Atong Ipaambit ang Atong Kasayuran sa usa ka Manluluwas
Ni Elder Gary E. Stevenson
Sa Korum sa Napulog Duha ka mga Apostoles
Gikan sa usa ka pakigpulong sa Komperensya sa mga Babaye sa Brigham Young University, “The Knowledge of a Savior [Ang Kasayuran sa usa ka Manluluwas],” nga gihatag niadtong Mayo 5, 2017.
Ang atong mensahe mao ang mensahe sa kalinaw, ug kamo ang mga mensahero nga mosangyaw niini. Mahimo ninyo kini pinaagi sa bag-o ug makapahinam nga mga pamaagi sa teknolohiya.
Litrato gikan sa Getty Images; Imahe ni Kristo, ni Heinrich Hofmann
Kita ang Simbahan ni Jesukristo, nga giestablisar sa ulahing mga adlaw. Sa samang paagi nga gisugo sa Ginoo ang Iyang mga disipulo sa karaang panahon, gisangunan kita sa ulahing mga adlaw nga “panglakaw kamo sa tibuok kalibutan, ug iwali ninyo ang ebanghelyo ngadto sa tibuok nga kabuhatan” (Marcos 16:15).
Ang karaang propeta nga si Nephi daklit nga mi-summarize niini nga misyon ug mensahe ug sa katuyoan luyo niini: “Kami naghisgot kang Kristo, kami nalipay diha kang Kristo, kami nagsangyaw kang Kristo, kami nanagna kang Kristo, ug kami nagsulat sumala sa among mga panagna, nga ang among mga anak mahimo nga masayud sa unsa nga tinubdan sila mahimo nga mangita alang sa kapasayloan sa ilang mga sala” (2 Nephi 25:26).
Diha sa basahon ni Mosiah, atong mabasa kon giunsa sa karaang propeta sa Basahon ni Mormon nga si Haring Benjamin sa pagpundok sa iyang katawhan sa tibuok yuta diha sa dapit sa templo, mipatukod og usa ka tore, ug mitudlo kanila. Samtang nagtudlo siya kanila, nanagna usab siya ngadto kanila mahitungod sa atong panahon: “Ug dugang pa, ako moingon nganha kaninyo, nga ang panahon moabut diin ang kasayuran sa usa ka Manluluwas mokaylap sa matag nasud, kaliwat, pinulongan, ug mga katawhan” (Mosiah 3:20).
“Ang Kasayuran sa usa ka Manluluwas”
Usa sa labing bililhon nga mga gasa nga atong ipakabahandi diha sa atong mga pamilya ug ikahatag ngadto sa uban mao “ang kasayuran sa usa ka Manluluwas,” o ni Jesukristo.
Uban sa pag-abli sa dispensasyon sa kahingpitan sa panahon miabut ang kalamdagan sa tanang katawhan ug daghan kaayong kalamboan sa teknolohiya. Nagdala kini og industriyanhong kauswagan ug mga himan sa komunikasyon, nga nagtugot nga matuman ang mga panagna ni Haring Benjamin.
Isip sakop sa Korum sa Napulog Duha ka mga Apostoles, gitawag isip talagsaon nga saksi “sa ngalan ni Kristo sa tibuok kalibutan” (D&P 107:23) nga adunay piho nga mga buluhaton sa Public Affairs ug Communication Services Committee, makahimo ko sa pagtutok sa katumanan niini nga panagna—nga “ang kasayuran sa usa ka Manluluwas” mapakatap sa tibuok kalibutan—gamit ang pinakabag-o nga mga teknolohiya nga anaa kanato.
“Sa Matag Nasud, Kaliwat, Pinulongan, ug mga Katawhan”
Sumala sa kasaysayan, ang mga kalamboan sa pag-imprinta ug ang pag-imbento sa radyo ug TV nakapahimo sa mensahe sa Pagpahiuli nga moabut sa tibuok kalibutan. Makakita kita og daghang mga ehemplo niini, diin ang uban anaa sa atong panumduman.
Sulod sa 10 ka tuig human sa Unang Panan-awon, ug sa bulan una pa maorganisar ang Simbahan, 5,000 ka mga kopya sa Basahon ni Mormon ang gimantala. Sukad niadto, sobra sa 175 ka milyon nga kopya ang naimprinta.
