Sauniga/Fonotaga Aso Sa Lona Lua ma le Lona Tolu
I Aso Sa lona lua ma le lona tolu o masina taitasi, o le a aoao ai e korama a toeaina ma le Aualofa mai aoaoga a taitai o le Ekalesia mai konafesi aoao e sili ona lata mai. E tatau ona tuu atu le faamamafa i savali mai uso o le Au Peresitene Sili ma le Korama a Aposetolo e Toasefululua. Peitai, e tusa ai ma manaoga i le lotoifale ma uunaiga mai le Agaga, e mafai ona talanoaina soo se savali lava mai le konafesi e sili ona lata mai.
I le tele o tulaga, o le au peresitene o le korama a toeaina po o le Aualofa o le a filifilia se savali mai le konafesi e suesue e tusa ai ma manaoga o tagata o le au paia, e ui e mafai ona i ai se sao o le epikopo po o le peresitene o le siteki. E mafai e taitai ona filifili se savali e fesootai i le autu na talanoaina i se fonotaga/sauniga lata mai a le aufono i le Aso Sa muamua, pe e mafai foi ona latou filifili se savali i se autu e ese mai ai, e tusa ai ma musumusuga mai le Agaga.
E ao i taitai ma faiaoga ona saili ni auala e uunaia ai tagata o le ekalesia e faitau savali ua filifilia ao lei taitai ma o mai saunia e faasoa mai ni upumoni o le talalelei ma manatu e uiga i le ala e faatinoina ai. O gaoioiga nei mo le aoaoina ua fautuaina atu, lea e faatatau i mataupu faavae o i le Aoao Atu i le Ala a le Faaola, e mafai ona fesoasoani ai i tagata o le au paia i le aoaoina mai savali o le konafesi aoao.
M. Russell Ballard, “O Meaalofa Faapelepele mai le Atua,” 9–11
O le savali a Peresitene Ballard o loo talanoaina ai ni autu eseese—e aofia ai perofeta, faatuatua ia Keriso, le faamanatuga, ma le auaunaga—ma e atonu e mafai e uso o la outou korama po o le Aualofa ona saili ni autu eseese e taua tele. Valaaulia ni tagata o le ekalesia e faasoa mai se mea mai lenei savali e uunaiaina i latou. O a valaaulia po o faamanuiaga folafolaina ua tatou mauaina i le savali a Peresitene Ballard? Mafaufau e valaaulia tagata o le ekalesia e manatunatu loloto mo ni nai minute i mea ua latou lagona le musuia e fai o se taunuuga o lenei talanoaga.
Gary E. Stevenson, “O Le Loto o se Perofeta,” 17–20
Ina ia fesoasoani i tagata o le ekalesia ia “malamalama i le maoae” o le valaauga o se perofeta fou, e mafai ona e valaauliaina tagata o le ekalesia e saili i le savali a Elder Stevenson, vaavaai mo upumoni ma malamalamaaga lea o le a fesoasoani e faamalamalama ia i latou le taua ma le paia o lenei faagasologa paia. Mafaufau e valaaulia tagata o le ekalesia e faasoa mai mea sa latou lagonaina i le taimi o le faapotopotoga paia lea na lagolagoina ai Peresitene Nelson o se Peresitene o le Ekalesia. E mafai foi ona e tusiina se fatu i luga o le laupapa ma fai i tagata o le ekalesia e tusi ai i totonu ni upu po o fuaitau lea e faamatala ai le loto ma uiga o Peresitene Nelson. O le a se mea na ia aoaoina ua faamanuiaina ai i tatou?
Neil L. Andersen, “O Le Perofeta a le Atua,” 24–27
O le talanoaina o le savali a Elder Andersen e mafai ona faamalosia ai le faatuatua o tagata o le ekalesia i perofeta soifua. E mafai ona e valaauliaina i latou e saili i lana savali mo se mea o le a fesoasoani e faamalamalama ia i latou le mafuaaga ua faia ai e le Atua perofeta i luga o le fogaeleele ma le mafuaaga ua tatou mulimuli ai ia i latou. E faapefea ona faamanuiaina i tatou ona ua ia i tatou se perofeta? E mafai ona faasoa mai e tagata o le ekalesia le ala ua latou maua ai se molimau o Peresitene Russell M. Nelson o le perofeta a le Alii ma le Peresitene o Le Ekalesia a Iesu Keriso o le Au Paia o Aso e Gata Ai.
