le Au Paia o Aso e Gata Ai, ma toe o nai vaiaso ae maliu o ia i le aso 19 o Novema, 1918, sa ia nofonofo ai i lona potu ma mafaufau loloto i le taulaga togiola a Keriso ma faitauina le faamatalaga a le Aposetolo o Peteru e uiga i le galuega a le Faaola i le lalolagi o agaga ina ua mavae Lona Faasatauroga.
Na ia tusia: “Ao ou faitau sa matuai faagaeetia a’u. … Aʼo ʼou mafaufau loloto i luga o nei mea … , sa tatalaina mata o loʼu malamalama, ma sa toʼa i oʼu luga le Agaga o le Alii, ma sa ʼou vaai i ʼau o e ua oti.”1 O le anotusi atoa o le faaaliga o loo faamaumauina i le Mataupu Faavae ma Feagaiga vaega 138.
Se’i o’u tuuina atu sina talaaga ina ia talisapaia atoatoa atili le olaga o sauniuniga a Iosefa F. ina ia maua lenei faaaliga ofoofogia.
Ina ua avea o ia ma Peresitene o le Ekalesia, sa asia ai Navu i le 1906 ma mafaufau i se manatuaga na ia maua ina ua lima ona tausaga. Sa ia saunoa: “O le vaega tonu lenei sa ou tu ai ina ua ui mai [Iosefa, le uso o lo’u tama, ma lo’u tama, o Ailama] e o atu ai i Karefasi. E aunoa ma le oso ese mai lana solofanua sa punou mai ai lo’u tama mai le nofoa o le solofanua ma sii atu a’u i luga mai le palapala. Sa ia sogi faatofa mai ia te a’u ma toe tuu a’u i lalo ma ou matamata atu a o ia tietie ese atu.”2
O le isi taimi na sosoo ai na toe vaai ai Iosefa F. ia i la’ua, o le taimi na sii ai o ia i luga e lona tina, o Mary Filitia Samita, e vaai i tino maliufasia o taooto faatasi i le mavae o le fasiotiga faamaturo i le Falepuipui i Karefasi i le aso 27 o Iuni, 1844.
Lua tausaga mulimuli ane, na tuua ai e Iosefa F., faatasi ma lona aiga ma lona tina faatuatua, o Mary Filitia Samita lona aiga i Navu mo Uinita Kuota. E ui sa le’i atoa le 8 tausaga le matua, ae sa manaomia Iosefa F. e ave se tasi o vaega o manu mai Montrose, Iowa, i Uinita Kuota ma mulimuli ane i le Vanu o Sate Leki, ma taunuu ai i le toeitiiti atoa lona 10 tausaga. Ou te faamoemoe o loo faalogo mai outou tamaiti ma alii talavou ma o le a iloaina le tiutetauave ma le faamoemoega na tuu i luga o Iosefa F. i le taimi o lona tamaitiiti.
I le na o le fa tausaga mulimuli ane, i le 1852, ina ua 13 ona tausaga, sa maliu ai lona tina pele—ma tuua ai Iosefa ma ona tei o ni matuaoti.3
Sa valaauina Iosefa F. e auauna atu i se misiona i Atumotu o Hawaii i le 1854 a o 15 ona tausaga. O lenei misiona, lea na sili atu ma le tolu tausaga le umi, sa amatalia ai se olaga o auaunaga i totonu o le Ekalesia.
I lona taunuu atu i Iuta, sa faaipoipo ai loa Iosefa F. i le 1859.4 Mo isi tausaga na sosoo ai, sa faatumulia ai lona olaga i galuega, tiute faaleaiga, ma ni misiona faaopoopo se lua. I le aso 1 o Iulai, 1866, i le 27 o tausaga, sa matua suia ai e faavavau e Iosefa F. lona olaga ina ua faauuina o ia o se Aposetolo e Polika Iaga. Ia Oketopa o le tausaga na sosoo ai, sa ia faatumuina ai se avanoa i le Aufono a le Toasefululua.5 Sa ia auauna atu o se fesoasoani ia Polika Iaga, Ioane Teila, Uilifoti Uitilafi, ma Lorenisio Senoa a o le’i avea o ia lava ma Peresitene i le 1901.6
Sa faafeiloai e Iosefa F. ma lona faletua o Julina le la ulumatua, o Mercy Josephine, i le aiga.7 Sa na o le lua ma le afa ona tausaga ae maliu o ia. Sa le’i pine ae tusia e Iosefa F. e faapea, “Ua tasi nei le masina ananafi talu ona maliu la’u … pele ia Josephine. E! ma’i mau pe a na mafai ona ou laveai o ia e ola ae e avea ma tamaitai matua. Ua ou misia lava o ia i aso uma ma ua tuua na o a’u. … Ia faamagalo o’u vaivaiga e le Atua pe afai e sese le alofa atu i a’u fanau iti e pei ona ou alofa ai ia i latou.”8
I le soifuaga atoa o Peresitene Samita sa maliu ai lona tama, lona tina, tasi le uso, lua tuafafine, lua avā, ma le fanau e toa sefulutolu. Sa masani lelei o ia ma faanoanoaga ma le maliliu o ē pele.