Sa bisan unsa nga Dominggo sa buntag, makahimo kamo sa pagpaminaw o pagtan-aw sa sibya sa Musika ug ang Gipamulong nga Pulong, nga hapit na moabut sa ika-5,000 nga sibya niini. Ang unang sibya nahitabo diha sa radyo niadtong 1929. Ang unang sibya sa kinatibuk-ang komperensya diha sa TV nahitabo niadtong 1949.
Makapainteres, niadtong 1966, si Presidente David O. McKay (1873–1970) misugod sa pagpamulong sa mga butang nga moabut: “Ang mga nadiskubrihan nga adunay ingon ka gamhanang potensyal, mahimong alang sa pagpanalangin o sa kalaglagan sa katawhan, nga nakapahimo sa responsibilidad sa tawo sa pagkontrolar niini nga maoy labing dakong responsibilidad nga gisangon sa tawhanong mga kamot sukad. … Kini nga panahon puno sa walay kinutubang kakuyaw, ingon man usab sa dili maihap nga mga posibilidad.”1
Niadtong 1974, si Presidente Spencer W. Kimball (1895–1985) mihulagway sa iyang panan-awon sa usa ka adlaw nga moabut: “Ang Ginoo mipanalangin sa kalibutan og daghan nga … mga satellite. Gipahimutang kini ibabaw sa kalangitan, nagpadala og mga signal sa sibya balik ngadto sa hapit tanang dapit sa yuta. … Siguradong kini nga mga satellite sinugdanan pa lamang sa unsay anaa sa umaabut sa tibuok kalibutan nga pagsibya. … Nagtuo ko nga ang Ginoo mahinamong mohatag nato sa mga imbensyon nga kita nga kasarangan nga mga tawo dili gani makahanduraw.”2
Uban sa teknolohikanhong paglambo sa komunikasyon ug media karon nga daling nagsunod sa paglambo ang internet, daw nasaksihan na nato sa atong kinabuhi ang literal nga katumanan sa mga panagna ni Haring Benjamin, Presidente McKay, ug Presidente Kimball.
Adunay klaro usab nga sundanan sa paggamit niini nga mga teknolohiya sa pagtukod sa gingharian sa Ginoo dinhi sa yuta. Gusto nakong mopaambit og mga ehemplo niini kaninyo.
LDS.org ug Mormon.org
Niadtong 1996, opisyal nga gisugdan sa Simbahan ang paggamit sa web [internet] isip pamaagi sa pagmensahe ug komunikasyon. Sukad niadto, gibana-bana nga 260 ka mga website nga gipasiugdahan sa Simbahan ang gisugdan, lakip ang mga website nga anaa sa hapit tanang nasud nga gipuy-an sa mga miyembro sa Simbahan, sa ilang lokal nga pinulongan.
Mopaambit ko og duha ka pamilyar nga mga ehemplo niini nga mga website. Una mao ang LDS.org, giestablisar niadtong 1996, nga karon magdawatan og sobra sa 24 ka milyon ka bag-ong mga bisita sa usa ka tuig ug sagad sobra sa 1 ka milyon ka bisita matag semana. Daghang mga miyembro ang mangita dinhi sa kurikulum alang sa pagtudlo ug sa nangaging mga pakigpulong sa kinatibuk-ang komperensya. Ang ikaduha mao ang Mormon.org, usa ka website nga gidesinyo aron mapaila ang ebanghelyo ngadto sa atong mga silingan ug mga higala nga dili mga miyembro sa Simbahan. Kini nga site magdawatan og sobra sa 16 ka milyon ka managlahing bisita sa usa ka tuig.
Mobile Apps
Imahe gikan sa Getty Images
Siyempre, ang mga teknolohiya paspas kaayo nga mausab, nga nagkinahanglan og dakong paningkamot ug mga kapanguhaan aron makaapas. Uban sa pagkaimbento sa mga smartphone miabut ang gahum sa paggamit ug pag-access sa daghan kaayong impormasyon gamit ang madala-dala nga device. Kadaghanan niini nga mga impormasyon gihan-ay pinaagi sa mga mobile application, o “apps.” Ang unang app nga gipasiugdahan sa Simbahan gipagawas niadtong 2007.
