Liuaina Loloto ma Tumau i le Tama Faalelagi ma le Alii o Iesu Keriso

Saunia e Elder Quentin L. Cook

O Le Korama a Aposetolo e Toasefululua

O lo tatou faamoemoega o le faapaleni lea o aafiaga i le Ekalesia ma le aiga i se auala o le a matua faateleina ai le faatuatua ma le faaleagaga ma faalolotoina ai le liua.

E pei ona faato’a faamalamalama atu ma le matagofie ma le mamana e Peresitene Russell M. Nelson, ua umi se taimi o galulue taitai o le Ekalesia i se “fuafuaga e faatotonugalemu-i-le-aiga ma lagolagoina-e-le-Ekalesia e aoao ai aoaoga faavae, faamalosia ai le faatuatua, ma atiae ai le lototapuai sili atu faaletagata lava ia.” Ona faasilasila mai lea e Peresitene Nelson o se fetuunaiga ina ia ausia ai “se paleni fou ma se fesootaiga i le va o aoaoga o le talalelei i totonu o le aiga ma totonu o le Ekalesia.”¹

Ina ia ausia nei faamoemoega—na faamatala mai e, ma i lalo o le taitaiga a Peresitene Russell M. Nelson ma sosoo ai ma le faaiuga a le Aufono a le Au Peresitene Sili ma le Korama a Aposetolo e Toasefululua—o le a fetuunaia ai le faatulagaga o sauniga i le Aso Sa i auala nei, e amata atu ia Ianuari 2019.

Faasologa o Sauniga i le Aso Sa

O sauniga a le Ekalesia i le Aso Sa o le a aofia ai le lotu faamanatuga e 60 minute i Aso Sa taitasi, e taulai atu i le Faaola, le sauniga o le faamanatuga, ma savali faaleagaga. A maea ona taape lea o tagata i vasega, o le a auai tagata o le Ekalesia i se vasega e 50 minute lea o le a felafoa’i i Aso Sa taitasi:

O le A’oga Sa o le a faia i Aso Sa muamua ma Aso Sa lona tolu o le masina.
O sauniga a korama a le Au Perisitua, Aualofa, ma Tamaitai Talavou o le a faia i Aso Sa lona lua ma Aso Sa lona fa.
O sauniga [po o vasega] o le Aso Sa lona lima o le a i lalo o le taitaiga a le epikopo.

O le a faia pea le Peraimeri i vaiaso taitasi i le taimi lava lea e tasi e 50 minute ma o le a aofia ai ma taimi o pesepesega ma vasega.

Ata

Faasologa i Aso Sa

E tusa ai ma le faasologa o sauniga i le Aso Sa, ua silafia ai e taitai sinia o le Ekalesia mo le tele o tausaga e faapea mo nisi o o tatou tagata faapelepele, o se faatulagaga tolu itula i le lotu i le Aso Sa e ono faigata. E moni lenei mea aemaise lava mo matua e i ai ni fanau laiti, o tamaiti Peraimeri, o tagata matutua, o tagata fou liliu mai, ma isi.²

Ae e telē atu se mea o loo i ai i lenei fetuunaiga nai lo le na ona faapuupuuina o le faatulagaga o sauniga i le Aso Sa. Ua faailoa atu e Peresitene Nelson ma le lotofaafetai le tele o mea ua ausia ona o se taunuuga o lo outou faatuatua i valaaulia talu ai. O ia, faatasi ma taitai uma o le Ekalesia, ua finagalo ia aumai le olioli sili atu o le talalelei—i matua, fanau, autalavou, tagata nofotoatasi, tagata matutua, tagata fou liliu mai, ma tagata na o loo aoaoina e faifeautalai—e ala i se taumafaiga paleni e faatotonugalemu-i-le-aiga, ma lagolagoina-e-le-Ekalesia. O faamoemoega ma faamanuiaga e fesootai ma lenei fetuunaiga ma isi suiga talu ai nei ua aofia ai mea nei:

Faalolotoina o le liua i le Tama Faalelagi ma le Alii o Iesu Keriso ma le faamalosia o le faatuatua ia i La’ua.
Faamalosia o tagata taitoatasi ma aiga e ala i le mataupu aoaoina e faatotonugalemu-i-le-aiga, ma lagolagoina-e-le-Ekalesia lea e saofagā atu i le ola fiafia i le talalelei.
Faamamaluina o le aso Sapati, i se taulaiga i le sauniga o le faamanatuga.
Fesoasoani atu i fanau uma a le Tama Faalelagi i itu uma e lua o le veli e ala i le galuega faafaifeautalai ma le mauaina o sauniga ma feagaiga ma faamanuiaga o le malumalu.

