Fakaava Ho Lotó ki he Laumālie Māʻoniʻoní

Fai ʻe Palesiteni Henry B. Eyring

Tokoni Ua ʻi he Kau Palesitenisī ʻUluakí

ʻĪmisi

Palesiteni Henelī B. ʻAealingi

Toʻo mei he “ʻOku ou Tuku ʻEku Melinó Kiate Kimoutolu,” Liahona, May 2017, 15–18, mo e “Ke ʻIate Kimoutolu ʻa Hono Laumālié,” Liahona, Mē 2018, 86–89.

ʻĪmisi

Open Your Heart to the Holy Ghost

ʻI he teuteu ke mavahe ʻa Sīsū mei Heʻene kau ākongá, naʻá Ne fakahā ange e founga te nau maʻu ai ʻEne melinó:

“Ko e Fakafiemālié, ko e Laumālie Māʻoniʻoní … te ne akoʻi ʻa kimoutolu ʻi he meʻa kotoa pē mo fakamanatuʻi [kiate] kimoutolu ʻi he meʻa kotoa pē, ʻa ia kuó u lea ʻaki kiate kimoutolú.

“ʻOku ou tuku ʻa e melinó kiate kimoutolu, ko ʻeku melinó ʻoku ou foaki kiate kimoutolú. … ʻOua naʻa mou mamahi, pea ʻoua naʻa mou manavahē.”(Sione 14:26–27)

ʻOku pelepelengesi ange hono ongoʻi e Laumālie Māʻoniʻoní ʻi ha meʻa te tau lava ʻo sio pe fanongo ki ai. ʻOku faʻa ongo ia ʻo hangē ko ha meʻa māfana ʻi hotau lotó. ʻOku ou faʻa ongoʻi ia ko ha maama.

ʻI hono papitaiso mo fakamaʻu koe ko ha mēmipa ʻo e Siasí, ʻoku talaatu ʻi ha tāpuaki ke ke “maʻu ʻa e Laumālie Māʻoniʻoní.” ʻI he momeniti ko iá, te ke lava ʻo maʻu ʻiate koe e Laumālie Māʻoniʻoní. Ka ʻe kei fie maʻu pē ke ke fili ke tali Ia ki ho lotó mo ho ʻatamaí.

ʻOku ou lotua te ke fakaava ho lotó ki he Laumālie Māʻoniʻoní. ʻOku ou lotua te ke ongoʻi e fiefia ʻo hono maʻu Ia ko ho takaua maʻu peé.

Tā Valivali e Meʻa ʻi Hono Lotó

ʻOku tokoniʻi kitautolu ʻe he Laumālie Māʻoniʻoní ke tau manatuʻi ha meʻa. Ka fie manatuʻi ʻe Palesiteni ʻAealingi ha meʻa, te ne hiki ia ʻi heʻene tohinoá. Ko e taimi ʻe niʻihi ʻokú ne faʻa tā valivali ha fakatātā ke fakahaaʻi e meʻa ʻokú ne ongoʻí.

ʻUluakí, ʻokú ne tā ʻaki ia ha penivahevahe. Hili iá peá ne tānaki atu ki ai mo ha ngaahi lanu. ʻOkú ne tuku ia ke mōmoa pea toe tānaki atu ha lanu ʻe taha.
ʻOku manako ʻa Palesiteni ʻAealingi ke ne tā valivali e fakatātā ʻo e ʻū vaká mo hono fāmilí. ʻOku ʻasi ʻa Sisitā ʻAealingi ʻi he fakatātā ko ʻení ʻi ha kiʻi vaka ʻi heʻene kei taʻu valú.
Lolotonga e ngāue fakafaifekau ha taha ʻo e makapuna ʻo Palesiteni ʻAealingí ʻi Falaniseé, naʻá ne tā ha ongo faifekau ʻokú na lue he halá ʻi Pālesi.
ʻOku fakamanatu kiate ia ʻe he tā valivali ko ʻeni ʻo hono hoa ko Kefiliní, mo ha toko ua ʻo ʻena fānau ʻe toko onó, ʻa ʻene ʻofa ki hono fāmilí.