David A. Bednar, “Agamalu ma Maualalo i le Loto,” 30–33
Ina ia uunaia se talanoaga e uiga i le savali a Elder Bednar, e mafai ona tusi i luga o le laupapa O le agamalu o le … ma le O le agamalu e le o le … Ona mafai lea e tagata o le ekalesia ona saili i le savali a Elder Bednar ma tusi i luga o le laupapa fuaitau na latou mauaina lea faamaeaina nei faamatalaga. O le a se mea ua tatou aoao mai lenei savali lea e uunaia i tatou ina ia agamalu atili? O a faataitaiga o le agamalu e mafai ona tatou mafaufau i ai? E mafai faapefea ona tatou faaaogaina le fautuaga a Elder Bednar ina ia agamalu atili?
Bonnie L. Oscarson, “O Tamaitai Talavou i le Galuega,” 36–38
O fesili o se tasi lea o auala e valaaulia ai le manatunatu loloto. Mafaufau e tusi i luga o le laupapa ni nai fesili lea na taliina e le savali a Sister Oscarson, e pei o le E mafai faapefea ona tatou faaaofia tamaitai talavou i le galuega a le Alii? Valaaulia tagata o le ekalesia e saili i lana savali mo tali i nei fesili ma talanoa mea sa latou aoaoina. O a faamanuiaga e oo mai pe a faaaofia tamaitai talavou i le auaunaga? Atonu e mafai e tagata o le vasega ona fefaasoaai aafiaga na latou mauaina i le auauna atu faatasi ma tamaitai talavou. E tusa ai ma la tatou talanoaga, o le a se mea tatou te lagona le uunaia e fai?
Dale G. Renlund, “Galuega o Talafaasolopito o Aiga ma le Malumalu: Faamauga ma le Faamalologa,” 46–49
Na saunoa Elder Renlund i le faaaliga a Esekielu i se malumalu ma le vai o loo tafe mai ai (tagai Esekielu 47:8–9). Atonu e mafai e se tasi o le korama po o le Aualofa ona tusi le ata o lenei faaaliga i luga o le laupapa. E faapefea e faamanuiaga o le galuega o le malumalu ma talafaasolopito o aiga ona pei o le vai i le faaaliga ia Esekielu? E mafai ona e valaauliaina tagata o le vasega e faasoa mai ni faamanuiaga o le galuega o le malumalu ma talafaasolopito o aiga ua latou tofo i ai. O le a se mea e mafai ona tatou faia e avea ai le galuega o talafaasolopito o aiga ma le malumalu o se vaega masani atili o o tatou olaga?
D. Todd Christofferson, “O Le Korama a Toeaina,” 55–58
I le korama a toeaina, atonu e te manao e valaaulia uso o le korama e faitau le vaega o le savali a Elder Christofferson ua faaulutalaina “O Le FFaamoemoega o Nei Suiga.” O le a se mea e mafai ona tatou faia e faamautinoa ai ua tatou ausia nei faamoemoega? I le Aualofa, e mafai ona e fai atu i se tasi e aotele mai suiga i korama a le Perisitua Mekisateko lea na faamatala mai e Elder Christofferson. Ona mafai lea ona faailoa mai e tuafafine ni mataupu faavae e faatatau i nei suiga e mafai ona faaaoga i le galuega o la outou Aualofa. I le korama a toeaina po o le Aualofa, e mafai e tagata o le ekalesia ona talanoa i mea sa latou aoaoina mai le tala a Brother Goates ma le auala e faatatau ai i le latou galuega.