Aoaoina o le Talalelei e Faatotonugalemu-i-le-Aiga ma Lagolagoina-e-le-Ekalesia

O lenei faatulagaga o sauniga o le Aso Sa o le a faatagaina ai se taimi tele atu mo se afiafi faaleaiga ma le suesueina o le talalelei i le aiga i le Aso Sa po o nisi taimi e ono filifilia e tagata taitoatasi ma aiga. O se po o gaoioiga faaleaiga e mafai ona faia i le Aso Gafua po o se isi taimi. I lenei tulaga, e tatau ai i taitai ona faaavanoa afiafi o Aso Gafua mai fonotaga ma gaoioiga faale-Ekalesia. Peitai, o taimi e faaaluina i afiafi faaleaiga, suesuega o le talalelei, ma gaoioiga mo tagata taitoatasi ma aiga e mafai ona faatulagaina e tusa ma o latou lava tulaga faaletagata lava ia.

Ata

Sau, Mulimuli Mai ia te Au—Mo Tagata Taitoatasi ma Aiga

O le suesueina o le talalelei e le aiga ma le tagata lava ia i le fale o le a iloga le faaleleia e se mataupu aoaoina laugatasia ma se punaoa fou, o le Sau, Mulimuli Mai ia te Au mo tagata taitoatasi ma aiga lea ua faamaopoopoina faatasi ma mea ua aoaoina i le A’oga Sa ma le Peraimeri.³ Ia Ianuari, o le a suesueina ai e vasega o le autalavou a le Ekalesia ma tagata matutua i le Aoga Sa ma le Peraimeri le Feagaiga Fou. O le punaoa fou mo suesuega i le fale, o le Sau, Mulimuli Mai ia te Au mo tagata taitoatasi ma aiga ua mamanuina e fesoasoani i tagata o le ekalesia ia aoaoina le talalelei i totonu o le aiga. Ua faamalamalama mai: “O lenei punaoa e mo tagata taitoatasi uma ma aiga i le Ekalesia. Ua mamanuina e fesoasoani ia [i tatou] e aoao [atili ai] i le talalelei—pe na o [tatou] pe faatasi ma [o tatou] aiga. O auivi o lenei punaoa [fou] ua faatulagaina e tusa ai ma se faasologa faalevaiaso.”⁴

O lesona fou o le Sau, Mulimuli Mai ia te Au a le Peraimeri e aoaoina i le lotu, o le a mulimulitaia le faatulagaga lava lea e tasi faalevaiaso. O vasega a le au matutua ma le autalavou i le Aoga Sa i Aso Sa muamua ma le tolu o le a faamaopoopoina ina ia latou lagolagoina le punaoa fou o le Sau, Mulimuli Mai ia te Au mo le aiga. I Aso Sa lona lua ma lona fa, o le a faaauau pea ona suesueina e tagata matutua i le au perisitua ma le Aualofa ia aoaoga a taitai o le Ekalesia, ma le faamamafa atu i savali o loo i ai nei a perofeta o aso nei.⁵ O tamaitai talavou ma alii talavou o le Perisitua Arona o le a suesueina autu o le talalelei i na Aso Sa.

Ua maua i punaoa fou mo suesuega i le aiga ni “Manatu mo Suesuega Faaleaiga o Tusitusiga Paia ma Afiafi Faaleaiga.”⁶ O auivi mo vaiaso taitasi o loo i ai ni manatu aogā mo suesuega ma ni gaoioiga mo tagata taitoatasi ma aiga. O le punaoa o le Sau, Mulimuli Mai ia te Au mo tagata taitoatasi ma aiga o loo i ai foi ni ata se tele o le a fesoasoani e faaleleia le aoaoina o tagata taitoatasi ma aiga, aemaise lava mo fanau.⁷ O lenei punaoa fou o le a tuuina atu i aiga taitasi ia Tesema o lenei tausaga.