Daghan ang mga ehemplo sa atong mapuslanong paggamit sa mga mobile apps aron mapakatap ang atong “kasayuran sa usa ka Manluluwas.” Dili nako ihulagway ang sulod sa daghang mga apps nga sayon ra kaayo ninyong magamit, apan aniay pipila ka mga ehemplo sa mga apps nga tingali pamilyar na kaninyo:
-
Gospel Library
-
Mormon Channel
-
LDS Tools
-
LDS Music
-
Family Tree
Gigamit kini sa minilyon ka higayon matag semana sa minilyon ka mga tiggamit.
Social Media
Base sa kahulugan niini, ang social media mao ang mga teknolohiya nga ikontrolar pinaagi sa computer nga nagtugot sa mga indibidwal ug mga organisasyon sa pagtan-aw, paghimo, ug pagpaambit og impormasyon, mga ideya, ug uban pang matang sa ekspresyon pinaagi sa internet nga mga komunidad ug mga network.
Sugod niadtong 2010, ang Simbahan misugod sa seryusong paggamit sa social media aron sa pagtuman nga mapakaylap “ang kasayuran sa usa ka Manluluwas.” Paspas kaayo kini ug kusganon nga digital nga matang sa komunikasyon. Hapit walay makatandi niini sa kapaspas sa kausaban.
Usa ka maobserbahan nga kinaiya sa social media mao nga sa higayon nga ang usa ka tawo masuheto o makomportable na sa usa ka plataporma, adunay motumaw nga mas bag-o, mas dako, o makita nga mas nindot o mas maayo.
Akong ihulagway sa daklit ang lima ka mga plataporma sa social media nga gigamit sa Simbahan isip mga paagi sa komunikasyon:
1. Ang Facebook adunay kapin sa 2 ka bilyon ka mga tiggamit sa tibuok kalibutan. Dinhi, ang mga tiggamit mohimo og ilang kaugalingong social network sa online nga mga higala.
2. Ang Instagram mao ang usa ka social site nga nakasentro sa mga litrato ug mga video.
3. Ang Pinterest daw sama og bulletin board sa internet. Dinhi ang biswal nga mga imahe nga gitawag og “pin” ipapilit diha sa board. Mahimo kining makadasig nga mga pulong o mapaninguhaon nga mga imahe sa litrato.
4. Ang Twitter mao ang usa ka social network nga nagtugot sa mga tiggamit sa pagpadala ug pagbasa og mugbo nga tag-280 ka titik nga mga mensahe nga gitawag og mga “tweet.”
5. Ang Snapchat nagpakita og mga litrato ug mugbo nga mga video nga mawala lang dayon o sa sulod sa 24 ka oras.
Isip usa ka institusyon, gigamit nato kini nga social media nga mga site sa gamhanang paagi.
Tingali makahinumdom mo sa makadasig nga mensahe sa komperensya mahitungod sa depresyon nga gihatag ni Elder Jeffrey R. Holland sa Korum sa Napulog Duha ka mga Apostoles pipila ka tuig na ang milabay.3 Gikan sa iyang pakigpulong, usa ka mubo nga video ang gihimo nga nakadawat og sobra sa duha ka milyon ka mga view [pagtan-aw] sa Facebook lamang, uban sa liboan ka mga like, share, ug positibo nga mga komentaryo.4
Niadtong Agosto 2016, si Presidente Dieter F. Uchtdorf mi-post og video sa Instagram, nga nagtudlo sa mga baruganan sa ebanghelyo ngadto sa iyang apo nga si Erik diha—makatag-an mo—sa cockpit sa eroplano!5 Ang post sa Instagram ni Presidente Uchtdorf nakalingaw sa liboan, ug nakakuha kini og daghang positibo nga mga komentaryo.
Ang Simbahan mimantala usab sa Instagram account niini niadtong Nobyembre 2017 og usa ka video ni Elder Dallin H. Oaks ug Elder M. Russell Ballard sa pagtubag sa usa ka pangutana sa young adult nga babaye kabahin sa mga babaye nga magserbisyo og mga mission. Kini nga post gitan-aw sa halos 112,000 ka higayon.
Diha sa Pinterest, ang usa ka tawo makakita og gatusan ka mga pin gikan sa LDS.org ug mas daghan pa gikan sa indibidwal nga mga miyembro, nga nagdasig sa uban.