Ronald A. Rasband, “Faauta! O Se Au Tautupu,” 58–61
Atonu o le pepese, faalogologo i, po o le faitauina faatasi o upu o le “Faauta! O Se Au Tautupu” (Viiga, nu. 158) e ono uunaia ai le talanoaga e uiga i le savali a Elder Rasband. E faapefea ona faapei ia korama a le perisitua ma le Aualofa o se au tautupu? E mafai foi e tagata o le ekalesia ona vaavaai mo ma talanoa i le “anoanoai o faamanuiaga” na ta’ua e Elder Rasband o le a oo mai mai le toefaatulagaina o le korama a le perisitua. O a isi faamanuiaga ua tatou mauaina—pe o tatou faamoemoe ia mauaina—mai le faaaogaina o nei suiga? E mafai faapefea e Aualofa ona mauaina atoatoa atili ia faamanuiaga e pei o le “eseese o meaalofa” ma le “fautuaina”?
Henry B. Eyring, “Auaunaga Musuia,” 61–64
Ua faamatala e Peresitene Eyring ia lauga o le sauniga faamanatuga e lua e uiga i le auaunaga lea na faagaeetiaina o ia. Atonu e mafai ona e talosaga atu i le afa o tagata o le korama po o le Aualofa e iloilo upu a le tama 14 tausaga le matua ma le isi afa e iloilo le tala e uiga i le faiaoga o aiga. Ao latou faitau, e mafai ona mafaufau tagata o le ekalesia e uiga i le fautuaga atonu latou te tuuina atu i se alii talavou po o se tamaitai talavou o le e fou le tofiaina e auauna atu i se tasi. E mafai faapefea ona tatou “avea ma e sili atu ona musuia ma alofa i la tatou … galuega faaleauaunaga”?
Dallin H. Oaks, “O Mana o le Perisitua,” 65–68
Ina ia amata se talanoaga, e mafai ona e tusia ulutala o vaega e fa o le savali a Peresitene Oaks i luga o le laupapa. Ona valaaulia lea o tagata taitoatasi e faitau leleoa se tasi o vaega ma tusi lea i luga o le laupapa o se fuaiupu e tasi e aotele ai le savali autu o lena vaega. Ona mafai lea ona faasoa mai tagata i mea latou te lagonaina le musuia e fai ona o mea na latou faitauina. E faapefea ona faaleleia la tatou auaunaga i le avea ai ma e umia le perisitua po o tuafafine o le Aualofa pe a tatou faaaogaina ia aoaoga o i le savali a Peresitene Oaks?
Russell M. Nelson, “Auauna Atu i le Mana ma le Pule a le Atua,” 68–75
Ua valaaulia e Peresitene Nelson e umia le perisitua ina ia “tutulai a’e” ma faaaoga le perisitua e faamanuia ai fanau a le Tama Faalelagi. Valaaulia tagata o la outou korama po o le Aualofa e saili ni faataitaiga sa ia tuuina atu ma talanoa i le auala latou te fesoasoani ai ia i tatou ina ia malamalama i le ala e mafai ai ona faaaoga le perisitua e faamanuia ai o latou aiga ma isi. O a aafiaga e mafai ona tatou faasoaina atu pe a faamanuiaina i tatou e ala i le mana o le perisitua? E mafai faapefea ona tatou fesoasoani i isi po o i tatou lava ia maua le faatuatua e faaaoga le perisitua a le Atua e “auauna atu ai i Lona suafa”?
Reyna I. Aburto, “Ma Le Loto Gatasi,” 78–80
O le savali a Sister Aburto ua tuuina mai ai se avanoa mo la outou korama po o le Aualofa e iloilo ai po o le a le lelei o loo outou galulue ai i le lotogatasi e faia le galuega a le Alii. Ina ia fesoasoani i tagata o le ekalesia e faia lenei mea, e mafai ona e faaali atu ni ata o pepe femalagaai, o le asiasiga a le Faaola i sa Nifae (tagai Gospel Art Book, 82, 83, 84), ma le galuega agaalofa a le Ekalesia (tagai LDS.org). E mafai ona suesue tagata o le ekalesia i le savali ma aoao ai i le auala na faaaoga ai e Sister Aburto nei faataitaiga e aoao atu ai e uiga i faamoemoega ma faamanuiaga o le galulue i le lotogatasi. O le a se mea e mafai ona tatou faia ia galulue ai “ma le loto gatasi”?
