O Tamaitai ma le Aoaoina o le Talalelei i le Aiga
O le Faaola o lou faataitaiga atoatoa lea o le auala o le a e faia ai se vaega tele i Lana fuafuaga e tuu le faamamafa sili i le aoaoina o le talalelei i totonu o le aiga.
Ou tuafafine pele, e matagofie le faatasi ai ma outou. O se taimi mataina lenei i Le Ekalesia a Iesu Keriso o le Au Paia o Aso e Gata Ai. O loo sasaaina mai e le Alii le malamalama i luga o Lana Ekalesia e pei ona Ia folafola mai o le a Ia faia.
E te manatua Lana fetalaiga: “O le a le umi e mafai ona tumau ai vai e tafe i le eleelea? O le a le mana e taofia ai le lagi? E pei ona lē mafai e le tagata ona faaloaloa atu lona lima faatauvaa e taofi ai le vaitafe o le Misuri i lona ala faatonuina, pe toe liliu ai i tua lona tafe, ua faapena ona lē mafai ona taofia le Malosi Aoao mai le sasaa mai i lalo o le malamalama mai le lagi i luga o ulu o le Au Paia o Aso e Gata Ai.”1
O se vaega o le faasoaina mai e le Alii o le malamalama i le taimi nei e faatatau i le faatelevaveina o Lana sasaa atu i fafo o le upumoni e faavavau i luga o ulu ma i loto o Lona nuu. Ua Ia faamanino mai o afafine o le Tama Faalelagi o le a faia se matafaioi taua i lena faatelevavega faavavega. O se tasi o faamaoniga o le vavega o Lona taitaia lea o Lana perofeta soifua ina ia faamamafa atili atu le aoaoina o le talalelei i totonu o le fale ma i totonu o le aiga.
Atonu e te fesili ifo, “E faapefea ona avea ia tuafafine faamaoni ma se malosiaga autu e fesoasoani i le Alii e sasaa mai le malamalama i luga o Lana Au Paia?” Ua tuuina mai e le Alii le tali i le “O Le Aiga: O Se Folafolaga i le Lalolagi.” E te manatua ia upu, ae atonu o e vaai i se uiga fou ma iloa ai na muai silafiaina e le Alii nei suiga faagaeetiaina, lea o loo tutupu nei. I le folafolaga, na Ia tuuina mai ai i tuafafine le tiute e avea ma faiaoga muamua o le talalelei i le aiga i upu nei: “O le uluai matafaioi a tina o le faafaileleina lea o a latou fanau.”2 E aofia ai ii le faafailele i upumoni o le talalelei ma le malamalama.
Na faaauau le folafolaga: “E ao i tamā ma tina ona fesoasoani le tasi i le isi o se paaga tutusa.”3 O se paaga tutusa i la’ua, e tutusa i o la’ua faamoemoega mo le tuputupu ae faaleagaga ma mo le mauaina o le malamalama, ma o lea ua tuufaatasia ai e fesoasoani le tasi i le isi. E tutusa i la’ua i o la’ua taunuuga paia ina ia faaeaina faatasi. O le mea moni, e le mafai ona faaeaina alii ma tamaitai na o se tagata e toatasi.
Aisea la, ua maua ai e se afafine o le Atua i se sootaga tuufaatasia ma tutusa le tiutetauave muamua e faafailele i niuterani sili ona taua ia e tatau i tagata uma ona maua, o se malamalama o le upumoni e sau mai le lagi? E tusa ai ma lo’u iloaina, o le ala lava lea a le Alii talu mai ona foafoaina aiga i lenei lalolagi.
Mo se faataitaiga, o Eva lea na mauaina le malamalama lea na manaomia e Atamu e ‘ai ai le fua o le laau e iloa ai le lelei ma le leaga ina ia la tausia ai poloaiga uma a le Atua ma foafoaina ai se aiga. Ou te le iloa pe aisea na auala muamua mai ai ia Eva, ae sa tuufaatasia atoatoa Atamu ma Eva i le taimi na sasaa mai ai le malamalama ia Atamu.
O le isi faataitaiga o le faaaogaina e le Alii o meaalofa a tamaitai o le faafaileleina o le ala na Ia faamalosia ai atalii o Helamana. E ese lava o’u lagona pe a ou faitau i le tala ma manatua ai upu filemu o le faamautinoaga a lo’u foi tina ina ua ou tuua le aiga mo le tautua faamiliteli.
Na tusia e Helamana:
“Sa aoaoina i latou e o latou tina, e faapea afai latou te le masalosalo, o le a laveaiina i latou e le Atua.
