Pag-ampo: Ang Yawe sa Pagpamatuod ug sa Pagpahiuli
Ni Elder Robert D. Hales (1932–2017)
Sa Korum sa Napulog Duha ka mga Apostoles
Gikan sa usa ka pakigpulong sa Oktubre 2003 nga kinatibuk-ang komperensya.
Sunda ang ehemplo ni Joseph Smith ug ang sundanan sa Pagpahiuli. Dangup sa mga kasulatan. Luhod aron mag-ampo. Pangayo pinaagi sa hugot nga pagtuo. Paminawa ang Espiritu Santo.
Litrato gikan sa Getty Images
Isip mga lider sa Simbahan, kita sa kasagaran pangutan-on, “Unsaon nako pagdawat og pagpamatuod sa gipahiuli nga ebanghelyo ni Jesukristo?”
Ang pag-angkon og pagpamatuod ug mahimong kinabig magsugod sa pagtuon ug pag-ampo, dayon magpuyo sa ebanghelyo uban sa pailub ug pagpadayon ug magdapit ug mosalig sa Espiritu. Ang kinabuhi ni Joseph Smith ug ang sundanan sa pagpahiuli mao ang pinakamaayong mga ehemplo niini nga proseso. Samtang [ipaambit nako] … [ang] mga panghitabo sa Pagpahiuli, bantayi ang mga paagi nga makaresulta sa pagpamatuod. …
Dakong Kalibug
Si Joseph Smith natawo niadtong Disyembre 23, 1805, sa Sharon, Vermont, USA. Gikan siya sa usa ka pamilya nga nag-ampo ug nagtuon sa Biblia. Sa iyang kabatan-on, interesado siya sa relihiyon ug nakadiskubre og “dakong kalibug” diha sa mga doktrina ni Kristo, uban sa “pari nga nakig batok sa pari, ug kinabig batok sa kinabig” (Joseph Smith—Kasaysayan 1:6).
Kini nga kalibug … nagsugod gatusan ka tuig kaniadto sa unsay gitawag nga Dakong Apostasiya. Ang adlaw ni Kristo “dili moabut,” miingon si Apostol Pablo, “hangtud mahitabo una ang pagsupil” (2 Mga Taga-Tesalonica 2:3).
Pipila ka dekada human sa Pagkabanhaw ni Kristo, ang Iyang mga Apostoles gipamatay, ang Iyang mga pagtulun-an gipang-usab, ug ang priesthood gikuha gikan sa yuta. Apan si Pablo, naglantaw sa atong panahon, nanagna nga “diha sa dispensasyon sa kahingpitan sa mga panahon [ang Dios] mohiusa sa tanang mga butang diha kang Kristo” (Mga Taga-Efeso 1:10). Siya mopahiuli sa tinuod nga Simbahan ni Kristo dinhi sa yuta sa makausa pa. …
Si Joseph Nakakita og Tubag
Si Joseph … , sa nag-edad og 14, nakakita sa iyang kaugalingon nga anaa sa “kagubot sa [relihiyusong] mga opinyon.” Kanunay siyang mangutana sa iyang kaugalingon, “Kon adunay usa [niini nga mga simbahan] nga tinuod, hain niini, ug sa unsa nga paagi ako masayud niini?” (Joseph Smith—Kasaysayan 1:10).
Si Joseph midangup sa Biblia alang sa mga tubag. “Kon aduna man kaninyo’y nakulangan sa kaalam,” mibasa siya sa Epistola ni Santiago, “papangayoa siya sa Dios, nga nagapanghatag ngadto sa tanang mga tawo sa madagayaon gayud, ug walay pagpamoyboy; ug kini igahatag kaniya (Santiago 1:5).
Detalye gikan sa Mga Tinguha sa Akong Kasingkasing II, ni Walter Rane
Misunod sa direksyon ni Santiago, si Joseph miadto sa kakahoyan duol sa ilang panimalay ug nag-ampo. Samtang siya nagtawag sa Dios, “usa ka dako nga gilis sa kahayag … nagpaubos,” labaw sa kahayag sa adlaw sa udtong tutok, ug “duha ka Personahe” mipakita. “Usa kanila misulti … , nagtawag sa [ngalan ni Joseph] ug miingon, nagtudlo ngadto sa lain—Kini mao ang Akong Hinigugmang Anak. Paminaw Kaniya!” (Joseph Smith—Kasaysayan 1:16–17).
