Fonotaga/Sauniga a le Aufono mo le Aso Sa Muamua

O le Aso Sa muamua o masina taitasi, o le a le toe i ai i sauniga/fonotaga a le korama a toeaina ma le Aualofa se lesona na aoaoina e se faiaoga. Nai lo lena, o le a taitaia e au peresitene o le korama a toeaina ma le Aualofa ia fonotaga/sauniga a le aufono. O nei fonotaga/sauniga a le aufono i Aso Sa muamua, e fefautuaai faatasi ai ia le korama a toeaina ma le Aualofa e uiga i tiutetauave, avanoa, ma luitau i le lotoifale; aoao mai malamalamaaga ma aafiaga a le tasi ma le isi; ma fuafua ni auala e tali atu ai i uunaiga na mauaina mai le Agaga. O nei talanoaga e tatau ona faavae i luga o mau talafeagai ma i aoaoga a perofeta soifua.

E le o fonotaga/sauniga uma a le aufono o le a tutusa. O nisi nei o taiala e fesoasoani i au peresitene e taitaia ai se aufono faamanuiaina.

A o lei faia le fonotaga/sauniga a le aufono

Fai:

Ia iloa ia manaoga, avanoa, ma luitau i le lotoifale.
Filifili ma le agaga tatalo se autu e talanoaina.
Valaaulia ni uso o le korama a toeaina po o tuafafine o le Aualofa e o mai saunia e faasoa mai o latou manatu ma aafiaga.

Aua Le Faia:

Saunia se lesona.
Sau ma se fofo faapitoa po o se fuafuaga faatino i le mafaufau.

I le taimi o le fonotaga/sauniga a le aufono

Fai:

Valaaulia tagata o le ekalesia e fefaasoaai aafiaga na faatinoga ni uunaiga sa latou mauaina mai sauniga na muamua atu.
Faailoa atu le autu o le fonotaga/sauniga ma uunaia tagata o le ekalesia e fefaasoaai aafiaga e uiga i ai, saili ni fofo ma taiala mai mau, upu a perofeta, ma le Agaga Paia.
Fuafua e faatino i mea sa talanoaina. E mafai ona aofia i lenei mea fuafuaga faalevaega po o fuafuaga ia e faia taitoatasi e le tagata lava ia.

Aua Le Faia:

Fao uma le taimi o le talanoaga.
Taumafai e faatalitonu isi i ou manatu.
Talanoa i mataupu maaleale pe e le faalauaiteleina.
Aoao atu se lesona.
Uunaia se tasi ia auai.

I le maea ai o le fonotaga/sauniga a le aufono

Fai:

Tulitataoina fuafuaga ma tofiga na faia i le taimi o le fonotaga/sauniga a le aufono.
Saili ni auala e faaaofia ai i latou o e le mafai ona auai i le fonotaga/sauniga ona o valaauga po o nisi mafuaaga. Faailoa atu ia i latou ia fuafuaga ia na faia.
Tuu atu i tagata avanoa e faasoa mai ni aafiaga i fonotaga/sauniga o i le lumanai.

Autu mo Fonotaga/Sauniga a le Aufono i Aso Sa Muamua

O manatu mo autu o talanoaga i fonotaga/sauniga a le aufono e ono sau mai fonotaga a le au peresitene, fonotaga a le aufono a le uarota, o le fuafuaga a le eria, musumusuga e maua e taitai a’o latou auauna atu i tagata o le ekalesia, ma uunaiga mai le Agaga Paia. O autu o i lalo ua na o ni fautuaga lava. E ono silafia e taitai nisi manaoga latou te lagona le musuia e talanoaina.

O le a se mea e mafai ona tatou faia e auauna atu ai ia i latou o siomiaina i tatou? (tagai Mosaea 23:18).
E mafai faapefea ona tatou faamuamuaina o tatou tiutetauave eseese?
O le a faapefea ona tatou faasoa atu le talalelei ma o tatou aiga ma tuaoi? (tagai Alema 17).
E mafai faapefea ona tatou puipuia i tatou lava ma o tatou aiga mai ala faasalalau le talafeagai ma ponokalafi?
O le a se mea o le a tatou faia e faufautua atu ai ma faamalosia a tatou fanau ma talavou i la tatou uarota?
E mafai faapefea ona sili atu lo tatou auai i le galuega o le talafaasolopito o aiga ma tapuaiga i le malumalu?
E faapefea ona tatou valaaulia le fesoasoani a le Alii a o tatou saili i tali o a tatou fesili ma tulituliloaina se malamalamaaga loloto o le talalelei?
E mafai faapefea ona tatou faamalosia a tatou molimau i le Alii ma Lana talalelei ma fesoasoani i o tatou aiga ina ia ola tutoatasi faaleagaga?