Ina ua maliu lona atalii o Albert Jesse, sa tusi atu ai Iosefa F. i lona tuafafine o Martha Ann e faapea sa ia aioi atu i le Alii e laveai o ia ma fesili ai, “Aisea lava ua faapea ai? E, le Atua e, aisea ea ua faapea ai?”9
E ui i ana tatalo i lena taimi, ae sa le’i maua e Iosefa F. se tali i lenei mataupu.10 Sa ia ta’u atu ia Martha Ann e faapea “[e foliga mai e pei] le lagi o se apamemea ua ufitia ai o matou ulu” i le mataupu o le oti ma le lalolagi o agaga. Ae ui i lea, o lona faatuatua i folafolaga e faavavau a le Alii sa tumau ma mausali.
I le taimi tatau ai a le Alii, o tali faaopoopo, mafanafana, ma le malamalama e uiga i le lalolagi o agaga sa sailia e Peresitene Samita na oo mai ia te ia e ala i le faaaliga ofoofogia na ia maua ia Oketopa 1918.
O lena tausaga sa matua patino le tiga mo ia. Sa ia lotofaavauvau i le maliliu o le anoano i le Taua Tele a le Lalolagi lea na faaauau ona oo atu i le silia ma le 20 miliona tagata na fasiotia ai. Ma le isi, sa pepesi foi le faama’i o le fulū i le lalolagi atoa na ma’umau ai ola o le toatele pe 100 miliona tagata.
I le gasologa o le tausaga, sa maliliu ai foi isi tagata faapelepele o le aiga o Peresitene Samita. O Elder Ailama Maki Samita o le Korama a Aposetolo e Toasefululua, o lona atalii ulumatua lea ma o lo’u tama matua lea, sa maliu faafuasei i le faaletonu o le pitogaau.
Sa tusia e Peresitene Samita: “Ua ou lē magagana—[gūgū] i le lotofaavauvau! … Ua nutimomoia lo’u fatu; ma tau manuō ai i le fiaola! … E! Ou te alofa ia te Ia! … O le a ou alofa ia te ia e faavavau pea. Ma e faapena lava ma o le a faapea foi i o’u atalii ma afafine uma, ae o ia o lo’u atalii ulumatua, o le na muamua aumaia le olioli ma le faamoemoe o se igoa mamalu i tagata. … Mai le ta’ele o lo’u agaga ou te faafetai ai i le Atua mo ia! Ae … Oka! Sa ou manaomia o ia. Tatou te manaomia uma o ia! Sa sili ona aogā o ia i le Ekalesia. … Ma o lenei … E! o le a se mea e mafai ona ou faia! … E! Le Atua e, fesoasoani mai ia te a’u!”11
O le masina na sosoo ai, sa maliu ai le atalii faaletulafono o Peresitene Samita, o Alonzo Kesler, i se faalavelave matautia faafuasei.12 Sa tusia e Peresitene Samita i lana apitalaaga, “O lenei faalavelave sili ona matautia, faataumaoi ma lotofaavauvau, ua matua toe faavauvau ai foi lo matou aiga atoa.”13
Fitu masina mulimuli ane, ia Setema 1918, na maliu ai le afafine faaletulafono o Peresitene Samita ma o lo’u tinamatua lea, o Ida Bowman Samita, i le mavae ai ona ia fanauina o lana pepe lona lima, o lo’u uncle o Ailama.14
Ma o lea la, i le aso 3 o Oketopa, 1918, i le lagonaina ai o le faanoanoa tele i le faitau miliona na maliliu i le lalolagi e ala i taua ma faama’i faapea ai foi ma le maliliu o tagata o lona lava aiga, sa maua ai e Peresitene Samita le faaaliga faalelagi ua lauiloa “o le faaaliga o le togiolaina o ē ua maliliu.”