Ang Dios Amahan ug ang Iyang Anak, nga si Jesukristo, nakigsulti kang Joseph. Sila mitubag sa iyang pangutana. Sila mitudlo kaniya nga ang tinuod nga Simbahan ni Kristo nawala gikan sa yuta. Si Joseph nakakat-on nga kining mga miyembro sa Dios nga Kapangulohan managlahi nga mga binuhat, Sila nakaila kaniya sa ngalan, ug Sila andam sa pagtubag sa iyang mga pag-ampo. Nabukas ang kalangitan, ang gabii sa apostasiya nahuman na, ug ang kahayag sa ebanghelyo nagsugod sa pagsidlak.
Sama ni Joseph, kadaghanan nato nangita sa kahayag sa kamatuoran. … Sama ni Joseph, kinahanglan kitang mosiksik sa mga kasulatan, mag-ampo, … [mahimong] mapainubsanon, ug [magkat-on] sa pagpakita og hugot nga pagtuo.
Si Moroni ug ang mga Palid nga Bulawan
Sulod sa tulo ka tuig human sa iyang Unang Panan-awon, si Joseph [miingon nga kanunay siyang mibati og pagkawala sa kadasig tungod sa iyang mga kahuyang ug mga kasaypanan]. Apan wala siya mawad-i sa hugot nga pagtuo o makalimot sa gahum sa pag-ampo.
Pagka-Septyembre 21, 1823, sa edad nga 17, [si Joseph] miluhod aron mangayo og “kapasayloan sa tanan [niyang] mga sala” … ug [aron masayud sa iyang] “kahimtang sa atubangan sa [Dios]” (tan-awa sa Joseph Smith—Kasaysayan 1:29). Samtang siya nag-ampo, ang kahayag … mitungha, nagkahayag “hangtud ang kahayag sa sulod sama na sa udtong tutok” (bersikulo 30). Niana nga kahayag adunay nagbarug nga personahe nga nagsul-ob og saput nga “may talagsaon nga kaputi” (bersikulo 31). Gitawag niya si Joseph sa iyang ngalan ug mipaila sa iyang kaugalingon nga si Moroni. Siya miingon “nga ang Dios adunay ipabuhat ni [Joseph]” ug misulti kaniya mahitungod sa usa ka karaang rekord nga “gisulat sa bulawang mga palid,” nga sa dihang gihubad, nahimong ang Basahon ni Mormon. Ang basahon naglangkob og rekord sa kahingpitan sa ebanghelyo. (Tan-awa sa mga bersikulo 33–34.) … Si Joseph gisugo [ngadto] … niana nga rekord, gilubong … [diha sa] duol nga Bungtod … Cumorah.
Pagkasunod adlaw nakit-an ni Joseph ang mga palid, apan ang panahon wala pa moabut nga kuhaon kini. Si Moroni miingon kang Joseph nga makigkita kaniya didto sa samang adlaw matag tuig sulod sa upat ka tuig (tan-awa sa mga bersikulo 52–53). Si Joseph mituman. Matag tuig moadto siya sa bungtod diin si Moroni mohatag kaniya og “mga panudlo” (bersikulo 54) mahitungod sa Pagpahiuli sa Simbahan ni Kristo. …
Si Joseph nakadawat sa mga palid niadtong Septyembre 22, 1827, sa edad nga 21. Siya usab nakadawat sa karaang instrumento alang sa paghubad niini, nga gitawag og Urim ug Thummim. Gamit kining sagrado nga tighubad, inubanan sa Espiritu Santo, si Joseph misugod sa buluhaton sa paghubad. …
Nahitabo ang Pagpahiuli
Sa edad nga 23, si Joseph naghubad sa mga palid sa dihang siya ug [ang iyang tigsulat], si Oliver [Cowdery,] nakaagi sa tudling kabahin sa bunyag alang sa kapasayloan sa mga sala. … Buot sila nga masayud og dugang. Si Joseph nasayud unsa ang buhaton.
Pagka-Mayo 15, 1829, [si Joseph ug si Oliver] miadto sa kakahoyan aron mangutana sa Ginoo. Samtang sila nag-ampo, si Juan Bautista mipakita “diha sa panganod sa kahayag” (Joseph Smith—Kasaysayan 1:68). Siya … ang mibunyag sa Manluluwas dinhi sa yuta, ug naghupot siya sa mga yawe sa priesthood nga gikinahanglan sa pagpahigayon niana nga ordinansa pinaagi sa pagtugot gikan sa Dios.