“Ma sa latou faamatala mai ia te au upu a o latou tinā, fai mai: Matou te le masalosalo lava sa mautinoa lena mea e o matou tinā.”4
E ui ou te le iloa uma mafuaaga a le Alii mo le tuuina atu o le uluai tiutetauave mo le faafaileleina o le aiga i tuafafine faamaoni, ae ou te talitonu e faatatau i lou gafatia e alofa atu. E manaomia ai le alofa sili e lagona ai manaoga o se isi nai lo ou lava manaoga. O le alofa le pona lena o Keriso mo le tagata o loo e faafaileleina. O lena lagona o le alofa mama e sau mai le tagata na filifilia ia avea ma tagata faafailele i le agavaa ai mo aafiaga o le Togiola a Iesu Keriso. O le anavatau a le Aualofa, lea na faataitaia e lo’u lava tina, na foliga mai ia te a’u na musuia: “E Le Uma le Alofa.”
I le avea ai ma afafine o le Atua, ua ia te outou se malosiaga masani ma le maoae e lagona ai manaoga o isi ma alolofa atu ai. O lena mea, o le a sili atu ai ona e gauai atu i musumusuga a le Agaga. Ona mafai lea ona taialaina e le Agaga mea e te mafaufau i ai, mea e te tautala ai, ma mea e te faia e faafailele ai tagata ina ia mafai ai ona sasaa mai e le Alii le malamalama, upumoni, ma le lototoa i luga o i latou.
O outou tuafafine o loo faalogologo mai i lo’u leo ua outou i ai taitoatasi i se nofoaga tulaga ese i la outou faigamalaga i le olaga. O nisi, o teineiti laiti ua i ai i se sauniga aoao mo tamaitai mo le uluai taimi. O nisi, o tamaitai talavou o loo sauniuni e avea ma tagata faafailele o loo finagalo le Atua e avea ai i latou. O nisi, o tamaitai faatoa faaipoipo e lei maua ni fanau; o isi o ni tina talavou e toatasi pe sili atu [ni fanau]. O nisi, o ni tina o ni fanau talavou ma o isi o loo i ai fanau i le misiona. O nisi o loo i ai fanau ua amata ona vaivai i le faatuatua ma ua mamao ese mai le aiga. O nisi o loo nonofo na o i latou ae leai se soa faamaoni. O nisi o ni tinamatutua.
Ae, po o le a lava lou tulaga faaletagata, o oe o se vaega—o se vaega autu—o le aiga o le Atua ma lou lava aiga, pe i le lumanai, i lenei lalolagi, po o le lalolagi o agaga. O lou tiute mai le Atua o le faafaileleina lea o le toatele o Ana fanau ma tagata o lou lava aiga i le mea e te mafaia i lou alofa ma lou faatuatua i le Alii o Iesu Keriso.
O lou luitau masani lava o le iloaina po o ai e faafailele, pe faapefea, ma o afea. E te manaomia le fesoasoani a le Alii. E silafia e Ia loto o isi, ma e Na te silafia le taimi ua saunia ai latou e talia lau faafailelega. O lau tatalo o le faatuatua o le ki lea i lou tulaga manuia. E mafai ona e faalagolago atu i le mauaina o Lana taitaiga.
Na Ia tuuina mai lenei faamalosiauga: “Ole atu i le Tama i lo’u igoa, i le faatuatua ma le talitonu o le a oulua maua, ma o le a oulua maua ai le Agaga Paia, lea na te faaali atu mea uma e tatau mo le fanauga a tagata.”5
E faaopoopo atu i le tatalo, o le suesue faamaoni i tusitusiga paia o le a avea ma vaega o lou mana faatupulaia e faafailele. O le folafolaga lenei: “Pe tou te mafaufau muamua foi po o a tou te fai atu; ae ia teu i o outou mafaufau e lē aunoa afioga o le ola, ma o le a tuu atu ia te outou i lea lava itula le vaega lena o le a fua atu i tagata taitoatasi.”6
O lea la o le a e faaaluina ai le taimi sili atu e tatalo ai, mafaufau loloto ai, ma manatunatu i mea faaleagaga. O le a e maua le malamalama o le upumoni o loo sasaa mai i ou luga ma tuputupu ae i lou mana e faafailele ai isi i totonu o lou aiga.
O le a i ai taimi e te lagona ai le telegese o lou alualu i luma i le aoaoina o auala lelei atu e faafailele ai. O le a manaomia ai le faatuatua e tumau ai. Na auina mai ia te oe e le Faaola lenei faamalosiauga.
“O le mea lea aua le faavaivai i le faia o mea lelei ona o loo oulua faataatiaina le faavae o se galuega tele. Ma o mea iti e tutupu mai ai mea tetele.
“Faauta, e manaomia e le Alii le loto ma le mafaufau malie; ma o e e loto malilie ma usiusitai o le a ʼaia le lelei o le laueleele o Siona i aso nei e gata ai.”7
O lou auai mai i lenei po o se faamaoniga ua e naunau e talia le valaaulia a le Alii e faafailele isi. E moni lena mea e oo lava i le teneitiiti sili ona laitiiti o loo i ai iinei i lenei po. E mafai ona e iloa po o ai e faafaileleina i lou aiga. Afai e te tatalo ma le manatu moni i ai, o le a oo mai i lou mafaufau se igoa po o se foliga. Afai e te tatalo ia iloa le mea e fai po o a tala e fai atu, o le a e lagona se tali. O taimi uma e te usitai ai, o le a tuputupu ae lou mana e faafailele ai. O le a e saunia mo le aso o le a e faafailele ai lau lava ia fanau.
