Usa ka Talagsaon nga Leksyon
Ni Elder Valeri V. Cordón
Sa Seventy
“Buksan ko kaninyo ang mga tamboanan sa langit, ug buboan ko kamo sa panalangin” (Malaquias 3:10).
Sa dihang nagdako ko sa Guatemala, ang akong pamilya nanag-iya og pabrika nga mohimo og mga uniporme sa mga sports team.
Ang akong papa gusto sa mga bata sa among pamilya nga makat-on sa pagtrabaho og maayo. Mitabang kami niya diha sa pabrika. Permi kong maapil sa gubot sa gamay pa ko. Daw kanunay kong makaguba og mga butang! Apan sa pagdako na nako, ako ang gipaatiman sa akong papa sa makinang gansilyohan.
Bayaran mi ni papa sa trabaho nga among nabuhat. Dayon mangutana siya, “Unsa may imong buhaton sa imong kwarta?” Nasayud ko kon unsa ang saktong tubag, “Mobayad sa ikapulo ug magtigom para sa akong misyon.”
Sa dihang mga 13 anyos ko, naalkanse og dako ang among negosyo. Kinahanglan namong ibaligya ang daghan sa among mga makina. Imbis nga adunay duha ka gatus ka trabahante, wala na lang gani sila kaabut og lima. Nagtrabaho sila diha sa among garahian sa balay.
Kanunay ko nga mobayad sa akong ikapulo, apan wala gayud nako masabti kon unsa kini ka importante. Dayon nakakat-on ko og talagsaon nga leksyon. Usa ka Sabado sa buntag akong nadunggan ang akong mga ginikanan nga hinay nga nag-istorya. Gisultihan sa akong papa si mama nga igo ra ang kwarta aron ibayad sa ikapulo o ipalit og pagkaon. Walay igong kwarta alang sa duha. Nabalaka kaayo ko. Unsa man ang buhaton sa akong papa?
Pagka-Dominggo akong nakita ang akong papa nga mitunol og sobre ngadto sa among branch president. Gipili niya nga mobayad sa ikapulo! Nalipay ko nga iyang gibuhat, apan nabalaka pud ko. Unsa man ang among kaunon?
Pagkasunod buntag dunay mga tawo nga nanuktok sa among pultahan. Gisultihan nila si papa nga nagkinahanglan sila og uniporme diha-diha dayon. Kasagaran ang mga tawo mobayad namo kon mahuman na ang order. Apan kining mga tawhana mibayad sa akong papa nianang adlawa, bisan wala pa namo matahi ang mga uniporme!
Sa usa ka tapos sa semana, nakakat-on ko og usa ka matahum nga leksyon nga gihinumduman nako sa tibuok nakong kinabuhi. Ang balaod sa ikapulo motabang kanato sa pagpalambo sa atong pagtuo ug pagpakita sa atong pasalamat ngadto sa Langitnong Amahan. Ang pagbayad sa ikapulo usa ka panalangin!