Ho an’ny tanora

Afaka mahita ny fanafahana ianao

friends smiling

Moa ve ianao na ny olona tianao tafalatsaka ao anatin’ny fiverimberenan’ny hoe solafaka, mibebaka, manolo tena indray, dia solafaka indray? Olon-dehibe tanora mahafinaritra maro izay niara-niasa tamiko fony aho evekan’ny paroasin’ny tanora tokan-tena no tafalatsaka ao anatin’izany fiverimberenan-javatra izany. Saingy betsaka ihany koa no nahita fanafahana amin’ny alalan’ny Sorompanavotan’i Jesoa Kristy. Ireo hafatra mikasika ny fiankinan-doha ao amin’ny fizarana ho an’ity volana ity dia manolotra hevi-baovao manampy amin’ny fahitana fanafahana—ho anao sy ho an’ny hafa.

Ny zavatra manan-danja indrindra tokony tsaroantsika dia ny hoe samy zanaka tian’ny Ray any An-danitra avokoa isika rehetra. Nampianatra ny Loholona Dieter F. Uchtdorf fa, “Tsy miandry anao handresy ny fahalemenao sy ireo fahazaran-dratsinao [Andriamanitra] akory vao hoe hitia anao. Tia anao izy androany, amin’ny fahatakarana tanteraka ireo ady atrehanao. … Fantany ny momba ny nenina nanananao noho ireo fotoana izay nahasolafaka anao na tsy nahombiazanao. Kanefa dia mbola tia anao Izy” (“Miaina ny filazantsara amim-pifaliana,” Liahona, nôv. 2014, 123; nampiana fanamafisana).

Etsy ankilany kosa, i Satana dia hiezaka handresy lahatra anao fa tsy afaka hitia anao intsony ny Ray any An-danitra ary tsy afaka hiasa aminao intsony ny hery manova sy manadion’ny Mpamonjy. Hiezaka handetika anao ao anatin’ny tafio-dranon’ny nenina sy ny rikoriko i Satana, fa aza mino ny laingany anefa.

Mitodiha kosa amin’ny Ray any An-danitra. Aza matahotra misokatra amin’ny evekanao na amin’ny filohan’ny sampana misy anao ary ny hafa izay tia anao. Eo am-pamakianao an’ireo tantara feno fanantenana avy amin’ireo olon-dehibe tanora hafa izay voakasiky ny fiankinan-doha, dia mandraisa andraikitra eo anatrehan’ny fahatsapana tonga ao aminao. Manàna faharetana amin’ny tenanao, tsarovy ny toetra araka an’ Andriamanitra misy ao aminao, ary inoy ny hery manasitran’i Jesoa Kristy. Izy ary ireo loharanom-panampiana maro dia maro hafa dia hanampy antsika hahita fahombiazana amin’ny fahitana ny fanafahana iriantsika. Aza milavo lefona na oviana na oviana.

Amim-pitiavana,

Richard Ostler

Hevi-baovao …

Avy amin’ny tanora

amin’ny fandresena fiankinan-doha

“Manàna namana azo iankinana. Lazao ny olona atokisanao na fantatrao fa hanampy anao ny olanao ary mametraha drafitra miaraka aminy amin’ny fandresena ilay olana. Iaraho mijery matetika aminy ny ezaka vita.”

—Kaitlin Chan, Alabama, Etazonia

“Manampy betsaka ny fidirana ao amin’ny Fandaharan’asan’ny Fiangonana miompana amin’ny fanasitranana amin’ny fiankinan-doha! Afaka mahazo fahatokisan-tena isika ao anatin’izany ka hizara ny zavatra niainantsika.”

—Emma Mecham, Idaho Etazonia

“Fifampiresahana, fandraisana andraikitra, ary fitsinjovana ny tena manokana.”

—Tristen Foster, Utah Etazonia

Ataovy izay hahatsapana fa zava-misy eo amin’ny fiainana izany olana izany. Samy olombelona avokoa isika. Ny fifampiresahana mivantana ary ny fanehoana fitiavana dia mahavita lavitra noho ny eritreretinao.”

—Mackenzie Molewyk, Australie Andrefana, Australie

Avy amin’ireo mpitarika ao amin’ny Fiangonana

“Tsarovy lalandava fa afaka mandresy ny fiankinan-doha ianao miaraka amin’ny fanampian’ny Mpamonjy. Mety ho lalana lava sy sarotra izany kanefa tsy hilavo lefona aminao ny Tompo. Tia anao Izy. Niaritra ny Sorompanavotana i Jesoa Kristy mba hanampiana anao hiova, sy hanafahana anao amin’ny fanandevozan’ny fahotana.

“Ny zavatra manan-danja indrindra dia ny manohy miezaka hatrany—indraindray dia mila fanandramana maromaro ny olona mialohan’ny hahitany fahombiazana. Noho izany, aza milavo lefona. Aza manary finoana. Tazony hanakaiky ny Tompo ny fonao, ary Izy no hanome anao ny herin’ny fanafahana. Hanafaka anao Izy.”

Ny Loholona Dieter F. Uchtdorf ao amin’ny Kôlejin’ny Apôstôly Roambinifolo, “Sondrian-tory ve ianareo mandritra ny Famerenana amin’ny laoniny?” Liahona, mey 2014, 61.

Manana traikefa hozaraina mikasika ny zavatra iray nianaranao avy tamin’ny fihaonamben’ny Fiangonana maneran-tany tamin’ity volana ity ve ianao? Alefaso aty aminay ao amin’ny liahona.ChurchofJesusChrist.org mialoha ny 31 ôktôbra 2020 ny valinteninao.

Zarao ny tantaranao

Manana tantara mahavariana hozaraina ve ianao? Na te hahita lahatsoratra momba ana lohahevitra sasantsasany ve ianao? Raha izany no izy dia te haheno anao izahay! Azonao alefa ao amin’ny liahona.ChurchofJesusChrist.org ny lahatsoratrao na ny fanamarihanao.

Jereo ireo lahatsoratra ireo sy ny hafa koa:

• Ao amin’ny liahona.ChurchofJesusChrist.org

• Ao amin’ny Ho an’ny tanora isan-kerinandro (ao amin’ny fizarana “Tanora na manambady na tsia” ao amin’ny Bibliothèque de l’Évangile)