Mga Pangutana ug mga Tubag
“Kon mobati ko nga daw nawad-an ko sa pagtuo, unsay akong mabuhat aron mahibalik kini?”
Dangup sa mga Kasulatan
Kon maglisud ko nga mobati sa Espiritu, makatabang kanako nga modangup sa mga kasulatan ug motan-aw sa hugot nga pagtuo nga gibatunan sa tanan. Makahatag kini kanako og pagtuo. Tingali mubo ra kaayo ang imong mga pag-ampo. Paningkamuti nga mahimo kining mas kinasingkasing ug ang Langitnong Amahan motabang kanimo nga mahibalik ang imong pagtuo.
Chris B., edad 14, Oregon, USA
Amumaha ang Liso sa Pagtuo
Nasayud ko nga maka-ampo ko sa Amahan ug makahangyo Kaniya sa pagtabang kanako nga maalima ang gidak-on sa pagtuo nga ako nang napalambo. Kinahanglang buhaton nako ang gikinahanglan nga mga butang sa pag-amuma niini, sama sa pagbasa sa mga kasulatan, pagtinguha og espiritwal nga mga kasinatian, pag-ihap sa akong mga panalangin, ug pagpangayo og tabang gikan sa akong pamilya. Nianang paagiha, ang akong pagtuo makasugod na usab sa pagtubo. Dili kini mahitabo diha-diha dayon—usa kini ka proseso nga magkinahanglan og panahon. Kinahanglan kong magbaton og pailub ug pagsalig sa Ginoo.
Elías B., edad 18, Mendoza, Argentina
Magtinabangay sa Pagsulbad
Sa dihang gibati nako nga daw nawad-an ko sa akong pagtuo, nakig-istorya ko sa akong mama ug papa, ug gitabangan namo kini sa pagsulbad. Usahay manganta mi og makadasig nga mga kanta pagkahuman aron among mabati ang Espiritu.
Emmalie C., edad 15, Colorado, USA
Pangutan-a ang Imong Ginikanan
Agig dugang sa direkta nga pag-ampo ngadto sa Langitnong Amahan, makapangutana kita sa atong mga ginikanan unsaon nato pagbalik ngadto Kaniya ug mahibalik ang atong pagtuo.
Elías S., edad 12, Paysandú, Uruguay
Pag-ampo, Pakig-istorya, ug Pagbasa
Isip usa ka tawo nga mikunhod ang pagtuo, dihay tulo ka butang nga akong gihimo aron maulian. Una, nag-ampo ko. Ang pag-ampo alang sa kalig-on ug aron masayud unsay akong buhaton misalir og maayo. Ikaduha, gisultihan nako ang suod nga mga higala, ug nakatabang sila og maayo kanako sa dihang nanginahanglan ko niini. Ikatulo, mibasa ko sa mga kasulatan. Daghan niini adunay kalabutan sa pagtuo ug makatabang kanato nga mahibalik kini.
Jack J., edad 14, Florida, USA