… Si Juan … mipandong sa iyang mga kamot diha sa [ulo ni Joseph ug dayon sa kang Oliver] ug mitugyan sa Aaronic Priesthood ngadto [sa matag usa] kanila (tan-awa sa D&P 13; Joseph Smith—Kasaysayan 1:68–69). … Sa hinapos sa Mayo o sayo sa Hunyo 1829, ang Melchizedek, o mas taas, nga Priesthood gitugyan ngadto ni Joseph ug Oliver pinaagi nila ni Apostoles Pedro, Santiago, ug Juan.
Pagpahiuli sa Melchizedek Priesthood, ni Walter Rane
Ang paghubad sa Basahon ni Mormon nahuman usab nianang pagka-Hunyo, ug ang basahon gimantala niadtong Marso 26, 1830. … Paglabay sa pipila ka mga adlaw, pagka-Abril 6, ang Simbahan pormal nga giorganisar. … Sama sa gipanagna ni Pablo, ang karaan nga Simbahan ni Kristo sa makausa pa gi-establisar dinhi sa yuta.
Apan ang buhat sa Pagpahiuli wala pa mahuman. … [Ang Templo sa Kirtland, ang pinakaunang templo nga natukod niini nga dispensasyon,] gipahinungod … pagka-Marso 27, 1836. Usa ka semana human niadto, pagka-Abril 3, usa ka miting gihimo didto. Human sa solemne ug hilum nga pag-ampo, … ang Ginoong Jesukristo [mipakita kang Joseph ug Oliver.] … Sila si Moises, Elias, ug Elijah mipakita usab didto [sa Templo sa Kirtland] ug [mihatag sa mga yawe sa priesthood] ngadto ni Joseph (tan-awa sa D&P 110).
Detalye gikan sa Si Jesukristo Mipakita ngadto ni Propeta Joseph Smith ug ni Oliver Cowdery, ni Walter Rane
Usa ka Sundanan nga Atong Sundon
Mga kaigsoonan, makita ba nato ang sundanan? Matag dakong hitabo sa Pagpahiuli—ang Unang Panan-awon, ang pagpakita ni Moroni ug ang pagtungha sa Basahon ni Mormon, ang pagpahiuli sa priesthood, ug ang pagpakita ni Jesukristo [diha sa] Iyang balaan nga templo—giunhan og pag-ampo. …
[Sa makadaghan] akong gibati ang dili ikalimud nga pagsaksi sa Espiritu sa Dios, sama sa kalayo nga nagdilaab sa akong kasingkasing, nga ang gipahiuli nga ebanghelyo tinuod. … [Kon wala ka masayud niining mga butanga sa imong kaugalingon] mosugyot ko sa pagdawat sa imbitasyon nga gihatag ni Moroni diha sa Basahon ni Mormon: “Ug kon kamo makadawat niini nga mga butang, ako moawhag kaninyo nga kamo mangutana sa Dios, ang Amahan sa Kahangturan, sa ngalan ni Kristo, kon kini nga mga butang dili ba tinuod; ug kon kamo mangutana sa kinasingkasing, uban sa tinuod nga katuyoan, nga may hugot nga pagtuo kang Kristo, siya mopakita sa kamatuoran niini nganha kaninyo, pinaagi sa gahum sa Espiritu Santo. Ug pinaagi sa gahum sa Espiritu Santo kamo mahimo nga masayud sa kamatuoran sa tanan nga mga butang” (Moroni 10:4–5). …
… Sunda ang ehemplo ni Joseph Smith ug ang sundanan sa Pagpahiuli. Dangup sa mga kasulatan. Luhod aron mag-ampo. Pangayo pinaagi sa hugot nga pagtuo. Paminaw sa Espiritu Santo. … Ug sa ngalan ni Jesukristo, mosaad ako, “Kon kamo … mangayo [sa Langitnong Amahan] pinaagi sa hugot nga pagtuo, motuo nga kamo makadawat, uban sa kakugi sa paghupot sa mga sugo [sa Ginoo], sa pagkatinuod kini nga mga butang ipahibalo nganha kaninyo” (1 Nephi 15:11).