Malelega Amata
O le taimi lenei mo se Ekalesia e faatotonugalemu-i-le-aiga ma lagolagoina e mea o loo tutupu i totonu o o tatou fale o paranesi, uarota, ma siteki.
O’u uso e ma tuafafine pele, ua matou tulimatai atu e toe faatasi ma outou i lenei konafesi aoao a le Ekalesia ia Oketopa. Matou te faafeiloai atu ma le fiafia tele ia te outou taitoatasi. Matou te matuai faafetai mo a outou tatalo o loo lagolagoina ai i matou. O loo mafai ona matou lagonaina lo latou aafiaga. Faafetai lava!
Matou te faafetai atu mo a outou taumafaiga maoae e mulimuli i fautuaga na tuuina atu i le konafesi aoao i le ono masina talu ai. Sa saili atu au peresitene o siteki i le lalolagi atoa i faaaliga e talafeagai e toefaatulaga ai korama a toeaina. O alii o na korama faatasi ai ma o tatou tuafafine tuuto o le Aualofa o loo galulue filiga e auauna atu i o tatou uso ma tuafafine i se auala maualuga atu, ma paia atu. Ua uunaia i matou e lo outou lelei ma a outou taumafaiga tulagaese e aumai le alofa o le Faaola i o outou aiga, tuaoi, ma uo ma ia auauna atu ia i latou e pei ona Ia faia.
Talu mai le konafesi ia Aperila, ua ma feiloai atu ma Sister Nelson i tagata o le ekalesia i konetineta e fa ma atumotu o le moana. Mai Ierusalema i Harare, mai Winnipeg i Bangkok, ua ma lagonaina lo outou faatuatua tele ma le malosiaga o a outou molimau.
Ua ma soona olioli i le toatele o a tatou talavou ua auai i le autau a le autalavou a le Alii e fesoasoani e faapotopoto Isaraelu ua faataapeapeina.1 Matou te faafetai atu ia te outou! A faaauau pea ona outou mulimuli i a’u valaaulia na tuu atu i la tatou faigalotu mo le autalavou i le lalolagi atoa, o le a outou faatuina le tagāvai mo le toatele o matou e mulimuli ai. Ma e maeu le eseesega o loo faia e outou le autalavou!
I le tele o tausaga talu ai nei, o loo tauivi ai pea i matou i aufono pulefaamalumalu o le Ekalesia ma se fesili autu: e mafai faapefea ona tatou avatua le talalelei i lona mama faigofie, ma sauniga i lo latou aafiaga e faavavau, i fanau uma a le Atua?
I le avea ai ma tagata o le Au Paia o Aso e Gata Ai, ua tatou masani lava i le manatu o le “lotu” o se mea e tupu i totonu o o tatou falesa, ma e lagolagoina e mea o loo tutupu i le aiga. Ua tatou manaomia se fetuunaiga i lenei mamanu. O le taimi lenei mo se Ekalesia e-faatotonugalemu-i-le-aiga, ma lagolagoina e mea o loo tutupu i totonu o o tatou fale o paranesi, uarota, ma siteki.
A o faaauau pea ona faatupulaia le Ekalesia i le lalolagi atoa, e toatele tagata o le ekalesia o loo nonofo i nofoaga e le o i ai ni a tatou falesa—ma atonu o le a leai pea mo se taimi umi. Ou te manatua se aiga o ē, ona o ia tulaga, sa manaomia ai ona fai sauniga i totonu o lo latou fale. Sa ou fesili i le tina pe o le a sona lagona i le alu ai i le lotu i lona lava fale. Sa tali mai o ia, “Ou te fiafia i ai! Ua faaaoga e lo’u toalua se gagana lelei atu i le aiga i le taimi nei, ma le iloaina o le a ia faamanuiaina le faamanatuga iinei i Aso Sa taitasi.
O le faamoemoega lava o le Ekalesia ua leva ona i ai o le fesoasoani lea i tagata uma ia faateleina lo latou faatuatua i lo tatou Alii o Iesu Keriso ma i Lana Togiola, ina ia fesoasoani ai ia i latou i le osia ma le tausia o a latou feagaiga ma le Atua, ma ia faamalosia ai ma faamauina o latou aiga. I lenei lalolagi faigata i nei aso, ua le faigofie ai lenei mea. Ua faateteleina e le fili ana osofaiga i le faatuatua ma o tatou luga ma o tatou aiga i se saoasaoa matua uigaese. Ina ia sao mai ai faaleagaga, tatou te manaomiaina ni fuafuaga e faatoilalo ai le fili ma ni fuafuaga mamao. Ona o lenei mea, ua matou mananao ai nei ia faatulaga ni fetuunaiga faalefaalapotopotoga ia o le a faamalosia atili ai o tatou tagata ma o latou aiga.
Mo le tele o tausaga, na galulue ai lava taitai o le Ekalesia i se mataupu aoaoina ua tuufaatasia e faamalosia ai aiga ma tagata taitoatasi e ala i se fuafuaga e faatotonugalemu-i-le-aiga ma lagolagoina-e-le-Ekalesia e aoao ai aoaoga faavae, faamalosia ai le faatuatua, ma atiae ai se lototapuai sili atu faaletagata lava ia. O a tatou taumafaiga i nei tausaga ua alu e faapaia le Sapati—ia faia o se aso fiafia ma se faailoga faaletagata lava ia i le Atua o lo tatou alofa mo Ia—o le a faaleleia e fetuunaiga o le a matou faalauiloa atu nei.
I lenei taeao o le a matou faalauiloa atu ai se paleni fou ma le fesootaiga i le va o le aoaoina o le talalelei i totonu o le aiga ma i le Ekalesia. E nafa i tatou taitoatasi ma lo tatou tuputupu ae faaleagaga faaletagata lava ia. Ma ua faamanino mai e tusitusiga paia ua i ai i matua le tiutetauave muamua e aoao atu aoaoga faavae i a latou fanau.2 O le tiutetauave o le Ekalesia o le fesoasoani lea i tagata taitoatasi i le sini faalelagi ua tuuina mai o le faateleina lea o lo latou malamalama faaletalalelei.
O le a faamalamalama atu nei e Elder Quentin L. Cook nei fetuunaiga taua. Ua autasi uma uso o le Aufono a le Au Peresitene Sili ma le Korama a Aposetolo e Toasefululua i le faamaoniaina o lenei savali. Matou te faamamaluina ma le lotofaafetai le musumusuga mai le Alii na faatosinaina le atinaega o fuafuaga ma faiga faavae ia o le a tuuina atu e Elder Cook.
O’u uso e ma tuafafine pele, ou te iloa o loo soifua le Atua! O Iesu o le Keriso! O Lana Ekalesia lenei o loo Ia taitaia e ala i valoaga ma faaaliga i Ana auauna faatauvaa. Ou te molimau atu ai i le suafa o Iesu Keriso, amene.