Ua apoapoaiina i tatou e Peresitene Nelson, mai lana uluai savali i tagata o le Ekalesia ia Ianuari, ina ia saunia mo le Afio Mai Faalua o Iesu Keriso e ala i le savavali i le ala o feagaiga.⁸

Ona o tulaga o le lalolagi, ua matua manaomia ai ona faalolotoina le liua ma le faamalosia o le faatuatua i le Tama Faalelagi ma Iesu Keriso ma Lana Togiola. Ua saunia e le Alii i tatou, i lea fuaitau ma lea fuaitau, mo taimi faigata ua tatou feagai ai nei. I tausaga talu ai nei, ua taialaina i tatou e le Alii ia taulimaina ni atugaluga autu, e aofia ai:

Faamamaluina o le aso Sapati ma le sauniga paia o le faamanatuga ua toe faamamafaina mo tausaga e tolu ua mavae atu.
I lalo o le taitaiga a le epikopo, o korama a toeaina ma Aualofa ua faamalosia o loo taulai atu i le faamoemoega o le Ekalesia⁹ ma fesoasoani i tagata ia osia ma tausia feagaiga paia.
O le auauna atu i se ala maualuga atu ma paia atu ua faatinoina ma le olioli.
O le amataina faatasi ma se taunuuga i le mafaufau, ua avea ai feagaiga o le malumalu ma auaunaga i talafaasolopito o aiga ma se vaega mautu o le ala o feagaiga.

O fetuunaiga ua faasilasila atu i lenei taeao o se isi lea o faataitaiga o le taiala mo luitau o o tatou aso.

O mataupu aoaoina a le Ekalesia ua masani ai ua faamamafa ai le aafiaga faale-Ekalesia i le Aso Sa. Ua tatou iloaina lena mea pe a lelei ona tatou aoao atu ma tele ni tagata o le vasega e saunia faaleagaga, e maua so tatou aafiaga sili atu i le Lotu i le Aso Sa. E faamanuiaina i tatou, lea e tele ai ina faateleina le Agaga ma faamalosia ai le liuaina i totonu o le faatulagaga faale-Ekalesia.

E manaomia ona faatosinaina ma le mamana atili e le mataupu aoaoina fou e faatotonugalemu-i-le-aiga ma lagolagoina-e-le-Ekalesia le tapuaiga faalelotu ma amioga faaleaiga ma tapuaiga faalelotu ma amioga faaletagata lava ia. Ua tatou iloa le aafiaga faaleagaga ma le liuaina loloto ma tumau lea e mafai ona ausia i le faatulagaga faaleaiga. I ni tausaga ua mavae, sa faamautu ai se suesuega e faapea mo alii ma tamaitai talavou, o le faatosinaga a le Agaga Paia e tele lava ina i ai i le suesueina o tusitusiga paia ma tatalo a le tagata lava ia i le aiga. O lo tatou faamoemoega o le faapaleni lea o aafiaga i le Ekalesia ma le aiga i se auala o le a matua faateleina ai le faatuatua, faaleagaga, ma faalolotoina ai le liua i le Tama Faalelagi ma le Alii o Iesu Keriso.

I le vaega o le faatotonugalemu-i-le-aiga ma lagolagoina-e-le-Ekalesia o lenei fesuiaiga, o loo i ai le fetuunaiga mo tagata taitoatasi ma aiga e fuafua ai ma le agaga tatalo le auala ma le taimi o le a faatinoina ai. Mo se faataitaiga, e ui o le a matua faamanuiaina e lenei mea aiga uma, e fua i manaoga i le lotoifale, ae o le a talafeagai atoa mo talavou nofofua, tagata matutua nofofua, matua nofotoatasi, aiga e le auai uma tagata i le lotu, tagata fou o le ekalesia,¹⁰ ma isi ia potopoto i ni vaega i fafo atu o sauniga tapuai masani o le Aso Sa ia olioli ai i mafutaga faaletalalelei ma ia faamalosia ai e le suesueina faatasi o le punaoa e faatotonugalemu-i-le-aiga ma lagolagoina-e-le-Ekalesia. O le a ausia faasamasamanoa lenei mea e i latou e mananao i ai.