Sama pananglit, daghan ang nagpaambit sa mga pulong sa mga propeta—kaniadto ug karon. Usa ka pin sa usa sa mga pagtulun-an ni Presidente Thomas S. Monson mabasa, “Daghan kaayong butang sa kinabuhi nag-agad sa atong kinaiya.”6
Usa ka tweet nga gipaambit ni Elder David A. Bednar sa Korum sa Napulog Duha ka mga Apostoles sa miaging tuig sa buntag sa Pasko sa Pagkabanhaw gitan-aw og 210,000 ka higayon. Si Elder Bednar mipakita nga ang usa ka mubo, yano nga mensahe, “Wala na Siya dinhi: kay Siya nabanhaw” (Mateo 28:6), mahimong adunay lawom ug mahangturong epekto.
Snapchat
Sa katapusan, ang mga litrato ug mga pulong nga nagpaambit sa usa sa mga Mensahe sa Unang Kapangulohan ni Presidente Monson bag-o lang nga nakita sa Snapchat.
Konektado nga mga Risgo
Karon, human nako madayeg ang mga hiyas niining bag-o nga mga teknolohiya ug mapakita ang tukma nga paggamit niini, nagtuo ko nga mapuslanon usab ang paghisgot sa pipila ka mga risgo nga konektado niini.
Kinahanglang makabantay kita sa panahon nga magahin diha sa social media o sa paggamit sa mga mobile apps. Ang paggamit sa social media nagdala usab sa risgo nga maminosan ang inter-aksyon nga mag-atubangay, nga tingali makapugong sa paglambo sa sosyal nga mga kahanas sa kadaghanan sa atong kabatan-onan.
Ang mga peligro sa dili angay nga sulod kinahanglang hatagan og gibug-aton. Adunay nagkadako nga epidemya sa pagkaadik sa pornograpiya diha sa katilingban, nga negatibong nakaapekto ug nakabiktima bisan sa mga miyembro sa Simbahan ug mga pamilya.
Sa katapusan, mohatag ko og duha ka dugang nga nagkauban nga mga risgo, nga makaapekto sa hapit tanan, lakip sa young women ug sa liboan ka milenyal nga mga inahan ug mga asawa. Akong ngalanan kining duha ka mga risgo isip “gimithi nga reyalidad” ug “makadaut nga mga pagtandi.” Nagtuo ko nga ang labing maayong paagi sa paghulagway niining duha ka mga risgo mao ang paghatag og pipila ka mga ehemplo.
Sa kinatibuk-ang pagkasulti, ang mga litrato nga ma-post sa social media malagmit nga naghulagway sa kinabuhi diha sa labing maayo ug kasagaran gani sa dili katuohan nga paagi. Kasagaran kining puno sa nindot nga mga litrato sa dekorasyon sa panimalay, nindot nga mga dapit bakasyunan, ug maayong pagkahikay nga mga pagkaon. Ang peligro, siyempre, mao nga daghang mga tawo ang mawad-an sa kadasig nga daw dili sila sama ka maayo niining gimithi nga reyalidad diha sa internet.
Nadasig sa usa ka post sa Pinterest mahitungod sa usa ka “pancake” nga birthday cake, ang akong pag-umangkong babaye bag-o lang mi-post sa iyang pagsulay og himo niini. Imbis nga tugutan kining makahimo og wala kinahanglanang pagpamugos, nakahukom siya nga modasig sa uban pinaagi sa pag-post sa iyang “Pinterest fail [pakyas sa Pinterest]” (tan-awa ang litrato sa pancake).
Unta, makakat-on kita sa pagkaplag og daghang kahimuot ug makasinati og minos nga pagkawalay kadasig kon mag-atubang og mga hulagway nga nagpakita og gimithi nga reyalidad ug nga sa kasagaran mosangput ngadto sa makaluya nga mga pagtandi.
Kini tataw nga dili lang usa ka timailhan sa atong panahon apan, mosukod sa mga pulong gikan ni Pablo, sa mga panahon usab nga nangagi: “Apan sila nga nagapakigsukdanay … ug nagatandiay sa ilang masigkaugalingon, sila walay kabuot” (2 Mga Taga-Corinto 10:12).