Sa ia ta’ua lea faaaliga i le aso na sosoo ai i le sauniga amata o le konafesi aoao ia Oketopa. Sa faasolo vaivai le malosi o Peresitene Samita, ae sa ia saunoa puupuu lava: “O le a ou le, ma ou te le taumafai e amata faamatala atu le tele o mea o loo i ai i lo’u mafaufau i lenei taeao, ma e tatau ona ou tolopoina seia i ai se taimi i le lumanai, e tusa ma le finagalo o le Alii, lo’u taumafai e ta’u atu ia te outou nisi o mea o loo i ai i lo’u mafaufau, ma o loo i ai i lo’u loto. Ou te le’i nofo na o a’u i nei masina e lima [ua mavae atu]. Sa ou mafuta i le agaga o le tatalo, o aioiga, o le faatuatua ma le naunautaiga; ma sa faia ni a’u fesootaiga faifai pea ma le Agaga o le Alii.15
O le faaaliga na ia maua i le aso 3 o Oketopa na faamafanafanaina ai lona loto ma maua ai tali i le tele o ana fesili. E mafai foi ona faamafanafanaina i tatou ma aoao atili e uiga i o tatou lava lumanai pe a tatou feoti ma e pele ia i tatou ma o atu i le lalolagi o agaga e ala i le suesueina o lenei faaaliga ma mafaufau loloto i lona taua i le auala o loo tatou ola ai i o tatou olaga i aso taitasi.
Faatasi ai ma le tele o isi mea sa vaai i ai Peresitene Samita, o le asiasiga a le Faaola i ē faatuatua i le lalolagi o agaga i le mavae ai o Lona lava maliu i luga o le satauro. Ou te sii mai le faaaliga:
“Ae faauta, sa faatutu e ia mai totonu o e amiotonu, ana ʼau ma tofia avefeau, ua faaofuina i le mana ma le pule, ma sa tofia i latou e o atu ma avatu le malamalama o le talalelei ia te i latou o e sa i ai i le pouliuli, i agaga lava o tagata uma;16 ma sa faapea ona talai atu o le talalelei i e ua oti. …
“Sa aoao atu ia te i latou le faatuatua i le Atua, le salamo mai agasala, le sui papatisoga mo le faamagaloina o agasala, le meaalofa o le Agaga Paia e ala i le faaee o lima,
“Ma isi mataupu autu uma o le talalelei sa tatau ia te i latou ona iloa ina ia latou agavaa ina ia mafai ona faamasino i latou e tusa ma tagata i le tino, ae ola i le Atua i le agaga. …
“Aua sa vaai e ua maliliu i le umi o le tuuesea o o latou agaga mai i o latou tino, o se pologa.
“O i latou ia na aoaoina e le Alii, ma tuu atu ia te i latou le mana e tutulai mai ai, pe a mavae lona toetu mai i le oti, e ulu atu i le malo o lona Tamā, e faapaleina iina i le ola pea ma le ola e faavavau,
“Ma faaauau pea mai le taimi lena i luma a latou galuega e pei ona sa folafolaina e le Alii, ma avea ma e e tofusia i faamanuiaga uma sa faapolopolo mo i latou o e alolofa ia te ia.”17
I le faaaliga, sa vaai ai Peresitene Samita i lona tama, o Ailama, ma le Perofeta o Iosefa Samita. Ua atoa le 74 tausaga talu mai le taimi mulimuli na ia vaai ai ia i la’ua a o tamaitiiti lava i Navu. E mafai na ona tatou mafaufau i lona olioli i le vaai atu i lona tama pele ma le uso o lona tama. Masalo sa musuia o ia ma faamafanafanaina ia iloa e faatumauina e agaga uma o latou lava foliga e pei ona i ai i le tino faaletino ma o loo latou faatalitali ma le naunautai i le aso o lo latou toetutu ua folafolaina. Ua faaalia atili i le faaaliga le loloto ma le lautele atoatoa o le fuafuaga a le Tama Faalelagi mo Ana fanau ma le alofa togiola o Keriso ma le mana le mafaatusalia o Lana Togiola.18
I lenei aso faamanatu faapitoa lona 100, ou te valaaulia ai outou ina ia faitau maeaea lelei ma le manatunatu i lenei faaaliga. A o outou faia lea mea, ia faamanuia le Alii ia te outou ina ia malamalama atoatoa atili ma talisapaia le alofa o le Atua ma Lana fuafuaga o le faaolataga ma le fiafia mo Ana fanau.
Ou te molimau atu o le faaaliga na maua e Peresitene Iosefa F. Samita e moni. Ou te molimau atu e mafai ona faitauina e tagata uma ma iloa ai e moni. O i latou e le mauaina lenei malamalama i lenei olaga, o le a mautinoa lava le iloaina o lona moni pe a taunuu atu tagata uma i le lalolagi o agaga. O iina, o le a alolofa ai ma viia e tagata uma le Atua ma le Alii o Iesu Keriso mo le fuafuaga sili o le faaolataga ma le faamanuiaga o le Toetutu folafolaina pe a toe faatasi le tino ma le agaga ma lē toe tuueseeseina ai lava.19
E ma’eu lo’u lotofaafetai i le iloa o le mea ua i ai nei la’u pele o Barbara ma o le a ma toe faatasi ma lo ma aiga mo le faavavau atoa. Ia tausia i tatou e le filemu o le Alii i le taimi nei ma le faavavau o la’u tatalo faamaualalo lea, i le suafa o Iesu Keriso, amene.