Henry B. Eyring, “[Maua] Lona Agaga e Faatasi ma Outou,” 86–89
Ina ia faateleina lo tatou naunau ma gafatia ina ia maua le Agaga Paia, ua faasoa mai ai e Peresitene Eyring ni aafiaga patino se tele ma tuuina mai se taitaiga faapitoa. Ina ua mavae le iloiloga o ona aafiaga, o a ni manatuaga talitutusa e mafai e tagata o le ekalesia o lau korama po o le Aualofa ona faasoa mai pe a pai atu le Agaga Paia i o latou loto po o le faamaonia o le upumoni? Atonu e mafai e tagata o le ekalesia ona lisi i luga o le laupapa le taitaiga lea na faasoa mai e Peresitene Eyring e fesoasoani “ia tatala o tatou loto ina ia maua le auaunaga a le Agaga.” E faapefea e le mulimuli i lana taitaiga ona fesoasoani ia i tatou i o tatou lava olaga ma i o tatou lava aiga? i lau korama po o le Aualofa?
Dallin H. Oaks, “O Mea Laiti ma Faatauvaa,” 89–92
O le savali a Peresitene o loo i ai ni tala faafaatusa e aoao atu ai le ala e mafai ai e mea laiti ma faatauvaa ona i ai se aafiaga malosi mo le lelei po o le leaga. O nei tala faafaatusa e aofia ai aa o laau, o se vaega o tagata alo, alava o maea, ma vai o loo tulutulu. E mafai e tagata o le ekalesia na faitau nei tala faafaatusa ma talanoa i mea latou te aoao atua e uiga i le mana o le faia ai pea o mea laiti ma faatauvaa. O a mea laiti ma faatauvaa ia e aumaia le faatosinaga a le Agaga Paia i o tatou olaga? Valaaulia tagata o le ekalesia e manatunatu loloto i mea ua uunaia i latou e fai e mulimuli ai i le fautuaga a Peresitene Oaks.
Russell M. Nelson, “Faaaliga mo le Ekalesia, Faaaliga mo o Tatou Olaga,” 93–96
I lana savali, sa aioi mai ai Peresitene Nelson ia i tatou ina ia faateleina lo tatou “gafatia faaleagaga e maua ai faaaliga.” Ina ia fesoasoani i tagata o le ekalesia ia mulimuli i lana taitaiga, e mafai ona e tusia ni fesili e pei o fesili nei i luga o le laupapa: Aisea tatou te manaomia ai faaaliga? E mafai faapefea ona faateleina lo tatou gafatia ia maua ai faaaliga—e le gata i tagata taitoatasi ma a’o tatou fefautuaai faatasi? O a faamanuiaga na folafola mai e Peresitene Nelson pe afai o le a tatou saili le faaaliga? Vaevae tagata i vaega, ma valaaulia vaega taitasi e saili ma faasoa mai ni tali i se tasi o fesili.
Gerrit W. Gong, “Ua Toe Tu Mai le Alii,” 97–98
O a mea e mafai e tagata o lau korama po o le Aualofa ona aoao mai i le savali a Elder Gong e uiga ia tatou feagaiga ma le Togiola a Iesu Keriso? E mafai ona e valaauliaina tagata o le ekalesia e suesue i le savali, vaavaai mo faamanuiaga ua ofoina mai e le Togiola a le Faaola ma a tatou feagaiga—o loo galulue faatasi—ia i tatou. Ona mafaufau lea e fai atu ni fesili e pei o fesili nei e uiga i mea ua latou maua: E faapefea ona galulue faatasi a tatou feagaiga ma le Togiola ina ia “mafai ai ma faapaiaina ai” i tatou? O le a se mea o la fesoasoani ai ia i tatou e pipiimau ai ma faamatuu atu?