Si Elder J. Devn Cornish sa Seventy bag-ohay lang usab nga mihatag og tukma sa panahon nga tambag: “Gipaantus nato ang atong kaugalingon pinaagi sa walay pulos nga pakigkompetensya ug pagtandi. Sayop natong gihukman ang bili sa atong kaugalingon pinaagi sa mga butang nga atong gibuhat o wala buhata ug pinaagi sa mga opinyon sa uban. Kon kinahanglan kitang motandi, atong itandi kon unsa kita kaniadto ngadto sa unsa kita karon—ug gani kon unsay gusto natong mamahimo sa umaabut.”7
Tuguti ko nga mopaambit og usa sa mga sekreto sa among pamilya, nga makita niining litrato sa pamilya (tan-awa sa sunod nga pahina) nga gikuha pipila ka tuig na ang milabay, sa wala pa mosikat ang social media. Kon gikuha pa kini karon, malagmit nga gi-post kini, nga nagpresentar og pamilya sa upat ka matahum, nagkatakdo ang kolor sa mga sinina, buotang mga anak nga lalaki nga nalingaw nga magpahulagway isip pamilya. Gusto ba kamong masayud sa tinuod nga istorya?
Makahinumdom gihapon ko sa tawag sa telepono gikan sa akong asawa. “Gary, asa ka? Naa mi diri sa outdoor studio sa litratista. Andam na mi nga magpahulagway. Dili gayud sayon nga masininaan ang mga bata, matarung, ug maandam. Duol na ka diri?”
Na, nakalimot ko ug wala pa kabiya sa opisina! Naulahi ko og tunga sa oras, ug dili maayo ang mga panghitabo sa wala pa ko moabut, nga hapit na magkagubot.
Unsay nahitabo? Na, ang akong kinamagulangang anak nagdagan-dagan sa nataran ug nakakita og kahoyng mansanas, namupo og pipila ka mansanas, ug misugod sa paglabay niini ngadto sa laing mga bata. Naigo niya sa mansanas ang among ikatulong anak nga lalaki diha sa likod ug natumba kini, ug busa misugod kini sa paghilak.
Samtang nahitabo kana, ang akong ikaduhang anak nga lalaki milingkod ug misaka og gamay ang sidsid sa iyang karsones. Ang ubang mga bata nakakita nga puti nga pangdula ang iyang mga medyas, dili ang pangsimba nga medyas nga giandam sa iyang mama nga ipasul-ob niya. Nangutana si Lesa niya, “Nganong wala man nimo gisul-ob ang imong pangsimba nga mga medyas?”
Miingon siya, “Na, dili ko ato ganahan. Katol man to.”
Ug samtang nakigsulti siya kaniya, ang among dos anyos nga anak nga lalaki nagdagan-dagan sa nataran, napandol, natumba, ug nagkadugo ang iyang ilong. Karon natuloan og dugo ang iyang puti nga turtleneck nga shirt, ug namansahan na kini. Maoy pagtunga nako. Ang bugtong paagi aron masalbar ang litrato mao ang pagbali sa turtleneck ug isul-ob kini nga pinabali, aron dili makita sa camera ang mantsa nga dugo.
Ang nahitabo pa, samtang nagdagan-dagan ang among kamagulangang anak ug nanglabay og mga mansanas, nadagma siya ug nakakuha og dakong mansa sa sagbut sa iyang tuhod. Busa, diha sa litrato, ang iyang bukton gituyo og butang nga motabon sa mansa sa sagbut.
Alang sa among ikatulong anak, mihulat kami og 20 minutos aron dili na pula ang iyang mga mata tungod sa paghilak.
Ug, siyempre, ang mga mansa sa dugo anaa na sa luyo sa sinina sa among kamanghurang anak nga lalaki.
Karon, ang kamot sa among ikaduhang anak gituyo og butang aron motabon sa iyang puti nga pangdula nga mga medyas aron motakdo ang tanan.
Alang nako, aw, si Gary magkaproblema sa asawa tungod kay ang akong pagkaulahi og abut ang hinungdan niining tanan.
Busa, kon makakita mo niining matahum nga litrato sa among pamilya ug maguol, “Nganong dili man namo matarung ang tanan ug mamahimong daw hingpit nga pamilya sama sa ilaha?” nasayud na kamo unsay tinuod!
Social Media ug Misyonaryo nga Buhat
Imahe gikan sa Getty Images
Sama sa inyong nakita, kinahanglang magmatngon kita sa mga kakuyaw ug peligro, lakip ang gimithi nga reyalidad ug makadaut nga mga pagtandi. Ang kalibutan sa kasagaran dili gayud sama kanindot sa atong makita niini diha sa social media. Bisan pa niana, adunay daghang kaayohan nga naabut ug moabut pa pinaagi niini nga mga plataporma sa komunikasyon.