E mafai ona tatalo tina o tupulaga talavou ia iloa le ala e faafailele ai se atalii po o se afafine ua foliga mai ua le ano mai i le faafailelega. Atonu e te tatalo ia iloa po o ai o i ai le faatosinaga faaleagaga e manaomia ma o le a taliaina e lau tama. E faafofoga ma tali mai le Atua i tatalo faamaoni a tina popole, ma e Na te auina mai le fesoasoani.
Ma le isi, atonu o lagonaina e se tinamatua o i ai iinei i lenei po le lototiga na mafua ona o mafatiaga ma faigata o lana fanau ma fanau a fanau. Atonu e te mauaina le lototele ma le taitaiga mai aafiaga o aiga i tusitusiga paia.
Mai le taimi o Eva ma Atamu, e oo atu ia Tama Isaraelu, ma oo atu i aiga uma i le Tusi a Mamona, e tasi lava se lesona mautinoa e uiga i le mea e fai i faanoanoaga a fanau le faamoemoeina: aua le taofia le alofa.
Ua tatou maua le faataitaiga faamalosiau a le Faaola a o Ia faafaileleina fanau agaga fouvale a Lona Tama Faalelagi. E ui lava ina latou ma tatou faatupuina le tiga, ae o loo faaloaloa mai pea le aao o le Faaola.8 Na Ia fetalai mai i le 3 Nifae e uiga i Ona tuafafine ma uso faaleagaga ia na Ia taumafai e faafailele ae sa le’i manuia: “E, outou e tagata … o e o le aiga o Isaraelu, ua faafia ea ona ou faapotopotoina o outou e pei ona ofaofatai mai e se matuamoa lana toloai i lalo o ona apaau, ma tausia outou.”9
Mo tuafafine i tulaga uma o le faigamalaga o le olaga, i tulaga uma faaleaiga, ma aganuu uma, o le Faaola o lou faataitaiga atoatoa lea o le auala o le a e faia ai se vaega tele i Lana fuafuaga e tuu le faamamafa sili i le aoaoina o le talalelei i le fale ma aiga.
O le a e aumaia ou lagona loloto o le alofa mama i suiga i gaoioiga ma faiga masani i totonu o lou aiga. O le a aumaia e lena mea le tuputupu ae sili faaleagaga. Pe a e tatalo faatasi ma [tatalo foi] mo tagata o le aiga, o le a e lagonaina lou alofa ma le alofa o le Faaola mo i latou. O le a avea atili lena mea ma au meaalofa faaleagaga a o e sailiina. O le a lagonaina e tagata o lou aiga a o e tatalo ma se faatuatua tele atu.
Pe a potopoto le aiga e faitau leotele tusitusiga paia, ua uma lava ona e faitauina ma tatalo e uiga i ai e saunia ai oe lava ia. O le a e mauaina ni taimi e tatalo ai mo le Agaga e faamalamalama atu i lou mafaufau. A oo la i lou taimi e faitau ai, o le a lagona e tagata o le aiga lou alofa mo le Atua ma mo Ana afioga. O le a faafaileleina i latou e Ia ma Lona Agaga.
E mafai ona oo mai lena lava sasaa tele i soo se faatasiga faaleaiga pe a e tatalo ma fuafua i ai. Atonu e alu ai se taumafaiga ma le taimi, ae o le a aumaia ai ni vavega. Ou te manatua se lesona na aoao mai e lo’u tina a o ou laiitiiti. E mafai ona ou vaaia pea i lo’u mafaufau le faafanua valivali sa ia faia o faigamalaga a le Aposetolo o Paulo. Ou te ofo pe faapefea ona ia maua le taimi ma le malosi e faia ai lena mea. Ma e oo mai i lenei aso ua faamanuiaina a’u i lona alofa mo lena Aposetolo faamaoni.
O le a maua e outou taitoatasi ni auala e saofagā ai i le sasaaina atu o upumoni i totonu o o outou aiga i le Ekalesia toefuataina a le Alii. O le a taitoatasi outou ma tatalo, suesue, ma mafaufau loloto ia iloa po o le a lou sao tulagaese o le a fai. Ae o le mea lenei ou te iloa: o outou taitoatasi, i le tou amoina faatasi ai ma atalii o le Atua, o le a avea ma se vaega tele o se vavega o le aoaoina o le talalelei ma ola ai lea o le a faanatinatiina ai le faapotopotoina o Isaraelu ma o le a saunia ai le aiga o le Atua mo le toe afio mai ma le mamalu o le Alii o Iesu Keriso. I le suafa paia o Iesu Keriso, amene.