Ulisses Soares, “E Saunoa Perofeta i le Mana o le Agaga Paia,” 98–99
O le savali a Elder Soares e mafai ona uunaia i tatou e galue i le faatuatua pe a tatou lagona le le atoatoa i le faia o le finagalo o le Alii. Na faapefea ona maua e Elder Soares le toafimalie ma le faamautinoaga ina ua ia mauaina lona valaauga fou o se Aposetolo? O le a se mea na ia aoaoina mai lana aafiaga i le valaauina ai o se peresitene o le misiona? O le a se mea e mafai ona tatou aoao mai i ana aafiaga? Tuu atu i tagata se taimi e faasoa mai ai ni aafiaga i se taimi na latou lagona ai le le mautinoa e uiga i se mea na finagalo le Alii ia i latou ia faia. O le a se mea na latou faia ia maua ai le faatuatua e agai i luma?
Jeffrey R. Holland, “Ia Faatasi ma Faamalosi i Latou,” 101–3
A’o aoao tagata o lau korama po o le Aualofa e uiga i suiga i “mataupu faaleauaunaga mo le perisitua ma le Aualofa,” o a ni fesili sa ia i latou? Atonu e mafai ona tuuina atu e le savali a Elder Holland ni tali. E mafai e tagata o le ekalesia ona vaavaai mo mataupu faavae o le talalelei lea na aoao atu e Elder Holland o faavae o nei suiga. O a ni valaaulia o tatou mauaina i lenei savali? O a faamanuiaga o loo folafola atu? E mafai faapefea e nei auala fou o le auaunaga ona fesoasoani ia i tatou ina ia avea ma “soo moni o Keriso”?
Jean B. Bingham, “Auauna Atu e pei ona Faia e le Faaola,” 104–7
I lana savali, ua valaaulia i tatou e Sister Bingham e fesili ifo ia i tatou lava ia fesili ia e mafai ona taitaia ai a tatou taumafaiga faaleauaunaga. E mafai ona talanoaina e tagata o le ekalesia le auala e mafai ai e nei fesili ona taitaia a tatou taumafaiga ona vaavaai lea mo tali i le fesili a Sister Bingham, “E faape’i la foliga o le [auaunaga]?” Atonu e te faaaluina se taimi e toe iloiloina ai nisi o faataitaiga na faasoa mai e Sister Bingham i auaunaga a tagata taitoatasi ma valaaulia tagata e faasoa mai ni a latou lava faataitaiga. O le a se mea ua tatou mauaina i le savali a Sister Bingham lea e faateleina ai lo tatou malamalamaaga o le mafuaaga ma le auala tatou te auauna atu ai?
Dieter F. Uchtdorf, “Faauta i le Tagata!,” 107–10
E faapefea ona tatou fesoasoani i se tasi ia malamalama o le taulaga togiola ma le Toetu a Iesu Keriso o ni mea sili ona taua ia na tutupu i le talafaasolopito o le lalolagi? Valaaulia ia tagata o le ekalesia e manatunatu loloto i le fesili lenei ao latou faitau i vaega o le savali a Elder Uchtdorf. O le a se mea sa latou maua o le a fesoasoani e faamatala ai le mafuaaga ua matua taua ai nei mea na tutupu ia i latou? A mavae lenei talanoaga, e mafai e tagata o le vasega ona talanoa i le uiga ia i latou o le “faauta i le tagata.” Na faapefea ona tatou aoao i le “faauta i le tagata”?
Quentin L. Cook, “Saunia e Feiloai ma le Atua,” 114–17
E mafai ona e amataina lau talanoaga e uiga i le savali a Elder Cook i le valaauliaina o se tagata e aotele mai le toefuataiina mai o ki o le perisitua i le Malumalu o Katelani. E tusa ai ma le savali a Elder Cook, o a tiutetauave o i ai i le ekalesia e fesootai ai i nei ki? O faapefea ona faaalia mai nei tiutetauave i le Ekalesia i lenei vaitaimi? Tusi upu amiotonu, lotogatasi, ma le tutusa i luga o le laupapa, ma fai atu i tagata e faasoa mai ni malamalamaaga sa latou mauaina e uiga i nei mataupu faavae taitasi mai le savali a Elder Cook. E mafai faapefea e nei mataupu faavae ona fesoasoani ia i tatou e faataunuuina ai ia tiutetauave paia a le Ekalesia?