Ang Missionary Department naghatag og pipila ka bag-o nga instruksyon sa 2017 kabahin sa praktikal nga mga paagi nga mahimong gamiton ang social media sa misyonaryo nga buhat. Ang daghang digital nga mga kapanguhaan nga anaa alang kanato mahimong gamiton sa gamhanan, sayon, yano, ug hilabihan ka epektibo nga mga paagi.
Adunay daghan kaayong kapuslanan ang paggamit sa teknolohiya sa angay ug dinasig nga mga paagi. Kinahanglang atong buhaton ang tanan natong mahimo aron sa pagtudlo sa matarung nga paggamit sa teknolohiya ngadto sa nagtubo nga henerasyon ug sa pagpasidaan ug pagpugong sa dili matarung nga paggamit ingon man sa kalabut nga mga peligro. Makatabang kini sa pagsiguro kanato nga ang mga benepisyo sa teknolohiya molabaw pa kay sa kalabut nga mga risgo.
“Pagkatahum sa mga Mensahero”
Sa panahon nga ako namalandong ug nag-ampo og maayo alang niini nga mensahe, nakamata ko og sayo usa ka buntag nga naghunahuna sa usa ka kanta ug sa yanong mga pulong niini: “Pagkatahum sa mga mensahero nga nagsangyaw kanato sa ebanghelyo sa kalinaw.”8
Ang atong mensahe mao ang mensahe sa kalinaw, ug kamo ang matahum nga mga mensahero nga mosangyaw niini. Mahimo ninyo kini pinaagi niining bag-o ug makapahinam nga mga pamaagi sa teknolohiya. Nagpuyo kita sa talagsaon nga kalibutan sa kahingpitan sa panahon nga adunay abilidad sa pagsangyaw sa ebanghelyo sa kalinaw diha gayud sa tumoy sa atong mga tudlo.
Aduna kitay propetikanhong mga pulong sa karaang mga propeta, nga hingpit nga naghulagway sa atong panahon ug naghatag og direksyon alang sa atong adlaw: “Ug dugang pa, ako moingon nganha kaninyo, nga ang panahon moabut diin ang kasayuran sa usa ka Manluluwas mokaylap sa matag nasud, kaliwat, pinulongan, ug mga katawhan” (Mosiah 3:20).
Aduna usab kitay mga pulong nga moabut kanato pinaagi sa modernong pagpadayag, nagsulti ug naghatag og giya alang sa atong panahon ug mga kahimtang. Akong kutloon si Elder Bednar: “Ako nagtuo nga ang panahon miabut alang nato isip mga disipulo ni Kristo sa paggamit niining dinasig nga mga himan sa husto ug mas epektibo nga paagi sa pagpamatuod sa Dios ang Mahangturong Amahan, Iyang plano sa kalipay alang sa Iyang mga anak, ug sa Iyang Anak, nga si Jesukristo, isip Manluluwas sa kalibutan; sa pagsangyaw sa kamatuoran sa Pagpahiuli sa ebanghelyo sa ulahing mga adlaw; ug sa pagtuman sa buhat sa Ginoo.”9
Akong dapiton ang matag usa kaninyo nga hingpit nga ikonsiderar ang inyong tahas sa pagsangyaw sa ebanghelyo sa kalinaw isip matahum nga mga mensahero. Atong himoon sa matag usa kanato ang atong parte sa pagpaambit sa “kasayuran sa usa ka Manluluwas” ngadto sa matag nasud, kaliwat, pinulongan, ug katawhan. Ang labing maayong paagi sa pagbuhat niini mao ang tinagsa nga lakang ug sa talagsaon nga paagi nga labing mosalir alang kaninyo ug sa inyong pamilya. Hinaut nga ang matag usa kaninyo makabaton og kaisug aron mo-blog, mo-pin, mo-share, mo-post, mo-tweet, mo-snap ug mo-swipe sa paagi nga mohimaya, mopasidungog, ug motahud sa kabubut-on sa atong mahigugmaong Langitnong Amahan ug modala og kasayuran sa Manluluwas ngadto sa inyong pamilya, mga minahal, ug mga higala—lakip ang inyong mga higala sa social media.