I le tele o vaega o le lalolagi, e filifili tagata e nonofo i le falesa pe a mavae sauniga masani o le Aso Sa e olioli ai i sootaga faaagafesootai. E leai ma se mea o i ai i lenei faasilasilaga o le fetuunaiga o le a faalavelave i lena faiga masani matagofie ma tauia i soo se auala.

Ina ia fesoasoani i tagata o le ekalesia ia saunia mo le Sapati, ua uma lava ona auina atu e nisi o uarota se imeli manino, tesi, po o se feau faaagafesootai i le ogatotonu o le vaiaso. I le tagai la i ai i lenei fetuunaiga, matou te fautua malosi atu lenei ituaiga o fesootaiga. O nei valaaulia o le a faamanatu atu ai i tagata o le au paia faatulagaga o sauniga o le Aso Sa mo lena vaiaso, e aofia ai le autu o le lesona o le a oo i ai, ma le lagolagosua i talanoaga faifai pea o le talalelei i le aiga. Ma le isi, o sauniga a tagata matutua i le Aso Sa o le a maua ai foi faamatalaga e fesootai ai suesuega i le ekalesia ma le aiga i vaiaso taitasi.

O le sauniga faamanatuga ma le taimi o le vasega o le a manaomia ai se iloiloga ma le agaga tatalo e faamautinoa ai o loo faamamafaina mea faamuamua faaleagaga i lo matafaioi faalepulega. Mo se faataitaiga, o faasilasilaga e mafai mo le tele o vaega ona avatu i le valaaulia i le ogatotonu o le vaiaso pe lolomi foi i polokalama. E ui o le sauniga faamanatuga e tatau ona i ai se tatalo amata ma se tatalo faaiu, ae o le sauniga po o le vasega e sosoo ai, e na o le tatalo faaiu e manaomia.¹¹

E pei ona ta’ua muamua atu, o le faatulagaga fou i Aso Sa o le a lē amataina seia oo ia Ianuari 2019. E tele ni mafuaaga mo lenei mea. O mafuaaga sili ona taua e lua, muamua, ia lava le taimi e tufatufa atu ai le punaoa o le Sau, Mulimuli Mai ia te Au mo tagata taitoatasi ma aiga ma le lona lua, ia lava se taimi mo peresitene o siteki ma epikopo e fetuunai ai faatulagaga o sauniga faatasi ai ma le sini ia tele ni uarota e vave amata i le aso.

A o saili atu taitai i faaaliga, o le taitaiga na maua i nai tausaga ua alu o le faamalosia lea o sauniga faamanatuga, faamamalu le aso Sapati, ma uunaia ma lagolago matua ma tagata taitoatasi ia faia o latou aiga o se punavai o le malosiaga faaleagaga ma le faatuatua faateleina—o se nofoaga o le olioli ma le fiafia.

Faamanuiaga Ofoofogia

O le a le uiga o nei fetuunaiga mo tagata o Le Ekalesia a Iesu Keriso o Au Paia o Aso e Gata Ai? Ua matou talitonu o le a faamanuiaina ai tagata o le ekalesia i ni auala tulagaese. O le Aso Sa e mafai ona avea ma se aso o le aoao mai ma le aoao atu o le talalelei i le lotu ma i le aiga. Pe a auai tagata taitoatasi ma aiga i aufono faaleaiga, talafaasolopito o aiga, auaunaga, galuega fesoasoani, tapuaiga faaletagata lava ia, ma taimi fiafia faaleaiga, o le a avea moni le aso Sapati ma aso fiafia.

