Elder Juan Pablo Villar
Fitugafulu a le Au Pulega Aoao
O le faafeiloaiga o Elder Juan Pablo Villa i le Ekalesia na oo mai i Santiago, Chile, ina ua faasilasila mai e lona uso matua, o Ivan i le aiga ua uma ona papatiso o ia e aunoa ma se faamaoniga a ona matua ma sa mulimuli ane fai mai, sa ia fuafua e auauna atu i se misiona. Ina ua fesiligia pe aisea, sa faasoa mai e Ivan lana molimau ma lona manao e faamisiona.
“Ou te lei malamalama i le uiga atoa o lena mea,” na toe manatua ai e Elder Villar, i lena taimi ua 17 ona tausaga. “Ae i lena taimi, sa ia tuuina ai se fatu i lo’u loto.”
O lena fatu na tuu atu i ai se avanoa e ola ai ina ua faasino atu o ia e lona uso i faifeautalai. O lana uluai lesona, sa maua ai e Elder Villar lana lava molimau i le moni o le Tusi a Mamona.
“Mo au lava ia, sa le o se mea tatau le tootuli i lalo ma tatalo, aua o le taimi na faasoa mai ai a latou molimau, sa ou iloaina i lo’u loto e moni,” na ia saunoa ai. “Ina ua ou iloa lena mea, o isi mea uma sa tatau lava ona moni.”
O Ivan, a o faamisiona ai i se misiona latalata ane, sa ia maua le faatagaga e papatiso ia Elder Villar i le 1988. Mulimuli ane, sa auai atu foi lona tina ma le isi ona uso o Claudio i le Ekalesia.
Na mavae se tausaga talu ona papatiso o ia, sa amata ai e Elder Villar ona faamisiona i le Misiona a Chile Viria del Mar, na amata ai se soifuaga auauna atu mai lena taimi e aofia ai le avea ma peresitene o le siteki, epikopo, fesoasoani i se au epikopo, fesoasoani i le Misiona a Chile Santiago Sasae, ma le Fitugafulu Eria i le Eria a Amerika Saute i Saute. Sa lagolagoina o ia i le aso 31 Mati, 2018 e avea ma Fitugafulu o le Pulega Aoao.
Sa soifua mai Elder Villar i le aso 11 Setema, 1969 i Valparaiso, Chile, ia Sergio Villar Vera ma Genoveva Saaverdra. Sa faaipoipo o ia ia Carola Cristina Barrios i le aso 31 Mati, 1994, i le Malumalu o Santiago Chile. O i laua o ni matua o se fanau e toatolu.
Ina ua uma ona maua sona tikeri o le tagata malaga [BA] i fesootaiga faaagafesootai ma sootaga lautele ma se tikeri o le matuaofaiva i mea tau maketi, sa faigaluega o ia i kamupani gaosi masini vailaau ma mea faafomai. I le 2007 sa maua ai sona tikeri o le matuaofaiva i le pulega o pisinisi mai le Iunivesite o Polika Iaga. Ona ia toe foi ai lea i Chile ma faigaluega ai mo Oica, o se kamupani eli auro, lea sa avea talu ai nei ma se pule sinia.