Kakai Lalahi Kei Talavoú
Ko Hono Fakahaaʻi Ho Tuʻunga Totonú
Ko e hā ʻokú ke sio ki ai ʻi hoʻo vakai ki he sioʻatá?
ʻOkú ke fakalau nai e meʻa ʻoku ʻikai ke ke saiʻia ai ʻi ho fōtungá? ʻOkú ke ongoʻi tautea nai koeʻuhi ko hoʻo ngaahi fehalākí pe vaivaí? ʻOkú ke sio ki ha sio fakamamaʻu mai ha fofonga ʻo ha taha ʻokú ne fakaangaʻi koe?
Pe ʻokú ke fakakaukau ko ha fānau koe ʻa e ʻOtuá? ʻOkú ke sio nai ki ha taha ʻokú ne lea ʻaki ha ngaahi meʻa lelei mo fakahaaʻi e houngaʻiá neongo pe ko e hā e tūkungá? ʻOkú ke sio nai ki he fofonga ʻo ha taha ʻoku angaʻofa atu kiate koe?
ʻE lava ke tau ikunaʻi e fakaangaʻi kitá, feinga maʻu pē ke haohaoá, mo e ngaahi ʻulungaanga fakafonua fakatuʻutāmakí, ʻi he mahino pe ko hai moʻoni kitautolú. Te tau lava ʻo taʻofi e tokanga ʻo fuʻu tōtuʻa ki hotau ʻata ʻi he sioʻatá ka tau feinga ke ʻata atu meiate kitautolu e Maama ʻo Kalaisí. ʻI he tatau ko ʻení, te ke lau ai kau ki he fōtunga ʻo e sinó pea maʻu ha mahino lahi ange ki ho mahuʻingá. ʻOku ou vahevahe ha ngaahi fakakaukau ki he fōtunga ʻo e sinó mei he ngaahi moʻoni ʻoku maʻu ʻi he folofolá mo e temipalé (vakai ki he peesi 44). ʻOku fakamatalaʻi ʻe Senitulā Vanesa ʻi ha fakamatala fakaʻilekitulōnika pē, ʻene houngaʻia koeʻuhi ko hono sinó ʻi heʻene foua e halafononga liliu moʻui ʻo e maʻu ʻo ha pēpeé.
ʻI he peesi 48, ʻoku vahevahe ai ʻe Mākisi e talanoa ʻo ʻene ikunaʻi e ngaahi fakakaukau tukuhifo ki hono fōtungá mo e founga te tau lava kotoa ai ʻo ʻilo ʻoku tau “feʻunga lelei pē”—pea ʻi he Fakalelei ʻa Sīsū Kalaisí, te tau lava ʻo ikunaʻi e meʻa kotoa pē.
ʻI heʻetau hoko ko e kau ākonga ʻa Kalaisí, he ʻikai lava ke tau fihia ʻi he ngaahi fakakaukau faʻa liliu ʻo e māmaní kau ki he moʻui leleí mo e fōtungá, pea ʻikai foki totonu ke fuʻu tōtuʻa ʻetau tukupā ke moʻui leleí. Manatuʻi, ʻoku ʻikai fua ho mahuiʻingá ʻi he fuo mo e lahi ʻo ho sinó. ʻOku taʻefakangatangata ho mahuʻingá, pea ʻoku haʻu ia mei he ʻOtuá.
Fakaʻapaʻapa atu,
ʻAsipeni Sitenitā