ʻAi Hangatonu
ʻOku fōtunga fēfē ʻa e sino kuo toetuʻú?
Ko e Kolo Taʻengatá, tā ʻe D. Keith Larson.
Fakatatau ki he folofolá mo e kau palōfita ʻo onopōní, ko e ngaahi sino toetuʻú ʻoku:
Fakatuʻasino. ʻOku maʻu ʻe he sino toetuʻú ha kakano mo e hui (vakai, Luke 24:36–39).
Taʻe-faʻa-mate. “ʻE fokotuʻu hake ʻa e sino fakamāmaní ni ko ha sino taʻe-faʻa-mate, … ke ʻoua naʻa nau toe mate” (ʻAlamā 11:45).
Haohaoa. “ʻE toe fakatahaʻi ʻa e sinó pea mo e laumālié ʻi hono anga haohaoá” (ʻAlamā 11:43). “ʻE toʻo atu ʻa e fōtunga taʻe kakató; toʻo atu mo e ngaahi melé, kae maʻu ʻe he kakai tangata mo fafiné ʻa e tuʻunga haohaoa ʻo honau laumālié, ʻi he haohaoa naʻe faʻu ʻaki ʻe he ʻOtuá he kamataʻangá” (Joseph F. Smith, Gospel Doctrine, 5th ed. [1939], 23).
Fakaʻofoʻofa. “ʻOku ʻikai ha meʻa ʻe toe fakaʻofoʻofa ange ke vakai ki ai, ka ko ha tangata pe fefine sino toetuʻu” (The Teachings of Lorenzo Snow, ed. Clyde J. Williams [1996], 99).
Ope atu he mālohi ʻo Sētané. “Kapau ʻe ʻikai toe tuʻu ʻa e kakanó, kuo pau ke moʻulaloa ʻa hotau laumālié ki he … tēvoló, … ke nofo mo e tamai ʻo e ngaahi loí, ʻi he mamahi, ʻo hangē pē ko iá” (2 Nīfai 9:8–9). Ka koeʻuhí kuo ʻomi ʻe Sīsū Kalaisi e toetuʻu hotau sinó, he ʻikai hoko ʻeni.*
Malava ke maʻu ha fiefia kakato. Ka ne ʻikai e toetuʻú, he ʻikai lava ke maʻu e fiefia ʻo e nāunau fakasilesitialé. “Ko e laumālié mo e ʻelemēnití ʻo ka fakatahaʻi, ʻo taʻelava ke toe mavahevahe, ʻoku maʻu ʻe ia hono kakato ʻo e fiefiá” (Tokāteline mo e Ngaahi Fuakava 93:33).