Ata

Aiga o Carvalho

O se tasi o aiga mai Pasila o ni tagata o se siteki lea sa faataitai ai le punaoa fou mo aiga o le Sau, Mulimuli mai ia te A’u. O le tama ia Fernando, o se faifeautalai ua foi mai le misiona, o ia ma lona faletua ia Nancy, o ni matua o se fanau e toafa, na lipoti mai: “Ina ua faalauiloa mai le polokalama o le Sau, Mulimuli Mai ia te Au i le matou siteki, sa ou matua fiafia lava, ma sa ou mafaufau ‘o le auala o loo matou suesueina ai tusitusiga paia i le aiga o le a suia.’ Na tupu moni lava i lo’u aiga, ma i le avea ai ma se taitai o le Ekalesia, sa ou vaaia na tupu i isi foi aiga. … Na fesoasoani ia i matou ia talanoaina moni lava tusitusiga paia i totonu o lo matou aiga. Na ma maua ma lo’u toalua se malamalamaaga loloto atu i autu sa suesueina. … Na fesoasoani ia i ma’ua … e faalautele lo ma malamalama o le talalelei, ma faaleleia lo ma faatuatua ma molimau. … Ou te molimau atu … ou te iloa sa musuia e le Alii ina ia mafai ona aumaia e le suesueina faifai pea ma le anoa o mataupu faavae ma aoaoga faavae o loo i ai i tusitusiga paia le faatuatua tele atu, molimau, ma le malamalama i aiga … i se lalolagi ua faateleina le pa’ū.”¹²

I polokalama faataitai i siteki i le lalolagi atoa, sa i ai se tali sili ona faafiafiaina i le punaoa fou o le Sau, Mulimuli Mai ia te Au mo aiga. E toatele sa latou lipoti mai ua latou alualu i luma mai le faitauina o tusitusiga paia i le suesueina moni o tusitusiga paia. Sa lagona tutusa foi le lagonaina o le aafiaga sa siitia ai le faatuatua ma sa i ai se aafiaga matagofie i le uarota.¹³

Liuaina Loloto ma Tumau

O le sini o nei fetuunaiga o le maua lea o se liuaina loloto ma tumau o tagata matutua ma le tupulaga faiae. O loo faamamafa mai e le uluai itulau o le punaoa mo tagata taitoatasi ma aiga e faapea: “O faamoemoega uma o le aoao mai ma le aoao atu o le talalelei o le faalolotoina lea o lo tatou liua ma fesoasoani ai ia te i tatou ia avea atili e faapei o Iesu Keriso. … O lona uiga ia faalagolago ia Keriso e suia o tatou loto.”¹⁴ E lagolagoina lenei mea e ala i le aapa atu “i tua atu o se potuaoga i le loto o se tagata ma le aiga. E moomia ai le faifaipea e le aunoa, o taumafaiga i aso taitasi ia malamalama ma ola ai i le talalelei. O le liua moni e moomia ai le faatosinaga a le Agaga Paia.”¹⁵

O le sini sili ona taua ma le faamanuiaga silisili o le liua loloto ma tumau o le mauaina lea ma le agavaa o feagaiga ma sauniga o le ala o feagaiga.¹⁶

Matou te faatuatuaina outou ia fefautuaai faatasi ma ia saili atu i faaaliga mo le faatinoina o nei fetuunaiga—ae ia le vaai ai i tala atu o le faailoga po o le taumafai e pulemalosi tagata po o aiga. O faamatalaga faaopoopo o le a faasoa atu i fesootaiga o le a oo atu, e aofia ai se tusi ma faamalamalamaga mai le Au Peresitene Sili.

Ou te molimau atu ia te outou i fonotaga a le Aufono a le Au Peresitene Sili ma le Korama a Aposetolo e Toasefululua i totonu o le malumalu, ma i le mavae ai ona aioi atu o lo tatou perofeta pele i le Alii mo se faaaliga ia faatino ai nei fetuunaiga, sa maua ai se faamautinoaga mamana e uso uma. O Russell M. Nelson o lo tatou Peresitene ma perofeta soifua. O le faasilasilaga ua faia i le asō o le a oo ai i faamanuiaga loloto mo i latou o ē taliaina ma le naunautai ia fetuunaiga ma saili atu i le taitaiga a le Agaga Paia. O le a tatou latalata atili atu i lo tatou Tama Faalelagi ma lo tatou Alii ma Faaola, o Iesu Keriso, o lē ua avea ai a’u ma se molimau mautinoa. I le suafa, o Iesu Keriso, amene.