Elder Gerrit W. Gong
Korama a Aposetolo e Toasefululua
“O lenei Sapati o le Eseta, ou te pese fiafia, ‘Aleluia,’ na saunoa ai Elder Gerrit W. Gong i lana uluai saunoaga i le konafesi aoao o se uso o le Korama a Aposetolo e Toasefululua. “O le pese o le alofa togiola a lo tatou Faaola toetu ua faamanatuina ai le ogatusa lelei o feagaiga … ma le Togiola a Iesu Keriso.”
Na faaalu e Elder Gong lona soifua e olioli ai i lena tulaga ogatusa lelei. Na te silafia o le mana o feagaiga, e o faatasi ma le Togiola a le Faaola, “e faamalolosia ai i tatou ma saga faatamaaliiina ai. “O le tuufaatasia o ia mea e lua, e faasuamalieina ai, faasaoina, faapaiaina, [ma] togiolaina ai,” na ia saunoa ai.
I se faaipoipoga i le malumalu i se tasi aso, o le mana o feagaiga, ua tuufaatasia ma le Togiola, sa atagia mai i faaata o le malumalu. Sa ia tomanatu i augatupulaga o lona aiga ua falo atu i le faavavau, mai le uluai tagata o lona aiga o First Dragon Gong, na fanau i le TA 837, mai tupulaga e 36 e oo mai i fanau a ana lava fanau ma faasolo ai pea lava i itu e lua.
“Na amata ai foi ona ou malamalama o i ma’ua ma lo’u toalua o ni fanau a o ma’ua matua ma ni matua i la ma’ua fanau, o ni fanau a fanau i o ma’ua matua matutua, ma ni matua matutua i fanau a le ma fanau,” na ia saunoa ai. “O lesona sili o le olaga nei e faifai malie lava ona taliaina e o tatou loto a o tatou aoao mai ma aoao atu i o tatou tiute e faavavau o se tamaitiiti ma se matua, matua ma se tamaitiiti.”
Na avea Elder Gong o se Pulega Aoao talu mai Aperila 2010 ma sa avea o se uso o le Au Peresitene o Fitugafulu talu mai Oketopa 2015. Na lagolagoina o ia o se uso o le Korama a Aposetolo e Toasefululua i le aso 31 Mati, 2018, lea na ia faamatalaina o se “valaauga paia mai le Alii na afua ai ona ou le manava.”
Mai le 2011 e oo atu i le 2015, sa avea Elder Gong ma se uso o le Au Peresitene Eria o Asia, ma sa faaiuina lena auaunaga o le Peresitene o le Eria. Sa faamisiona talai o ia i le Misiona a Taiuani Taipei, sa fautua maualuga, taitai vaega a faitaulaga sili, peresitene o le Aoga Sa o le siteki, faiaoga seminare, epikopo, peresitene o le misiona a le siteki, peresitene o le siteki, ma Fitugafulu Eria.
Na maua e Elder Gong se tikeri o le tagata malaga [BA] i Suesuega Tau Asia ma Suesuega Tau Iunivesite mai le Iunivesite o Polika Iaga i le 1977. I le 1979 sa maua e ia se tikeri o le matuaofaiva i filosofia ma i le 1981 sa maua ai se faailoga o le tofamanino i sootaga faavaomalo mai le Iunivesite o Oxford, lea sa avea ai ma Sikola o Rhodes. I le 1985 sa auauna atu Elder Gong o se fesoasoani faapitoa i le failautusi o le setete o le U.S. State Department, ma i le 1987 sa ia galue o se fesoasoani faapitoa i le amapasa o le I.S. i Beijing, Saina. Na amata i le 1989, sa galue auauna o ia i tofiga i le Nofoaga Tutotonu mo Fuafuaga Faataatitia ma Suesuega Faavaomalo i Uosigitone D.C. Sa fesoasoani o ia i le peresitene mo le fuafuaina ma iloiloga i le Iunivesite o Polika Iaga seia oo ia Aperila 2010.
Sa malaga mai matua matutua o Elder Gong i le Iunaite Setete mai Saina. Sa soifua mai Gerrit W. Gong i le Aai o Redwood, Kalefonia, ISA, i le 1953. Na ia faaipoipo atu ia Susan Lindsay ia Ianuari, 1980, ma o i laua o ni matua o se fanau e toafa ma fanau a fanau e toatolu.
“O mea uma e lelei ma faavavau e faatotonugalemu i le moni o loo soifua le Atua lo tatou Tama e Faavavau ma Lona Alo, o Iesu Keriso, ma Lana Togiola, ua molimauina e le Agaga Paia. Na saunoa ai Elder Gong i lenei konafesi. “Ou te molimau atu ma le migao ma le paia i le Keriso soifua—[Sa] … i ai o Ia faatasi ma i tatou i le amataga, o loo faatasi o Ia ma i tatou e oo i le iuga.”